Read Ntcham 1 Rois 11 Bible Online

1 Rois 11 - Ntcham bible

1 Rois 11

¹Ubɔti Saloomɔn nìn cáá binicannimpoobi tikpil. U nín cáá Faaroo bisal boonee, u nìn gíti cáá Moowaab yab nì Amɔn yab nì Eedoom yab nì Siidɔn yab nì Eeti yab nimpoobi ki kútì[43].

²Ti-Dindaan nìn kpáafì Isirayeel yab atimbun gbanti nib pu ki lī yii: «Ní taa tīī-bi ni-bisalib ticati kí taa yòon̄ bi mun bisalib kí cáá, an yaa kaa sá míǹ bi làá yàntī ní nīn kíǹ ki tòotī bi-waaŋi[44].» Ama bíǹ ní Saloomɔn nìn néeń ki dū u-ba ki yá ki nákáǹ-bi.

³Saloomɔn nìn cáá binimpoobi alaataa aluli ní ki cáá bibɔntiibi alaataa ata. U-nimpoobi gbanti nìn yāntì u-pɔbil gáatì.

⁴Di sá yii ŋyunti ŋun Saloomɔn púĺee ní u-nimpoobee yāntì u cūtìi bíi tòotī awaa. Waa nìn gíti sí nì ti-Dindaan u-Nimbɔtiu deedee kii u-baa Daafiidee.

⁵Saloomɔn nìn kíǹ ki tòotī Siidɔn yab waal Asitaartee, nì Amɔn yab timbiiliwaal Miilkɔm.

⁶Saloomɔn nìn ŋá tin kaa nìn kítì ti-Dindaan nimbiinee, di sá yii waa nìn nóó ti-Dindaan nì dipɔbil diba kii u-baa Daafiidee.

⁷Áli gba Saloomɔn máń kuwaadii dijool din bí ki bíitiǹ Jeerusaleemee ki tīī Moowaab yab timbiiliwaal Keemoosi nì Amɔn yab timbiiliwaal Mooleeki.

⁸U nìn pée ŋá míǹ ní ki tīī u-nicannimpoobi kɔkɔ. Bi nìn tùutī talaalub ki kù tiwaŋkuti ki ŋáań saraabi ki tìì bi-waaŋi.

⁹Ti-Dindaan nìn gíí Saloomɔn pu diŋuul, kun puee u nìn fātì u-boon ki tīī úǹ Isirayeel Nimbɔtiu un nìn nyántì u-ba ki dàkā-u mili pu kɔkɔee.

¹⁰U nìn kpáafì-u ú taa nóó awaayee, ama Saloomɔn kaa nìn ŋá kii Unimbɔti nín nìn kpáafì-u puee.

¹¹Niinee ní ti-Dindaan bí Saloomɔn yii: «A nín ŋá pu ní ki ŋá míǹ kaa ŋúb́ m-poondi nì m-marab bin m tīī-see, m làá fōō dibeel a-ŋaan, ní kí dū-dì kí tīī a-tɔntɔnliibi kansikin ubɔ.

¹²Ama a-baa Daafiidi puee, maa làá ŋá m nín bí yii m làá ŋá puee a-maŋfal wiiŋyi poon. M làá dāá fōō dibeel a-jipɔɔn ŋaan ní.

¹³Ama maa làá fōō dibeel kɔkɔ, Daafiidi m-tɔntɔnliu pu nì Jeerusaleem tiŋki kin m lēēyee puee, m làá kíń kunaakoou kubɔ kí tīī a-jipɔɔn.»

¹⁴Ti-Dindaan nìn yāntì ueedoomja Adaadi, u sá Eedoom yab beecindin ubɔee yíkì ki bíi jáà nì Saloomɔn.

¹⁵Daafiidi yuntiŋuee, u nìn cūtìi jáń nì Eedoom yab. U-janjakpiliu Joowaab nìn cūtì kí síb́ Isirayeel yab bin bi nìn kūū kujaaunee ní ki kpáàa kūū Eedoom ninjab nì bi-bininjabiyaamu kɔkɔ.

¹⁶Di sá yii Joowaab nì Isirayeel yab bin nìn táá-uee nìn kāl̀ Eedoom tiŋkin iŋmal iluu ní áli ki dāa kūū ki céetì bi-ninjab nì bi-bininjabiyaamu kɔkɔ.

¹⁷Ama Adaadi un nìn dáá sá kinaacimpɔmbikee nì u-baa tɔntɔnliibi biba nìn ŋúń ki sáǹ ki cūtìi kāl̀ Eejipiti tiŋkin.

¹⁸U nìn yíkì Madiyan tiŋkin ní ki dūu dī Paraan teekun. Niinee ní u kpáaǹ Paraan yab biba ní bi nín cá ki tin bàn̄ Eejipiti bɔtiu Faaroo cee. Faaroo nìn tīī Adaadi kudii nì tikpaatan ní ki pōoǹ-u kí nīn kpīintí-u.

¹⁹Adaadi bɔti nìn fáatiǹ Faaroo ní úǹ dū u-nimpuu Tapaneesi naal ki tīī-u u cáá.

²⁰Tapaneesi naal màl̄ Adaadi kibininjabiki ní ki pú-kì diyindi yii Geenubaati. Tapaneesi nìn yāntì kì bí dibeecindi ubɔti biyaamu kansikin ní u kpēē-kì.

²¹Adaadi bí Eejipiti mimmee ní ki gbìl̄ yii Daafiidi kpíì, ní ujanjakpil Joowaab mun kpíì. Niinee ní u bí Faaroo yii: «Yàntī ḿ nīn gítí m-tiŋkin.»

²²Ní Faaroo bālifì-u yii: «Ba di lóò-si m-cee doo ní a nyàab̀ kí nīn gítí a-tiŋkin?» Ní u kíí yii: «Tiba kaa lóò-mi, sii dee yàntī ḿ nín cá.»

²³Unimbɔti nìn gíti yāntì Eeliyadaa jipɔɔn Reesɔn jáń nì Saloomɔn. Reesɔn gbanti nìn sáǹ u-kpiliu Adadeeseer, Sooba bɔtiu ní.

²⁴U nìn kóoǹ bininjab biba ki kpáfì u-cee ní ki kpántì bi-kpiliu. Daafiidi nín nìn kūū ki céetì Adadeeseer janjaliibi puee ní bíǹ sáǹ ki cūtìi kāl̀ Damaasi tiŋkin, ní ki dāa dūu kpántì Damaasi bɔtiu.

²⁵Saloomɔn maŋfal wiiŋyi kɔkɔ poonee, Reesɔn nìn pée sá Isirayeel nannanliu ní, ní kí nín kūtì inikpiti in Adaadi nìn ŋá Isirayeel yabee. U nìn jíń dibeel Aram tiŋkin ní u-nimbil kaa nìn pée là kí wāl̀ Isirayeel yab.

²⁶Neebaati jipɔɔn Jeerooboowaam nìn sá Eefiraayiim naakookun ní ki kóò Seereeda. U-na nìn sá ukpiipu ní bi yíì-u yii Seeruya. U nìn sá Saloomɔn tɔntɔnliu ní ki yíkìi bíi jáà nì ubɔti.

²⁷Kun pu u nìn yíkì ki bíi jáà nì ubɔtee sɔ̀. Saloomɔn nìn bíi māā Miiloo diiku ní ki yāntì bi ŋéeb́ mbùń ŋun nìn bí u-baa Daafiidi Tiŋki gundi puee.

²⁸Jeerooboowaam gbanti nìn dáá sá kinaacimpɔmbiki ki cáá difaŋgiil ki ŋūǹ ditundi tiŋan. Saloomɔn nìn ká yii u tūǹ ditundi tiŋan ní u lēē-u ú nīn kpèé Eefiraayiim nì Manasee naakɔti tɔntɔnliibi.

²⁹Dalbee Jeerooboowaam nyáń Jeerusaleem kí nīn cée ní Unimbɔti bɔnaatiliu Ayiiya, usiilooja kíntì-u nsanni. Bi-liitil di nìn pée bí tisatin ní Ayiiya pēē dibɔkutikpaandi dipɔndi.

³⁰Ayiiya cúú dibɔkutikpaandi dipɔndi din u nìn pēēyee ní ki cátì saalaa nì mili pu.

³¹Niinee ní u bí Jeerooboowaam yii: «Yòon̄ m nín cátì dibɔkutilee puee ajan saalaa, di sá yii ti-Dindaan Isirayeel Nimbɔtiu nín sòon̄ puee sèé: <Kpèè m làá fōō Saloomɔn ŋaan dibeel ní kí dū tinaakɔti saalaa kí tīī-si.

³²M-tɔntɔnliu Daafiidi nì Jeerusaleem tiŋki kin m lēē Isirayeel naakɔti kɔkɔ kansikinee puee, m làá pée kíń-u kunaakɔbambaantiiu ní.

³³M làá ŋá míǹ kun puee Isirayeel yab dū-mi ki fá, ní ki cūtìi bíi jáaḿ Siidɔn yab waal Asitaartee nì Moowaab yab waal Keemoosi nì Amɔn yab waal Miilkɔm. Baa nóó m-saŋŋu kí nīn ŋáań tin kítì m-nimbiinee, kaa tí ŋúb́ m-bɔkpaaŋi nì m-koobiliŋ kii u-baa Daafiidee.

³⁴Nì míǹ kɔkɔee maa làá fōō dibeel Saloomɔn ŋaan, di sá yii m-tɔntɔnliu Daafiidi un m lēē ní u nìn ŋúb́ m-marab nì m-bɔkpaaŋee puee, m dū-u ki kāaǹ ú nīn sá ubɔti u-maŋfal wiiŋyi kɔkɔ poon ní.

³⁵Ama m làá fōō dibeel u-jipɔɔn ŋaan ní kí dū tinaakɔti saalaa kí tīī-si.

³⁶M làá kíń u-jipɔɔn kunaakoou kubɔ. Mimmee m-tɔntɔnliu Daafiidi làá nīn pée cáá naantiiu ubɔ kā dibeel pu Jeerusaleem tiŋkin. Di sá yii kitiŋ kin ní m lēē kí nīn lèekī m-ba ki dàkèe dee.

³⁷Siiyee, m làá tīī-si dibeel kii a nín là puee. A làá jī Isirayeel tiŋki pu dibeel.

³⁸A yaa pílifì tin ní m làá tùkù-see, ki yaa nóó m-saŋŋu, ki yaa ŋáań tin kítèe m-nimbiin, ki ŋúb́ m-bɔkpaaŋi nì m-marab kii m-tɔntɔnliu Daafiidi nín nìn ŋúb́ puee, m làá nīn bí a-cee, ní kí yàntī a-kpátam boonee, a-naantiibi ń nīn pée kā dibeel kii Daafiidi yab nín bí puee. M làá dū Isirayeel tiŋki kí ŋá a-ŋaan.

³⁹M làá dáaĺ Daafiidi naantiibi tafal, ama maa làá dáaĺ bi-tafal kí nīn cá jaanjaan.>»

⁴⁰Saloomɔn béè mimmee ní ki nyàab̄ kí kpɔ̀ Jeerooboowaam. Úǹ béè mimmee ní ki sáǹ ki nín cá Eejipiti ki tin kɔ́ Eejipiti bɔtiu Siisaaki pu, ki dāa sāā ŋyunti ŋun ní Saloomɔn kpíìyee.

⁴¹Bi ŋmàn̄ Saloomɔn maam, tin kɔkɔ u ŋée nì u-ciiŋyi bɔti kɔkɔ ki ŋá Saloomɔn Tuuŋŋi Gbɔŋku poon.

⁴²Saloomɔn nìn kāl̀ Jeerusaleem ki jíń Isirayeel tiŋki kɔkɔ pu dibeel abin imuŋku ili ní.

⁴³Saloomɔn kpíì ki cūtìi ŋàl̄ u-naanjab ní bi síb́-u u-baa Daafiidi Tiŋkin. U-jipɔɔn Rooboowaam di fōō u-yil ki kpántì ubɔti.