Read Ntcham 1 Rois 14 Bible Online

1 Rois 14 - Ntcham bible

1 Rois 14

¹Ŋyunti gbanti mbaanti poonee, Jeerooboowaam jipɔɔn Abiiya nìn dōoǹ iween pu.

²Niinee ní Jeerooboowaam bí u-nimpuu yii: «Yīkìm̄, kpántí a-ba binib ń taa béé yii a sá man Jeerooboowaam nimpuu, kí nīn cá Siiloo tiŋkin. Niin ní Unimbɔti bɔnaatiliu Abiiya kóò. Úǹ di nìn tùkū-mi yii m làá dāá jī Isirayeel tiŋki pu dibeel.

³Á kpáaǹ kpɔnɔb saalaa nì tisiil dibool kí cùú ká-u. U làá tùkù-si kun làá bàń kibiki nee puee.»

⁴Ní Jeerooboowaam nimpuu lafun ŋá míǹ. U nìn yíkì ki nín cá Abiiya dumpu. Too, tiputi puee, Abiiya kaa nìn gíti wāĺ.

⁵Ama ti-Dindaan nìn bí Abiiya yii: «Jeerooboowaam nimpuu làá dāan̄ a-cee. U làá kpántí u-ba kí dāá bàlifì-si u-jipɔɔn un būǹee pu.» Ní Unimbɔti tùkū-u tin u máaǹ kí sòoǹee.

⁶Ŋyunti ŋun Abiiya gbìl̄ u-taaŋi pu u bāań kipunyɔkɔpuee ní u bí yii: «Jeerooboowaam nimpuu, kɔ́nní! Ba pu ní a kpántì a-ba bí taa béé-si? Tin m cáá kí tùkù-see gba kaa sá tibɔmɔntiil.

⁷Nín̄ gítí kí tùkù Jeerooboowaam yii ti-Dindaan Isirayeel Nimbɔtiu bí-u yii: <Man di lēē-si samaa kansikin ki dū-si ki kāaǹ m-nibul Isirayeel pu ubɔti.

⁸M fōō Daafiidi dicaŋkun dibeel ki dūu tīī-si, ama aa dī m-tɔntɔnliu Daafiidi un nìn ŋúb́ m-marab, ki nóó-mi nì u-pɔbil kɔkɔ, ki ŋáań tin kítì m-nimbiinee tabɔbiliŋ.

⁹A gíti ŋá ikpiti ki jítiǹ bin līntiǹ-see kɔkɔ. A mɔ́ɔ́ awaa ki gbítì m-ŋuul ní ki fātì a-boon ki tīī-mi.

¹⁰An puee m làá cáań nnaabu kí tɔ̄ a-dicaŋku pu. M làá kpɔ̀ kí céetí a-dicaŋkun iyumbu nì bin tɔ́ bi-ba ki sá bininjab ki bí Isirayeel tiŋkinee. M làá nàan̄ a-naantiibi kii bi nín ŋàtī timool puee ní[49].

¹¹A-dicaŋkun unil un yaa kpíì kitiŋinee, iboo di làá ŋmɔ́-u. Un di yaa tí kpíì tisatinee, kaajiikub di làá jī u-nanti.> Ti-Dindaan nín sòon̄ puee dee.»

¹²Ní Unimbɔti bɔnaatiliu nìkī ki lī yii: «Ama sii Jeerooboowaam nimpuu, á yīkì kí nīn kùǹ. A tin pée lì yii a làá kɔ́ kitiŋinee, a-bikee làá kpú.

¹³Isirayeel yab kɔkɔ làá kàl̄ ki-kpool ní kí síb́-kì, di sá yii Jeerooboowaam dicaŋkunee, un baba bi làá pée ŋmā kí síb́ee dee. Jeerooboowaam dicaŋkunee, un baba bɔti fáatiǹ ti-Dindaan Isirayeel Nimbɔtiuee dee.

¹⁴Ti-Dindaan làá kàan̄ ubɔtipɔɔn ubɔ Isirayeel tiŋki pu. Úǹ di làá kpɔ̀ kí céetí Jeerooboowaam dicaŋkun yab kɔkɔ. Díǹ gba ní an sá. M bí yii an sá kɔŋkɔnnee bɔti ní!

¹⁵Ti-Dindaan làá dáaĺ Isirayeel yab tafal. Bi-wunti làá dāá nīn jìkì kii tikati tin sí nnyiminee nín jìkì puee ní. U làá dāá fùkù Isirayeel yab kí nyāntí kitimmɔntii kin u nìn dūu tīī bi-naanjabee poon ní kí cáá-bi kí yàl̄ Babiloon mɔɔl Eefiraati gbandi lapu pu yal, kun puee bi kpítì idɔcɔbikaa ki gbítì ti-Dindaan ŋuul.

¹⁶Jeerooboowaam nín ŋá ikpiti ki yāntì Isirayeel yab mun ŋá ikpiti puee, u làá dū-bi kí fá.»

¹⁷Niinee ní Jeerooboowaam nimpuu yíkì ki nín kùǹ ki tin bàn̄ Tiirsa tiŋkin. U nín pée dū u-taal ki tāā u-cindee ní u-bikee sīntì.

¹⁸Isirayeel yab kɔkɔ nìn síb́-kì ní ki súń ki-kpool kii ti-Dindaan nín dī u-bɔnaatiliu Abiiya pu ki lī pu ki síiǹee.

¹⁹Jeerooboowaam tuuŋŋi ŋin kíǹee, u nín jáń tijáti nì u nín jíń dibeel puee bɔti kɔkɔ ŋmàn̄ ki kā Isirayeel bɔtiibi tuuŋŋi gbɔnti poon.

²⁰Abin ŋin Jeerooboowaam dūu kāl̀ Isirayeel tiŋki pu dibeelee nyáń abin mmuŋku nì ali. U kpíì ki cūtìi ŋàl̄ u-baabee ní u-jipɔɔn Nadaab fōō u-yil ki kpántì ubɔti.

²¹Saloomɔn jipɔɔn Rooboowaam di nìn kā Juuda tiŋki pu dibeel. U nìn cáá abin imuŋku ili nì dibindi diba ní ki nín kpántì ubɔti. U nìn jíń Jeerusaleem, kitiŋ kin ti-Dindaan nìn lēē Isirayeel naakɔti kɔkɔ kansikin bí nīn jáaḿ-uee pu dibeel abin saalku nì ali ní. U-na nìn sá uamɔnnimpu ní bi yíì-u yii Naama.

²²Juuda yab nìn ŋá tin kaa kítì ti-Dindaan nimbiinee. Bi nìn ŋá ikpiti ki gbítì u-ŋuul ki jítiǹ bi-naanjab nín nìn ŋá puee.

²³Bi mun nìn máń awaadiin ŋgbantamu pu, ki cóoǹ ataŋkpee nì idɔ in pu bi cɔ̀b̀ ticɔbikaalee ŋgbantamu pu nì isuboon kɔkɔ taapu[50].

²⁴Bininjab nì binimpoobi nìn bí niin gba ki ŋáań alaakpaatuun ki jáaḿ awaa. Atimbun ŋin ti-Dindaan nìn jìn̄ ki fōō bi-timmu ki tīī Isirayeel yabee nín nìn ŋáań ntimbiil tuuŋŋi ŋin kɔkɔee, míǹ deedee ní bi mun nìn ŋáań[51].

²⁵Rooboowaam nín kāl̀ dibeel dibiŋŋmooŋmootiil poonee ní Eejipiti bɔtiu Siisaaki dɔ́miń ki jáń nì Jeerusaleem tiŋki.

²⁶U nìn yōoǹ tigaajawan tin bí ti-Dindaan Diikunee nì tin bí dibeecindinee. U nìn pée yōoǹ kɔkɔ ní. U nìn yōoǹ ki kpáaǹ agbampɔɔ ŋin Saloomɔn nìn dū sindaariya ki mɔ́ɔ́yee kɔkɔ[52].

²⁷Niinee ní ubɔti Rooboowaam dū tasa kúti ki mɔ́ɔ́ agbampɔɔ ki téeǹ ŋin bi yōoǹee pu, ní ki dū-ŋi ki ŋá bijanjaliibi bin cí ubɔti naakooku punyɔmmuee kpiliu ŋaan ú nīn kpèé.

²⁸Ubɔti yaa nìn pée yíkì ki kóò kunimbɔtidiinee, bijanjaliibi nìn yòontí agbampɔɔ gbanti ní ki līī ní kí fàtīí gíiǹní-ŋi.

²⁹Atuun ŋin kɔkɔ Rooboowaam nìn túńee ŋmàn̄ ki kā Juuda bɔtiibi tuuŋŋi gbɔŋkun.

³⁰Kujaau nìn pée bí Rooboowaam nì Jeerooboowaam kansikin ní kaa gbèentí.

³¹Rooboowaam kpíì ki cūtìi ŋàl̄ u-baabi ní bi síb́-u u-baabi kaakulin Daafiidi Tiŋkin. U-na nìn sá uamɔnnimpu ní bi yíì-u yii Naama. Rooboowaam jipɔɔn Abiyaam di fōō u-yil ki kpántì ubɔti.