Read Ntcham Genèse 48 Bible Online

Genèse 48 - Ntcham bible

Genèse 48

¹Míǹ boonee ní bi tùkū Jooseefi yii: «A-baa būǹ.» Ní u yōoǹ u-jipɔmbi liitil, Manasee nì Eefiraayiim, ki búntì.

²Ní bi tùkū Jaakɔb yii: «A-jipɔɔn Jooseefi dɔ́miń kí màntì a-pu.» Ní Jaakɔb pɔ́ɔǹ u-ba ki nyīī ki yíkìi kāl̀ u-dooŋu pu.

³U kāl̀ee ní ki bí Jooseefi yii: «Unimbɔti Mpɔŋkɔdaan nìn nyántì u-ba ki dàkā-mi Luusi, Kanaan tiŋkin ní ki bīiǹ m-boon.

⁴U bí-mi yii: <M làá yàntī á màal̀ kí bùtī. Sii pu ní m làá dī kí náań anibul kupaau. M làá dū kitiŋ nee kí tīī a-naantiibi án nīn sá bi-tiŋki kí nīn cá jaanjaan.>

⁵A-jipɔmbi bili bin a màl̄ Eejipiti tiŋkin ki wāatì ní man nín dɔ́miń a-ceeyee làá nīn sá man jipɔmbi ní. Eefiraayiim nì Manasee làá nīn sá man jipɔmbi kii Rubeen nì Simeeyɔn nín sá m-jipɔmbi puee ní.

⁶Ama mbiyaamu mun a làá dāá màal̀ bi-boonee, a-yɔmu dāa yá. Bi-mambi Eefiraayiim nì Manasee timmu poon ní bi mun dāa fòol̄ bi-fakal.

⁷M nìn nyánní Padan-Aram ki kùnní ki tóobiń Eefiraata, Kanaan tiŋkin ní a-na Raseel kpíì nsanni m-nimbiin ní m síb́-u nsan caŋin niin. Eefiraata tiŋki gbanti ní bi gíti yíì Beetileem[110].» -

⁸Jaakɔb nín ká Jooseefi jipɔmbee ní u bālifì yii: «Bilab sɔ̀ ní?» -

⁹Ní Jooseefi kíí-u yii: «M-jipɔmbi bin Unimbɔti pú-mi Eejipiti tiŋkin dooyee dee.» Ní u-baa bí-u yii: «Cáań-bi m-cee doo ḿ mèè kí bìin̄ bi-pu.»

¹⁰Jaakɔb nìn púĺ, u-nimbiliŋ kaa nìn gíti wāĺ tiŋan. Ní Jooseefi sútì u-jipɔmbi ki kɔ́ĺ Jaakɔb, ní u cúú-bi ki nákáǹ u-ba ki kpàl̄-bi.

¹¹Ní Jaakɔb bí Jooseefi yii: «Maa pée dākafì yii m bí kí gíti ká-si ŋwindal. Ama ní Unimbɔti yāntì m tin ká ki kpáaǹ a-biyaamu gba.»

¹²Niinee Jooseefi cúú u-jipɔmbi ki nyántìń u-baa taaŋi kansikin[111], ní ki gbāaǹ u-baa nimbiin.

¹³Boonee ní Jooseefi cúú u-jipɔmbi liitilee, ki ŋúb́ Eefiraayiim ŋŋaŋgiil an dàkà yii Jaakɔb ŋaŋgan pú, ní ki ŋúb́ Manasee ŋŋaŋgan, an dàkà yii Jaakɔb ŋaŋgiil pú, ní ki sútì-bi ki pìl̄ bi-naanja.

¹⁴Ama ní Jaakɔb tāntì u-ŋaŋgiil ki páaǹ Eefiraayiim un sá kiwaai ki yú u-ŋaŋgan púee yil pu, ní ki tāntì u-ŋaŋgan ki páaǹ Manasee un yú u-ŋaŋgiil púee yil pu. U pée nyí ní ki kpántì iŋal míǹ, di sá yii Manasee di sá ukpil.

¹⁵Ní u mēē ki bīiǹ Jooseefi pu ki lī yii: «Unimbɔti un m-naanja Abraam nì m-baa Isaaki nóóyee, Unimbɔti un ŋúb́-mi doooo bi nín màl̄-mi ki dāa sāā díǹ neeyee,

¹⁶Unimbɔti tuuŋŋu ŋun nyántì-mi tin kɔkɔ kaa ŋān̄ee poonee, ń bìin̄ mbiyaamu nee boon. Bi-puee m-yindi nì m-naanja Abraam yindi nì m-baa Isaaki yindi ń nīn bí ki cá. Bí màal̀ kí bùtī kí gbí kitiŋ kɔkɔ.»

¹⁷Jooseefi nín ká yii u-baa ŋaŋgiil pá Eefiraayiim yil puee, an kaa mɔ́ɔkiǹ-u. Ní u mākaǹ kí cúú u-baa ŋal kí páatí Eefiraayiim yil pu kí bàà dūú páań Manasee yil pu.

¹⁸Ní Jooseefi bí u-baa yii: «Aayee m-baa, an kaa sá míǹ. Unee di sá ukpil, dū a-ŋaŋgiil kí páań úǹ yil pu.»

¹⁹Ama ní u-baa yíì ní ki bí-u yii: «M nyí, m-jipɔɔn, m nyí. Manasee nibooliŋu mun làá dāá kpántí dinikitikpaandi ní. Ama nì míǹ kɔkɔee, u-naal làá dāá nīn sá ukpaan ki jítiǹ-u ní u-nibooliŋu làá dāá kpántí atimbun kupaau nib.»

²⁰Yaadal wiiŋŋu ní u mēē ki bīiǹ bi-pu ki lī yii: «Nimbi yiŋŋi ní Isirayeel yab làá dāá nīn yíì ki mèé ki bìintí binib pu yii: <Unimbɔti ń bìin̄ a-boon kii u nín nìn bīiǹ Eefiraayiim nì Manasee boon puee.>» Míǹ ní Jaakɔb dū Eefiraayiim ki līntì Manasee nyɔkɔpu.

²¹Ní Jaakɔb bí Jooseefi yii: «Kpèè m làá kpú ní nee! Ama Unimbɔti làá nīn bí ni-cee, ki làá fàtīí cáá-ni kí gíiǹ ni-naanjab tiŋkin.

²²M làá dū Siikeem tiŋki kí kūtì-si a-jandi ń nīn wīikí ki jítiǹ a-mambi jaŋŋi. Man m-ba di dū m-tàataajiki nì m-tɔbu ki jáń ki fōō kitiŋ gbanti Amɔɔr yab ŋaan.»