Read Ntcham 1 Rois 13 Bible Online

1 Rois 13 - Ntcham bible

1 Rois 13

¹Ŋyunti ŋun Jeerooboowaam dá láá sí nsaraafan caŋin ki ŋáań saraayee ní Unimbɔti yāntì u-bɔnaatiliu ubɔ nyánní Juuda tiŋkin ki dɔ́miń.

²U bāańee ní ki sòon̄ ti-Dindaan nyɔɔbundi nee ki tɔ́ nsaraafan pu yii: «Nsaraafan! Nsaraafan! Pīlifì tin ti-Dindaan bíi sòoǹee! Bi làá dāá màal̀ kibininjabiki kiba Daafiidi dicaŋkun. Bi làá dāá pɔ̄-kì diyindi yii Joosiyaasi. U làá dāá kpɔ̀ ŋgbantamu pu saraaŋaliibi bin tùutī a-pu talaalutuukaabee kí ŋá saraa a-pu. Bi làá dāá dū anikpab kí páań a-pu kí wà ŋŋmi[48].»

³Ŋwiin gbanti mbaantee ní Unimbɔti bɔnaatiliuee gíti lī yii: «Kudaaŋŋu kun ti-Dindaan tīīyee sɔ̀. Nsaraafan làá wīī, ní ŋkpam min pá ŋu-puee ń lítí kitiŋ.»

⁴Ŋyunti ŋun ubɔti gbìl̄ tin Unimbɔti bɔnaatiliuee sòon̄ ki tɔ́ Beeteel saraafaŋŋuee puee, ní u tāntì u-ŋal nsaraafan pu ki bí yii: «Cúúmaan-u!» Ama ní u-ŋal ŋun u tāntèe dūu fáká, waa ti ŋúń ki gúkúǹ-ŋu.

⁵Dibòol pu niin niin ní nsaraafan wīī ní ŋkpam min pá ŋu-puee lítì kitiŋ kii Unimbɔti nín bàà yāntì u-bɔnaatiliu sòon̄ puee.

⁶Niinee ní ubɔti bí Unimbɔti bɔnaatiliuee yii: «M gbàam̄-si, mèè ti-Dindaan a-Nimbɔtiu ú dū m-kpitii kí pɔ̄-mi kí cáaǹ m-ŋal kí tīī-mi.» Unimbɔti bɔnaatiliuee nìn mēē ti-Dindaan ní ubɔti ŋal fātìi ŋáŋkì ki gítì kii ŋu nín nìn bí puee.

⁷Niinee ní ubɔti bí Unimbɔti bɔnaatiliuee yii: «Dāan̄ tí cù man dumpu á jī tijin, ḿ kpáàa pɔ̄-si tiba.»

⁸Ama ní Unimbɔti bɔnaatiliuee bí ubɔti yii: «Báà a yaa yākatì a-gaajawanti mili ki dū dijandi ki tīī-mi, maa làá kɔ́ a-dumpuɔɔɔ, kaa làá jī tijinaaa, kaa làá nyɔ̀ nnyim mpaan nee pu.

⁹Di sá yii ti-Dindaan nín tùkū-mi puee dee yii: <A taa jī tibaaa, kí taa nyɔ̀ tibaaa, kí taa fàtīí dī nsan ŋun pu a dī ki cūtèe kí gítiń.>»

¹⁰U lī mimmee ní ki dī nsan ŋubɔ ki nín gítí. Waa nìn gíti dī nsan ŋun ní u dī ki dɔ́miń Beeteelee.

¹¹Unimbɔti bɔnaatiliu ubɔ nìn kóò Beeteel tiŋkin ki púĺ. U-jipɔmbi nìn dɔ́miń ki máafì-u tin kɔkɔ ní Unimbɔti bɔnaatiliuee ŋá ŋwiin gbanti Beeteel tiŋkin nì tin u tùkū ubɔtee.

¹²Niinee bi-baa bālifì-bi yii: «Nsan ŋulɔŋu ní u dī ki nín gítí?» Ní u-jipɔmbi dàkā-u nsan ŋun Unimbɔti bɔnaatiliu un nyánní Juuda tiŋkin ki dɔ́mińee dēe.

¹³Ní u bí u-jipɔmbi yii: «Kpàl̄maan m-maŋki kí tīī-mi.» Ní u-jipɔmbee kpàl̄ kimaŋ ki tīī-u ní u máĺ ki kāl̀ ki-pu.

¹⁴Niinee ní u nín jì Unimbɔti bɔnaatiliuee boon ní ki tin ká-u u kā teereebinti subu bubɔ taapu, ní u bālifì-u yii: «Sii di sá Unimbɔti bɔnaatiliu un nyánní Juuda tiŋkineeee?» Ní u kíí yii: «An sá man.»

¹⁵Ní Unimbɔti bɔnaatiliu un kóò Beeteelee bí-u yii: «Dāan̄ tí cù man dumpu á ká tiba kí jī.»

¹⁶Ní u kíí-u yii: «Maa ŋūǹ kí táá-si kí gítáaa, kaa tí máaǹ kí jī tijinaaa, kí nyɔ̀ tiba doo.

¹⁷Di sá yii ti-Dindaan bí-mi yii: <A taa jī tibaaa, kí taa nyɔ̀ tibaaa, kí taa fàtīí dī nsan ŋun pu a dī ki cūtèe kí gítiń.>»

¹⁸Ama ní Unimbɔti bɔnaatiliu utikpilee bí-u yii: «Ma mun sá Unimbɔti bɔnaatiliu kii siiyee ní. Ntuun ŋubɔ di dɔ́miń ki dū ti-Dindaan nyɔɔbundi nee ki tùkū-mi yii ḿ fàtīí gíiǹní-si á jī tijin kí nyɔ̀ nnyim.» Ama Unimbɔti bɔnaatiliu utikpilee nìn bíi mɔ́ntí-u ní.

¹⁹Niinee Unimbɔti bɔnaatiliu un nyánní Juuda tiŋkinee táá-u ki nín gítí ki jíń tijin ki nyùn̄ nnyim.

²⁰Ŋyunti ŋun bi-liitil kā ki jīǹee ní ti-Dindaan sòon̄ nì u-bɔnaatiliu un fātìi gíiǹní un béeyee.

²¹Niinee ní úǹ dūu nāatì Unimbɔti bɔnaatiliu un nyánní Juuda tiŋkinee. U nìn bí-u yii: «A yīntiǹ ti-Dindaan. Aa tɔ́ ti-Dindaan a-Nimbɔtiu marau un u tīī-see.

²²A gítìń Beeteel ki jíń tijin ki nyùn̄ nnyim. Ama ti-Dindaan mun nìn bí-si yii a taa ŋá míǹ. A nín ŋá mimmee puee, a làá kpú ní baa làá síb́-si a-naanjab kaakulin.>»

²³Bi jíń ki nyùn̄ ki dóòyee ní Unimbɔti bɔnaatiliu utikpilee kpàl̄ u-maŋki ki tīī Unimbɔti bɔnaatiliu un u fātìi gíiǹnée

²⁴ní u nín cá. U cée ní gbikinti ubɔ kíntì-u nsanni ki kūū-u. U nìn dɔ̄ nsanni ní kimaŋ nì gbikintee yú ki kɔ́ĺ-u.

²⁵Bisanjitiliibi nìn ká dinikpilee dɔ̄ nsanni gbikinti yú ki kɔ́ĺ, ní bi dɔ́miń ki dū tibɔtee ki máafì kitiŋin, laakin Unimbɔti bɔnaatiliu utikpilee nìn kóòyee.

²⁶Unimbɔti bɔnaatiliu un nìn cūtì ki gíiǹní-uee nín gbìl̄ tin jítèe ní u bí yii: «Unimbɔti bɔnaatiliu un nyánní Juuda tiŋkinee dee, úǹ di yīntiǹ ti-Dindaan maraauee. Ti-Dindaan dū-u ki tīī gbikinti ní u cúú-u ki kūū, kii ti-Dindaan nín nìn tùkū-u puee.»

²⁷U lī mimmee ní ki bí u-jipɔmbi yii: «Kpàl̄maan-mi kimaŋ!» Ŋyunti ŋun bi kpàl̄ kimaŋ ki dóòyee,

²⁸ní u nín cá ki bàn̄ ki ká dinikpilee dɔ̄ nsanni, kimaŋ nì gbikinti yú ki kɔ́ĺ. Gbikintee kaa nìn ŋmɔ́ dinikpileeyaaa, kaa ŋá kimaŋ mun tiba.

²⁹Niinee ní Unimbɔti bɔnaatiliu utikpilee yōoǹ dinikpilee ki dūu páaǹ kimaŋ pu ki gíiǹní Beeteel. U nìn súń u-kpool, ní ki síb́-u.

³⁰U nìn dū-u ki ŋá úǹ u-ba kaakulin, ní ki gāā nlan yii: «Áù, m-nabiki kpíì!» ki súń u-kpool.

³¹U síb́-u míǹ ki dóòyee ní ki bí u-jipɔmbi yii: «M yaa láa kpíìyee, ní dāá síb́-mi dikaakul din poon ní m síb́ Unimbɔti bɔnaatiliu neeyee. Ní dāá dū m-kpabiŋ kí bíĺ kí kɔ́ĺ u-kpabiŋ.

³²Di sá yii ti-Dindaan bɔti tin u dī u-pu ki sòon̄ ki tɔ́ Beeteel saraafaŋŋu pu nì awaadiin ŋin bí ŋgbantamu pu Samaarii timmunee làá lafun ŋá míǹ.»

³³Nì míǹ kɔkɔee, Jeerooboowaam kaa nìn fá u-bimbikpitim. U nìn gbíntìi nìkì ki lèekī binib samaa kansikin ki kàantí-bi bisaraaŋaliibi ŋgbantamu pu. Ubɔ yaa nìn lèe, u nìn bàtī ŋkpam kí sìtī udaan yil pu ní kí kàan̄-u ú nīn sá usaraaŋal ŋgbantamu pu waadiiŋŋin.

³⁴An bimbim nìn yāntì Jeerooboowaam dicaŋku kɔkɔ nib kɔ́ ikpitin, an pu ní Unimbɔti nāaǹ kudicaŋu gbanti ki céetì-kù kitiŋ pu.