Read Ntcham Genèse 50 Bible Online

Genèse 50 - Ntcham bible

Genèse 50

¹Jooseefi baa Jaakɔb dáaĺ u-ba ki sīntèe ní Jooseefi ŋàan̄ ki cìb̄-u ní ki súń ki yáliŋkì.

²Boonee ní u tùkū u-tɔntɔnliibi bin sá dɔkɔtabee yii bí bɔ́ntí u-baa ú taa sūū. Dɔkɔtabee nìn bɔ́ntì Jaakɔb wunti.

³Bi nìn dū iwiin imuŋku ili ní ki bɔ́ntì Jaakɔb ki ŋmītì u-wunti ikpafi ú taa sūū. Iwiin in nyɔkɔm bi nìn dù kí bɔ́ntí utaŋkpiil ú taa sūūyee dee. Eejipiti yab nìn dū iwiin imuŋku ita nì saalaa ki súń Jaakɔb kpool.

⁴Bi súń Jaakɔb kpool an jítèe ní Jooseefi bí bikpilib bin bí ki pìlīǹ Faarooyee yii: «M gbāam̀-ni, ní dàkà-mi tiniti kí tùkù Faaroo yii:

⁵<Kí wàatī m-baa ń kpúee, u nìn yāntì m pūtì ki pōoǹ-u yii u yaa kpíìyee, ḿ cáá-u kí síb́ Kanaan tiŋkin, dikaakul din u bɔ́ntì ki yóoǹ u-bee poon. An puee, pɔ̄-mi nsan ḿ cùú síb́ m-baa kí fàtīí gítiń[118].>»

⁶Faaroo gbìl̄ mimmee ní ki bí Jooseefi yii: «Nín̄ cá kí síb́ a-baa kii u nín yāntì a pūtì ki pōoǹ-u puee.»

⁷Niinee ní Jooseefi búntì kí cùú síb́ u-baa. Faaroo tɔntɔŋkpilib kɔkɔ nì u-kpambaliŋ nì Eejipiti tindaŋkpilib kɔkɔ nìn céeǹ-u.

⁸Jooseefi dicaŋkun yab kɔkɔ nì u-nabiyaamu nì u-baa dicaŋkun yab kɔkɔ nìn cūtì. Bi-biyaamu nì bi-waŋkuti baba di nìn pée kíǹ Gooseen tiŋkin.

⁹Binib biba mun nìn kā tɔrɔkub ní biba mun kā itaamu ki céeǹ Jooseefi, ní bin nìn céeǹ-uee dūu ŋá dinikitikpaŋkpaandi.

¹⁰Bi bàn̄ Ataadi naapaal din bí Jɔɔdan buŋgbandi lapu puee, ní ki kāl̀ niin ki súń Jaakɔb kpool tiŋan pu, ki gāā dituweel. Iwiin iluli ní Jooseefi dūu kāl̀ u-baa kpool niin.

¹¹Kanaan yab bin nìn kóò niinee nín ká bi súń Jaakɔb kpool Ataadi naapaal pu miŋyee, ní bi bí yii: «Dikpool nee sá dikpɔkpaandi ní Eejipiti yab cee.» An pu ní bi pú dinaapaal din bí Jɔɔdan buŋgbandi lapu puee yii Abeel Miisirayiim, taapu di sá yii: <Eejipiti yab kpool>.

¹²Jaakɔb jipɔmbi nìn ŋá kii bi-baa nín nìn kpáafì-bi puee.

¹³Bi yōoǹ-u ki cūnnì Kanaan tiŋkin ki síb́ dikaakul din sá ntaŋkpalɔkɔ ki bí Makipeela saakunee. Abraam di nìn dá kusaau gbanti Eefrɔn, ueetija cee Mamiree timbiliiki caŋin ki dūu ŋá kuceeu[119].

¹⁴Jooseefi síb́ u-baa ki dóòyee ní ki fātìi nín gítí Eejipiti, u nì u-nabiyaamu nì bin kɔkɔ céeǹ-u u cūtìi síb́ u-baayee.

¹⁵Jooseefi nabiyaamu nín ká yii bi-baa kpíìyee ní bi bíi lì tɔb cee yii: «Mimmee Jooseefi yaa dū-ti ki ŋá u-poon ní ki làá téeǹ-ti ikpiti in kɔkɔ ti nìn ŋá-uee fáà!»

¹⁶Ní bi tú bí tùkù Jooseefi yii: «Kí wàatī a-baa ń kpúee, dinyɔɔbunjoolkaal din u nìn lēe sèé:

¹⁷<Ní tùkù Jooseefi yii m gbāam̀-u, ú dū u-nabiyaamu nín yīntiǹ-u puee nì bi nín ŋá-u ikpiti in kɔkɔee kí pɔ̄-bi.> Míǹ puee dū timbi bin nóó Unimbɔti un a-baa nìn nóóyee kpitii kí pɔ̄-ti.» Bi nín tùkū Jooseefi an bɔtee ní u bíi sūǹ.

¹⁸Niinee ní u-nabiyaamu mu-ba dɔ́miń ki lítì u-taaŋi taapu ní ki bí-u yii: «Ti sɔ̀, dū-ti kí kpántí a-yumbui.»

¹⁹Ní Jooseefi bí-bi yii: «Taa fàŋkìmaan! M ŋūǹ kí fōō Unimbɔti paaŋŋuɔɔ?

²⁰Ni bàà nìn dākafì kí ŋá-mi tikpitil ní, ama ní Unimbɔti dūu kpántì tiŋan kí ŋmā kí fīī dinibukpaandi kii an nín bíi jītí pu díǹ ni wāĺ nee ní.

²¹An puee taa fàŋkìmaan. M làá nīn kpèé ni nì ni-dicaŋŋi tiŋan.» Míǹ ní u nìn sòon̄ nì bi dinyɔɔbummɔɔndi ki sɔ̄ŋkì bi-pɔbil.

²²Jooseefi nì u-baa dicaŋkun yab nìn gbíntì ki kóò Eejipiti tiŋkin. Jooseefi nìn ŋá abin dilaataal nì saalaa ní ki nín kpíì.

²³Jooseefi ká u-jipɔɔn Eefiraayiim biyaamu áli anaantitɔntɔkɔ ata, ní ki ká u-naantiiu Makiir, Manasee jipɔɔn biyaamu mun.

²⁴Bi bí míǹ dalbee ní Jooseefi tùkū u-nabiyaamu yii: «Man làá kpú ní nee, ama Unimbɔti làá dāá pée tūtuǹ-ni. U làá dāá nyāntí-ni kitiŋ nee poon kí cáá-ni kí cùnnì kitiŋ kin u nìn pūtì ki pōoǹ yii u làá tīī Abraam nì Isaaki nì Jaakɔbee.»

²⁵Ní Jooseefi yāntì Isirayeel yab pūtì ki pōoǹ-u, ní u lī-bi yii: «Unimbɔti làá dāá pée tūtuǹ-ni ní. Ní dāá kpáaǹ m-kpabiŋ kí nyā kitiŋ nee poon[120].»

²⁶Jooseefi ŋá abin dilaataal nì saalaa ní ki nín kpíì. Bi nìn bɔ́ntì-u ki ŋmītì u-wunti ikpafi ú taa sūū, ní ki dū-u ki ŋá dakaa poon ki síiǹ Eejipiti tiŋkin niin.