Read Ntcham Genèse 6 Bible Online

Genèse 6 - Ntcham bible

Genèse 6

¹Binib nìn kíĺ ki bíi bùtī kitiŋ pu, ní ki màl̄ mbinimpubiyaamu.

²Unimbɔti jipɔmbi[19] ká yii binifoobi sapɔmbi ŋān̄ee ní bi lēekì bi-kansikin bin fáatiǹ-bee ki cáá.

³Ní ti-Dindaan bí yii: «Maa làá yàntī kufoou kun m ŋá unilinee ń nīn bí u-ni ki cá jaanjaan. Kun puee u sá tiwun ní ki bí iwɔfin. Waa làá yúntí kí jītí abin dilaataal nì mmuŋku pu.»

⁴Tinikpaandi nìn bí kitiŋ pu ŋyunti ŋun Unimbɔti jipɔmbi dɔ́miń ki cáá binifoobi sapɔmbi ki màl̄ mbiyaamuee. Míǹ boonee bi nìn gbíntì ki bí[20]. Bíǹ di nìn sá bijanjaliibi bin nìn nyáń diyindi cannaakuee.

⁵Ti-Dindaan nìn ká yii binib kpitii mɔ̀tīi wīintí kitiŋ pu. Baabadalee tibɔkpitil ŋma di nìn gbí bi-pɔbiliŋ poon bi dàkafī.

⁶Ní an wùn̄ ti-Dindaan ki kɔ́-u kunimbaau u nín náań unil kitiŋ puee.

⁷Ní ti-Dindaan bí yii: «See m kúntì binib bin m náańee kitiŋ pu. M làá kúntí-bi kí kpáaǹ tiwaŋkuti nì tin kɔkɔ fù ti-biŋŋi puee nì inoon kɔkɔ, kun puee an wùn̄-mi m nín náań-bee pu.»

⁸Ama Noowa baba di nìn fáatì ti-Dindaan[21].

⁹Noowa nì u-biyaamu bɔti sɔ̀. Noowa nìn sá unimɔnti ní ki bí deedee u-yuntiŋu nib kansikin. U nìn nóó Unimbɔti mmɔntiim.

¹⁰U nìn màl̄ mbininjabiyaamu muta. Bi-yiŋŋi di sá Seem nì Kaam nì Jaafeeti[22].

¹¹Kitiŋ nìn bíil̀ Unimbɔti nimbiin. Tipɔmbɔti ní binib nìn kíǹ ki dàkà tikɔkɔ poon.

¹²Unimbɔti nìn ká yii ikpiti jíń kitiŋ, di sá yii binib nìn dū bi-ba ki líì nì tikpitil.

¹³Ní Unimbɔti bí Noowa yii: «M làá kúntí binib kɔkɔ, kun puee bi yāntì tipɔmbɔti jíń kitiŋ kɔkɔ. M làá céetí-bi kitiŋ pu.

¹⁴Á dū busubu bun bi yíì goofeeree dɔi kí kpáá meela, kí pìtī poon adiin kí bɔ̀ntī poon nì boon aŋɔ.

¹⁵Á kpáá-bu mpúun ń nīn cáá meetab dilaataal nì imuŋku ili nì saalaa, ŋwaan ń nīn cáá meetab mmuŋku nì biŋmoo, ŋfɔkɔn ń nīn sá meetab saalku.

¹⁶A yaa ŋée, á kpáá kí bìin̄ yilpu, ní kí yàntī mbùń dimeetajandi ń nīn bí a nín kpáá ki bīiǹ puee nì meela guŋŋi kansikin, ní kí gíí kipunyɔkɔ dijandi diba pú, ní kí pìtī meela poon aditɔntɔkɔ ata.

¹⁷Man làá yàntī utaa ń nì, ní nnyiŋgbeen ń kúntí tin kɔkɔ pée cáá kufoou ki bí kitiŋ puee, tin kɔkɔ bí kitiŋ puee làá céetí.

¹⁸Ama m làá pòon̄ sii dipoondi. A làá dāá kɔ́ meelan, sii nì a-nimpuu nì a-jipɔmbi nì a-coopoobi.

¹⁹Á dāá lēē tin kɔkɔ cáá kufoouee, kubuluu kamaa uja nì usal kí kɔ́ǹ meelan sii nì bi ń ŋmátí.

²⁰Á dāá lēē unoon kamaa buluku uja nì usal, nì kuwaŋkuluu kamaa buluku uja nì usal, nì kun kamaa pée fù kitiŋ puee buluku uja nì usal, bi-kɔkɔ ń dāá dāan̄ a-cee kí ŋmátí.

²¹Á dāá nyàab̀ tin kɔkɔ pée sá tijinee mun kí kpāafì án dāá nīn sá sii nì tin kɔkɔ bí a-ceeyee jinti.»

²²Ní Noowa lafun ŋá kii Unimbɔti nín bí yii ú ŋá puee deedee[23].