Read Ntcham 2 Samuel 15 Bible Online

2 Samuel 15 - Ntcham bible

2 Samuel 15

¹Míǹ boonee ní Abisaloom nyàab̄ janjatɔrɔku nì itaamu, ní bijanjaliibi imuŋku ili nì saalaa sáń ki līī u-nyɔkɔpu.

²Abisaloom nìn péetí kutaafaau ní kí cùú kàl̄ kitiŋ punyɔkɔ nsan caŋin. Ŋyunti ŋun kamaa ubɔ yaa nìn cáá tiba ki cá ubɔti dumpu ki là ubɔti ń sòoǹ kí ŋāŋkì kí tīī-uee ní ú yíiń udaan kí bàlifì-u yii : «A nyánní kitiŋ kilakan ní?» Ní úǹ ń kíí-u yii : «Man a-tɔntɔnliu nyánní Isirayeel yab naakooku kubɔ poon ní.»

³Ní Abisaloom ń bí-u yii: «A-bɔti ŋān̄ ki túĺ nsan, ama ubɔ kaa bí ubɔti cee ki làá gbìl̄ kí tīiǹ-si.»

⁴Ní ú kūtì kí lì yii: «Man di yaa bàà sá kitiŋ nee bɔsoonliuee, bin kɔkɔ cáá tibɔti ki là bí sòoǹ kí ŋāŋkì kí tīī-bee bàà dòoń m-cee ní ḿ sòoǹ kí ŋāŋkì kí tīī-bi!»

⁵Ubɔ yaa nìn bāań ki gbāaǹ kí jāam̀-uee, ní ú cúú u-ŋal kí yáatí-u kí yóoń ní kí kpàl̄-u.

⁶Míǹ ní Abisaloom nìn ŋáań bin kɔkɔ nìn cá ubɔti cee ú sòoǹ kí ŋāŋkì bi-bɔtee. U nìn ŋá míǹ ní ki ŋmātiǹ Isirayeel yab.

⁷Abin anaa boonee, ní Abisaloom bí ubɔti yii: «Pɔ̄-mi nsan ḿ cù Eebrɔn kí pà ipoon in m nìn pōoǹ ti-Dindaanee.

⁸Di sá yii ŋyunti ŋun m nìn bí Geesuur, Siirii yab tiŋkinee, man a-tɔntɔnliu nìn pōoǹ yii: <M-Dindaan, a yaa yāntì m fātìi gítì Jeerusaleemee, m làá cù Eebrɔn kí ŋá saraabi kí tīī-si.>»

⁹Ní ubɔti bí-u yii: «Nín̄ cá nì ŋgbansɔŋfi.» Ní u yíkìi kíĺ nsan ki búntì Eebrɔn.

¹⁰U bàn̄ niinee ní ki tú binib Isirayeel yab timmu kɔkɔ poon bí tùkù-bi yii: «Ni yaa láa pée gbìl̄ bi búń ŋyinee, ní dāá lì yii: <Abisaloom kpántì ubɔti Eebrɔn tiŋkin.>»

¹¹Abisaloom nìn mēē Jeerusaleem binib alaataa ali bi pá u-boon kaa nyí tiba poon. Bíǹ kaa nìn pée nyí tin Abisaloom nìn bɔ́ntì kí ŋée poon tiba.

¹²Ŋyunti ŋun Abisaloom bíi ŋáań saraayee ní u tú bí yíiń Ayiitoofeel, u-baa Daafiidi saŋkiliu. U nìn kóò u-tiŋkin Giiloo. Niinee bin nìn pá Abisaloom boonee dūu wíiǹ ní bi nín nìn bóob́ kí ŋá tiŋyee mun ká mpɔn.

¹³Unil ubɔ nìn dɔ́miń ki tùkū Daafiidi yii: «Isirayeel yab gítì Abisaloom jandi pú.»

¹⁴Ní Daafiidi bí u-kàliŋkpilib bin nìn bí u-cee Jeerusaleemee yii: «Tí yīkì kí sām̀maan malaa, an yaa sá fám, Abisaloom kaa làá tàan̄ ti-kansikin báà ubɔ. Yáb́maan, an yaa kaa sá míǹ, u làá cúú-ti malaa, kí kpɔ̀ binib kɔkɔ kí cáań nnaabu kí tɔ̄ kitiŋ nee pu.»

¹⁵Ní u-kàliŋkpilib kíí-u yii: «Ti-baa ubɔti, a yaa pée lēē puee, míǹ ní ti làá ŋá.»

¹⁶Niinee ní ubɔti còom̄ ataa pu u nì u-dicaŋku kɔkɔ nyáń ki búntì. Ubɔti nìn dū u-nimpoobi ŋwaamu saalaa ki kāaǹ bí nīn kpèé dibeecindi.

¹⁷Ubɔti còom̄ ataa pu u nì samaa kɔkɔ nyáń ki cée ní ki cūtìi yúl̀ kudiluŋkikaau boon.

¹⁸Ní u-yab còom̄ ki jītí. Bíǹ di sá Keereeti yab kɔkɔ nì Peeleeti yab kɔkɔ bin cí ubɔtee, nì Gaati[28] yab binib alaataa aluu bin nìn nóoń-u doooo Gaati tiŋkinee. Bíǹ gbanti kɔkɔ nìn cōom̀ ki jítì ubɔti nimbiin.

¹⁹Ubɔti bí Gaati yab janjakpiliu Itaayii yii: «Ba pu ní a nóoń-ti? Gítí kí cùú nīn bí ubɔtipɔɔn cee, di sá yii a sá unicaan ní, ní bi jìn̄-si gba a-tiŋkin.

²⁰A dáá pée bàń dee ní ḿ kpáaǹ-si tí nīn tú ki yìiǹaaa? Maa kpáàa nyí laakin m cée. Míǹ puee kpáaǹ a-nabiyaamu kí gítí. Ti-Dindaan ń dàkà-si u-poommɔŋŋu nì u-laŋŋaŋfitiiku.»

²¹Ama ní Itaayii kíí ubɔti yii: «M pūtì ti-Dindaan nì sii ubɔti yii, laakin ti-baa ubɔti làá nīn bée, án yaa sá kí kpúɔɔɔ, án yaa tí sá kí ŋmátáaa, niin ní man a-tɔntɔnliu mun làá nīn bí.»

²²Ní Daafiidi kíí-u yii: «An ŋān̄, dāá lìntī nyɔkɔpu.» Niinee ní Itaayii nì u-janjaliibi nì bi-dicaŋŋi jítìi līntì nyɔkɔpu.

²³Ŋyunti ŋun bijanjaliibi nìn còom̄ ki jītí Daafiidi nimbiinee, samaa nìn gà dituweel ní. Ní ubɔti dūtì Seedrɔn bùmbiki nì u-yab kɔkɔ, ní ki dūu túĺ kuteeu saŋŋu.

²⁴Usaraaŋakpil Saadooki nì Leefii yab bin tūntí Mpèé dakaauee mun nìn bí bi-kansikin. Leefii yab nìn túutì dakaayee ki yóoǹ ní Abiyataar kíĺ ki bíi ŋáań saraabi áli binib kɔkɔ dāa sáǹ ki nyáń kitiŋin ki dóò.

²⁵Ubɔti bí Saadooki yii: «Gíiǹ Unimbɔti dakaau kitiŋin. Ti-Dindaan yaa súń m-saai, u làá fàtīí gíiǹní-mi. U làá yàntī ḿ fàtīí ká Unimbɔti dakaau nì u-kɔŋkooŋŋu.

²⁶Ama u yaa tí bí yii maa ti fáatiǹ-u, ú ŋá-mi min ní u lèe.»

²⁷Ní ubɔti gíti bí usaraaŋakpil Sadooki yii: «Aa káaa? Nín̄ gítí mmɔŋki nì ŋgbansɔŋfi sii nì a-jipɔɔn Ayiimaasi nì usaraaŋakpil Abiyataar nì u-jipɔɔn Yoonatan.

²⁸Man làá nīn bí kuteeun laakin Jɔɔdan buŋŋu kaa nyóò binib còom̄ ki dùtēe ki cí ni-kansikin ubɔ ń dāan̄ kí tùkù-mi tin bíi jītée.»

²⁹Niinee ní Saadooki nì Abiyataar fātìi gíiǹ Unimbɔti dakaau Jeerusaleem ní ki gbíntì niin.

³⁰Daafiidi nìn dàb̀ ɔliifi sufii jool pu ki sūǹ. U nìn dū ŋŋaabu ki bīiǹ u-nimbiin kí dàkà u-nimbaaku, ní ki còom̄ fám kaa táká anaataka. U nì bin nìn nóóyee mun nìn dū iŋaabu ki bīiǹ bi-nimbiiŋyi ki dàb̀ dijool ki sūǹ.

³¹Bi dɔ́miń ki tùkū Daafiidi yii: «Ayiitoofeel kútì Abisaloom nì u-yab bin fōō dibeelee pu.» Ní Daafiidi mēē yii: «M gbāam̀-si m-Dindaan, yàntī Ayiitoofeel saŋkii kɔkɔ ń taa tɔ̄ ditundi.»

³²Ŋyunti ŋun Daafiidi dàb̄ ki bàn̄ dijool yilpu kúnti kunti laakin bi jáaḿ Unimbɔtee, ní u ká uarkitiija Usayii, u-saŋkiliu còom̄ ki túŋkí-u. Tiwan tin u nìn pēēyee nìn cátì ní u-yil táká ntam.

³³Ní Daafiidi bí-u yii: «A yaa dɔ́miń m-cee, a làá kpántí-mi digìńdi ní.

³⁴Ama nín̄ gítí kitiŋin Abisaloom cee kí tùkù-u yii: <Ti-baa ubɔti, m dɔ́miń kí nīn kíǹ ki bí a-cee ní. Dooooyee m nìn tūǹ ditundi ki tìì a-baa ní, ama kɔŋkɔnnee sii ní m làá tɔ̄ ditundi kí tīī.>» Niinee a ŋūǹ kí pìin̄ Ayiitoofeel saŋkii kí tūtuǹ-mi.

³⁵Bisaraaŋakpilib Saadooki nì Abiyataar bí niin kí tūtuǹ-si. Tin kɔkɔ yaa bíi jítì dibeecindinee, á māafì-bi.

³⁶Saadooki jipɔɔn Ayiimaasi nì Abiyataar jipɔɔn Yoonatan bí bi-cee niin. Tin yaa pée bíi jītée, ní tɔ̄ń-bi bí dāá tùkù-mi.

³⁷Ŋyunti ŋun Daafiidi saŋkiliu Usayii cá kí kɔ́ Jeerusaleem tiŋkinee, Abisaloom mun dòoń kí kɔ́ dee.