Read Ntcham Genèse 7 Bible Online

Genèse 7 - Ntcham bible

Genèse 7

¹Noowa kpáá meela ki dóòyee ní ti-Dindaan bí-u yii: «Á kɔ́ meelan, sii nì a-dicaŋku kɔkɔ, kun puee a-yuntiŋu nib nee kansikinee, sii ní m ká yii a bí deedee.

²Á kɔ́ǹ tiwaŋkuti tin kɔkɔ ŋān̄ bí dūú ŋá saraayee tiluli tiluli, ijaa nì isal, ní kí kɔ́ǹ tin kaa ŋān̄ bí dūú ŋá saraayee tili tili, uja nì usal.

³Á kɔ́ǹ inoon kɔkɔ mun míǹ, ijaa iluli isal iluli, kí ŋmā kí kpāafì i-boolii kitiŋ pu.

⁴Di sá yii, an kíǹ iwiin iluli dee, m làá yàntī utaa ń nì kitiŋ pu, ŋwiimpu nì kunyeeu, iwiin imuŋku ili kí céetí tin m náań tì bí kitiŋ puee kɔkɔ.»

⁵Ní Noowa ŋá kii ti-Dindaan nín bí yii ú ŋá miŋyee.

⁶Noowa nìn cáá abin alaataa aluu ní utaa nìn̄ ní nnyiŋgbeen dɔ́miń kitiŋ pu.

⁷Ŋyunti gbantee Noowa nì u-nimpuu nì u-jipɔmbi nì u-coopoobi kɔ́ meelan, nnyiŋgbeen ń taa yòon̄-bi[24].

⁸Tiwaŋkuti tin ŋān̄ bí dūú ŋá saraayee nì tin kaa ŋān̄ bí dūú ŋá saraayee, nì inoon nì tin kɔkɔ pée fù kitiŋ puee,

⁹kubuluu kamaa uja nì usal nìn dɔ́miń ki kɔ́ meela poon Noowa cee kii Unimbɔti nín nìn pée tùkū-u puee.

¹⁰Iwiin iluli boonee, ní utaa nìn̄, ní nnyiŋgbeen dɔ́miń ki bīiǹ kitiŋ pu.

¹¹Noowa biŋŋi alaataa aluu poon, dibindi ŋmaliliitiu iwiin saalku nì ili dal ní inyimbulkpaan cúu pīitì, ní nnyim cílìń, ní yilpu cúu cōotì ní nnyim sìtīń[25].

¹²Utaa nìn nìn̄ iwiin imuŋku ili, ŋwiimpu nì kunyeeu.

¹³An wiiŋŋu ní Noowa nì u-nimpuu nì u-jipɔmbi Seem nì Kaam nì Jaafeeti nì bi-nimpoobi bitee kɔ́ meelan.

¹⁴Ŋwiin gbanti ní upeel kamaa buluku, kuwaŋkuluu kamaa buluku nì tin kɔkɔ fù kitiŋ puee kubuluu kubuluu, nì unoon kamaa buluku, nì tin kɔkɔ cáá ifeenee kubuluu kubuluu mun kɔ́ meelan.

¹⁵Tiwan tin kɔkɔ pée cáá kufoouee nóoń tɔb tili tili, ki kɔ́ Noowa cee, meela poon.

¹⁶Tin kɔkɔ pée cáá kufoouee, uja nì usal nìn kɔ́ meelan kii Unimbɔti nín nìn pée tùkū Noowa puee. Ní ti-Dindaan dūu pīiǹ u-pu.

¹⁷Ní utaa nìn̄ iwiin imuŋku ili. Ní nnyim gbí kitiŋ pu ní meela yíkì ki dēeǹ nnyim pu.

¹⁸Ní nnyim gbí ki bīiǹ kitiŋ kɔkɔ, ní meela kíǹ ki dēē nnyim pu.

¹⁹Nnyim mɔ̄tìi gbí ki jɔ́m̀ ki tin bīiǹ ajoon ŋin fɔ̀kɔ̀ tikpilee kɔkɔ pu.

²⁰Nnyim gbí ki bīiǹ ajoon pu ki páaǹ kii meetab biluli pu.

²¹Tin kɔkɔ nìn pée cáá kufoou ki bí kitiŋ puee, an dàkà yii inoon nì tiwaŋkuti nì ipeel nì tin kɔkɔ pée kpátì ki gbí kitiŋ puee, ki kpáaǹ binib, kɔkɔ kpíì múb.

²²Tin kɔkɔ nìn pée bí ki cáá kufoou ki fòotī ki bí kitiŋ puee kpíì.

²³Míǹ ní ti-Dindaan nìn céetì tin kɔkɔ nìn pée bí kitiŋ puee, an dàkà yii binib nì tiwaŋkuti nì tin kɔkɔ pée kpátì ki gbí kitiŋ puee ki kpáaǹ inoon. U nìn kúntì an kɔkɔ nyíb, see Noowa nì bin nìn bí u-cee meela poonee baba di nìn kíǹ.

²⁴Nnyim nìn gbí ki dɔ̄ míǹ ki tin sāā iwiin dilaataal nì imuŋku ili nì saalaa.