Read Ntcham 1 Rois 10 Bible Online

1 Rois 10 - Ntcham bible

1 Rois 10

¹Sabaa nimpubɔtiu nìn gbìl̄ ti-Dindaan nín yāntì Saloomɔn nyáń diyindi puee, ní u dɔ́miń kí màntì u-pu, kí pɔ́ɔǹ-u ipɔɔn kí màkan̄-u kí kpèè.

²U nìn bāań Jeerusaleem nì dinikitikpaandi nì igutaamu i tú talaalub nì sindaariya tikpil nì ataŋkpamɔnti. U bāań Saloomɔn ceeyee ní ki bālifì-u tibɔti tin kɔkɔ pée kā u-pɔbilinee.

³Saloomɔn nìn pée kíí-u tin kɔkɔ u nìn bālifì-uee ní. Tiba kaa nìn bí ki pɔ̄ɔ̄ ki tīī ubɔti waa ŋúń ki kíí.

⁴Sabaa tiŋki nimpubɔtiu nín ká Saloomɔn ciiŋyi nì kudii kun u máńee

⁵nì tijin tin tɔ́kɔ́ u-teebiliu puee nì u-tɔntɔnliibi kɔŋkooŋyi nì u-tɔntɔnliibi bin tìì-u tijin u jīǹ nì nnyim u nyùee wampeeŋkaati nì saraabi bin u nìn ŋáań kunimbɔtidiinee ní an ŋá-u bitii waa ti nyí tin poon u bée.

⁶Niinee ní u bí ubɔti yii: «Tin m gbìl̄ m-tiŋkin a-tuuŋŋi pu nì a-ciiŋyi puee lafun sá mbaamɔn ní.

⁷Ama maa nìn fōō ki kíí, see m nín dɔ́miń m-ba ki ká nì m-nimbilee. Tin bi máafì-mee kaa bàn̄ tin m ká nee dijandi gba. A-ciiŋyi nì a-gaajati jítiǹ tin m gbìl̄ee pu kpataaa.

⁸A-nib nì a-tɔntɔnliibi bin bí a-nimbiin baabadal ki pílifí a-ciiŋyi nyɔɔbuŋŋee bí mmɔnneeee!

⁹Tí nyɔ̄ŋkì ti-Dindaan a-Nimbɔtiu un di lēē-si á kàl̄ Isirayeel tiŋki pu dibeelee! Kun puee u néeń Isirayeel kí nīn cá jaanjaan, an pu ní u dū-si ki kāaǹ dibeel á yàntī tin bí deedeeyee nì ibaamɔn ń nīn bí[41].»

¹⁰Míǹ boonee ní Sabaa tiŋki nimpubɔtiu tīī ubɔti Saloomɔn sindaariya tɔnnib bita nì dijandi nì talaalub tikpil nì ataŋkpamɔnti. Sabaa nimpubɔtiu nín nìn tīī ubɔti Saloomɔn talaalub puee, baa ti pée ká an talaalub bulifi kɔ́ Isirayeel tiŋkin dalba dalba.

¹¹Yiiram meelab bin nìn túǹní sindaariya Oofiiri tiŋkin ki cáańee nìn cáań santaal dɔi tikpil tikpil nì ataŋkpamɔnti mun.

¹²Ubɔti nìn dū idɔ gbanti ki ŋá jaantalkub ki tíkiǹ ti-Dindaan Diiku nì kubɔtinaakoou, ní ki nìn lēē ki kpítì tibati ki tīī u-laŋgaaliibi. Santaal dɔi kaa ti pée kɔ́ Isirayeel tiŋkin míǹ ki dāa sāā díǹ.

¹³Ubɔti Saloomɔn mun nìn tīī Sabaa nimpubɔtiu tin kɔkɔ u nìn là ki bālifèe, ní kí nín kūtì tin úǹ ubɔti nìn pú-u mbɔtiyaaminee. Míǹ boonee ní u nì u-tɔntɔnliibi nín gítí bi-tiŋkin.

¹⁴Dibimbaantiil poonee, sindaariya un bi cáań ki tīī ubɔti Saloomɔŋyee nìn nyáń tɔnnib mmuŋku ní,

¹⁵ní kí nín kūtì bibantiliibi nì binyampoobi nín nìn cāabìń sindaariya un ki pà patantibee, nì ŋwìiń jeetilaŋki pú bɔtiibi nì Isirayeel tiŋgbammu nín lèekī pu ki cāabìń ki pà lampoobee.

¹⁶Ubɔti Saloomɔn nìn yāntì bi dū sindaariya ki mɔ́ɔ́ agbampɔɔ alaataa ali. Bi nìn dū sindaariya kiiloobi biluu ní ki mɔ́ɔ́ digbampɔɔl kamaa.

¹⁷U nìn gíti dū sindaariya ki mɔ́ɔ́ agbampɔɔ ŋwaamu alaataa ata. Bi nìn dū sindaariya kiiloo ubɔ nì dijandi ní ki mɔ́ɔ́ digbampɔɔl kamaa. Ubɔti nìn dū agbampɔɔyee ki síiǹ kudii kun bi yíì yii <Leebanɔn Pɔɔkuee> poon ní.

¹⁸Ubɔti nìn gíti kpítì dibeejal dikpaandi diba ní ki dū sindaariyamɔnti ki nyūntì ní ki dū kunti nyiŋŋi ki nákáǹ nákáǹ.

¹⁹Dibeejalee nìn cáá akɔl aluu, ní di-yilpu pú bí dikuŋkundi, ní ki cáá laakin bi pāantí iŋalee. Bi nìn kpítì gbikintib bili ki síiǹ laakin bi pāantí iŋalee.

²⁰Gbikintib nìn bí saalaa nì bili ní ki bí akɔl aluuyee nín kúntí puee. Baa nìn pée kpítì dibeejal diba míǹ dibeel diba poon ki ká.

²¹Ubɔti Saloomɔn kɔŋkɔnnyɔkaabi kɔkɔ nìn sá sindaariya ŋma ní, ní asambil ŋin bí <Leebanɔn Pɔɔku> diikunee nìn sá sindaariyamɔnti ŋma. Baa nìn dù animbil kúti kí ŋá tiba, di sá yii Saloomɔn yuntiŋuee, animbil kúti kaa nìn cáá kunyampoou.

²²Di sá yii ubɔti nìn cáá meelab Taarsiisi tiŋkin bin tūntí binyampoobee bi cá ki gítiń bi nì Yiiram meelab. Abin ata poon diba puee, meelab gbanti nìn cāabìń sindaariya nì animbil kúti nì kunti nyiŋŋi nì ilantan nì ikooŋaan.

²³Ubɔti Saloomɔn nìn jítiǹ kitiŋ pu bɔtiibi kɔkɔ tigaajati poon nì iciin poon.

²⁴Kitiŋ pu nib kɔkɔ nìn nyàab̀ kí ká Saloomɔn kí ŋmā kí pīlifì iciin in Unimbɔti nìn tīī-uee.

²⁵Bi yaa nìn dòońee, báà ŋma nìn cāabìń animbil kúti wanti nì sindaariya wanti nì tiwampeeŋkaal nì tijanjawan nì talaalub nì itaamu nì imamboon ki pūǹ-u. Dibindi kamaayee, binib nìn pée ŋáań míǹ ní.

²⁶Saloomɔn nìn kóoǹ janjatɔrɔkub nì itaamu ki kpáfì. U nìn cáá janjatɔrɔkub kutuku ubɔ nì alaataa anaa, ní ki cáá itaamu kutukub saalaa nì bili. Tijanjawan gbanti tiba nìn bí ntimu mun poon ní ajanjanaapaa nìn bée, ní tiba mun bí u-cee Jeerusaleem.

²⁷Ubɔti nìn yāntì animbil gbí Jeerusaleem kii ataŋkpeeyee ní, ní seedir dɔi wīikí kii Seefeelaa tiŋkin sufii in bi yíì siikoomɔɔree.

²⁸Saloomɔn taamui nìn nyēeń Eejipiti nì Siisilii timmun ní. Niin ní ubɔti nyampoobi nìn dāań-i[42].

²⁹Bi yaa nìn cáań janjatɔrɔku Eejipiti tiŋkinee, u-nyampooku nìn sá animbil kúti jitɔmbi alaataa aluu ní, ní utaamu nyampooku sá animbil kúti jitɔmbi dilaataal nì imuŋku ili nì saalaa. Binyampoobi gbanti nìn cāabìń janjatɔrɔkub nì itaamu gbanti ki nyáfíǹ Eeti yab nì Siirii yab bɔtiibi kɔkɔ mun.