Read Ntcham 2 Samuel 22 Bible Online

2 Samuel 22 - Ntcham bible

2 Samuel 22

¹Daafiidi dū anyɔɔbun nee ki gāā nlan ki nyɔ́ŋkì ti-Dindaan ŋyunti ŋun u nyántì-u u-nannanliibi kɔkɔ, cilinjee Saayuul ŋaanee.

²U lī yii: Ti-Dindaan di sá man taŋkpanaakooku, úǹ di sá man guŋkpaandi lɔkɔl nì man fiiliu.

³U sá man Nimbɔtiu ní ki sá ntaŋkpalɔkɔ ŋun poon m sáń ki kóòyee. Úǹ di sá man gbampɔɔl ní ki sá man jajil pɔŋŋu, ti-Dindaan di sá man balilaŋki. Úǹ ní m sáń ki kóò ní u fìil̄-mi tipɔmbɔti dambi ŋaan.

⁴Tí nyɔ̄ŋkì ti-Dindaan! M kúuǹ ki yíiń ti-Dindaan ní u yāntì m jáń ki pɔ́ɔkiǹ m-nannanliibi.

⁵Ŋkúm kusakai nìn fìn̄-mi, dinàandi nyiŋgbeeŋŋu nìn yōoǹ-mi ki dóò.

⁶Ditaŋkpiilin laaŋku nìn māntìi tú-mi, ní ŋkúm talinti píĺ ki dɔ̄ m-nimbiin.

⁷M kúuǹ ki yíiń ti-Dindaan m-nimbinaamandi poon. M fáá mbiil m-Nimbɔtiu ń jòoń-mi. U gbìl̄ m-neen pu doooo u-diikun ní m-kuŋkuuntii kɔ́ u-tafalin.

⁸Niinee ní kitiŋ fōō dijinjikil ki cīŋkì, ní ajoon nyeel cīŋkì. Di sá yii Unimbɔti gíí diŋuul.

⁹Ŋŋminyiim nìn nyēē u-maŋfataabuŋyin, ní aŋmilimbil ŋin nàantée nì amɔsiŋkoon nyēē u-nyɔkɔn.

¹⁰Ní u cúú kutagbɔŋu ki cátì ní ki kpákatìń, ní ditagbandi din bɔ̀ǹee bí u-taaŋi taapu.

¹¹U kāl̀ tiwannáaŋkaal tin cáá ifeenee pu ki ŋàan̄, ní ki dū kubuŋu ki kpántì ifeen ki kíǹ ki dàn̄.

¹²Dibɔmbɔndi ní u dūu bīiǹ u-ba pu ní atagban ŋin gbìfì nnyim gbí ŋi-poonee māntìi tú-u.

¹³Ŋwalifi nìn bí u-nimbiin, ní atagban jītí ki sá ataanyiŋkumbil nì amɔsiŋkoon.

¹⁴Ti-Dindaan sòon̄ní doooo yilpu kii ntaateenteenee, Yilpu Fɔ́ŋŋŋ Nimbɔtiu yāntì bi gbìl̄ u-nyɔkɔ pu.

¹⁵U tɔ́ u-piiŋyi ní u-nannanliibi yàl̄, ní u dū itaaŋmɔŋmɔ ki ŋmíntì bi-pu ní bi sáǹ ki kátì.

¹⁶Ti-Dindaan tāā ki bíikì u-nannanliibi pu, ní ki fōō bi-pu diŋuul, an pu ní tiŋku poon nyim fóotì, ní kitiŋ nyeel cúu bīitì ki dɔ̄.

¹⁷Ní ti-Dindaan kāl̀ doooo yilpu ki tāntì u-ŋal ki cúú-mi ki nyántì inyiŋfi taapu.

¹⁸U fōō-mi m-nannanliu un pɔ̄ɔ̄yee ŋaan, m-pulincɔntiibi bin pɔ̄ɔǹ-mee ŋaan.

¹⁹M-nimbinaamandi dal ní bi dɔ́miń ki jáń nì mi, ama ti-Dindaan dɔ́miń ki tíkiǹ-mi.

²⁰U nyántì-mi digìńdin ki tīī-mi dibatɔl. U fīī-mi, kun puee u néeń-mi.

²¹Ti-Dindaan di pàn̄-mi, kun puee m ŋá tin bí deedeeyee. U bīiǹ m-pu kun puee tikpitil tiba kaa táká m-ŋal.

²²M nóó ti-Dindaan saŋŋu nì mbaamɔn, ní kaa fātì m-boon ki tīī m-Nimbɔtiu.

²³M ŋúb́ ti-Dindaan marab kɔkɔ, kaa fātì m-kpaŋkpamboon ki tīī u-bɔkpaaŋi.

²⁴Waa ká m-pu tiba kí wòoǹ-mi, ní m pɔ́ɔǹ m-ba kí taa ŋá ikpiti.

²⁵An pu ní ti-Dindaan pàn̄-mi, kun puee m ŋá tin bí deedeeyee, ní u nyí mun yii m-ŋalii kaa táká ikpiti.

²⁶Ti-Dindaan, bin nóó-si nì dipɔbil dibee, a sí nì bi dipɔbil diba mun ní. Bin bí deedeeyee, a sí nì bi deedee ní.

²⁷A ŋáań bin pɔbiliŋ pīiǹee tiŋan, ama ní ki dàkà bikpitiŋaliibi yii a nyíǹ-bi.

²⁸Di sá yii a fìil̄ dinibul din sīntiǹ di-ba taapuee, ama ní ki sìntīǹ bilambidambi taapu.

²⁹Ti-Dindaan, sii di sá m-fitilau, sii di ŋmíntí-mi ní m-bɔmbɔndi ń wāŋkì.

³⁰M ŋūǹ kí já nì dijanjakitil, kun puee a tútúǹ-mi. M ŋūǹ kí yùkū kí lákatí agun ŋin bi máń ki tú kitiŋee, kun puee man Nimbɔtiu bí m-cee.

³¹Tin kɔkɔ Unimbɔti ŋáańee ŋān̄, ní unil ŋūǹ kí nīn máká u-nyɔɔbundi pu. U sá digbampɔɔl ní ki tīī bin kɔkɔ sáń ki kóò-uee.

³²Ŋma di sá Unimbɔti, an yaa kaa sá ti-Dindaan? Ŋma di sá timbi taŋkpanaakooku, an yaa kaa sá ti-Nimbɔtiu?

³³Úǹ di sá Unimbɔti un tìì-mi mpɔnee, ní ki cátí nsammɔnti ki tìì-mi m còom̄.

³⁴U yàntī m-taaŋi yáb̀ m sáń kii ucaŋkpalimee, ní ki yàntī ḿ jɔ̄m̀ kí tɔ́kɔń ajoon pu tiba ń taa ŋá-mi.

³⁵Waa bífí-mi bi nín jáà puee ŋmaniŋma, ama u yàntī ḿ ŋmā kí dáaĺ butɔbu bun bi dū tasa kúti ki píĺee.

³⁶Ti-Dindaan, a tìì-mi digbampɔɔl din fìil̄-mee, ní a-ŋaŋgiil tíkí-mi, ní a nín tútúǹ-mi puee yāntì m nyáń diyindi.

³⁷Sii puee m ŋūǹ kí dàatī malaa malaa, ní maa tà ki pántí.

³⁸M jì m-nannanliibi ní kí cúú-bi, m yaa kaa nāaǹ-bi maa fàtī m-boon.

³⁹Ní ḿ pɔ̀fì pɔ̀fì-bi ní baa ti ŋūǹ kí yīkì, ní ki kíǹ ki dɔ̄ m-taaŋi taapu fìlfil[34].

⁴⁰A tìì-mi mpɔn ḿ já kujaau, ní ki dù bin yíkíi jáà nì mee ki ŋáań m-taaŋi taapu.

⁴¹A yàntī m-nannanliibi sáń kukunsaŋu, ní ki nàantí bin ná-mee.

⁴²Bi kūuntí ki nyàab̀ dijòońdi, ní ubɔ kpá kí fīī-bi. Bi kúuǹ ki yíiń ti-Dindaan gba, ama waa kíí-bi.

⁴³M jáń ki pɔ́ɔkiǹ-bi ki nàn̄-bi dúsi dusi kii ŋkpɔŋkpɔm min kubuŋu yòontée, ki tà-bi ki ŋmàtifī kii nsanni kpatee.

⁴⁴A fīī-mi ki nyántì anibul ŋin nib nìn yíkì ki jáà nì mee ŋaan, ní ki dū-mi ki ŋá atimbun yidaaŋwu. Anibul ŋin maa nìn nyée kpántì m-naacimbi ki tūǹ ditundi ki tìì-mi.

⁴⁵M tin pée lì yii m wàatī m-nyɔkɔ kí sòoǹee, binaacimbee tātìi gbāaǹ m-nimbiin ki kíǹ ki tɔ́-mi.

⁴⁶Bi-wunti kúù, ní bi nyēeń bi-balilaŋki tiwun jìkì.

⁴⁷Ti-Dindaan bí dimaŋfalin! Tí nyɔ̄ŋkìmaan m-taŋkpanaakooku! Tí pàkàmaan Unimbɔti un di sá m-fiiliuee!

⁴⁸Unimbɔti tútuǹ-mi m jáń ki pɔ́ɔkiǹ m-nannanliibi, ní ki dū atimbun ki ŋá m-taaŋi taapu.

⁴⁹U fīī-mi ki nyántì m-nannanliibi ŋaan. Tiŋman u yāntì m jáń ki pɔ́ɔkiǹ bin jáà nì mee, ní ki fīī-mi ki nyántì tipɔmbɔti dambi ŋaan.

⁵⁰An pu ní, m-Dindaan, m làá nyɔ̄ŋkì-si atimbun kansikin, ní kí gāā ilan kí pàkà a-yindi[35].

⁵¹Unimbɔti tìì u-bɔtiu ajajil ŋin sá akpaanee. U dàkà ubɔti un úǹ u-ba lēēyee nì Daafiidi nì u-naantiibi dineeŋkpaandi kí nīn cáa cá jaanjaan.