Read Ntcham 1 Rois 12 Bible Online

1 Rois 12 - Ntcham bible

1 Rois 12

¹Rooboowaam nìn cūtì Siikeem, di sá yii niin ní Isirayeel yab kɔkɔ nìn kóoǹ ki kpáfì kí kàan̄-u dibeel.

²Neebaati jipɔɔn Jeerooboowaam nìn dáá gbíntìi bíń Eejipiti tiŋkin, laakin u nìn sáǹ ubɔti Saloomɔn ki cūtìi kāl̀ee. U nín gbìl̄ Siikeem kooŋyi gbanti puee ní u gbíntì Eejipiti niin.

³Ama ní bi tú binib bi cūtìi yíiń-u. U bāańee ní u nì Isirayeel beel samaau kɔkɔ bí Rooboowaam yii:

⁴«A-baa nìn túǹ-ti ditúndi din nyìm̀ee. Siiyee, ti là yii á bàtī-ti ditumpɔɔl din a-baa nìn yāntì ti túńee nì diwaŋgul din u nìn dūu nyīkiǹ ti-puee. A yaa ŋá míǹ ti kíí kí nīn sá a-tɔntɔnliibi.»

⁵Ní u kíí-bi yii: «Nín̄ cámaan, iwiin ita dalee ní fàtīí gítiń.» U lī mimmee ní samaa nín cá.

⁶Niinee ní Rooboowaam bālifì bitindaŋkpilib bin nìn bí u-baa Saloomɔn tundin ŋyunti ŋun u nìn dáá bí dimaŋfalinee yii: «Ni sáŋkí-mi ḿ kíí binib nee yii ba?»

⁷Ní bikpilibee bí-u yii: «Díǹ nee, a yaa kíí kí nīn sá binib nee tɔntɔnliu ní ki kíí-bi kinyɔɔmɔɔyee, bi làá nīn sá a-tɔntɔnliibi kí nīn cá jaanjaan.»

⁸Ama ní Rooboowaam kaa dū bikpilibee saŋkii ki túń ditundi, ní ki yíiń binipɔmbi u nì bin jíń tinaacimpɔn dicilpu bi bí u-tundinee.

⁹U nìn bí bíǹ yii: «Nimbi fáà, ni sáŋkí-mi yii ba? Ḿ kíí binib bin bíi bàlifī-mi ḿ bàtī diwaŋgul din m-baa nìn dūu túǹ-bee nyiŋfiŋu pu yii ba?»

¹⁰Ní binipɔmbi u nì bin kpáfìi jíń tinaacimpɔnee kíí-u yii: «Kpèè a nín làá kíí binib bin dɔ́miń ki bí-si yii: <A-baa nìn túǹ-ti diwaŋgul din nyìm̀ee, siiyee bàtī di-nyiŋfiŋu pu kí tīī-ti> puee sɔ̀: <M-ŋambikpakpalii gbìfiǹ m-baa ŋal.

¹¹M-baa yaa nìn túǹ-ni diwaŋgul din nyìm̀ee, man làá gíti kūtì diwaŋgul gbanti nyiŋfiŋu pu. M-baa nìn dū anaalab ní ki dáaĺ ni-tafal, mamee, m làá dū anaalab ŋin cáá agatee ní kí dáaĺ ni-tafal.>»

¹²Ŋwintataati dalee Jeerooboowaam nì samaa dɔ́miń ki ká Rooboowaam kii úǹ u-ba nín nìn lī puee yii: «Fàtīí gítiḿmaan ŋwintataati dal kí ká-mee.»

¹³Bikpilib nín nìn sáŋkì u-bɔti puee, waa dūu túń ditundi, ní ki sòon̄ nì samaa an pɔ̄ɔ̄.

¹⁴Binipɔmbee nín nìn sáŋkì-u puee, míǹ ní u dūu sòon̄ nì binibee. U bí-bi yii: «M-baa yaa nìn túǹ-ni diwaŋgul din nyìm̀ee, man làá gíti kūtì diwaŋgul gbanti nyiŋfiŋu pu. M-baa nìn dū anaalab ní ki dáaĺ ni-tafal, mamee, m làá dū anaalab ŋin cáá agatee ní kí dáaĺ ni-tafal.»

¹⁵Ubɔti kaa nìn pílifiǹ binibee, kun puee ti-Dindaan di nìn bɔ́ntì míǹ kí ŋmā kí ŋá kii u nín nìn dī u-bɔnaatiliu usiilooja Ayiiya pu ki pōoǹ Neebaati jipɔɔn Jeerooboowaam puee ní[45].

¹⁶Isirayeel yab nín ká yii ubɔti kaa bíi pílifíǹ-bee ní bi bí-u yii: «Ti nì Daafiidi cáá tilati? Ti nì Jeesee jipɔɔn kaa cáá mpèé ŋubɔ! Isirayeel yab, tí nīn gítímaan ti-tantibin! Kɔŋkɔnnee sii Daafiidi, nín̄ jīǹ a-dicaŋku pu dibeel[46]!» Bi lī mimmee ní báà ŋma nín gítí u-tantiun.

¹⁷Ama Isirayeel yab bin nìn kóò Juuda tiŋkinee baba pu ní Rooboowaam nìn nìkī ki jíń dibeel.

¹⁸Nì míǹ kɔkɔee ubɔti Rooboowaam nìn dū Adooram un kpèé diwɔ́bil tuuŋŋee ki tú Isirayeel yab cee, ama ní bíǹ yáŋkì-u ataŋkpee ki kūū. Niinee ní ubɔti Rooboowaam ŋá malaa ki jɔ́m̀ u-tɔrɔkuu poon ki sáǹ ki nín cá Jeerusaleem.

¹⁹Kí yòon̄ ŋwiin gbanti ní Isirayeel yab bin kóò ŋgan pú beelinee kíĺ ki jáà nì Daafiidi dicaŋku bɔtiibi. Kujaau gbanti bí ki dāa sāā díǹ.

²⁰Ŋyunti ŋun Isirayeel yab bin kɔkɔ kóò ŋgan pú beelinee gbìl̄ yii Jeerooboowaam fātìi gítìńee, ní bi kóoǹ samaa kɔkɔ ki kpáfì ní ki tú ki yíiń-u ní ki dū-u ki kāaǹ bi-pu ubɔti. Juuda naakooku baba yab di nìn pée síl̀ nì Daafiidi dicaŋku deedee.

²¹Ŋyunti ŋun Rooboowaam bàn̄ Jeerusaleemee ní u kóoǹ Juuda nì Beenjameen naakɔti janjaliibi bimɔmmɔntiibi kutukub imuŋku ili nì saalaa ki kpáfì kí cùú já nì Isirayeel yab, án nín làá ŋá pu úǹ Saloomɔn jipɔɔn ń fàtīí fōō dibeelee.

²²Ama ní Unimbɔti bí u-bɔnaatiliu Seemaya yii:

²³«Tùkù Juuda bɔtiu Rooboowaam, Saloomɔn jipɔɔn nì Juuda nì Beenjameen naakɔtin yab nì samaa un kɔkɔ pée kíǹee yii,

²⁴ti-Dindaan nín sòon̄ puee sèé: <Naa máaǹ kí cùú já nì ni-nabiyaamu Isirayeel yab. Báà ŋma ń nīn gítí u-dumpu, di sá yii man di yāntì tin bíi jītí nee bāań.>» Niinee ní bi gbìl̄ ki tīī nì ti-Dindaan nyɔɔbundi ní ki nín gítí bi-dumpui.

²⁵Jeerooboowaam nìn máń digundi ki tú Siikeem tiŋki kin bí Eefiraayiim jooŋŋi puee, ki kíǹ ki kóò niin. Boonee ní u dāa yíkì niin ki cūtìi máń digundi ki tú Peenuyeel tiŋki.

²⁶Jeerooboowaam nìn lī u-neen yii: «An nín bíi jītí pu nee, Daafiidi dicaŋku dāa ŋūǹ kí fàtīí fōō dibeel.

²⁷Di sá yii binib nee yaa gbíntìi cáà Jeerusaleem ki ŋáań saraabi ti-Dindaan Diikunee, bi-pɔbiliŋ làá fàtīí gítí bi-kpiliu Juuda bɔtiu Rooboowaam cee. Bi làá dāá kpɔ̀-mi ní kí fàtīí gítí Juuda bɔtiu Rooboowaam cee.»

²⁸Niinee ní ubɔti Jeerooboowaam ká nlandɔkɔ ní ki yāntì bi dū sindaariya ki mɔ́ɔ́-u anabil ali, ní u bí samaa yii: «Ni jɔ́m̀ Jeerusaleem tiŋkin ki gīī Isirayeel yab, kpèèmaan ni-Nimbɔtiu un nyántìń-ni Eejipiti tiŋkinee[47].»

²⁹U ŋá mimmee ní ki dū dinabil diba ki síiǹ Beeteel tiŋkin ní ki dū din kíǹee ki síiǹ Daani tiŋkin.

³⁰U nín ŋá pu ki yāntì samaa ŋá ikpitee dee. Di sá yii binib tikpil nìn pá dinabililiitiil boon ki tin bàn̄ Daani tiŋkin.

³¹Jeerooboowaam nìn gíti yāntì bi máń awaadiin ŋgbantamu pu, ní ki nìn lēē bin kaa sá Leefii yabee bí nīn sá bisaraaŋaliibi.

³²Dibindi poon ŋmaniniitiu iwiin saalku dalee ní Jeerooboowaam yāntì bi jíń jiŋaal kii un bi jīǹ Juuda tiŋkinee, ní úǹ u-ba ŋá saraabi nsaraafan pu. U nìn ŋá míǹ mbaantiim Beeteel ki ŋá saraabi ki tīī anabil ŋin u nìn mɔ́ɔ́yee. U nìn kāaǹ bisaraaŋaliibi ŋgbantamu mun bí Beeteel u bɔ́ntì mu-pu bí nīn ŋáań saraabee.

³³Dibindi poon ŋmaniniitiu, iwiin saalku dalee ní u yíiń samaa kɔkɔ bí jī jiŋaal Beeteel. Ŋwiin gbantee, úǹ di gāā u-bindi ki lēē-ŋu. Jiŋaal gbanti yuntiŋuee, úǹ u-ba di nìn pée ŋá saraa nsaraafan ŋun u nìn yāntì bi máńee pu.