Read Ntcham 2 Samuel 24 Bible Online

2 Samuel 24 - Ntcham bible

2 Samuel 24

¹Ti-Dindaan fātìi tí fōō Isirayeel yab pu diŋuul, ní ki lūkutì Daafiidi ń ŋá tin baa lèe. U bí-u yii: «Cùú kàaǹ Isirayeel nì Juuda nib.»

²Ubɔti bí ujanjakpil Joowaab un bí u-ceeyee yii: «Á yìiǹ Isirayeel naakɔti kɔkɔn, kí yòon̄ Daani ŋgiil pú kí cáá sāā Beerseeba ŋgan pú kí kàaǹ binib kɔkɔ ḿ béé bi-wíiŋŋu nyɔkɔm.»

³Ní Joowaab kíí-u yii: «Ti-Dindaan a-Nimbɔtiu ń yàntī dinibul ń bùtī míǹ dilaataal pu, sii ti-baa ubɔti ń ká nì a-nimbiliŋ! Kin ba pu ní ti-baa ubɔti nyàab̀ kí kàaǹ binib ní?»

⁴Nì míǹ kɔkɔee ubɔti nín pée tīī Joowaab nì bijanjakpilib mara uŋyee, míǹ ní u pée ŋúb́. Niinee ní bíǹ kíĺ nsan kí cùú kàaǹ Isirayeel nib.

⁵Bi nìn dūtì Jɔɔdan buŋŋu, ní ki kíĺ ki bíi kàaǹ Arooweer tiŋkin yab nì kitiŋ kin bí ditantakalinee yab. Bi cōom̀ ki jítì Gaadi ki nìkī kí nīn cá Yaseer.

⁶Bi kɔ́ Galaadi tiŋkin ní ki nín cá Itii yab tiŋkin Seedeesi. Bi nìkī ki nín cá Daani-Yaan tiŋkin nì ntimu mun māntìi tú-kèe. Míǹ boonee ní bi kàan̄ Siidɔn yab.

⁷Ní bi nìkī ki nín cá Tiir tiŋki kin bi máń digundi ki māntìi túee poon, nì Eefi nì Kaana yab timmun. Bi yíkì niinee ní ki nín cá Juuda yab tiŋki kin bí Neegeeb bi yíì Beerseebee.

⁸Bi dū iŋmal iwa nì iwiin mmuŋku ní ki yìin̄ Isirayeel nì Juuda tiŋki kɔkɔn ki kàan̄ binib, ní ki fātìi gítìń Jeerusaleem.

⁹Joowaab cáá binib bin bi kàan̄ee wíiŋŋu nyɔkɔm ki tīī ubɔti: Isirayeel yab bin nìn ŋmāntì kí cù kujaauee nìn nyáń kutukub alaataa anii, ní Juuda yab nyáń binib kutukub alaataa aŋmoo.

¹⁰Daafiidi nín kàan̄ binib míǹ ki dóòyee ní u-pɔbil bíi máfí. Ní u bí ti-Dindaan yii: «M ŋá ikpitikpaan. M-Dindaan, dūú pɔ̄-mi. M ŋá kii m sá uwaatee ní!»

¹¹Kutaa wúntì Daafiidi fīntì kutaafaauee, ti-Dindaan sòon̄ nì u-bɔnaatiliu Gaadi un sá Daafiidi saŋkiliuee yii:

¹²«Cùú ká Daafiidi kí tùkù-u yii: <M làá dū ditafadaaldi mita pu kí bíĺ-si, din a yaa lēēyee, díǹ ní m làá dūú dáaĺ a-tafal.>»

¹³Ní Gaadi cūtì Daafiidi cee ki dū tibɔtee ki tùkū-u, ní ki bí-u yii: «A là ŋkùm ń jēetí a-tiŋki pu abin alulaaa, a-nannanliibi ń sāǹ kí jà-si iŋmal itaaa, bìlbil kúm ń jēetí kitiŋ kɔkɔ pu iwiin ita? Dàkafì kí tùkù-mi tin m làá tin tùkù un túnní-mee.»

¹⁴Ní Daafiidi bí Gaadi yii: «M bí kunimbaakpaaŋŋu poon ní... Ama an sɔ́ ḿ kɔ́ ti-Dindaan ŋaan ki jítiǹ ḿ kɔ́ unil ŋaan, di sá yii ti-Dindaan úǹ poon mɔ̄ ní.»

¹⁵Ní ti-Dindaan dū bìlbil kúm ki tɔ́ Isirayeel yab pu, kí yòon̄ kutaafaau gbanti kí cáá sāā ŋwiin ŋun u yóoǹee. Binib bin kpíì dinibul kansikin kí yòon̄ Daani ŋgiil pú kí cáá sāā Beerseeba ŋgan púee nìn sá binib kutukub imuŋku ita nì saalaa ní.

¹⁶Ŋyunti ŋun ntuun bàà tāntì ŋu-ŋal ki túĺ Jeerusaleem tiŋki kí nàan̄-kèe, ní ti-Dindaan kpántì u-landɔkɔŋu ní ki bí ntuun ŋun bíi kù binibee yii: «An ŋmāntèe, gbèen̄ee.» Ŋyunti gbantee ti-Dindaan tuuŋŋu nìn yú ujeebusja Araafina bileegbanaapaal caŋin.

¹⁷Daafiidi nín ká ntuun bíi kù binib mimmee ní u bí ti-Dindaan yii: «Man di ŋá ikpiti, man di yīntì, m-nibul mun ŋá ba? An sá man nì m-dicaŋku tafal ní á dáaĺ.»

¹⁸Ŋwiin gbanti mbaanti ní Gaadi cūtìi ká Daafiidi ní ki bí-u yii: «Jɔ̄m̀ ujeebusja Araafina bileegbanaapaal pu kí mā ti-Dindaan nsaraafan.»

¹⁹Ní Daafiidi nín jɔ́ḿ kii ti-Dindaan nín dī Gaadi pu ki tīī mara puee.

²⁰Araafina kpēēyee ki ká Daafiidi nì u-kàliŋkpilib dòoń u-cee. Ní u nyáń ki túŋkì-bi ní ki tātìi dōoǹ dicincibil ubɔti nimbiin.

²¹Ní ki bālifì yii: «Ba pu ní sii ti-baa ubɔti dòoń man a-tɔntɔnliu cee ní?» Ní Daafiidi kíí-u yii: «M dɔ́miń kí dā a-bileegbanaapaal kí mā m-Dindaan nsaraafan ní. Ti yaa ŋá mimmee, bìlbil kúm min bíi kù samaa nee làá gbèen̄.»

²²Ní Araafina bí Daafiidi yii: «Ti-baa ubɔti ń yòon̄ tin kɔkɔ fáatì-uee kí dūú ŋá saraabi. Kpèè inaa sèé á dūú ŋá saraawɔkaa. Tɔrɔku dɔkpalkaai mun sèé á dūú kpāā ŋŋmi kí wà saraabi.

²³M dū tikɔkɔ ki tīī-si! Ti-Dindaan a-Nimbɔtiu ń fōō a-saraabi.»

²⁴Ama ní ubɔti bí-u yii: «Aayee, m làá dā a-bileegbanaapaal ní kí pà-si kunimbiŋmiiu nín sá puee. Maa là kí dū faalaa wanti kí ŋá saraawɔkaa kí tīī m-Dindaan m-Nimbɔtiu.» Ní Daafiidi pàn̄-u animbil jitɔmbi imuŋku ili nì saalaa dibileegbanaapaal nì inaa pu.

²⁵Niin ní Daafiidi máń ti-Dindaan nsaraafan, ní ki ŋá bisaraawɔkaabi nì mpèé saraabi. Niinee ní ti-Dindaan súń kitiŋee saai, ní bìlbil kúm min jéetì Isirayeel tiŋki puee gbēeǹ.