Read Ntcham 2 Samuel 21 Bible Online

2 Samuel 21 - Ntcham bible

2 Samuel 21

¹Daafiidi yuntiŋuee, ŋkùm miba nìn nyáń ki sāā abin ata. Ní Daafiidi bālifì ti-Dindaan, ní u kíí-u yii: «Saayuul nì u-dicaŋkun yab pu ní ŋkùmee nyáń, kun puee bi nìn ŋá ikpiti ki kūū Gabawɔn yab.»

²Ní ubɔti yíiń Gabawɔn yab ki sòon̄ nì bi. Gabawɔn yab kaa nìn sá Isirayeel yab, ama bi sá Amɔɔr yab bin Isirayeel yab nìn kūū ki kíǹee ní. Isirayeel yab nìn pūtì ki pōoǹ-bi yii baa làá kpɔ̀-bi[32]. Dineendi din Sayuul nìn cáá Isirayeel nì Juuda yab puee nìn yāntì u nyàab̄ kí kpɔ̀ kí céetí-bi.

³Daafiidi bālifì-bi yii: «Ni là ḿ ŋá ba kí tīī-ni ní? Ḿ ŋá mana kí ŋāŋkì tikpitil tin Saayuul ŋá-nee, án nín làá ŋá pu ní mèè kí bìin̄ ti-Dindaan nibul puee ní?»

⁴Ní Gabawɔn yab kíí-u yii: «Ti nì Sayuul nì u-dicaŋku kansikin bɔtee, an kaa sá animbil àá sindaariya àá Isirayeel yab ubɔ kúm di làá ŋāŋkì-tì.» Ní Daafiidi fātìi bí-bi yii: «Lìmaan kun ni baasii lèe, m làá ŋá kí tīī-ni.»

⁵Niinee ní bi bí ubɔti yii: «Saayuul nìn là kí kúntí-ti. U nìn bɔ́ntì kí kpɔ̀ kí céetí-ti báà ubɔ ń taa kíń Isirayeel tiŋki kɔkɔn.

⁶Bí cúú u-dicaŋku poon binib biluli kí tīī-ti ní tí cáá-bi kí cɔ̀b̄ ti-Dindaan nimbiin, Giibeeya tiŋkin. Niin ní Sayuul un ti-Dindaan nìn lēēyee nìn kóò.» Ní ubɔti kíí-bi yii: «M làá cáań an nibee kí tīī-ni.»

⁷Ama ubɔti nìn fīī Joonatan jipɔɔn Meefiibooseeti, Sayuul naantiiu. Daafiidi nìn pūtì ti-Dindaan ki pōoǹ u nì Joonatan bɔɔtiiku pu[33].

⁸Ama u nìn nyàabìń Arimooni nì Meefiibooseeti, Aya bisal Riispa jipɔmbi bili bin u nìn màl̄ Sayuulee, nì Saayuul bisal Miikaal jipɔmbi biŋmoo bin u nìn màl̄ Barsilayii jipɔɔn Adriyeel un sá Meeyooba tiŋkinee.

⁹U nìn dū-bi ki tīī Gabawɔn yab, ní bíǹ cáá-bi ki cɔ̀b̄ dijool pu ti-Dindaan nimbiin. Binib bilulee nìn kpíì dicilpu. Ŋwimpeepeekaa ŋun bi bōoǹ ki bíi cēē ɔɔjee ní bi nìn kūū-bi.

¹⁰Aya bisal Riispa nìn dū kpɔsata un u nìn lōōyee ki dāntì ditaŋkpakpaandi pu, ní ki kā niin kí yòon̄ ŋyunti ŋun bi kíĺ ki bíi cēē ɔɔjee kí cáá sāā ŋyunti ŋun utaa kpákatìńee. Ŋwiimpuee, u nìn jì inoon ń taa jī bi-nanti, ní kunyeeuee, u jì ipeel.

¹¹Ní bi cūtìi tùkū ubɔti Aya bisal Riispa, Sayuul nimpuwaaki nín ŋá puee.

¹²Niinee Daafiidi yāntì bi yōoǹní Sayuul nì u-jipɔɔn Joonatan kpabiŋ Yaabeesi yab cee Galaadi tiŋkin. Di sá yii Fiiliistii yab nín nìn jáń ki pɔ́ɔkiǹ Saayuul Giilboowa tiŋkinee, bi nìn cáá Saayuul nì Joonatan ki lúntì Beeti-Seeyan paaŋŋu pu, ní Yaabeesi yab cūtìi sākatìń bi-wunti.

¹³Daafiidi nìn yōoǹní Saayuul nì Joonatan kpabiŋ niin ki cáańee ki dūu kpáfì nì bin bi nìn cɔ̀b̄ee yaŋ pu.

¹⁴Ní bi cáá bi-kpabiŋ nì Saayuul nì Joonatan yaŋ ki bíl̀ Saayuul baa Kiisi kaakulin, Seera timbiliikin, Beenjameen tiŋkin. Bi ŋá kii ubɔti nín tīī mara bí ŋá puee ki dóòyee ní Unimbɔti súń kitiŋ gbanti saai.

¹⁵Kujaau kubɔ gíti nyáń Fiiliistii yab nì Isirayeel yab kansikin. Daafiidi nì u-janjaliibi nìn sīntì kí já nì Fiiliistii yab. Bi bí dikɔ̀ndi poonee ní Daafiidi gīī.

¹⁶Niinee ní Iseebi-Beenoobi un sá Arafa naakookunee bíi pùlifī ki lì yii u làá kpɔ̀ Daafiidi. U nìn gbìn̄ kijipɔŋ ki ŋúb́ kikpaŋ. Kikpaŋee nyɔkɔpu nìn sá tasa kúti ní ki nyìm̀ kii kiiloobi bita nì ipaa.

¹⁷Ama Abisayi un na bi yíì Seeruyee dɔ́miń ki jòoń ubɔti ní ki kūū ufiiliistiija. Niinee Daafiidi janjaliibi pūtì ki bí Daafiidi yii: «Aa ti làá pée nóó-ti tí cù dikɔ̀ndi, án nín làá ŋá pu ní Isirayeel walifiŋu ń taa kpúee.»

¹⁸An yúntì boonee ní dikɔ̀ndi diba nyáń Fiiliistii yab nì Isirayeel yab kansikin Goobi tiŋkin. Niin ní Sibeekayii un sá Usa tiŋkinee kūū Saafi un sá Arafa dicaŋkunee.

¹⁹Dikɔ̀ndi diba tí pōō Isirayeel yab nì Fiiliistii yab kansikin, Goobi tiŋkin. Min bí nee, Yaarii jipɔɔn Eelanan un sá Beetileem tiŋkinee kūū Gooliyaati ugaatija. U-kpaŋki dɔŋu nìn gbìfì kii tikúti tin bisataluliibi cōontí ki lù satabee ní.

²⁰Dikɔ̀ndi diba mun nìn tí nyáń Isirayeel yab nì Fiiliistii yab kansikin Gaati tiŋkin. Kujawɔkɔu kubɔ nìn bí ki sá Arafa dicaŋkun. Ku nìn cáá ŋŋambiyaamu muluu ŋŋal kamaa pu nì ntaŋambiyaamu muluu ditaal kamaa pu, mu-kɔkɔ nìn kpáfì mmuŋku nì munaa.

²¹U nìn kpēē ki sɔ́kɔ́ Isirayeel yab. Ní Daafiidi maan Sama jipɔɔn Yiinatan kūū-u.

²²Daafiidi nì u-janjaliibi nìn kūū Fiiliistii janjaliibi binaa gbanti. Bi nìn sá Arafa dicaŋkun, Gaati tiŋkin.