Read Ntcham 2 Samuel 14 Bible Online

2 Samuel 14 - Ntcham bible

2 Samuel 14

¹Joowaab un na bi nìn yíì Seeruyee nìn dáań ki ká yii ubɔti dáá gbíntìi dàkafī Abisaloom pu.

²Ní u tú Teekoowa tiŋkin bi nyàabìń-u unimpu un cáá iciinee ní ki bí-u yii: «Á ŋá kii a kā dikpoolee, kí nīn lōō kpɔsatab kí taa nyāantì a-ba. Á ŋá kii unil un kāl̀ dikpool an yúntèe.

³Míǹ boonee, á cù kí ká ubɔti kí sòoǹ nì u tin m làá tùkù-si nee.» Niinee ní Joowaab dàkā-u tin u làá tin sòoǹ nì ubɔtee.

⁴Unimpuee yíkì ki nín cá ubɔti cee. U bàn̄ee ní ki tātìi dōoǹ ubɔti nimbiin dicincibil ní ki bí yii: «Ti-baa, pée fīī-mi!» -

⁵Ní ubɔti bālifì-u yii: «Ba ní a là ní?» Ní u kíí-u yii: «Ti-baa, m sá ukpiipu ní. M-cal kpíì.

⁶M nìn cáá jipɔmbi bili, ní bi jáń kusaaun. Báà ubɔ nìn kpá niin kí pàtī-bi ní ubɔ fáá ki kūū u-juti.

⁷Niinee ní ti-maaliŋun yab kɔkɔ yíkìi kāl̀ m-pu ki bí-mi yii: <Nyāntí unikpɔlee kí ŋúbíǹ-ti tí kpɔ̀-u kí téeǹ u-nabiki kin u kūūyee yil pu. - Ti yaa ŋá mimmee, ti kúntì un làá jī difakalee dee.> - Mimmee bi púntìi gbíntì dimɔsiŋkɔndi din bàà pée kíǹ-mee dee. Baa là kí kíń m-cal mmaabool bí nīn téetí u-yindi kitiŋ pu.»

⁸Ní ubɔti bí-u yii: «Nín̄ kùǹ. M làá yóoń mara ubɔ a-pu bí taa ŋá-si tiba.» -

⁹Ní unimpuee fātìi bí ubɔti yii: «Ti-baa ubɔti, tin kɔkɔ làá bàń tibɔti nee poonee kpuulool ń lítí man nì m-dicaŋku pu. An taa lítí sii nì a-tiŋki pu.»

¹⁰Ní ubɔti bí-u yii: «Ubɔ yaa gíti sòon̄ an bɔti a-ceeyee, á cáań udaan m-cee. Waa làá ti sòoǹ-tì a-cee ŋwindal.»

¹¹Ní unimpuee bí yii: «Ti-baa, pée pùtī ti-Dindaan a-Nimbɔtiu, án nín làá ŋá pu un làá kpɔ̀ m-jipɔɔn kí tɔ̀ ipɔntoonee[27] ń taa kpɔ̀-u kí yàntī m-nimbinaamandi ń gíti lákatíǹ-mee.» - Ní ubɔti bí yii: «M pūtì ti-Dindaan yii a-jipɔɔn yil pu kuyikpiliu kubɔbɔ kaa làá lítí kitiŋ.»

¹²Ní unimpuee gíti bí yii: «Ti-baa, a kíikí m gíti sòoǹ nì si tibaaa?» Ní ubɔti bí-u yii: - «Sòoǹ.»

¹³Ní unimpuee bí ubɔti yii: «Kin a nyí míǹ dee, ba pu ní a ŋá Unimbɔti nibul kii bi nín là kí ŋá m-jipɔɔn puee? Kii a nín dáá sòon̄ pu nee, a kūū a-bɔti, di sá yii aa nyántìń Abisaloom kitiŋ kin poon u sáǹ ki kɔ́ee ki gíiǹní.

¹⁴Ti-kɔkɔ làá dāá pée kpú ŋwindal ní. Ti bí kii nnyim min bi yaa dūu fá, baa ti ŋūǹ kí fāā-mèe ní. Ama an kaa sá míǹ ní Unimbɔti bɔ́ntì Abisaloom pu. U lēē yii ú taa nín̄ bí ki dátiǹ-u.

¹⁵Kɔŋkɔnnee, m yaa dɔ́miń sii ti-baa ubɔti cee ki sòon̄ nì si tibɔti neeyee, an sá yii samaa nín sòoǹ puee di fāaǹ-mi. Niinee ní m dākafì yii: <M yaa sòon̄ nì ubɔti, an yaa yíì u làá gbìl̄ kí tīiǹ-mi.>

¹⁶Di sá yii ubɔti làá kíí kí nyāntí-mi un bàà là kí kúntí man nì m-jipɔɔn, Unimbɔti nibul kansikinee ŋaan.

¹⁷Ní man a-tɔntɔnliu lī m-neen yii: <Tin ti-baa ubɔti làá sòoǹee làá cáań ŋgbansɔŋfi. Di sá yii ti-baa ubɔti sá kii Unimbɔti tuuŋŋuee ní, u nyí kí gàntī tin ŋān̄ee nì tin kaa ŋān̄ee. Ti-Dindaan a-Nimbɔtiu ń nīn bí a-cee.>»

¹⁸Niinee ní ubɔti bí unimpuee yii: «M làá bàlifì-si tibɔti tiba. Á kíí-mi-tì ibaamɔn.» - Ní unimpuee kíí-u yii: «Ti-baa ubɔti, m gbāam̀-si, sòoǹ tin a cááyee.»

¹⁹Ní ubɔti bí yii: «Joowaab nyɔkɔ kaa cēē tibɔti nee poonaaa?» - Ní unimpuee kíí-u yii: «Ti-baa ubɔti, ibaamɔn ní m làá sòoǹ. A nín sòon̄ puee, a sòon̄ ki tɔ́ kufaaun ní. Tiŋman, a-tɔntɔnliu Joowaab di sáŋkì-mi ḿ sòoǹ tin kɔkɔ m sòon̄ nee.

²⁰A-tɔntɔnliu Joowaab ŋá míǹ kí kpántí tibɔti tin poon ti bí nee ní. Ama sii ti-baa ubɔti cáá iciin kii Unimbɔti tuuŋŋuee ní, a nyí tin kɔkɔ pée jītí kitiŋ puee.»

²¹Niinee ní ubɔti ká Joowaab ki bí-u yii: «A nín lī puee m làá ŋá míǹ. Cùú gíiǹní Abisaloom doo.»

²²Ní Joowaab tātìi dōoǹ ubɔti nimbiin dicincibil ní ki jáam̀-u ki lī yii: «Ti-baa, kɔŋkɔnnee man a-tɔntɔnliu béè yii m cáá diyimɔɔl a-cee, di sá yii a kíí ki fōō m-nyɔkɔ.»

²³Ní Joowaab yíkìi kíĺ nsan ki búntì Geesuur tiŋkin. U nìn gíiǹní Abisaloom Jeerusaleem.

²⁴Ama ní ubɔti bí yii: «Abisaloom ń taa dāan̄ m-cee, ú nīn kùǹ u-dumpu.» Niinee Abisaloom nín kùǹ u-dumpu ubɔti kaa fōō-u.

²⁵Isirayeel tiŋki kɔkɔ poonee, unil ubɔ nìn kpá ki ŋān̄ ki bàn̄ Abisaloom. Báà ŋma nìn pàkà-u ní. Kí yòon̄ u-taaŋi kí cáá sāā u-yilee, laaba kaa wɔ̀b̄.

²⁶Dibintil kamaayee, u nìn cēē u-yikpiti, di sá yii an nìn nyìm̀ u-pu. Bi yaa nìn cáń u-yikpitee, bi nìn ŋmàntī kiiloobi bili nì ipaa ki nóó nì ubɔti nín yóoǹ nnyiŋfi ŋun bí nīn ŋmàntēe.

²⁷Abisaloom nìn cáá mbininjabiyaamu muta nì kinimpubiki kiba. Bi nìn yíì-kì yii Taamaar. U nìn ŋān̄ usapɔɔn an kaa cáá bí lì.

²⁸Abisaloom nìn kāl̀ Jeerusaleem abin ali, u-baa kaa kíí u gbóoń u-cee.

²⁹Míǹ boonee, Abisaloom tú bí yíiń Joowaab ú tɔ̄-u u-baa cee, ní Joowaab yíì kaa dɔ́miń. Ní u fātìi tí tú unil nliliitiim Joowaab cee, ní u yíì kaa dɔ́miń.

³⁰Niinee ní u bí u-tɔntɔnliibi yii: «Kéè ni ká ɔɔji saaku kun dɔ̄ ki pìlīǹ-mee yaa! Joowaab saaku dee. Ní cùú tūū-kù ŋŋmi.» Ní u-tɔntɔnliibi cūtìi tūū kusaau gbanti ŋŋmi.

³¹Ní Joowaab cūtì Abisaloom cee ki bālifì-u yii: «Ba pu ní a-tɔntɔnliibi cūtìi tūū m-saaku ŋŋmi ní?»

³²Ní Abisaloom kíí-u yii: «M nìn tú bi yíiń-si ní a yíì kaa dɔ́miń. M bàà nìn là kí tɔ̄-si ubɔti cee á bàlifì-u yii: <Ba pu ní m yíkìń Geesuur tiŋkin ki dɔ́miń doo ní? An bàà sɔ́ ḿ nīn gbíntìi bí niinaa! Kɔŋkɔnnee m là kí cùú ká ubɔti, m yaa ŋá ikpiti iba, ú kpɔ̀-mi!>»

³³Ní Joowaab nín cá ubɔti cee ki máafì-u Abisaloom nín lī puee. Ní ubɔti yíiń Abisaloom. U bàn̄ u-ceeyee ní ki tātìi dōoǹ ubɔti nimbiin dicincibil. Niinee ní ubɔti kpàl̄-u.