Read Ntcham 2 Samuel 10 Bible Online

2 Samuel 10 - Ntcham bible

2 Samuel 10

¹Míǹ boonee ní Amɔn yab bɔtiu kpíì, ní u-jipɔɔn Anuun fōō u-yil ki kāl̀ dibeel.

²Niinee Daafiidi bí yii: «M làá ŋá Naasi jipɔɔn Anuun tiŋan kii u-baa nín nìn ŋá-mi tiŋan puee.» Ní Daafiidi lēē u-kàliŋkpilib ki tú bí cùú jāam̀-u u-baa kpool. Bikàliŋkpilib bin Daafiidi nìn túee nìn dūu bàn̄ Amɔn yab tiŋkin.

³Amɔn yab bɔtibiliŋ bí bi-kpiliu ubɔti Anuun yii: «A dàkafī yii Daafiidi là kí tīī a-baa jilmee pu ní u túnní binib bí dāá jāam̀-si u-kpoolaaa? An kaa sá bí cɔ̄ŋkì kitiŋ kí béé ki-filiŋfeetii kí dāá já kí fōō-kì dalba pu ní bi dɔ́mińaaa?»

⁴Niinee ní Anuun yāntì bi cúú Daafiidi kàliŋkpilib, ki kōol̀ bi-nyimpuliŋ dijandi, ki gíí bi-bɔkutiŋ ki ŋāatì bi-kpiliŋ pu, ní ki gíiǹ-bi ki líì.

⁵Daafiidi nìn gbìl̄ tin jítèe. Niinee ní u lēē binib bí cùú tūŋkì u-kàliŋkpilibee, di sá yii bi nìn kɔ́ǹ-bi icoo tikpil. Ní ubɔti bí bí tùkù-bi yii: «Ní kàl̄maan Jeeriikoo ni-nyimpuliŋ ń túkú, boonee ní nīn nín kùnní.»

⁶Amɔn yab nín béè yii bi kɔ́ Daafiidi poon ki lēē baadakamee ní bi nyàab̄ binib ki tú Siirii yab bin kóò Beeti-Reeyoob nì Soobayee cee ki pàn̄ bijanjaliibi kutukub mmuŋku, ki pàn̄ ubɔti Maaka janjaliibi kutuku, ní ki pàn̄ Toob yab janjaliibi kutukub saalaa nì bili.

⁷Daafiidi gbìl̄ mimmee ní ki dū Joowaab nì bijanjaliibi bin kɔkɔ cáá dibaatandee ki tú bí cùú já nì bi.

⁸Amɔn yab nìn nyáń ki yúl̀ mpɔ̀n pu kitiŋ punyɔkɔki caŋin ki cí kí já. Ní Siirii yab bin kóò Sooba nì Beeti-Reeyoobee nì Toob yab nì Maaka yab náká náká tisatin.

⁹Joowaab dáań ki ká yii an sá anikiti ali ní u làá jáǹ, diba bí nyɔkɔpu diba bí boon pú. Niinee ní u lútì Isirayeel janjaliibi kansikin bimɔntiibi ní ki dū-bi ki yóoǹ ki bíitì Siirii yab.

¹⁰Ní ki dū bin kíǹee ki ŋúbiǹ u-nabiki Abisayi, ki bíitiǹ Amɔn yab.

¹¹Joowaab tùkū u-nabiki yii: «Siirii yab yaa bíi pɔ́ɔkíǹ-mee, á dāá tíkiń-mi. M yaa tí ká yii Amɔn yab bíi pɔ́ɔkíǹ-see, ma mun làá dāan̄ kí tíkiń-si.

¹²Dàkà dibaatandi, tí dàkà dibaatandi kí fīī ti-nibul nì ti-Nimbɔtiu timmu. Ti-Dindaan ń ŋá min u lèe.»

¹³Niinee Joowaab nì u-janjaliibi nín cá kí já nì Siirii yab, ní bíǹ sáǹ-bi.

¹⁴Amɔn yab nín ká yii Siirii yab sáǹee, ní bi mun sáǹ Abisayi, ki kɔ́ kitiŋin. Niinee Joowaab gbēeǹ kaa ti bíi jì Amɔn yab, ní ki nín fàtī Jeerusaleem.

¹⁵Siirii yab nín ká yii Isirayeel yab pɔ́ɔkiǹ-bee, ní bi kóoǹ bi-janjaliibi kɔkɔ ki kpáfì.

¹⁶Ubɔti Adadeeseer tú binib Siirii yab bin kóò Eefiraati mɔɔl lapu puee cee, ní bíǹ yíkìń ki dūu bāań Eelam. Adadeeseer janjakpiliu Soobaaki di nìn līī bi-nyɔkɔpu.

¹⁷Ní bi tùkū Daafiidi an bɔti, ní u kóoǹ Isirayeel yab janjaliibi kɔkɔ ki kpáfì, ní bi nín cá ki dūtì Jɔɔdan buŋŋu ki dūu bàn̄ Eelaam. Siirii yab nìn yúl̀ mpɔ̀n pu ki tātìi gbāaǹ dikɔmbool pu kí já nì Daafiidi.

¹⁸Ama Isirayeel yab jáń ki pɔ́ɔkiǹ-bi, ní bi sáǹ. Daafiidi yab nìn kūū itaamu in dátí janjatɔrɔkubee alaataa aluli, ní ki kūū bitanjakaliibi kutukub imuŋku ili. Bi nìn tīī Siirii yab janjakpiliu Soobaaki tiweendi, ní u kpíì niin.

¹⁹Bibɔtiibi bin kɔkɔ nìn bí Adadeeseer taapuee nìn ká yii Isirayeel yab jáń ki pɔ́ɔkiǹ-bi. Niinee ní bi nì Isirayeel yab sòon̄ ki gbìlīǹ tɔb ŋgbansɔŋfi ń nīn bí bi-kansikin, ní ki sīntì bi-ba taapu ki tīī-bi. Kí yòon̄ ŋyunti gbantee, Siirii yab kíǹ ki fàŋkí kí jòò Amɔn yab.