Read Ntcham 2 Samuel 7 Bible Online

2 Samuel 7 - Ntcham bible

2 Samuel 7

¹Daafiidi kɔ́ u-beecindin, ní ti-Dindaan nyántì-u u-nannanliibi bin māntìi tú-uee ŋaan, ki tīī-u ŋgbansɔŋfi.

²Dalbee ní u bí Unimbɔti bɔnaatiliu Naatan yii: «Kpèè, man kóò dibeecindi din bi dū idɔmɔnti in bi yíì seediree ki kpááyee. Ama ní Unimbɔti dakaau yú tanti un poon bi dū iŋoobu kuti satab ki gāāyee.»

³Ní Naatan bí ubɔti yii: «Tin kā a-pɔbilin a là kí ŋée, cùú ŋá míǹ, di sá yii ti-Dindaan bí a-cee.»

⁴Ama kunyeeu gbantee ní ti-Dindaan sòon̄ nì Naatan yii:

⁵«Cùú tùkù m-tɔntɔnliu Daafiidi yii man ni-Dindaan nín lī puee sɔ̀. Sii di kaa làá mā-mi Kudii ní ḿ kɔ́.

⁶Kí yòon̄ daliŋkin m nyántì Isirayeel yab Eejipiti tiŋkin ki dāa sāā díǹ nee, ubɔ kaa máń-mi kudii m kɔ́ ki ká. M nìn sá kii usaŋkinlee ní ki nìn kàal̀ ntimu ki nìkì, ní ki nìn kóò tantin.

⁷Kí kūtèe, ŋyunti ŋun m dūu céeǹ Isirayeel yab bi-saŋkindi poonee, m nìn kāaǹ bikpilib tikpil. Bíǹ di nìn kpāā Isirayeel yab m-nibul. Maa láá pée bālifì-bi dalba dalba yii: <Ba pu ní naa dū seedir dɔi ki máń-mi kudii?>

⁸Kɔŋkɔnnee á tùkù m-tɔntɔnliu Daafiidi yii: <Man ni-Dindaan Mpɔŋkɔdaan di páatì-si ipii boon kupikpaaun ki dū-si ki kāaǹ dibeel m-nibul Isirayeel yab pu[18].

⁹Laakin kamaa a cūtèe, m bí a-cee. M kúntì a-nannanliibi kɔkɔ a-nimbiin. M làá yòon̄ a-yindi yilpu kii binikpaambi bin kāl̀ kitiŋ puee.

¹⁰M làá tīī Isirayeel m-nibul mpaan ŋun pu m làá kàan̄-bee. Bi làá nīn kóò niin kaa làá fàŋkì tiba. Binikpitib biba kaa làá ti dāan̄ kí wɔ́b́-bi kii dooooyee,

¹¹ŋyunti ŋun ní m nìn kāaǹ bibɔsoonliibi m-nibul Isirayeel puee. M làá fīī-si a-nannanliibi kɔkɔ ŋaan kí líí ní á ŋùŋfì. Di sá man ni-Dindaan bíi tùkù-si yii m làá náań-si dicindi.

¹²Ŋyunti ŋun ní sii yuntiŋu yaa láa sāā a cūtìi dōoǹ ki ŋàl̄ a-baabee, m làá dāá lēē a-maaliŋun ubɔ, un sá a-poon naŋuee kí kàan̄ dibeel a-yil pu. M làá dāá yàntī u-beel ń nīn bá ki pɔ̄ɔ̄[19].

¹³Úǹ di làá dāá mā-mi Kudii[20] kí tīī m-yindi tinyool, ní ḿ dāá yàntī u-beel ń nīn bá ki pɔ̄ɔ̄ ki cá jaanjaan.

¹⁴Man làá nīn sá-u ubaati, ní úǹ ń nīn sá-mi ujipɔnti[21]. U yaa yīntèe, m làá dáaĺ u-tafal kii ubaati nín dátí u-jipɔɔn tafal puee ní.

¹⁵Ama maa làá cúú m-laŋŋaŋfitiiku kí fōō u-cee kii m nín fōō-ku Sayuul cee puee[22]. M nìn dū Sayuul ki fá ní ki dū sii ki kāaǹ u-paaŋŋu pu.

¹⁶M làá yàntī a-dicaŋku nì a-beel ń nīn bá ki pɔ̄ɔ̄ kí nīn cá jaanjaan. Tiba kaa làá ŋmā kí cìŋkì a-beel pɔŋŋu ŋwindal.»

¹⁷Ní Naatan cáá tibɔti tin Unimbɔti sòon̄ nì u dileedakal poonee kɔkɔ ki tùkū Daafiidi.

¹⁸Niinee ní ubɔti Daafiidi cūtì ti-Dindaan nimbiin ki mēē-u yii: «M-Dindaan Unimbɔti, ba ní m sá, ní m-dicaŋku bí tilatin ní a cáá-mi ki bàn̄ laakin m bí nee ní?

¹⁹Nì míǹ kɔkɔee, a wāĺ yii tin a ŋá nee pátì a-cee. Di sá a gíti pōoǹ man a-tɔntɔnliu dicaŋku ipoon iba in bɔti dáá dátìńee. M-Dindaan Unimbɔti, tin a ŋá nee máaǹ unilaaa?

²⁰M-Dindaan Unimbɔti, a nyí man a-tɔntɔnliu tiŋan. Too tilati ní m làá gíti lì kí kūtì.

²¹Kii a nín pōoǹ ki lī yii a làá ŋá pu a-pɔbilinee ní a túń atuŋkpaan nee ki nyántì-ŋi ki dàkā man a-tɔntɔnliu.

²²Ti-Dindaan Unimbɔti, a lafun baasii sá ukpaan ní! Aa cáá juti! Sii boonee, Unimbɔti ubɔ gíti kpá, kii ti nín gbìl̀ bi sòoǹ puee.

²³Dinibul diba gíti bí kitiŋ pu doo ki bí kii Isirayeel nibuleeee? A cūtìi dá-dì ki nyántì Eejipiti yab nì bi-waaŋi ŋaan ki dū-dì ki kpántì a-nibul. A yōoǹ di-yindi yilpu, ki túń atuŋkpaan nì maamaaci tuuŋŋi ki tīī-dì a-tiŋkin. Ditimbundi diba gíti bí ki náań nì a-timbundi din a dá ki nyántì Eejipiti yab timbundi nì bi-waaŋi ŋaaneeee?

²⁴Ti-Dindaan, a dū Isirayeel yab ki kpántì a-nibul kí nīn cá jaanjaan, ní a kpántì bi-Nimbɔtiu.

²⁵Kɔŋkɔnnee m-Dindaan Unimbɔti, a nín sòon̄ yii a làá ŋá pu kí tīī man a-tɔntɔnliu nì m-dicaŋkuee, ŋá míǹ án nīn bí ki cá jaanjaan, kii a nín pōoǹ puee.

²⁶Bí yòon̄ a-yindi yilpu kí nīn pée cá jaanjaan, binib ń lì yii: <Ti-Dindaan Unimbɔti Mpɔŋkɔdaan di sá Isirayeel yab Nimbɔtiu!> Ní man a-tɔntɔnliu Daafiidi dicaŋku ń nīn bá ki pɔ̄ɔ̄ a-nimbiin.

²⁷An puee ti-Dindaan Unimbɔti Mpɔŋkɔdaan, Isirayeel yab Nimbɔtiu, sii a-ba di tùkū man a-tɔntɔnliu yii: <M làá náań-si dicindi>. An pu ní man a-tɔntɔnliu ká kunyannyaau kí mèè-si ŋwimmeem nee.

²⁸Ti-Dindaan Unimbɔti, sii di sá Unimbɔti. A yaa lī puee, míǹ ní a ŋáań, ní a pōoǹ man a-tɔntɔnliu nnaam!

²⁹Kɔŋkɔnnee, bìin̄ man a-tɔntɔnliu naantiibi pu bí nīn pée bí a-nimbiin ki cá jaanjaan. Di sá yii sii ti-Dindaan Unimbɔti di pōoǹ míǹ. A-biindi puee, man a-tɔntɔnliu dicaŋku làá fōō dibiindi kí nīn cá jaanjaan!»