Read Ntcham 2 Samuel 20 Bible Online

2 Samuel 20 - Ntcham bible

2 Samuel 20

¹Unifan ubɔ nìn bí niin bi yíì-u Seeba. U nìn sá Beenjameen naakookun ní bi yíì u-baa Biikirii. Kijapaayee nìn búń ŋyin ki lī yii: «Tiba kaa bí ti nì Daafiidi kansikin! Mpèé ŋubɔ kaa bí ti nì Jeesee jipɔɔn nee kansikin! Isirayeel yab, báà ŋma ń nīn gítí u-dumpu[31].»

²Niinee Isirayeel yab yíkìi dū Daafiidi ki fá ní ki kíǹ ki nóó Seeba. Ama Juuda yab nìn gbíntì ki bí Daafiidi cee. Bi nìn céeǹní-u doooo Jɔɔdan áli Jeerusaleem.

³Daafiidi bàn̄ ki kɔ́ u-beecindin Jeerusaleem. U nìn yíiń u-nimpuwaamu saalaa mun u nìn dūu kāaǹ bí nīn kpèé dibeecindee ki cáá-mu ki kɔ́ǹ kudii kubɔn bi cí-bi. U nìn tìì-bi tin kɔkɔ pée máaǹee, ama waa nìn gíti dɔ̀ bi-cee. Bi nìn pīī míǹ ní ki dāa sāā bi-kúm dal. Bi nìn bí kii bikpiipoobee, ama ní bi-cal kaa kpíì.

⁴Ubɔti bí Amasaa yii: «Á kpāfì Juuda janjaliibi kɔkɔ. M tīī-si iwiin ita a nì bi ń dāan̄ m-cee doo.»

⁵Amasaa búntì kí ŋá kii ubɔti nín bí yii ú ŋá puee, ama ní ki jítì iwiin in ubɔti yóoǹ-uee pu.

⁶Ní ubɔti bí Abisayi yii: «Kɔŋkɔnnee, Biikirii jipɔɔn Seeba làá kɔ́ǹ-ti digìńdi kí jītíǹ Abisaloom. Yòon̄ bijanjaliibi bin cí-mee kí jà Seeba boon, ú taa sāǹ kí kɔ́ ntimu mun poon bi máń digundi ki māntìi túee kí ŋmátí.»

⁷Ní Joowaab janjaliibi nì Keereeti yab nì Peeleeti yab, nì bibaatandambi kɔkɔ nyáń ki páaǹ Abisayi boon kí jà Biikirii jipɔɔn Seeba boon.

⁸Bi bàn̄ ki yú ditaŋkpakpaandi din bí Gabawɔn caŋinee, ní Amasaa bāań bi-cee. Joowaab nìn yú ki pēē u-janjawanti ki gbìn̄ gbaja kitàataajiki fúuń kijitooun ki lúń. Ŋyunti ŋun Joowaab bíi sútíi pìl̀-uee ní u-tàataajiki nyáń ki lítì.

⁹Ní Joowaab jáam̀ Amasaa yii: «M-nabiki, a pɔ̄ɔ̄ tiŋanaaa?» Ní u dū u-ŋaŋgiil ki cúú Amasaa nyimpul ki kpàl̄-u.

¹⁰Amasaa kaa nìn gíiǹ u-landɔkɔŋu kitàataajiki kin nìn kā Joowaab ŋaŋganee pu. Joowaab nìn dū kitàataajikee ki sāā Amasaa pool ní ina nyáń ki dɔ̄ kitiŋ ní u kpíì. Waa nìn gíti kútì-u nliliitiim. Míǹ boonee ní Joowaab nì u-nabiki Abisayi nìkī ki bíi jì Biikirii jipɔɔn Seeba boon.

¹¹Joowaab janjaliu ubɔ nìn kā ki kɔ́ĺ utaŋkpiil Amasaa ki lì yii: «Un kamaa bí Joowaab nì Daafiidi jandee ń páań Joowaab boon.»

¹²Amasaa nìn dōoǹ ki bíntì u-fatikuu poon nsan kansikin. Ujanjalee nìn ká yii binib dòoń ki yūlifí niin. Niinee ní u fùn̄ dinikpilee ki cáa bíl̀ kusaau kubɔn, ní ki dū sata ki bīiǹ di-pu.

¹³U nín ŋá mimmee ní binib kíǹ ki dòoń ki jītí kaa ti yūlifí, ki nóó Joowaab ki jì Biikirii jipɔɔn Seeba boon.

¹⁴Joowaab nìn yìin̄ Isirayeel naakɔti timmu kɔkɔn ki tin bàn̄ Abeel-Beeti-Maaka. Beerii yab kɔkɔ nìn kpáfì ki nóó-u.

¹⁵Joowaab nì u-janjaliibi nìn māntìi tú Abeel-Beeti-Maaka tiŋki kin poon Seeba nìn bée. Bi nìn fāā ntam ki kpúkuǹ ki tin sāā digundi, ní bijanjaliibi kíĺ ki bíi gbì ki tíkití digundee nyeel dí lítí.

¹⁶Unimpu ubɔ nìn bí kitiŋ gbanti poon ki cáá iciin ní ki téeń yii: «Pīlifìmaan, pīlifìmaan. Tùkùmaan Joowaab yii ú sútiń kí pìlīń-mi ḿ sòoǹ nì u tiba.»

¹⁷Ní Joowaab sútìi pìl̄-u ní u bālifì-u yii: «Sii di sá Joowaabaaa?» Ní Joowaab kíí-u yii: «Iiin, an sá man.» Ní unimpuee bí-u yii: «Á pīlifì tibɔti tin man a-tɔntɔnliu làá sòoǹ nì see.» Ní Joowaab bí-u yii: «M pílifí.»

¹⁸Ní u bí yii: «Bi lì dilìmbil diba yii: <Bàlifì isaŋki Abeel-Beeti-Maaka yab cee, a-bɔti kɔkɔ làá ŋāŋkì.>

¹⁹Ti sá ŋgbansɔŋfi nib ní ki yú deedee Isirayeel tiŋkin. Ní sii dɔ́miń kí kúntí kitiŋ kin sá Isirayeel tiŋkpaammu kansikin kibee! Ba pu ní a nyàab̀ kí kúntí tiwan tin ti-Dindaan yèe?»

²⁰Ní Joowaab bí yii: «Kpataaa, maa pée cáá nlandɔkɔ kí nàan̄ àá kí kúntí tiba nì tiba!

²¹Kaa sá kitiŋ ní m là kí kúntí, ama unil ubɔ ní m nyàab̀. U sá Eefiraayiim jooŋŋi pu timmu kiban, bi yíì-u Seeba, Biikirii jipɔɔn. U yíkì ki bíi jáà nì ubɔti Daafiidi. Ní nyāntímaan úǹ baba kí tīī-mi ní ḿ yàntī ni-tiŋki.» Ní unimpuee bí yii: «An ŋān̄, ti làá tìl̄ u-yil kí dūú lúkuń-si digundi boon.»

²²Unimpuee nín gítí u-yab cee ki tīī-bi isaŋkimɔnti. Ní bi tīl̀ Seeba yil ki dūu lúkuń Joowaab. Ní u búń ŋyin ní bi yāntì kitiŋee, ní báà ŋma nín kùǹ u-dumpu. Joowaab úǹ nìn nín gítí Jeerusaleem ubɔti cee.

²³Joowaab di nìn sá Isirayeel yab janjaliibi kɔkɔ kpiliu. Yooyadaa jipɔɔn Beenaya di nìn sá Keereeti nì Peeleeti yab kpiliu.

²⁴Adooram di nìn kpòotī ayumbutuun ŋin ŋin pɔ̄ɔ̄yee, Joosafaati jipɔɔn Ayiiluudi di nìn sá ubɔti soobaabuu.

²⁵Seeba di nìn sá ugbaŋŋmal. Saadooki nì Abiyataar di nìn sá bisaraaŋakpilib.

²⁶Daafiidi nìn gíti cáá usaraaŋal ubɔ, bi nìn yíì-u Iira, u sá Yayiir dicaŋkun.