Read Ntcham 2 Samuel 3 Bible Online

2 Samuel 3 - Ntcham bible

2 Samuel 3

¹Saayuul yab nì Daafiidi yab jaaku nìn yúntì tikpil. Daafiidi nìn mɔ̀tīi kāntí mpɔn ki cá, ama ní Saayuul yab bíǹ mɔ̀tīi pèefī ki cá.

²Daafiidi nín màl̄ mbininjabiyaamu mun Eebrɔn tiŋkinee sɔ̀. U-jipɔŋkpiliu di sá Aminɔn, ní bi yíì u-na yii Ayiinoowaam, u sá Jisirayeel tiŋkin.

³U-jipɔnliliitiu di sá Kiileeyab, ní bi yíì u-na yii Abiigayiil, Naabaal un sá Kaarmeel tiŋkin ki kpíìyee nimpuu. U-jipɔntataatiu di sá Abisaloom, ní bi yíì u-na yii Maaka, Geesuur bɔtiu Talimayi bisal.

⁴U-jipɔɔn unanaati di sá Adooniyawuu, ní bi yíì u-na yii Agiiti, ní u-jipɔɔn uŋmooŋmooti sá Seefatiya, ní bi yíì u-na yii Abitaal.

⁵U-jipɔɔn ululuuti di sá Yitireeyam, ní bi yíì u-na yii Eegila, Daafiidi nimpuu ubɔ mun. Daafiidi jipɔmbi bin u nìn màl̄ Eebrɔn tiŋkinee dee.

⁶Ŋyunti ŋun Saayuul yab nì Daafiidi yab nìn bí ki jáàyee, Abineer úǹ nìn mɔ̀tīi kāntí mpɔn Saayuul yab kansikin.

⁷Saayuul nìn cáá ubɔnti ubɔ bi yíì-u yii Riispa ní ki yíì u-baa yii Aaya. Ní Isi-Booseeti bí Abineer yii: «Ba pu ní a dōoǹ nì m-baa bɔɔn ní?»

⁸An bɔtee nìn yāntì Abineer fōō diŋuul ŋkpitim pu, ní ki bí Isi-Booseeti yii: «M sá kibɔkɔ ki pá Juuda yab boonaaa? Doooo nee, maa pée nyáń a-baa cindin yab nì u-nabiyaamu nì u-bɔɔbi boon. M mɔ̀n̄ a-pu á taa kɔ́ Daafiidi ŋaan, ní díǹ nee, a bí ki wòoǹ-mi unimpu nee puɔɔ!

⁹Unimbɔti ń dáaĺ m-tafal ŋkpitim pu, m yaa kaa ŋá min ti-Dindaan pōoǹ yii u làá ŋá kí tīī Daafiidee!

¹⁰Di sá yii ti-Dindaan pūtì yii u làá fōō Saayuul dicaŋkun yab ŋaan dibeel. U làá wàan̄ Daafiidi beel Isirayeel nì Juuda timmu pu, kí yòon̄ Daani ŋgan pú kí cáá sāā Beerseeba ŋgiil pú.»

¹¹Isi-Booseeti kaa nìn ŋúń ki gātì Abineer báà dinyɔɔbundi, kun puee u nìn fàŋkí-u.

¹²Ní Abineer tú binib Daafiidi cee bí tùkù-u yii: «Ŋma di yì kitiŋ nee ní? Ŋá mpèé nì man, ní ḿ tūtuǹ-si á kóoǹ Isirayeel yab kɔkɔ kí páań a-boon.»

¹³Ní Daafiidi kíí-u yii: «M làá ŋá mpèé nì si, ama kí wàatī á dāan̄ kí ká-mee, á péé péé kí dū m-nimpuu Miikaal, Saayuul bisal kí tīiń-mi[9].» Niinee a ŋūǹ kí dāan̄ kí ká-mi.

¹⁴Ní Daafiidi tú binib Saayuul jipɔɔn Isi-Booseeti cee bí tùkù-u yii: «Dū m-nimpuu Miikaal kí tīiń-mi, di sá yii m dū Fiiliistii yab kuncooti dilaataal ní ki pàn̄ u-pu kucootiiu.»

¹⁵Niinee Isi-Booseeti fōoń-u u-cal uliliiti, Layiisi jipɔɔn Paltiyeel cee.

¹⁶Ní u-cal céeǹ-u ki pá u-boon ki sūǹ ki tin bàn̄ Bawuriim. Niinee Abineer bí-u yii ú nīn gítí u-dumpu ní u nín gítí.

¹⁷Abineer kíĺ ki bíi sòoǹ nì Isirayeel tindaŋkpilib yii: «An yúntì ni nín bíi nyàab̀ yii Daafiidi ń nīn sá ni-bɔtiuee.

¹⁸Toooo, ŋyunti bāań ní ŋá tiba. Di sá yii ti-Dindaan sòon̄ Daafiidi pu yii: <M-tɔntɔnliu Daafiidi pu ní m làá dī kí fīī Isirayeel m-nibul kí nyāntí Fiiliistii yab nì bi-nannanliibi bin kɔ kíǹee ŋaan.>»

¹⁹Abineer nìn sòon̄ nì Beenjameen naakookun yab mun. Boonee ní u nín cá Eebrɔn ki tùkū Daafiidi u nì Isirayeel yab nì Beenjameen naakookun yab kɔkɔ nín sòon̄ ki gbìlīǹ tɔb ki yóoǹ miŋyee.

²⁰Bininjab mmuŋku di nìn céeǹ Abineer ní bi dūu bàn̄ Daafiidi cee Eebrɔn tiŋkin. Daafiidi nìn ŋá tican ki fōō-bi.

²¹Ní Abineer bí-u yii: «M làá cùú kóoǹ Isirayeel yab kɔkɔ kí páań sii ti-baa ubɔti boon. Bi làá ŋá mpèé nì si, ní á jī dibeel an kɔkɔ pu kii a nín là puee.» U sòon̄ míǹ ki dóòyee ní Daafiidi pú-u nsan ú nīn kùǹ, ní u nín kùǹ nì ŋgbansɔŋfi.

²²Míǹ boonee Joowaab nì Daafiidi janjaliibi dūu bāań. Bi nìn cūtì kujaau ki jáń ki fōoń tigaajawan tikpil. Ŋyunti gbantee, Abineer kaa nìn gíti bí Daafiidi cee Eebrɔn, di sá yii Daafiidi nìn yāntì u fātìi nín kùǹ nì ŋgbansɔŋfi.

²³Joowaab nì u-janjaliibi kɔkɔ nín nyánní kujaau ki bāańee, ní bi tùkū-u yii: «Neer jipɔɔn Abineer dɔ́miń ki ká ubɔti ní u yāntì u nín kùǹ nì ŋgbansɔŋfi.»

²⁴Ní Joowaab nín cá ubɔti cee ki bí-u yii: «Ba pu ní a ŋá mimmee? Abineer dɔ́miń a-cee ní a yāntì u fātìi nín kùǹ nì ŋgbansɔŋfaaa?

²⁵Kéè sii a-ba nyí Neer jipɔɔn Abineer gbantaa! U dɔ́miń ki kíil̀-si, kí béé a-filiŋfeetii kɔkɔ ní.»

²⁶Joowaab nyáń ubɔti ceeyee ní ki tú binib bí jà Abineer boon. Bi nìn jìn̄ ki cúú-u Siira nyimbɔbil caŋin ní ki fātìi gíiǹní-u Daafiidi kaa nyí.

²⁷Abineer fātìi gítìń Eebrɔn tiŋkinee, ní Joowaab cáá-u ki kākatì ŋkpaanceeti kitiŋ punyɔkɔ poon pú kii u là kí lɔ̄kɔfì-u tibee. Niin ní u sāā u-pool kitàataajiki ki kūū-u ki tɔ̀n̄ u-nabiki Asayeel kúm pɔntooŋyi.

²⁸Boonee Daafiidi nín dāa gbìl̄ tin jítèe ní u fáá mbiil yii: «Ti-Dindaan nyí yii man nì m-beel kaa kútì Neer jipɔɔn Abineer kúm bɔti poon.

²⁹Abineer kúm kpuulool ń lítí Joowaab nì u-dicaŋku yil pu. U-dicaŋku poonee, bin wunti làá nīn yàkà, àá bin dinyaŋgbandi làá cúúyee, àá bin làá nīn sá bideembi ki ŋúb́ ŋkpandɔ ki nyìitēe, àá bin bi làá dū kitàataajiki kí kpɔ̀ee, àá bin ŋkùm làá cúúyee ń taa lóó.»

³⁰Joowaab nì u-nabiki Abisayi nìn sāā ki kūū Abineer, kun puee u nìn kūū bi-nabiki Asayeel kujaaun Gabawɔn tiŋkin.

³¹Daafiidi nìn tùkū Joowaab nì bijanjaliibi bin kɔkɔ bí u-ceeyee yii: «Cátímaan tiwan tin ni pēēyee, kí dū kutukub kí gbìn̄ kí dàkà yii ni bí kunimbaaun kí sɔ̄ Abineer kpool.» Ubɔti Daafiidi nìn còom̄ ki pá utaŋkpiil boon ní.

³²Eebrɔn ní bi síb́ Abineer. Ubɔti nìn súń ki yíkintì Abineer kaakul pu, ní samaa kɔkɔ bíi sūǹ.

³³Ní ubɔti gāā Abineer kúm pu ŋkpiisilan nee yii: Abineer, ba pu ní a kpíì kii ugbaan nín kúù puee?

³⁴Baa nìn bóob́ a-ŋalii, kaa bá a-taaŋi abaa. Ama ní bi kūū-si kii unil un kɔ́ binikpɔliibi ŋaanee. Ní samaa kɔkɔ mɔ̄tìi bíi sūǹ u-pu.

³⁵Ŋyunti ŋun ní ŋwìiń dáá bée ní samaa dɔ́miń ki páb́ Daafiidi yii ú jī tijin fiii. Ní Daafiidi pūtì ki lī yii: «Ŋwìiń yaa kaa jéetì ní m yaa ŋmɔ́ kpɔnɔ àá m jíń tibee, Unimbɔti ń dáaĺ m-tafal ŋkpitim pu.»

³⁶Samaa kɔkɔ nìn dáań ki ká míǹ ní an nìn ŋān̄ bi-cee. Tin kɔkɔ ubɔti nìn ŋáańee nìn ŋān̄ samaa cee ní.

³⁷Juuda nì Isirayeel yab kɔkɔ nìn béè yaadal wiiŋŋu yii ubɔti kaa nìn nyí Neer jipɔɔn Abineer kúm poon tiba.

³⁸Ní Daafiidi gíti bí u-naacimbi yii: «Naa nyí yii dibɔtibil, unikpaan di kpíì díǹ wiiŋŋu Isirayeel tiŋkinaaa?

³⁹Nì min kamaa bi sītì m-yil pu ŋkpam m kpántì ubɔtee, maa ŋūǹ kí dàkà mpɔn kii binib bin na bi yíì yii Seeruya nee nín ŋá puee. Ti-Dindaan ń téeǹ utɔŋfiti u-toom paati nín sá puee.»