Read Ntcham 2 Samuel 1 Bible Online

2 Samuel 1 - Ntcham bible

2 Samuel 1

¹Saayuul kúm boonee, Daafiidi nìn cūtìi jáń ki pɔ́ɔkiǹ Amaleeki yab. U nìn gítìń ki kāl̀ Siikilaagi tiŋkin iwiin ili.

²Ŋwintataati dalee, u bí yii ú kpèèyee, unaacimpɔɔn ubɔ di nyánní Saayuul janjanaapaal pu ki páaǹnée. U-wampeeŋkaati nìn cátì ní ntam pùkū u-yil. U bāań Daafiidi ceeyee ní ki tātìi gbāaǹ u-nimbiin dicincibil u-yil tūū kitiŋ.

³Daafiidi nìn bālifì-u yii: «A nyánní la?» Ní u kíí-u yii: «M nyánní Isirayeel yab janjanaapaal pu ní ki sáǹní.»

⁴Daafiidi bí-u yii: «Tùkù-mi tin jítì niinee.» Ní u bí-u yii: «Isirayeel yab sáǹ kujaaun ní bi kūū bi-kansikin binib tikpil. Áli gba bi kūū Saayuul nì u-jipɔɔn Joonatan.»

⁵Ní Daafiidi bālifì unaacimpɔɔnee yii: «A ŋá mana ní ki béè yii Saayuul nì u-jipɔɔn Joonatan kpíì?»

⁶Ní unaacimpɔɔnee bí-u yii: «M pée bí Giilboowa[1] jool pu yìkíl̄ yikil ní. M bí yii ḿ kpèèyee, Saayuul di ŋúb́ u-kpaŋki ki nyìitēe. Janjatɔrɔkub nì bitanjakaliibi nìn kā u-pu kàti kati.

⁷U fātèe ki ká-mi, ní ki yíiń-mi, ní m kíí-u yii: <Ti-baa, m sèé.>

⁸Ní u bālifì-mi yii: <Sii di sá ŋma ní?> Ní m kíí-u yii: <M sá uamaleekija ní[2].>

⁹Niinee ní u bí-mi yii: <M gbàam̄-si, dāá kpɔ̀-mi, di sá yii m-nimbiliŋ bɔ̀ntī, nì min kamaa m dáá gbíntìi fòotēe.>

¹⁰Niinee, m sútì ki pìl̄-u ní ki kūū-u, kun puee m nyí yii u yaa lítì, waa làá pée ŋmátí. Míǹ boonee ní m cíkitì u-beefuuliiki ní ki fúutì dibɔmbil din u fúuńee ki cáań doo kí tīī-si.»

¹¹Niinee Daafiidi dáaĺ tiwan tin u pēēyee ki cátì, ní u-naacimbi kɔkɔ mun dáaĺ ki cátì bi-yati.

¹²Bi nìn kāl̀ Saayuul nì u-jipɔɔn Joonatan nì Isirayeel yab bin kɔkɔ sá ti-Dindaan nibul bi kūū kujaaunee kpool. Bi nìn súń ki bóob́ kinyɔkɔ ki cáa sāā kujoou.

¹³Daafiidi gíti bí unaacimpɔɔn un cáań tibɔti ki tùkū-uee yii: «A bí yii a sá la naaa?» Ní u bí-u yii: «Amaleeki yab bin kóò ni-puee ubɔ jipɔɔn ní m sá.»

¹⁴Ní Daafiidi bí-u yii: «Ba pu ní aa fāŋkì ki kūū ubɔti un ti-Dindaan lēēyee?»

¹⁵Niinee ní Daafiidi yíiń u-naacimpɔmbi ubɔ ní ki bí-u yii: «Dāá kpɔ̀ kijapaai nee.» Ní u dɔ́miń ki kūū-u.

¹⁶Ní Daafiidi bí-u yii: «A-kpuulool làá báatí a-yil pu ní, di sá sii a-ba nyɔkɔ di sòon̄ ki kūū a-bɔti ki lī yii: <Man di kūū ubɔti un Unimbɔti lēēyee.>»

¹⁷Daafiidi gāā ŋkpiisilan nee Saayuul nì u-jipɔɔn Joonatan pu.

¹⁸U nìn tīī mara yii bí dū-ŋu kí dàkà Juuda yab. An sá Butɔbu kpiisilaŋŋu ŋun bi ŋmàn̄ ki ŋá deedeedambi gbɔŋkunee[3] ní.

¹⁹Isirayeel, a-janjamɔntiibi kpíì a-gbantammu pu! Ba pu ní a-baatandambi kpíì ní?

²⁰Taa gbìitīmaan-tì Gaati tiŋkin, taa mūlifìmaan-tì Asikeelɔn daŋŋi pu[4]. An yaa kaa sá míǹ, Fiiliistii yab nimpoobi làá nīn fàal̀, bin kaa gíí akpancan nee sapɔmbi làá nīn bí dipɔɔpindin.

²¹Giilboowa jooŋŋi[5], dimalindi ń taa ti tɔ̄ ni-pu, utaa ń taa ti nì ni-pu, bí taa ti ká tisati tin lòoǹee ni-pu. Di sá yii niin ní bi kɔ́ǹ bibaatandambi gbampɔɔŋi icoo. An kaa sá ŋkpam ní bi cáa nùkù Saayuul gbampɔɔl.

²²Kí yàntī fatiku ń nyā kí pùub̀ee, kí jáǹ binannanliibi bin pɔ̄ɔ̄yee, Joonatan tɔbu kaa nìn gítí bu-boon, míǹ ní Saayuul mun tàataajiki kaa nìn nyēē kí gítiń fám.

²³Saayuul nì Joonatan nìn néeń tɔb tiŋan, ki kpáaǹ bi-kúm poon baa yākatì tɔbin. Bi nìn yáb̀ ki jítiǹ ikaabu, ní ki nìn cáá dibaatandi ki jítiǹ gbikintib.

²⁴Isirayeel sapɔmbi, sɔ̄maan Saayuul pu. Úǹ di nìn pēentí-ni abɔkutinyaan, ní ki nìn cáá sindaariya wanti ki nyɔ̀kɔntí-ni.

²⁵Bibaatandambi kpíìń dikɔ̀ndin, Joonatan kpíì ki dɔ̄ ŋgbantamu pu.

²⁶M-nabiki Joonatan, m wíì a-pu, maa mɔ̄ a-pu. A néeń-mi ki jítiǹ unimpu nín néeń u-cal puee.

²⁷Bibaatandambi kpíìń dikɔ̀ndin, tijanjawan kaa ti bí tiban.