Read Ntcham 2 Samuel 5 Bible Online

2 Samuel 5 - Ntcham bible

2 Samuel 5

¹Isirayeel yab naakɔti kɔkɔ dɔ́miń Eebrɔn tiŋkin ki ká Daafiidi ki bí-u yii: «Ti baasii pēē dinabiil ní[10].

²Iyunti in jítèe, min Saayuul nìn sá ti-bɔtiuee, sii di nìn līī Isirayeel yab janjaliibi nyɔkɔpu ki cáǹ-bi kujaau. Ní ti-Dindaan nìn pōoǹ-si yii: <Sii di làá dāá kpàà Isirayeel yab man nibul kí nīn sá bi-bɔtiu.>»

³Isirayeel yab kpilib kɔkɔ nìn dɔ́miń Eebrɔn tiŋkin Daafiidi cee. Niin ní u nì bi ŋá mpèé ti-Dindaan nimbiin, ní bi bātì ŋkpam ki sītì u-yil pu ú nīn sá Isirayeel yab bɔtiu.

⁴Daafiidi nìn cáá abin mmuŋku nì saalaa ní ki jíń dibeel. U nìn kāl̀ dibeel abin imuŋku ili ní.

⁵U nìn kāl̀ Eebrɔn tiŋkin ki jíń Juuda yab pu dibeel abin aluli nì dijandi, ní ki kāl̀ Jeerusaleem ki jíń dibeel Isirayeel yab nì Juuda yab kɔkɔ pu abin mmuŋku nì saalaa nì abin ata[11].

⁶Ubɔti Daafiidi nì u-yab bóob́ kí já nì Jeebusi yab bin kóò Jeerusaleem tiŋkinee. Binib gbanti nìn bí Daafiidi yii: «Aa làá kɔ́nní kitiŋ nee poon! Bijɔfub nì bideembi saaleen di làá jà-si kí gíiǹ.» Bi nìn là kí lì yii Daafiidi kaa làá ŋmā kí kɔ́[12].

⁷Daafiidi jáń ki fōō Siiyɔn, kitiŋ pɔŋŋu pɔ̀ti pu laakin bi máń diguŋkpaandi ki túee. Kí yòon̄ ŋyunti gbantee ní bi kíǹ ki yíì niin yii Daafiidi Tiŋki.

⁸Daafiidi nìn lī ŋwiin gbanti yii: «Un yaa là kí já kí pɔ̄ɔkiǹ Jeebusi yabee, udaan ń dī kubùŋu kun bi cátì kitiŋee pu kí kɔ́ kí nyā bi-pu. An yaa kíǹ bijɔfub nì bideembee, maa là bi-bɔti.» Niin ní dilìmbil nee nyáń yii: «Bijɔfub nì bideembi kaa kóò kunimbɔtidiin.»

⁹Daafiidi cūtìi kāl̀ kitiŋ pɔ̀ti pu laakin bi máń diguŋkpaandi ki túee ní ki pú niin diyindi yii <Daafiidi Tiŋki>. Boonee, u nìn fātìi máń ki māntìi tú kí yòon̄ Miiloo kí nīn cá poon pú[13].

¹⁰Daafiidi nìn mɔ̀tīi kāntí mpɔn ki cá, ní ti-Dindaan Unimbɔti Mpɔŋkɔdaan nìn bí u-cee.

¹¹Tiir yab bɔtiu Iram nìn túnní binib Daafiidi cee. Bi nìn cáań-u busubu bun bi yíì seediree dɔi nì kapintab nì bitaŋkpakpitiliibi bí mā-u dibeecindi.

¹²Niinee, Daafiidi nìn béè yii ti-Dindaan u-ba di kāaǹ-u Isirayeel tiŋki pu dibeel, ní Isirayeel u-nibul puee, u bíi yòontí u-beel yilpu.

¹³Daafiidi nín nìn yíkì Eebrɔn ki cūtìi kíǹ ki bí Jeerusaleemee, u nìn gíti cáá binimpoobi tikpil ki kútì, binimpukpilib nì nnimpuwaamu, ní bi nìn màl̄-u mbininjabiyaamu nì nnimpubiyaamu.

¹⁴Nninjabiyaamu mun u màl̄ Jeerusaleemee yiŋŋi sèé: Samuwa nì Soobaab nì Naatan nì Saloomɔn,

¹⁵nì Yiibaar nì Eelsuwa nì Neefeegi nì Yaafiya nì

¹⁶Eelsama nì Eeliyadaa nì Eeliifeeleeti.

¹⁷Fiiliistii yab nín nìn gbìl̄ yii bi bātì ŋkpam ki sītì Daafiidi yil pu ki kāaǹ-u dibeelee, ní bi-kɔkɔ nín cá kí nyàab̀-u kí cúú-u. Daafiidi gbìl̄ an bɔtee ní ki nín sìntī kibalilaŋin.

¹⁸Fiiliistii yab bàn̄ee ní ki yàl̄ ki gbí Reefayiim tantakalin.

¹⁹Ní Daafiidi bālifì ti-Dindaan yii: «Ḿ cùú já nì Fiiliistii yabaaa? A làá dū-bi kí ŋá m-ŋaanaaa?» Ní ti-Dindaan kíí Daafiidi yii: «Cùú já nì bi, m làá dū-bi kí ŋá a-ŋaan.»

²⁰Niinee Daafiidi nín cá áli Baal Peerasiim ki jáń ki pɔ́ɔkiǹ-bi niin. Ní ki bí yii: «Kii nnyim nín cífí nnyimbilkaam gundi dibùndi puee, míǹ ní m-Dindaan cátì nsan m-nimbiin m-nannanliibi kansikin!» An pu ní bi pú niin diyindi yii Baal-Peerasiim. Taapu di sá yii: «Un cífí dibùndee Kpiliu.»

²¹Fiiliistii yab nìn sáǹ ki fá bi-waaŋi niin, ní Daafiidi nì u-naacimbi dɔ́miń ki yōoǹ.

²²Fiiliistii yab fātìi tí gítìń ki yàl̄ ki gbí Reefayiim kí já nì Daafiidi.

²³Ní Daafiidi bālifì ti-Dindaan ní úǹ kíí-u yii: «Á taa bíití bi-nimbiin pú kí já nì bi! Màntī bi-boon pú, ní kí dāá nyā bi-pu isufi taapu.

²⁴A yaa láa gbìl̄ bi-tagbiŋŋi pu isufee yilpuee, á yáb́ malaa. Ti-Dindaan di līntì a-nyɔkɔpu kí já nì Fiiliistii yab janjakitil.»

²⁵Ní Daafiidi ŋá kii ti-Dindaan nín bí ú ŋá puee, ní ki jáń ki pɔ́ɔkiǹ-bi, ki jìn̄-bi kí yòon̄ Geeba ki tin cáa sāā Geeseer kpaanyɔkɔ.