Read Ntcham Genèse 9 Bible Online

Genèse 9 - Ntcham bible

Genèse 9

¹Unimbɔti bīiǹ Noowa nì u-jipɔmbi boon ní ki bí-bi yii: «Ní màal̀ kí bùtī kí gbí kitiŋ.

²Kitiŋ pu waŋkuti kɔkɔ, nì kitiŋ pu peelii kɔkɔ, nì inoon kɔkɔ, nì tin kɔkɔ fù kitiŋ puee nì ijɔm kɔkɔ làá nīn fàŋkí-ni ní yɔ́kɔ́ yɔkɔ. Tiwan gbanti kɔkɔee, m dūu ŋá ni-ŋaan.

³M tīī-ni tin kɔkɔ pée bí ki cáá kufoouee án nīn sá-ni tijin, kii m nín nìn tīī-ni timool tin kɔkɔ lòoǹ ibee puee. M dū kɔkɔ ki tīī-ni án nīn sá ni-jinti.

⁴Ama ní taa ŋmɔ́ kuwaŋkuluu kun baa lāntì fatiku nyáńee nanti, kun puee kuwaŋkuluu fatikuu di yì ku-maŋfal[26].

⁵Ní nīn nyí yii m làá dāá bàlifì ni-fatikuu un sá ni-maŋfalee pu. Upeel un kamaa yaa cúú unilee, m làá dāá bàlifì-u unil gbanti fatikuu pu. Míǹ ní unil un kamaa yaa kūū u-jutee, m làá dāá bàlifì-u u-juti gbanti maŋfal pu.

⁶Unimbɔti náań unil ki nántiǹ u-ba ní, míǹ puee un di yaa kūū unilee, u-nijuti di làá kpɔ̀ u mun[27].

⁷Ama nimbee, ní màal̀ kí bùtī kí gbí kitiŋ pu.»

⁸Ní Unimbɔti gíti bí Noowa nì u-jipɔmbi yii:

⁹«Mamee, man pōoǹ-ni dipoondi, nimbi nì ni-naantiibi

¹⁰nì tin kɔkɔ bí ni-cee ki cáá kufoouee, an dàkà yii inoon nì tiwaŋkuti nì ipeel nì tin kɔkɔ pée nyáń meelan ki cáá kufoou ki bí kitiŋ puee.

¹¹Dipoondi din m pōoǹ-nee sɔ̀. Maa làá ti yàntī nnyiŋgbeen ń dāá kúntí tiwan tin kɔkɔ cáá kufoouee tiba kitiŋ pu.»

¹²Ní Unimbɔti gíti kútì ki lī yii: «Kudaaŋŋu kun dàkà báà ŋma dipoondi din dɔ̄ man nì nimbi nì tin kɔkɔ cáá kufoou ki bí ni-ceeyee, nì inifunaan in dāa bí ki dòońee kansikinee sèé:

¹³«M dū m-kuntinyindi ki làl̄ atagban pu án nīn sá kudaaŋŋu yii dipoondi dɔ̄ man nì kitiŋ kansikin.

¹⁴M yaa láa pée yāntì utaa yíiń ní dikuntinyindi nyáń ki làl̄ atagban puee,

¹⁵m làá dāá téetí dipoondi din dɔ̄ man nì ni nì tin kɔkɔ cáá kufoouee kansikinee pu. Di sá yii nnyiŋgbeen kaa ti bí kí dāá kúntí tin kɔkɔ cáá kufoouee.

¹⁶Dikuntinyindee yaa nyáń ki làl̄ atagban pu m wál̀-dèe, ní ḿ téetí dipoondi din dɔ̄ kí nīn cá jaanjaan, man Unimbɔti nì tin kɔkɔ cáá kufoou ki bí kitiŋ puee kansikinee pu.»

¹⁷Ní Unimbɔti bí Noowa yii: «Dikuntinyindi di sá dipoondi din dɔ̄ man nì tin kɔkɔ cáá kufoou ki bí kitiŋ puee kansikinee daaŋku.»

¹⁸Noowa jipɔmbi bin nìn nyáń meela poonee di sá Seem nì Kaam nì Jaafeeti. Kaam di màl̄ Kanaan.

¹⁹Noowa jipɔmbi bitee di màl̄ ki gbéeǹ kitiŋ.

²⁰Noowa kíĺ tikpaal dikpɔ̀l ní ki cóoǹ fiinyi.

²¹Dalbee ní u nyùn̄ fiinyi subiliŋ daam ki gbí ní ki dɔ̄ u-tantiu poon dicancaŋgbeel.

²²Kaam un sá Kanaan baayee ká u-baa nín dɔ̄ dicancaŋgbeel puee, ní u nyáń ki tùkū Seem nì Jaafeeti.

²³Niinee ní Seem nì Jaafeeti kpàlīń tɔb bili, ki dū dibɔkutikpaandi ki páaǹ bi-gbigbipati pu ki túlifìń bi-boon ki cáań ki bīiǹ bi-baa pu. Baa fātì bi-nimbiin kí kpèè bi-baa, ní kaa nín wál̀ u-cooi.

²⁴Ndaam dāa cēetì Noowa pu u fīntèe ní ki béè u-bijoolkaaki nín ŋá-u miŋyee.

²⁵Niinee ní u bí yii: «Mbusu ń kɔ́ Kanaan. Iyumbu yumbuu ní u làá nīn sá ki tīī u-mambi!»

²⁶Ní ki gíti bí yii: «Tí nyɔ̄ŋkì ti-Dindaan un sá Seem Nimbɔtiuee! Kanaan úǹ ń nīn sá Seem yumbuu!

²⁷Unimbɔti ń yàntī Jaafeeti ń bùtī kí nīn kóò Seem tantibin, Kanaan úǹ ń nīn sá bi-yumbuu!»

²⁸Nnyiŋgbeen boonee, Noowa gíti ŋá abin alaataa ata nì imuŋku ili nì abin saalaa ní.

²⁹Noowa biŋŋi kɔkɔ nìn kpáfì abin alaataa awa nì imuŋku ili nì abin saalaa, ní u nín kpíì.