Read Ntcham 2 Samuel 12 Bible Online

2 Samuel 12 - Ntcham bible

2 Samuel 12

¹Unimbɔti nìn tú u-bɔnaatiliu Naatan Daafiidi cee. U bàn̄ ki ká-uee ní ki bí-u yii: «Binib bili nìn bí kitiŋ kiban, ubɔ nìn sá ugaaja ní un kíǹee sá usoodaan.

²Ugaajee nìn cáá ipii nì iŋoobu nì inaa tikpil.

³Usoodaanee úǹ kaa nìn pée cáá báà tiba, asee kipisalii kiba ní u nìn dá. U nìn kpīintí-kì ní ki nì u-biyaamu wīintí mbaantiim. Tijin tin u nìn jīǹee nì nnyim min u nìn nyùee ní u tìì-kì. Kipisaliiyee nìn dɔ̀ ki kɔ́l̀-u, ní kì bí kii u-bisalee.

⁴Dalbee unicaan ubɔ kɔ́ ugaajee. Ama ugaajee kaa là kí cúú u-piii àá u-ŋoobui àá u-naai kansikin ubɔ kí ŋá u-nicaaŋwu tijin. Ama ní ki cúú usoodaan pisaliiki ki kūū ki ŋá u-nicaaŋwu tijin.»

⁵Ní Daafiidi fōō ugaajee pu diŋuul ŋkpitim pu, ní ki bí Naatan yii: «M pūtì ti-Dindaan un bí nee yii unil un ŋá mimmee máaǹ bí kpɔ̀-u.

⁶U nín ŋá pu kaa súń u-juti saayee, ú pà mpisalimu munaa kí téeǹ kipisaliiyee pu.»

⁷Ní Naatan bí Daafiidi yii: «Unil un ŋá mimmee, sii dee! Kpèè ti-Dindaan Isirayeel yab Nimbɔtiu nín lī puee sèé: <Man di lēē-si á nīn sá Isirayeel yab bɔtiu. Man di fīī-si ki nyántì Saayuul ŋaan.

⁸M dū a-kpiliu Saayuul dicaŋku ki tīī-si, ki dū u-nimpoobi ki ŋá a-ŋaan. M dū-si ki kāaǹ á jī dibeel Isirayeel yab nì Juuda yab pu. An yaa bàà pátì, m bàà ŋūǹ kí kūtì-si tin jítiǹ mimmee.

⁹Ba pu ní a kpēē man a-Dindaan fám ki ŋá min kaa fáatiǹ-mee? A kūū uyitiija Urii. A yāntì Amɔn yab kūū-u, ní sii fōō u-nimpuu ki cáá.

¹⁰An puee kí yòon̄ kɔŋkɔnnee kí nīn cée, nnikpaakoon pée kpá kí lóó a-dicaŋkun, di sá yii a kpēē-mi fám ki fōō uyitiija Urii nimpuu ki cáá.

¹¹Man ni-Dindaan nín lī puee sɔ̀. M làá yàntī mbusu ń jēetí a-pu, ní mbusu gbantee làá nyānní sii a-ba dicaŋkun ní. A-nimbilaaliyin ní m làá fōō a-nimpoobi kí tīī a-yab ubɔ ní ú dòon̄ nì bi ŋwiimpu[26].

¹²Di sá yii sii ŋá dibalin ní, ama man làá nyāntí tin a ŋée Isirayeel yab kɔkɔ nimbilaaliyin ŋwiimpu ní.»

¹³Ní Daafiidi bí Naatan yii: «M yīntiǹ ti-Dindaan.» Ní Naatan kíí Daafiidi yii: «Ti-Dindaan mun dū a-kpitii ki pú-si. Aa làá kpú.

¹⁴Ama tibɔti nee poonee, a kpēē ti-Dindaan fám. An puee kibininjabiki kin bi màl̄-si nee làá kpú.»

¹⁵Niinee ní Naatan nín kùǹ. Ti-Dindaan yāntì iween iba dɔ́miń ki cúú Urii nimpuu Batiseeba biki kin u màl̄ Daafiidee.

¹⁶Daafiidi nìn mēē Unimbɔti kibiki gbanti pu. U nìn bōob̀ kinyɔkɔ, ní u yaa nìn kɔ́ u-diikunee, u dɔ̀ kitiŋ fám ní.

¹⁷U-kàliŋkpilib bin bí u-cindinee dɔ́miń u-cee ki gbāam̀-u ú yīkì kitiŋ ní u yíì, ní kaa là kí jī tijin bi-cee.

¹⁸An dāa tú kinyɔŋee, kibikee kpíì. Daafiidi tɔntɔnliibi nìn fàŋkí kí tùkù-u yii kibiki kpíì. Bi nìn bíi lì yii: «Ŋyunti ŋun kibikee dáá bée, ti nìn sòon̄ nì u waa pílifiǹ-ti. Kɔŋkɔnnee ti làá ŋá mana kí tùkù-u yii kì kpíì. U ŋūǹ kí ŋá u-ba tin kaa ŋān̄ee!»

¹⁹Daafiidi gbìl̄ bi nín bí ki mùkufī bi-ŋmaniŋmee, ní u béè yii kibikee kaa ti bí. Ní u bālifì-bi yii: «Kibikee kpíì níii?» Ní bi kíí-u yii: «Iiin, kì kpíì.»

²⁰Niinee Daafiidi yíkì kitiŋ, ki cūtìi fùl̄ ki yāaǹ u-wunti pu talaalu ní ki kpántì tiwampeeŋkaal. Míǹ boonee ní u nín cá circir kɔŋkooŋŋun ki gbāaǹ ki jáam̀ ti-Dindaan. U fātìi bāańee ní ki yāntì bi ŋá-u tijin u jíń.

²¹U-tɔntɔnliibi bālifì-u yii: «Ti-baa, tin a bíi ŋáań nee là kí lì yii ba dee? Di sá ŋyunti ŋun kibiki dáá bée, a nìn bōob̀ kinyɔkɔ ní ki sūǹ. Kɔŋkɔnnee kì nín kpíìyee ní a yíkìi kāl̀ ki bíi jīǹ tijin.»

²²Ní Daafiidi kíí-bi yii: «Ŋyunti ŋun kibiki dáá bée, m nìn bōob̀ kinyɔkɔ ki sūǹ, di sá m nìn dàkafī yii an yaa yíì ti-Dindaan làá sɔ̄ m-saai kí cáaǹ-kì.

²³Ama kɔŋkɔnnee kì kpíì, ba pu ní m nín gíti bōob̀ kinyɔkɔ? M ŋūǹ kí gíiǹní-kì dimaŋfalinaaa? Man di làá dāá cù ki-cee, kíǹ kaa ti ŋūǹ kí gítiń m-cee.»

²⁴Daafiidi ŋméeǹ u-nimpuu Batiseeba. Boonee ní u nì u kpáfì ní u cáá dipool ki màl̄ kibininjabiki ní ki pú-kì diyindi yii Saloomɔn. Ti-Dindaan nìn néeń-kì.

²⁵U nìn dī u-bɔnaatiliu Naatan pu ní ki tùkū Daafiidi míǹ. Ní Naatan pú-kì diyindi yii Yeediidiya, an taapu di sá yii: «Un ti-Dindaan néeńee.»

²⁶Ŋyunti gbantee ujanjakpil Joowaab nìn cūtìi jáń nì Amɔn yab tiŋki Raaba ki fōō laakin ubɔti kóòyee.

²⁷Joowaab nìn tú binib bí tùkù Daafiidi yii: «M bíi jáà nì Raaba tiŋkin yab, ki fōō bi-tiŋki laakin bi bíl̀ nnyimee.

²⁸An puee kpāfì bijanjaliibi bin kíǹee, sii a-ba ń dāan̄ kí já kí fōō-kì. Maa là kí já kí fōō-kì m-ba kí fōō diyindi.»

²⁹Ní Daafiidi kpáfì bijanjaliibi bin kíǹee ní bi dɔ́miń ki jáń nì Raaba ki fōō-kì.

³⁰Bi nìn cíkitì Amɔn yab bɔtiu beefuuliiki u-yil pu ki dūu cíkiǹ Daafiidi. Kibeefuuliiyee nyiŋfiŋu nìn sá kiiloobi mmuŋku nì saalaa nyɔkɔm, ní ataŋkpamɔnti náká ki-pu. Kí kūtèe, Daafiidi nìn jáń ki fōō tiwan tikpil, ní ki kóoǹ ki kpīnnì.

³¹Daafiidi nìn cúú kitiŋ gbanti nib kuyuŋu bi tūǹ atuun ŋin pɔ̄ɔ̄yee. Biba nìn sèekì ki kpítí ataŋkpee, ní biba gà isufi, ní biba mun māā brikisib. Míǹ ní u nìn ŋá Amɔn yab bin bí ntimu mun kɔkɔ kíǹee poon. U ŋá míǹ ki dóòyee ní u nì u-janjaliibi nín gítí Jeerusaleem.