Read Ntcham 1 Rois 16 Bible Online

1 Rois 16 - Ntcham bible

1 Rois 16

¹Ti-Dindaan nìn sòon̄ nì Ananii jipɔɔn Jeewuu, u-bɔnaatiliu ú tùkù Bayeesa yii:

²«Aa nìn bí tiban, ama ní m lēē-si ki dū-si ki kāaǹ m-nibul Isirayeel pu ubɔti. Díǹ pu nee, a nóó Jeerooboowaam tabɔbiliŋ, ki yāntì Isirayeel yab ŋá ikpiti ki gbítì m-ŋuul.

³An puee m làá kúntí sii nì a-dicaŋku, m làá ŋá-ni kii m nín ŋá Neebaati jipɔɔn Jeerooboowaam dicaŋku puee ní.

⁴A-dicaŋkun unil un yaa kpíì kitiŋinee, iboo di làá ŋmɔ́-u, ní un yaa kpíì tisatinee, inoon ń jī u-nanti.»

⁵Bayeesa tuuŋŋi ŋin kɔkɔ u túńee nì u-pɔ́ɔǹtam ŋmàn̄ ki kā Isirayeel bɔtiibi tuuŋŋi gbɔŋkun.

⁶U kpíì ki cūtìi ŋàl̄ u-baabee ní bi síb́-u Tiirsa tiŋkin. U-jipɔɔn Eela di fōō u-yil ki kpántì ubɔti.

⁷Ti-Dindaan nìn dī u-bɔnaatiliu Ananii jipɔɔn Jeewuu pu ní ki sòon̄ nì Bayeesa nì u-dicaŋku pu. Di sá yii mpeepeekaamee u nìn yīntiǹ ti-Dindaan. U nìn gbítì ti-Dindaan ŋuul kun puee u nìn ŋá ikpiti kii ubɔti Jeerooboowaam nín nìn ŋá puee ní. Nliliitiimee, u nìn kūū ki céetì Jeerooboowaam dicaŋkun yab kɔkɔ.

⁸Juuda bɔtiu Asaa nín kāl̀ dibeel abin mmuŋku nì aluu poonee ní Bayeesa jipɔɔn Eela kpántì Isirayeel bɔtiu. U nìn kóò Tiirsa ní ki jíń dibeel abin ali.

⁹Ama u-janjakpiliu Simrii, ujanjakpil un kpèé janjatɔrɔkubee bɔ́ntì ki jáń nì u. Ubɔti nìn bí Tiirsa tiŋkin un kpèé kubɔtinaakoouee dumpu ki nyù ndaam ki gbéè.

¹⁰Niin ní Simrii kɔ́ ki kūū-u. Tíǹ jítì ŋyunti ŋun ní Juuda bɔtiu Asaa jíń dibeel abin mmuŋku nì aluli poonee ní. Simrii nìn fōō Eela yil ki kpántì ubɔti.

¹¹U kpántì ubɔti ki kāl̀ dibɔtijal puee ní ki kūū Bayeesa dicaŋkun yab kɔkɔ, waa nìn kíǹ-u uninjaaa, kaa kíǹ-u kinabikaaa, kaa kíǹ-u bɔɔ mun.

¹²Simrii nìn kūū ki céetì Bayeesa dicaŋkun yab kɔkɔ ki nóó nì ti-Dindaan nín nìn dī u-bɔnaatiliu Jeewuu pu ki sòon̄ puee ní.

¹³An nìn jítì míǹ kun puee Bayeesa nì u-jipɔɔn nìn ŋá ikpiti ní ki yāntì Isirayeel yab mun ŋá ikpiti, ki dū bi-waaŋi ki gbítì ti-Dindaan, Isirayeel Nimbɔtiu ŋuul.

¹⁴Eela tuuŋŋi ŋin kíǹee, nì tin u ŋée kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

¹⁵Juuda bɔtiu Asaa nín jíń dibeel abin mmuŋku nì aluli poonee, ní Simrii kpántì Isirayeel bɔtiu. U nìn kóò Tiirsa ní ki jíń dibeel iwiin iluli. Isirayeel janjaliibi nìn cūtì ŋyunti gbanti kí já nì Fiiliistii yab tiŋki Giibeetɔn.

¹⁶Bijanjaliibi bin nìn bíń kujaauee nín gbìl̄ yii Simrii bɔ́ntì ki jáń nì ubɔti ki kpáàa kūū-uee, ní bi ŋá kinyɔɔbaantii dijanjanaapaal pu niin ki lēē ujanjakpil Oomirii ú kpántí Isirayeel bɔtiu.

¹⁷Niinee Oomirii nì u-janjakitil yíkìń Giibeetɔn ki dɔ́miń ki māntìi tú Tiirsa tiŋki.

¹⁸Simrii nín ká yii bi ŋman fōō kitiŋ ki dóòyee ní u nín kóò ubɔti dibiki kiban. U nìn gāā ŋŋmi ki tūū ní an wùn̄ ki kūū-u.

¹⁹An nìn jítì míǹ kun puee Simrii nìn ŋá tin kaa fáatiǹ ti-Dindaanee. U nìn ŋá ikpiti, ki nóó Jeerooboowaam tabɔbiliŋ ki yāntì Isirayeel yab kɔ́ ikpitin.

²⁰Simrii tuuŋŋi ŋin kíǹee nì u nín bɔ́ntì pu ki kūū ubɔtee ŋmàn̄ ki kā Isirayeel bɔtiibi tuuŋŋi gbɔŋkun.

²¹Simrii kúm boonee ní Isirayeel yab cúu yākatì mili: dijandi diba nìn là Giinaati jipɔɔn ń nīn sá ubɔti ní dijandi din kíǹee lēē Oomirii.

²²An dāa kúntèe, bin nìn dī Oomiriiyee di jáń ki pɔ́ɔkiǹ bin nìn pá Giinaati jipɔɔn Tiibinii boonee. Tiibinii kpíìyee ní Oomirii kpántì ubɔti.

²³Juuda bɔtiu Asaa nín jíń dibeel abin mmuŋku nì saalaa nì diba poonee, ní Oomirii kpántì Isirayeel bɔtiu. U nìn jíń dibeel abin saalaa nì ali ní. U nìn dáá kóò Tiirsa tiŋkin ní ki jíń dibeel abin aluu.

²⁴Míǹ boonee ní u cūtìi ká Seemeer ní ki dá u-cee Samaarii gbantaŋki animbil kúti jitɔmbi kutukub biluu. U nìn máń digundi ki tú kigbantaŋee ní ki pú kitiŋ kin u náańee diyindi yii Samaarii ki nóó nì uwandaan yindi Seemeer.

²⁵Oomirii nìn ŋá tin kaa fáatiǹ ti-Dindaanee. U nìn gíti ŋá tin jítiǹ bibɔtiibi bin līntiǹ-uee.

²⁶U nìn pée dī Neebaati jipɔɔn Jeerooboowaam un nìn yāntì Isirayeel yab ŋá ikpiti ki dū iwaatooti ki gbítì ti-Dindaan ŋuulee tabɔbiliŋ ní.

²⁷Oomirii tuuŋŋi ŋin kíǹ u túńee nì u-pɔ́ɔǹtam kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

²⁸U kpíì ki cūtìi ŋàl̄ u-baabee ní bi síb́-u Samaarii tiŋkin. U-jipɔɔn Akaab di fōō u-yil ki kpántì ubɔti.

²⁹Juuda bɔtiu Asaa nín jíń dibeel abin ali kpá imuŋku ili poonee ní Oomirii jipɔɔn Akaab kpántì Isirayeel bɔtiu.

³⁰Ama Oomirii jipɔɔn Akaab nìn ŋá tin kaa fáatiǹ ti-Dindaanee ki jítiǹ bibɔtiibi bin kɔkɔ līntiǹ-uee.

³¹U nín nìn nóó Neebaati jipɔɔn Jeerooboowaam kpitii tabɔbiliŋee kaa bàn̄-uee, ní u gíti cūtìi cáá Siidɔn yab bɔtiu Eetibaal bisal Jeesabeel. U nìn cūtìi bíi gbàantí diwaal Baal nimbiin ki jáaḿ-dì[56].

³²Kudii kun u nìn máń Samaarii tiŋkinee poonee, u nìn máń nsaraafan ki tīī diwaal.

³³Akaab nìn kpítì ndɔ ŋun pu bi cɔ̀b̀ ticɔbikaalee ki cóoǹ. U nìn gíti ŋá tin jítiǹ mimmee ki gbítì ti-Dindaan Isirayeel Nimbɔtiu ŋuul ki jítiǹ Isirayeel bɔtiibi bin kɔkɔ nìn līntiǹ-uee.

³⁴U-beel yuntiŋu ní ubeeteelja Yiil máń digundi ki tú Jeeriikoo tiŋki. Ama kii ti-Dindaan nín nìn dī Nuuni jipɔɔn Joosuwa pu ki sòon̄ puee, míǹ ní an nìn jítì. Ŋyunti ŋun bi bíi gbì kí bíĺ kitiŋee nyeelee ní u-jipɔŋkpiliu Abiiram kpíì, ní ŋyunti ŋun bi bíi cōontí kitiŋee punuubee ní u-jipɔnjoolkaau Seeguub mun kpíì[57].