Read Ntcham Genèse 49 Bible Online

Genèse 49 - Ntcham bible

Genèse 49

¹Jaakɔb yíiń u-jipɔmbi ní ki bí-bi yii: «Ní kpāfìmaan m-cee ḿ tùkù-ni tin làá fu bàń-ni fool boonee.

²Jaakɔb jipɔmbi, ní dāá kpāfìmaan kí pīlifì! Ní dāá pīlifì man ni-baa Isirayeel.

³Sii Rubeen, m-jipɔŋkpiliu, sii di dàkā m-ninjati, sii ní m péé ki màl̄ m-fatikuu nín dáá tùm̀ee. A cáá tinyool nì mpɔn ki jítiǹ a-naalib kɔkɔ.

⁴A pɔ̄ɔ̄ kii nnyinjilee, aa làá nīn gíti cáá ujipɔŋkpil nyooti. Di sá yii a dōoǹ nì man a-baa nimpuu ki kɔ́ǹ m-dooŋu tijɔkɔndi[112].

⁵«Simeeyɔn nì Leefii sá kuyuu nì ku-bukul ní, bi kpáfì kinyɔkɔ ki ŋá tipɔmbɔti.

⁶Maa kútì bi-nyɔɔpeeŋu poon, bi-kpāfitam kaa fáatì-mi. Di sá yii bi gíí diŋuul ki pɔ̄fì binib[113], bi ŋá inimbinaakulim ki gāatì ki kūū inajaa.

⁷M ŋá bi-ŋuul fám, kun puee bi dū-dì ki ŋá tipɔmbɔti. M ŋá bi-búm fám, kun puee bi dū-mì ki ŋá inimbinaakulim. M làá yàkatī-bi kí tɔ̄ Jaakɔb niboolii kansikin. M làá yàntī bí yàl̄ kí kɔ́ Isirayeel tiŋki kɔkɔn.

⁸«Juuda, a-nabiyaamu làá dāá nyɔ̄ŋkì-si, a làá dāá pɔ̄ɔkiǹ a-nannanliibi sɔ́kɔ sɔkɔ. A-nabiyaamu làá dāá gbàan̄ a-nimbiin.

⁹M-jipɔɔn Juuda, a sá digbikintipɔmbil din nyáń njim ki fātìi gítìńee ní. Gbikinti yaa gítìń ki dōoǹee, ŋma di ŋūǹ kí ŋá-u mpɔn ú yīkì[114].

¹⁰Sii Juuda ŋaan ní dibeel làá nīn pée bí, a-dicaŋkun ní mpɔn làá nīn bí, kí nīn cí un baasii yì dibeelee ń bàń. Úǹ ní atimbun kɔkɔ làá dāá nīn tɔ́.

¹¹U dāa dù u-maŋki kí gbìn̄ fiinyi subu, fiinyi supanjal pu ní u dāa dù u-mambiki kí kúĺ. Ndamam poon ní u dāa fíntí u-bɔkutil, fiinyi damam poon ní u dāa fíntí u-bɔkutikpaandi.

¹²U-nimbiliŋ dāa máǹ kii ndamamee, ní u-nyiŋŋi dāa pīiǹ kii nnaabiimee.

¹³«Sabulɔn dāa kóò tiŋku gbandi ní. Niin ní meelab dāa yūlifí. U-tiŋki dāa wāā kí tin sāā Siidɔn.

¹⁴«Isakaar sá kimaŋ kin yáàyee ní, kì dɔ̄ awaŋgul ali kansikin[115].

¹⁵U ká yii laakin u dɔ̄ ki ŋùŋfēe ŋān̄, ní kitiŋ mun kítì. U dū u-ba ki tīī kí túń awaŋgul, ki sīntiǹ u-ba kí tɔ̄ uyumbu tundi.

¹⁶«Daani làá dāá jī dibeel u-samaau pu kii Isirayeel naakɔti kɔkɔ poon an nín bí puee.

¹⁷Daani sá ukoobu un dɔ̄ didandi puee, kii ukoowaati un dɔ̄ nsannee. Ukoobu júntí utaamu tagbíŋŋi, ní utanjakal ń lítí tiwantampin.

¹⁸«M-Dindaan, a-fiil pu ní m máká.

¹⁹«Gaadi nannanliibi làá dāá cíliń u-pu, ama úǹ di làá dāá lábití kí jà-bi.

²⁰Aseer tiŋki làá dāá lòoǹ tijimmɔntiil, tijin tin kítì bibɔtiibi ń jēe.

²¹«Neefitalii sá upeeman un tɔ́ u-bee, u màal̀ mbinyanyaammu.

²²«Jooseefi sá busubu bun lòoǹ tikpilee ní, bu yú nnyimbul caŋin, ní bu-pandi fɔ̄kɔǹ ki lībitì digundi.

²³U-nannanliibi táká-u. Bi kā u-pu kàti kati ki tòó-u ipiin,

²⁴ama ní u ŋúb́ u-tɔbu an píkí, u-ŋal tèen̄ ki yáb̀. Jaakɔb Nimbɔtiu un sá Mpɔŋkɔdaan ki kpàá Isirayeel, ki sá u-taŋkpanaakookuee di tútúǹ-u.

²⁵Man a-baa Nimbɔtiu un tútúǹ-see puee, Unimbɔti Mpɔŋkɔdaan un bīī a-boonee puee, á fōō tiŋan tin sá utaa ki nyēeń yilpuee, kí fōō tiŋan tin sá nnyim ki bí taapuee, kí fōō tiŋan tin sá binib nì tiwaŋkuti maabutiŋuee.

²⁶Dibiindi din m fōō m-baabi ceeyee, dibiindee jítiǹ din nyēeń ajoon ŋin pée bí jaanjaanee pu, ki jítiǹ cannaaku gbantammu pu. Sii Jooseefi ń fōō dibiindi gbanti, dí nīn bí sii un Unimbɔti lēē a-nabiyaamu kansikinee pu.

²⁷Beenjameen sá sinsiŋku un tɔ̀ntī tinanee ní. Kutaafaauee u cútí upeel ní kí ŋmɔ́ ní kujoouee ú dū tinan tin kíǹee kí yàkatī.

²⁸«Bíǹ gbanti kɔkɔ di kpáfì ki sá Isirayeel naakɔti saalaa nì tilee. Tibɔjoolkaal tin bi-baa nìn sòon̄ nì bi ŋyunti ŋun u nìn bīiǹ bi-puee dee. U nìn tīī báà ŋma nì u-biindi nín sá puee.»

²⁹Jaakɔb kpáafì u-jipɔmbi yii: «Kɔŋkɔnnee, m làá kpì kí cùú ŋàl̄ m-baabi. M yaa búntèe, ní síb́-mi m-baabi kaakul din sá ntaŋkpalɔkɔ ki bí ueetija Eefrɔn saakunee.

³⁰Ntaŋkpalɔkɔ gbanti bí Makipeela ki pìlīǹ Mamiree timbiliiki kin bí Kanaan tiŋkinee. M-naanja Abraam di nìn dá kusaau gbanti Eefrɔn cee án nīn sá-u kuceeu[116].

³¹Niin ní bi síb́ u nì u-nimpuu Saara, ní ki síb́ m-baa Isaaki nì u-nimpuu Reebeeka. Niin ní ma mun síb́ m-nimpuu Leeya.

³²Eeti yab cee ní u nìn dá kusaauee nì ntaŋkpalɔkɔ gbanti.»

³³Jaakɔb nín kpáafì u-jipɔmbi míǹ ki dóòyee ní ki fātìi dōoǹ, ki dáaĺ u-ba ki sīntì ki nín cá u-naanjab cee ditaŋkpiilin[117].