Read Ntcham 2 Samuel 6 Bible Online

2 Samuel 6 - Ntcham bible

2 Samuel 6

¹Daafiidi fātìi kpáfì Isirayeel yab janjamɔntiibi. Bi nìn nyáń binib kutukub mmuŋku nì saalaa ní.

²Daafiidi nì binibee nìn nín cá Baala tiŋki kin bí Juuda tiŋkinee kí gíiǹní mpèé Dakaau. Ti-Dindaan Mpɔŋkɔdaan un kā keerubimbi puee yindi ní bi nìn dūu pú Dakaa gbanti[14].

³Bi nìn dū Unimbɔti dakaau ki tākaǹ tɔrɔkupɔɔn poon. Bi nìn yōoǹní-u Abinadaab dumpu kigbantaŋ pu. Abinadaab jipɔɔn Usa nì Ayiiyoo di nìn kpòotī inaa in dàtī tɔrɔkupɔɔn gbantee[15].

⁴Bi nín yōoǹ Unimbɔti dakaau Abinadaab dumpu kigbantaŋ pu mimmee, ní Ayiiyoo līī u-nyɔkɔpu.

⁵Daafiidi nì Isirayeel yab kɔkɔ nìn bí ki fàal̀ nì dipɔɔpindi ti-Dindaan nimbiin ki bɔ̀ɔ́ tiwambɔɔkaal tin bi dū siipreesi dɔi ki kpítèe kɔkɔ nì ti-bulifi, nì kubeeu nì saŋgu nì ŋgaŋgamu nì icaal nì cancakantib.

⁶Bi bàn̄ Naakɔn tuulool caŋinee ní inaa gbéetì ní Usa tāntì u-ŋal ki cúú Unimbɔti dakaau.

⁷Ti-Dindaan nìn fōō Usa pu diŋuul, ní ki fáá-u niin u nín yīntèe pu. Usa nìn kpíì Unimbɔti dakaau caŋin niin.

⁸Niinee Daafiidi fōō diŋuul, kun puee ti-Dindaan nìn dáaĺ Usa tafal. Ní bi pú mpaan gbanti diyindi yii Peereesi-Usa. Bi dáá gbítìi yíì mpaan gbanti míǹ ki dāa sāā díǹ.

⁹Daafiidi nìn fāŋkì ti-Dindaan yaadal wiiŋŋu, ní ki bí yii: «Maa làá ŋmā kí cùnnì ti-Dindaan dakaau m-dumpu!»

¹⁰Daafiidi kaa nìn gíti là kí yòon̄ ti-Dindaan dakaau kí cùnnì Daafiidi Tiŋkin. U nìn yāntì bi cáa yóoǹ Oobeedi-Eedoom dumpu. Kijapaai gbanti nìn sá Gaati tiŋkin ní.

¹¹Dakaayee nìn yúl̀ Oobeedi-Eedoom dumpu iŋmal ita, ní ti-Dindaan bīiǹ u nì u-dicaŋku kɔkɔ pu[16].

¹²Bi nìn dɔ́miń ki tùkū Daafiidi yii: «Unimbɔti dakaau puee, ti-Dindaan bīiǹ Oobeedi-Eedoom pu ki yāntì u-tuuŋŋi kɔkɔ bíi còom̄-u tiŋan.» Niinee Daafiidi cūtì Oobeedi-Eedoom dumpu ki yōoǹ Unimbɔti dakaau ki cáa cūnnì Daafiidi Tiŋkin ifaal poon.

¹³Ŋyunti ŋun ní bin tú ti-Dindaan dakaauee yaa dāatì ataa aluuyee ní bí yūĺ kí dū unaja nì dinabil din bí màlmalee kí ŋá saraa.

¹⁴Daafiidi nìn baasii bíi ŋōō nì u-pɔŋŋu kɔkɔ ní ti-Dindaan nimbiin. U nìn pée pēē bisaraaŋaliibi bɔkutil din bí fálfalee ní.

¹⁵Daafiidi nì Isirayeel yab kɔkɔ nìn yōoǹ ti-Dindaan dakaau ki cáa cūnnì Jeerusaleem nì dipɔɔpindi kuŋkuuntii ki búǹ ŋyin.

¹⁶Ŋyunti ŋun bi cáá ti-Dindaan dakaau ki kɔ́ǹ Daafiidi Tiŋkinee, Saayuul bisal Miikaal gbóoń tɔkɔlee ki ká ubɔti Daafiidi nín pée yùkufī ki tìintí pu ki ŋōō ti-Dindaan nimbiinee. U-ŋool gbanti puee, u nìn kpēē ki sīŋkiǹ-u u-pɔbilin.

¹⁷Daafiidi nìn gāā tanti dakaa gbanti pu. Bi nìn yōoǹní dakaayee ki kɔ́ǹ tantee poon ki yóoǹ mpaan ŋun Daafiidi nìn lēē kí síiń-uee. Míǹ boonee ní Daafiidi ŋá bisaraawɔkaabi nì mpèé saraabi ki tīī ti-Dindaan.

¹⁸U ŋá saraabi míǹ ki dóòyee ní ki mēē ti-Dindaan Mpɔŋkɔdaan ki bīiǹ samaa pu.

¹⁹Míǹ boonee ní u yākatì Isirayeel samaau kɔkɔ tijin. Uninja kamaa nì unimpu kamaa nìn fōō kpɔnɔ nì dinaŋkúndi nì fiinyi subiliŋ akulim kalaau. Míǹ boonee ní báà ŋma fātìi nín kùǹ[17].

²⁰Daafiidi fātì u-dumpu kí cùú mèè kí bìin̄ u-dicaŋku yab pu, ní Miikaal nyáń ki túŋkì-u ki bí-u yii: «Bi baasii tīī sii Isirayeel bɔtiu díǹ tinyool ní. A lēē a-cancaŋgbeel ki dàkā a-kàliŋkpilib tɔntɔnliibi binimpoobi kii unil un kaa bí tibanee nín ŋáań puee!»

²¹Ní Daafiidi kíí-u yii: «An sá kí tīī m-Dindaan tinyool pu ní m ŋɔ́ń míǹ. Úǹ di lēē-mi, kun puee m-bɔti fáatiǹ-u ki jítiǹ a-baa nì a-dicaŋkun yab kɔkɔ, ní ki kāaǹ-mi dibeel Isirayeel u-nibul pu. U-nimbiin ní m làá nīn fàal̀.

²²M làá gíti sìntī m-ba taapu kpataaa kí taa nín̄ sá tiba kí jītíǹ min bí nee. Míǹ gba di làá yàntī bitɔntɔnliibi bin bɔti a sòoǹ nee ń tīī-mi tinyool.»

²³Saayuul bisal Miikaal kaa ká mmaal ní ki dāa kpáàa kpíì.