Read Ntcham 2 Samuel 17 Bible Online

2 Samuel 17 - Ntcham bible

2 Samuel 17

¹Ayiitoofeel bí Abisaloom yii: «Yàntī ḿ lēē bininjab kutukub saalaa nì bili. M làá jà Daafiidi boon kunyeeu nee.

²M làá cùú túuǹ-u ŋyunti ŋun u gīī mpɔn kaa ti bí-uee, ní ḿ fàaǹ-u ní u-yab bin nóó-uee ń sāǹ kí wàatī-u. Niinee ubɔti yaa kíǹ u-babee ní ḿ kpɔ̀-u.

³M yaa ŋá mimmee ní ḿ gíiǹní samaa kɔkɔ a-jandi pú. Di sá yii unil un a nyàab̀ kí kpɔ̀ee yaa kpíìyee, binib kɔkɔ làá fàtīí gítiń a-jandi pú ní kí nīn bí ŋgbansɔŋfin.»

⁴Abisaloom nì Isirayeel yab kpilib kɔkɔ nìn ká yii nlandɔkɔee sá mmɔnti.

⁵Ní Abisaloom bí yii: «Yíiḿmaan uarkitiija Usaayii tí pīlifì u mun nín cáá tin ki làá tùkù-tee.»

⁶Ní Usaayii nín cá Abisaloom cee, ní Abisaloom bí-u yii: «Kpèè Ayiitoofeel nín lī puee sèé. Tí ŋá u nín lī pueeyaaa, tí taa ŋá? Sii dàkafī yii ba?»

⁷Ní Usaayii kíí Abisaloom yii: «Min bí nee, Ayiitoofeel saŋkii kaa làá tɔ̄ ditundi.

⁸Sii a-ba nyí a-baa nì u-naacimbi pu. Bi sá bibaatandambi ní. Bi fōō mbum kii digbiŋgbil din biki an cúú kupɔɔunee ní. A-baa sá ujanjal ní. Waa làá kíí kí dòon̄ u-yab cee kunyeeu nee.

⁹Kɔnampu nee, u kɔ́ ki bál̀ mbòó ŋubɔn, àá laaba. Kujaau yaa kíĺ ní bi bíi kù ti-yabee, samaa làá gbìl̄ ní kí lì yii: <Bi jáń ki pɔ́ɔkiǹ Abisaloom janjaliibi.>

¹⁰Niinee, báà ujanjal yaa cáá dipɔbil kii gbikintee, see u-wunti ń yɔ̀tī. Kun puee Isirayeel yab kɔkɔ nyí a-baa nín sá ujanjakpaanee, ní u-janjaliibi mun sá bibaatandambi.

¹¹Kpèè tin m cáá ki làá sāŋkì-see. Kpāfì Isirayeel yab kɔkɔ a-cee kí yòon̄ Daani tiŋki ŋgan pú kí cáá sāā Beerseeba tiŋki ŋgiil pú. Bi máaǹ kí nīn wīikí kii tiŋku gbandi bulee, ní sii a-ba ń lìntī nyɔkɔpu ní cù kujaau.

¹²Báà laakin ní u yaa bée, see tí bà-u ní kí kpátí kí bìin̄ u-pu kii dimalindi nín bìintí kitiŋ pu puee. Taa làá yàntī úǹ Daafiidi nì u-nib ubɔbɔ ń ŋmátí.

¹³U yaa sáǹ ki kɔ́ kitiŋ kibanee, Isirayeel yab kɔkɔ làá cáań iŋmii ní tí dáaĺ kitiŋee kí cáá tɔ̄ mbunni. Niinee baa dāa gíti kāntí kitaŋkpalii kitiŋ gbantin.»

¹⁴Abisaloom nì Isirayeel yab kɔkɔ lī yii: «Usaayii saŋkii ŋān̄ ki jítiǹ Ayiitoofeel yai.» Di sá yii ti-Dindaan nìn lēē ki yóoǹ yii Ayiitoofeel saŋkii ń ŋá fám, i mun di bàà ŋān̄. U nìn ŋá míǹ kí cáań mbusu kí tɔ̄ Abisaloom pu ní.

¹⁵Ní Usaayii tùkū bisaraaŋakpilib Saadooki nì Abiyataar yii: «Kpèè Ayiitoofeel nín sáŋkì Abisaloom nì Isirayeel kpilib puee, nì ma mun nín sáŋkì-bi puee.

¹⁶Kɔŋkɔnnee, tɔ̄maan bí tùkù Daafiidi malaa yii ú taa dòon̄ Jɔɔdan tantakalin. U máaǹ kí dùtī Jɔɔdan buŋŋu, an yaa kaa sá míǹ, Abisaloom làá kpɔ̀ kí céetí u nì u-yab.»

¹⁷Joonatan nì Ayiimaasi nìn yú Eeni-Roogeel ki cí. Usapɔɔn ubɔ nìn cāabìń tibɔti tin bi làá dūú nàatī ubɔti Daafiidee. Di sá yii bíǹ kaa nìn ŋūǹ kí kɔ́ kitiŋin bí ká-bi.

¹⁸Ama kinaacimpɔmbiki kiba nìn ká-bi ní ki cūtìi tùkū Abisaloom. Ní binib bilee búntì malaa malaa ki bàn̄ Bawuriim tiŋkin ki kɔ́ uninja ubɔ pu. U nìn cáá lɔkɔ u-cindi, ní bi kɔ́ lɔkɔee poon.

¹⁹Kudiidaan nimpuu nìn dū tanti ki bīiǹ lɔkɔee pu ki dū asubil ki díntì, bí taa béé yii tiba bí niin.

²⁰Ní bin Abisaloom túnnée bāań ki kɔ́ unimpuee dumpu ki bālifì-u yii: «Ayiimaasi nì Joonatan bí la?» Ní u kíí-bi yii: «Bi dūtì kibùmbiki ki búntì.» Ní bi cūtìi nyàab̄-bi kaa ká-bi, ní ki fātìi nín gítí Jeerusaleem.

²¹Bi búntèe ní Yoonatan nì Ayiimaasi nyáń lɔkɔn ki cūtìi tùkū Daafiidi yii: «Yīkìmaan kí dùtī Jɔɔdan buŋŋu malaa, di sá yii Ayiitoofeel nín tīī isaŋkee, bi nín bí yii ní ŋá puee dee.»

²²Dicilpu niinee ní Daafiidi nì u-yab kíĺ ki bíi dùtī Jɔɔdan buŋŋu. Kutaa tin lì yii kù wúntée, bi-kɔkɔ dūtì ki dóò, báà uniseen kaa kíǹ.

²³Ayiitoofeel nín ká yii baa dū u-saŋkii ki túń ditundee, ní u dū dimaŋgakal ki páaǹ u-maŋki pu ki jɔ́m̀ ki kāl̀ ki nín kùǹ u-tiŋkin. U bàn̄ee ki tīī u-dicaŋkun yab marab, ní ki lúntì u-ba ŋŋmii ki kpíì. Bi nìn síb́-u u-baa kaakulin.

²⁴Daafiidi nìn dūu bàn̄ Maanayiim[29]. Ŋyunti gbantee, Abisaloom nì Isirayeel yab janjaliibi kɔkɔ nìn bíi dùtī Jɔɔdan buŋŋu.

²⁵Abisaloom nìn lēē Amasaa ki dū-u ki kpántì bijanjaliibi kpiliu ú fōō Joowaab yil. Amasaa gbanti baa nìn sá uisirayeelja ní bi yíì-u Yeeteer. U nìn cáá Naaki bisal Abiigal, Seeruya naal, Joowaab na.

²⁶Abisaloom nì Isirayeel yab nìn gāā bi-janjanaapaal Galaadi tiŋkin ní.

²⁷Daafiidi nín bāań Maanayiim tiŋkinee, Naasi jipɔɔn Soobii un nyánní Amɔn yab tiŋyil Raabee nìn dɔ́miń ki kútì u-pu. Bin nìn nóó-uee di sá Amiyeel jipɔɔn Makiir un nyánní Loo-Deebaar tiŋkinee nì ugalaadija Baarsilaayi un nyánní Roogeeliim tiŋkinee.

²⁸Binibee nìn cáań tiwandooŋkaal nì ndoo pu satab, asambil nì mbamu nì bilee nì ɔɔji nì ŋyim nì tijimpin tin bi púĺee nì atùun nì atùmman

²⁹nì tisiil nì nnaabiim nì inaa nì ipii waagaasiibi ki cáań ki tīī Daafiidi nì u-yab bin nìn nóó-uee bí jī. Di sá bi nìn lī bi-neen yii: «Kɔnampu, digìńdi nì ŋkùm nì nnyinnyoo bàn̄ binib nee kuteeun.»