Read Ntcham 2 Samuel 9 Bible Online

2 Samuel 9 - Ntcham bible

2 Samuel 9

¹Dalbee ní Daafiidi bālifì yii: «Unil ubɔ kaa kíǹ Saayuul dicaŋkun ki bí dimaŋfalinaaa? Joonatan puee, ḿ bàà ŋá-u tiŋan[23].»

²Uninja ubɔ nìn bí Saayuul cindin ki sá u-tɔntɔnliu bi yíì-u yii Siiba. Bi nìn cáań uninjee ubɔti cee, ní ubɔti bí-u yii: «Sii ní bi yíì Siibaaa?» Ní u kíí-u yii: «Iiin, ti-baa an sá man.»

³Ní ubɔti bí yii: «Unil ubɔ kaa kíǹ Saayuul dicaŋkun ḿ ŋá udaan tiŋan kii m nín nìn pōoǹ Unimbɔti nimbiin yii m làá ŋá pueeee?» Ní Siiba kíí-u yii: «Joonatan jipɔɔn ubɔ kíǹ, u-taaŋi wɔ̀b̄.»

⁴Ní ubɔti bí yii: «U bí la?» Ní Siiba kíí-u yii: «U bí Amiyeel jipɔɔn Maakiir cee Loo-Deebaar.»

⁵Ní ubɔti Daafiidi tú unil Loo-Deebaar tiŋkin, Amiyeel jipɔɔn Maakiir cee ú cáań Meefiibooseeti.

⁶Joonatan jipɔɔn Meefiibooseeti, Saayuul naantiiu bāań Daafiidi ceeyee ní ki tātìi dōoǹ Daafiidi nimbiin dicincibil. Ní Daafiidi bālifì-u yii: «Sii di sá Meefiibooseetaaa?» Ní u kíí-u yii: «Iiin ti-baa, an sá man.»

⁷Ní Daafiidi bí-u yii: «Taa fàŋkì. A-baa Joonatan puee, m làá ŋá-si tiŋan. M làá gíiǹ a-naanja Saayuul timmu kɔkɔ ki tīī-si, ní man nì si ń nīn pēē disambibaantiil ki jīǹ baabadal.»

⁸Ní Meefiibooseeti tātìi dōoǹ dicincibil ní ki bí yii: «Ti-baa, ba pu ní a dū man a-tɔntɔnliu un kaa pée bí tiban kii kibɔkɔ kin kpíìyee bɔti ki páb́ a-ba?»

⁹Ubɔti yíiń Saayuul tɔntɔnliu Siiba ní ki bí-u yii: «M dū tin kɔkɔ sá Saayuul nì u-dicaŋku wantee ki tīī Meefiibooseeti, a-kpiliu naantiiu.

¹⁰Sii nì a-biyaamu nì a-tɔntɔnliibi di làá nīn gbāā ki kù ki tìì-u. Á nīn cāabìń tijin tin u-dicaŋku làá nīn jīǹee, ama man nì u di làá nīn pēē disambibaantiil ki jīǹ baabadal.» Siiba nìn cáá jipɔmbi saalku nì bitɔntɔnliibi mmuŋku.

¹¹Ní Siiba bí ubɔti yii: «Ti-baa, m làá ŋá tin kɔkɔ a bí yii ḿ ŋée.» Kí yòon̄ ŋyunti gbantee, Meefiibooseeti nì ubɔti di nìn kíǹ ki pēē disambibaantiil ki jīǹ kii ubɔti jipɔɔnee.

¹²Meefiibooseeti nìn cáá kibininjabiki bi yíì-kì Miika. Bin kɔkɔ nìn kóò Siiba dumpuee nìn tūǹ ditundi ki tìì Meefiibooseeti ní.

¹³Meefiibooseeti taaŋi liitil nín nìn wɔ̀b̄ee puee, u nìn kíǹ ki kóò Jeerusaleem ní, kí ŋmā kí nīn cá ubɔti cee ki jīǹ tijin.