Read Ntcham 1 Rois 1 Bible Online

1 Rois 1 - Ntcham bible

1 Rois 1

¹Ubɔti Daafiidi nìn púĺ tikpil. Bi nìn bìintí-u satab, ama an kaa nìn tùm̀ u-pu.

²Niinee ní u-tɔntɔnliibi bí-u yii: «Ti làá nyàab̀ kisapɔmbiki kin kaa nyí uninjee kí tīī ti-baa ubɔti. Kisapɔmbikee làá nīn bí ubɔti cee ki tūǹ ditundi ki tìì-u, ki kpèé-u, ní kí nīn dɔ̀ ki kɔ́l̀-u án nīn tùm̀ u-pu.»

³Bi nìn nyàab̄ Isirayeel tiŋki kɔkɔn kisapɔmbiki kin ŋān̄ee, ní ki tin ká kisuneembiki Abisaaki ní ki cáań-kì ubɔti cee.

⁴Kisapɔmbikee nìn ŋān̄ kunyaaŋŋu an kaa cáá bí lì. Kì nìn bí ubɔti cee ki tūǹ ditundi ki tìì-u ki kpèé-u. Ama ubɔti kaa nìn béè-u[1].

⁵Ŋyunti gbantee, Daafiidi jipɔɔn Adooniyasi un Agiiti nìn màl̄-uee nìn bí ki sòoǹ mbɔtiyaamin yii: «Man di làá fōō dibeel.» U nìn nyàab̄ tɔrɔku ubɔ nì itaamu[2], ní bininjab imuŋku ili nì saalaa līī u-nyɔkɔpu.

⁶U nín bée, dalba dalba u-baa kaa wòon̄-u ki lī yii: «Ba pu ní a ŋáań míǹ?» Kí kūtì muee, u nìn ŋān̄ unaacimpɔɔn ní úǹ di nìn sá un pá Abisaloom boon u-na maaliŋu poonee.

⁷Adooniyasi nìn sòon̄ nì ujanjakpil Joowaab, Seeruya jipɔɔn nì usaraaŋakpil Abiyataar, ní bíǹ kíí ki kútì u-pu.

⁸Ama usaraaŋakpil Sadooki nì Yeewooyadaa jipɔɔn Beenayawuu nì Unimbɔti bɔnaatiliu Naatan nì Simeeyii nì Reeyii nì Daafiidi baatandambi kaa nìn kíí ki kútì Adooniyasi pu.

⁹Dalbee ní Adooniyasi kūū ipii nì inajaa nì anabil ŋin cáá ŋkpamee ki ŋá saraa <Ditaŋkpal din ŋàtī> ki bí ki pìl̄ Eeni-Roogeelee caŋin. U nìn yíiń ubɔti jipɔmbi u-naalib kɔkɔ nì Juuda nikpaambi bin bí ubɔti tundinee kɔkɔ.

¹⁰Ama waa nìn yíiń Unimbɔti bɔnaatiliu Naatan nì Beenayawuu nì ubɔti baatandambi nì u-naal Saloomɔn.

¹¹Niinee ní Naatan cūtìi ká Saloomɔn na Baatiseeba ki bí-u yii: «Sii kaa gbìl̄ yii Agiiti jipɔɔn Adooniyasi kpántì ubɔti ní ti-baa Daafiidi kaa kpáàa nyáaa[3]?

¹²Kɔŋkɔnnee, isaŋki in m cáá kí tīī-see sɔ̀, fīī a-ba kí kpáaǹ a-jipɔɔn Saloomɔn mun.

¹³Cù kí ká ubɔti Daafiidi kí tùkù-u yii: <Ti-baa ubɔti, sii di kaa pūtì ki pōoǹ man a-tɔntɔnliu yii a-kpátam boonee, m-jipɔɔn Saloomɔn di làá kpántí ubɔti kí kàl̄ a-beejal puɔɔɔ? Kin an gíti dī mana ní Adooniyasi dāa kpántì ubɔti ní?>

¹⁴Ŋyunti ŋun ní a dáá bí ubɔti cee ki bíi sòoǹ nì uee ní man m-ba ḿ kɔ́nní kí nyīī tin a bíi sòoǹee pu ŋŋal.»

¹⁵Niinee, Baatiseeba nín kóò ubɔti cee u-diikun. Ubɔti nìn púĺ tikpil ní kisuneembiki Abiisaagi bí u-cee ki kpèé-u.

¹⁶Baatiseeba nìn tātìi gbāaǹ ubɔti nimbiin ní úǹ bālifì-u yii: «Ba ní a là ní?»

¹⁷Ní Baatiseeba kíí-u yii: «Ti-baa ubɔti, a nìn pūtì ti-Dindaan a-Nimbɔtiu ki pōoǹ man a-tɔntɔnliu ki lī yii: <M-kpátam boonee, a-jipɔɔn Saloomɔn di làá kpántí ubɔti kí kàl̄ m-beejal pu.>

¹⁸Ama kpèè, Adooniyasi kpántì ubɔti ní sii ti-baa ubɔti kaa kpáàa nyí!

¹⁹U kūū inajaa nì anabil ŋin cáá ŋkpamee nì ipii tikpil ki ŋá saraa, ní ki yíiń a-jipɔmbi kɔkɔ ki kpáaǹ usaraaŋakpil Abiyataar nì ujanjakpil Joowaab, ama waa yíiń a-jipɔɔn Saloomɔn.

²⁰Kɔŋkɔnnee, ti-baa ubɔti, Isirayeel yab kɔkɔ nimbiliŋ kíǹ ki cɔ́ a-pu ki cí un ní a làá lēē ú kpántí ubɔti a-kpátam boonee ní nee.

²¹Ti-baa ubɔti, a yaa kaa ŋá míǹ ní ki kpíì ki cūtìi ŋàl̄ a-baabee, bi làá dāá ŋá man nì m-jipɔɔn Saloomɔn kii ti sá binikpitibee ní.»

²²Ŋyunti ŋun Baatiseeba dáá gbíntìi bíi sòoǹ nì ubɔtee ní Unimbɔti bɔnaatiliu Naatan dūu kɔ́nní.

²³Ní bi tùkū ubɔti yii Unimbɔti bɔnaatiliu Naatan bāań, ní Naatan nín cá ubɔti cee ki tātìi gbāaǹ u-nimbiin u-yigbeel tūū kitiŋ.

²⁴Míǹ boonee ní u lī yii: «Ti-baa ubɔti, mimmee sii di lēē yii a-kpátam boonee Adooniyasi ń kpántí ubɔti kí kàl̄ a-beejal puɔɔɔ?

²⁵Di sá yii u sīntì díǹ Eeni-Roogeel, ki kūū inajaa nì anabil ŋin cáá ŋkpamee nì ipii tikpil ki ŋá saraabi. U yíiń a-jipɔmbi kɔkɔ, ki yíiń bijanjakpilib nì usaraaŋakpil Abiyataar. Bi nì u kpáfì ki bíi jīǹ ki nyù ní bi lì yii: <Ubɔti Adooniyasi ń ká mmaŋfafɔkɔn!>

²⁶Ama waa yíiń man a-tɔntɔnliuaaa, kaa yíiń usaraaŋakpil Sadookaaa, kaa yíiń Yeewooyadaa jipɔɔn Beenayawuuyaaa, kaa yíiń a-jipɔɔn Saloomɔn mun.

²⁷Mimmee ti-baa ubɔti, sii di lafun lēē míǹ ní kaa kpáàa tùkū timbi a-tɔntɔnliibi tí béé un di làá kpántí ubɔti a-kpátam booneeee?»

²⁸Niinee ní ubɔti Daafiidi bí yii: «Yíiḿmaan-mi Baatiseeba!» U bāańee ní ki yúl̀ ubɔti nimbiin.

²⁹Niinee ní ubɔti pūtì ki pōoǹ-u yii: «M pūtì ti-Dindaan un bí dimaŋfalin, ki nyántì-mi m-nimbinaamandi kɔkɔ poonee yii,

³⁰kii m nín nìn pūtì ti-Dindaan Isirayeel Nimbɔtiu ki pōoǹ-si yii: <M-kpátam boonee, a-jipɔɔn Saloomɔn di làá kpántí ubɔti kí kàl̄ m-beejal puee,> díǹ nee gba m làá ŋá míǹ.»

³¹Niinee Baatiseeba tātìi gbāaǹ ubɔti nimbiin u-yigbeel tūū kitiŋ ní u lī yii: «Ti-baa ubɔti Daafiidi ń nīn bí dimaŋfalin kí nīn cá jaanjaan!»

³²Míǹ boonee ní ubɔti Daafiidi bí yii: «Yíiḿmaan-mi usaraaŋakpil Sadooki nì Unimbɔti bɔnaatiliu Naatan nì Yeewooyadaa jipɔɔn Beenayawuu!» Ní bi yíiń-bi ní bíǹ bāań ki síl̀ ubɔti nimbiin.

³³Ní ubɔti bí-bi yii: «Kóom̀maan m-tɔntɔnliibi kɔkɔ kí kpāfì, ní kí dū m-jipɔɔn Saloomɔn kí kàan̄ mama m-ba mambooŋwu pu, kí cáá-u kí sìntī Giiyɔn nyimbuliŋun.

³⁴Ni yaa bàn̄ niinee, usaraaŋakpil Sadooki nì Unimbɔti bɔnaatiliu Naatan ń bàtī ŋkpam kí sìtī u-yil pu kí kàan̄-u ubɔti Isirayeel tiŋki pu. Míǹ boonee ní búń dikantándi ní kí kúuǹ mpɔn kí lì yii: <Ubɔti Saloomɔn ń nīn cáá mmaŋfafɔkɔn[4]!>

³⁵Míǹ boonee, ní fàtīí táá-u kí gítiń kitiŋin, ní ú dāá kàl̄ m-beejal pu. Úǹ di làá fōō m-yil kí kpántí ubɔti, di sá yii úǹ ní m kāaǹ ú kpántí Isirayeel nì Juuda ubɔti.»

³⁶Yeewooyadaa jipɔɔn Beenayawuu kíí ubɔti yii: «Án ŋá míǹ! Ti-Dindaan, ti-baa ubɔti Nimbɔtiu di sòon̄ míǹ.

³⁷Kii ti-Dindaan nín nìn bí sii ti-baa ubɔti cee puee, ú nīn bí Saloomɔn mun cee, ní kí tīī Saloomɔn beel tinyool tin jítiǹ sii ti-baa ubɔti Daafiidi yalee.»

³⁸Usaraaŋakpil Sadooki nì Unimbɔti bɔnaatiliu Naatan nì Yeewooyadaa jipɔɔn Beenayawuu nì Keereeti nì Peeleeti yab nín cá Saloomɔn cee, ki yōoǹ-u ki kāaǹ ubɔti Daafiidi mambooŋwu pu, ní ki cáá-u ki cūnnì Giiyɔn nyimbuliŋun[5].

³⁹Usaraaŋakpil Sadooki nìn yōoǹ ti-Dindaan circir kɔŋkooŋŋun ŋyin, ŋkpam kā ŋu-poon, ní ki bātì ŋkpamee ki sītì Saloomɔn yil pu ki kāaǹ-u tibɔtiil. Niinee ní bi búń dikantándi ní bin kɔkɔ bí niinee kúuǹ mpɔn ki lī yii: «Ubɔti Saloomɔn ń nīn cáá mmaŋfafɔkɔn!»

⁴⁰Ní samaa kɔkɔ táá-u ki gítìń kitiŋin. Binib nín nìn bí ki búǹ ŋwulimu ki fàal̀ puee, an nìn bí kii bi-kuŋkuuntii nìn yāntì kitiŋ bíi cìŋkēe ní.

⁴¹Adooniyasi nì bin kɔkɔ u nìn yíińee nìn jíń tijin ki dóò ní ki gbìl̄ ikuŋkuunti pu. Joowaab úǹ nìn gbìl̄ dikantándi pu gba ní ki bí yii: «Ba pu ní kitiŋin an tùm̀ dàii míǹ?»

⁴²U bíi sòoǹ míǹ u-nyɔkɔ kaa láá ŋmíl̀ ní usaraaŋakpil Abiyataar jipɔɔn Yoonatan dūu bāań. Ní Adooniyasi bí-u yii: «Kɔ́nní, a sá tinyooldaan ní, báà an ŋá pu, a cáań-ti tibɔmɔntiil ní.»

⁴³Ní Yoonatan kíí Adooniyasi yii: «An kaa sá míǹ báà fiii! Ti-baa ubɔti Daafiidi dū Saloomɔn ki kāaǹ ubɔti.

⁴⁴Ubɔti yāntì usaraaŋakpil Sadooki nì Unimbɔti bɔnaatiliu Naatan nì Yeewooyadaa jipɔɔn Beenayawuu nì Keereeti yab nì Peeleeti yab dū-u ki kāaǹ úǹ ubɔti mambooŋwu pu.

⁴⁵Usaraaŋakpil Sadooki nì Unimbɔti bɔnaatiliu Naatan bātì ŋkpam ki sītì u-yil pu ki kāaǹ-u ubɔti Giiyɔn nyimbuliŋu caŋin. Míǹ boonee ní samaa kɔkɔ nín gítí kitiŋin nì dipɔɔpindi ní kitiŋin nib kɔkɔ kɔ́ ifaalin. An pu ní ni gbìl̄ kuwoou puee.

⁴⁶Saloomɔn jɔ́m̀ ki kāl̀ dibeejal pu gba.

⁴⁷Áli gba ubɔti kàliŋkpaambi dɔ́miń ki pàkā ti-baa ubɔti Daafiidi ki lī yii: <Unimbɔti ń yàntī Saloomɔn yindi ń nīn nyìm̀ ki jítiǹ a-yal ní kí tīī u-beel tinyool tin jítiǹ a-yatee.> Niinee ní ubɔti gbāaǹ u-lambaŋki pu,

⁴⁸ní ki lī yii: <Tí nyɔ̄ŋkì ti-Dindaan Isirayeel Nimbɔtiu u nín tīī-mi díǹ ubɔ ú kàl̄ m-beejal puee, nì u nín yāntì m-nimbil wál̀ tin bíi jītí neeyee.>»

⁴⁹Bin kɔkɔ Adooniyasi nìn yíińee nín gbìl̄ mimmee ní bi-pɔbiliŋ bíil̀, ní báà ŋma yíkìi túĺ u-laŋki.

⁵⁰Adooniyasi u-ba mun nìn fāŋkì Saloomɔn ní ki sáǹ ki cūtìi cúú nsaraafan yiŋyi[6].

⁵¹Ní bi dɔ́miń ki tùkū Saloomɔn yii: «Kpèè, Adooniyasi fāŋkì sii ubɔti Saloomɔn ní ki sáǹ ki cūtìi cúú nsaraafan yiŋyi ki bí yii: <Ubɔti Saloomɔn yaa kaa pūtì ki pōoǹ-mi yii waa làá kpɔ̀-mee, m kpá kí yīkì doo.>»

⁵²Ní Saloomɔn kíí yii: «U yaa làá nīn sá ubulcinnil, maa làá ŋá-u tiba, ama u yaa cáá tibɔkpitil u-ni, u làá kpú.»

⁵³Ubɔti Saloomɔn tú binib bi kpákatìń-u nsaraafan pu. U bāańee ní ki gbāaǹ ubɔti Saloomɔn nimbiin. Niinee ní Saloomɔn bí-u yii: «Nín̄ kùǹ a-dumpu!»