Read Ntcham 1 Rois 15 Bible Online

1 Rois 15 - Ntcham bible

1 Rois 15

¹Neebaati jipɔɔn Jeerooboowaam nín kāl̀ Isirayeel tiŋki pu dibeel abin saalku nì ata poonee ní Abiyaam kpántì Juuda tiŋki bɔtiu.

²U nìn jíń dibeel Jeerusaleem abin ata ní. U-na nìn sá Abisaloom bisal ní bi yíì-u yii Maaka.

³U nìn pée ŋá ikpitibaanti in u-baa nìn ŋée ní. U-pɔbil kaa nìn bí diba nì ti-Dindaan u-Nimbɔtiu kii u-naanja Daafiidee.

⁴Daafiidi puee, ti-Dindaan u-Nimbɔtiu nìn tīī-u jipɔɔn un làá nīn sá ubɔti u-kpátam boonee. Mimmee dibeel kaa nyēē u-dicaŋkun ní Jeerusaleem ń nīn gbíntìi bí ki sá ubɔti tiŋki.

⁵Di sá yii Daafiidi nìn ŋá tin fáatiǹ ti-Dindaanee, ní u-maŋfal wiiŋyi kɔkɔ poonee, waa nìn fātì u-boon ki tīī tin u nìn kpáafì-uee, see ueetija Urii bɔtee baba[53].

⁶Rooboowaam maŋfal wiiŋyi kɔkɔ poonee, kujaau nìn pée bí u nì Jeerooboowaam kansikin ní.

⁷Abiyaam tuuŋŋi ŋin kɔkɔ u túńee ŋmàn̄ ki kā Juuda bɔtiibi tuuŋŋi gbɔntin. Kujaau nìn pée tí bí u nì Jeerooboowaam kansikin ní[54].

⁸Abiyaam kpíì ki cūtìi ŋàl̄ u-baabee ní bi síb́-u Daafiidi Tiŋkin. U-jipɔɔn Asaa di fōō u-yil ki kpántì ubɔti.

⁹Jeerooboowaam nín kāl̀ Isirayeel tiŋki pu dibeel abin mmuŋku poonee, ní Asaa kpántì Juuda bɔtiu.

¹⁰U nìn jíń dibeel abin imuŋku ili nì diba ní Jeerusaleem tiŋkin. U-na di sá Abisaloom bisal Maaka.

¹¹Asaa nìn ŋá tin fáatiǹ ti-Dindaanee, kii u-naanja Daafiidee.

¹²U nìn jìn̄ bininjab nì binimpoobi bin nìn bí awaadiinni ki ŋáań alaakpaatuunee, ní ki kúntì awaa ŋin u-naanjab nìn mɔ́ɔ́yee[55].

¹³U nìn lēē u-na Maaka tinimpubɔtiilin, kun puee u nìn kpítì diwaal ki nántiǹ ntimbiil waal Aseera. Asaa nìn gāā diwaalee ki lúkú ní ki cáá-dì ki cūnnì Seedrɔn buŋgbandi ki tūū ŋŋmi.

¹⁴Ama waa nìn kúntì laakin bi tòotī awaa ŋgbantamu puee. Nì míǹ kɔkɔee, Asaa maŋfal wiiŋyi kɔkɔ poonee, u-pɔbil nìn bí diba nì ti-Dindaan ní.

¹⁵U nìn cáań ti-Dindaan Diikun tin kɔkɔ ní úǹ u-ba nì u-baa nìn dūu sú Unimbɔtee, an dàkà yii animbil nì sindaariya nì asambil.

¹⁶Kujaau nìn pée bí Asaa nì Isirayeel bɔtiu Bayeesa kansikin ní.

¹⁷Isirayeel bɔtiu Bayeesa dɔ́miń dalba kí já nì Juuda tiŋki, ní ki máń digundi ki tú Raama timbiliiki kí pìin̄ Juuda bɔtiu Asaa nsan.

¹⁸Niinee ní Asaa kɔ́tì animbil nì sindaariya un kɔkɔ nìn bí kunimbɔtidii nimbikpaafidiikun nì ubɔti nimbikpaafidiikunee ki tīī u-tɔntɔnliibi bí cáá cùnnì Damaasi kí tīī Siirii bɔtiu Been-Adaadi, Tabirimɔn jipɔɔn nì Eesiyɔn naantiiu. U nìn bí bí tùkù-u yii:

¹⁹«Yàntī mpèé ń nīn bí man nì sii kansikin kii an nín nìn bí man baa nì sii baa kansikin puee. Kpèè animbil nì sindaariya ní m dūu tú bí cáań kí tīī-si nee. Míǹ puee cùú kpìtī mpèé ŋun bí si nì Isirayeel bɔtiu Bayeesa kansikinee ú taa ti dāan̄ kí já nì mi.»

²⁰Been-Adaadi nìn gbìl̄ ki tīī nì ubɔti Asaa ní ki dū u-janjakpilib ki tú bí cùú já nì Isirayeel timmu. Bi nìn jáń ki fōō Iyɔn nì Daani nì Abeel-Beeti-Maaka timmu nì Kiineereeti tiŋki kɔkɔ nì Neefitalii timmu kɔkɔ.

²¹Bayeesa nín gbìl̄ tibɔti gbantee ní u gbēeǹ kaa ti bíi māā Raama timbiliiki gundi ní ki nín gítí ki cūtìi kāl̀ Tiirsa.

²²Niinee ní ubɔti Asaa yíiń Juuda yab kɔkɔ kaa gāntì báà ubɔ. U nìn yāntì bi cáań ataŋkpee nì idɔ in Bayeesa nìn cáa bíi māā Raama gundee. Ubɔti Asaa nìn yāntì bi dū ataŋkpee nì idɔ gbanti ki máń digundi ki tú Beenjameen tiŋki Geeba nì Miisipa timmu.

²³Atuun ŋin kɔkɔ ní Asaa nìn túńee nì u-pɔ́ɔǹtam nì ntimu mun u máń agun ki túee kɔkɔ ŋmàn̄ ki kā Juuda bɔtiibi gbɔŋkun. Ama u-puti poonee, u nìn búŋkì ní u-taaŋi dūu fàl̄.

²⁴U kpíì ki cūtìi ŋàl̄ u-baabee ní bi síb́-u ki kɔ́ĺ u-baabi, u-naanja Daafiidi Tiŋkin. U-jipɔɔn Joosafaati di fōō u-yil ki kpántì ubɔti.

²⁵Juuda bɔtiu Asaa nín kāl̀ dibeel, dibinliliitiil poonee, ní Jeerooboowaam jipɔɔn Nadaab kpántì Isirayeel bɔtiu. U nìn jíń dibeel Isirayeel tiŋki pu abin ali ní.

²⁶U nìn ŋá tin kaa fáatiǹ ti-Dindaanee. U nìn dī u-baa saŋŋu ní ki nóó u-baa nín nìn yāntì Isirayeel yab kɔ́ ikpitin puee tabɔbiliŋ.

²⁷Niinee ní Ayiiya jipɔɔn Bayeesa un sá Isakaar naakookunee bɔ́ntì kí já nì u. Ŋyunti ŋun Nadaab nì Isirayeel janjaliibi cūtì kí já nì Fiiliistii yab tiŋki Giibeetɔn ki māntìi tú-kèe ní Bayeesa kūū-u.

²⁸Juuda bɔtiu Asaa nín kpántì ubɔti dibintataatiil poonee ní Bayeesa kūū Nadaab ní ki fōō u-yil ki kpántì ubɔti.

²⁹U nín pée kpántì ubɔtee ní u kūū Jeerooboowaam dicaŋkun yab kɔkɔ kaa kíǹ báà unibaanti. U nìn kūū ki céetì bi-kɔkɔ ki nóó nì ti-Dindaan nín nìn dī u-bɔnaatiliu usiilooja Ayiiya pu ki sòon̄ puee ní.

³⁰An nìn jítì míǹ kun puee Jeerooboowaam nìn ŋá ikpiti ní ki yāntì Isirayeel nibul mun ŋá ikpiti, ki gbítì ti-Dindaan Isirayeel Nimbɔtiu ŋuul.

³¹Nadaab tuuŋŋi ŋin u túńee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

³²Asaa maŋfal wiiŋyi kɔkɔ poonee, kujaau nìn pée bí u nì Bayeesa kansikin ní.

³³Asaa nín kpántì Juuda bɔtiu dibintataatiil poonee ní Ayiiya jipɔɔn Bayeesa kpántì ubɔti. U nìn kóò Tiirsa ní ki jíń dibeel abin mmuŋku nì anaa.

³⁴U nìn ŋá tin kaa fáatiǹ ti-Dindaanee. U nìn dī Jeerooboowaam saŋŋu ní ki nóó u nín nìn yāntì Isirayeel yab kɔ́ ikpitin puee tabɔbiliŋ.