Read Ntcham 1 Rois 18 Bible Online

1 Rois 18 - Ntcham bible

1 Rois 18

¹Ŋyunti ŋubɔ boon, ŋkùm biŋŋi ditataatiil poonee ní ti-Dindaan bí Eelii yii: «Nín̄ cá kí dū a-ba kí dàkà ubɔti Akaab, di sá yii m làá yàntī utaa ń nì kitiŋ pu.»

²Ní Eelii nín cá kí dū u-ba kí dàkā Akaab. Samaarii tiŋkinee, ŋkùm nìn pɔ̄ɔ̄ ŋkpitim pu.

³Akaab nìn yíiń Oobadiya, bin kpèé dibeecindee kpiliu. - Oobadiya nìn fàŋkí ti-Dindaan tikpil.

⁴Míǹ puee ŋyunti ŋun Jeesabeel nìn yāntì bi kūū ti-Dindaan bɔnaatiliibee, Oobadiya nìn fīī bi-kansikin dilaataal ní. U nìn kpáfì-bi akiti ali pu ní dikitil kamaa cáá binib imuŋku ili nì saalaa ní ki nìn dū-bi ki bál̀ itaŋkpalɔkɔ ili poon. U nìn tìì-bi tijin bi jīǹ nì nnyim bi nyù. -

⁵Niinee ní Akaab bí Oobadiya yii: «Yàntī tí cù kí kpèè inyimbul nì ibun kɔkɔn ti yaa kāntí timool kí cáań kí tīī itaamu nì imamboon í taa kpú. An yaa kaa sá míǹ, ti làá dāá kpɔ̀ ti-waŋkuti.»

⁶Niinee ní bi sòon̄ ki bɔ́ntì báà ŋma nín làá túĺ laakiŋyee. Akaab nìn túĺ laaba pú ní Oobadiya mun dūu túĺ laaba pú.

⁷Oobadiya tàkā u-saŋŋu ki cée, u bí yii ú kpèèyee, Eelii dee. Oobadiya béè-uee ní ki tātìi dōoǹ u-nimbiin dicincibil ní ki bí yii: «Sii ní an lafun sáa, m-dindaan Eelii?»

⁸Ní Eelii kíí-u yii: «Man dee! Cùú tùkù a-kpiliu Akaab yii: <Eelii dòoń!>»

⁹Ní Oobadiya bí yii: «Tikpitil tilati ní m ŋá ní a là kí dū man a-tɔntɔnliu kí ŋá Akaab ŋaan ú kpɔ̀-mi ní?

¹⁰M pūtì ti-Dindaan a-Nimbɔtiu un bí dimaŋfalin nee yii ditimbundi àá dibeel diba kaa kíǹ m-kpiliu Akaab kaa tú binib bí nyàab̀-si. Ditimbundi àá dibeel diba nib yaa bí yii baa ká-see, see ubɔti ń gíti yàntī bí pùtī yii baa lafun ká-si.

¹¹Ní kɔŋkɔnnee, sii bíi lì yii ḿ cùú tùkù m-kpiliu yii: <Eelii dòońaa!>

¹²Ama m yíkí a-cee doo kí cùú tùkù Akaab yii a dòońee ní ti-Dindaan Fam ń yòon̄-si kí cáá búntí laaba, ní u nín dɔ́miń doo kaa ká-see, ní ú kpɔ̀-mi. Man a-tɔntɔnliu mun, doooo m-naacimpɔntin ní m fàŋkí ti-Dindaan.

¹³M-dindaan, baa kalin máafì-si tin m ŋá ŋyunti ŋun ní Jeesabeel kūū ti-Dindaan bɔnaatiliibeeee. M nìn dū ti-Dindaan bɔnaatiliibi dilaataal ní ki bál̀. M nìn yākatì-bi akiti ali pu ní dikitil kamaa cáá binib imuŋku ili nì saalaa ní m dū-bi ki bál̀ itaŋkpalɔkɔ ili poon, ki tìì-bi tijin nì nnyim.

¹⁴Ní kɔŋkɔnnee sii ń tùkù man yii: <Cùú tùkù a-kpiliu yii Eelii dòońaa!> U làá kpɔ̀-mi ní!»

¹⁵Ama ní Eelii bí-u yii: «M pūtì ti-Dindaan Mpɔŋkɔdaan un tundin m bí nee yii díǹ nee gba, m làá cù kí sīĺ Akaab nimbiin.»

¹⁶Niinee ní Oobadiya nín cá Akaab cee ki dūu máafì-u, ní Akaab nín cá kí tūŋkì Eelii.

¹⁷Ŋyunti ŋun Akaab ká Eeliiyee ní u bí-u yii: «Sii un cáań agìń ki tɔ́ Isirayeel yab puee, sii deeee?»

¹⁸Ní Eelii kíí-u yii: «An kaa sá man di cáań digìńdi ki tɔ́ Isirayeel yab pu, ama an sá sii nì a-baa dicaŋkun yab, kun puee ni fātì ni-boon ki tīī ti-Dindaan marab ki cūtìi nóó diwaal Baal.

¹⁹Ama kɔŋkɔnnee, tɔ̄ binib bí yíiń Isirayeel yab kɔkɔ nì diwaal Baal bɔnaatiliibi alaataa anaa nì imuŋku ili nì saalaayee, nì diwaal Aseera bɔnaatiliibi alaataa anaa bin boon Jeesabeel pée, bí kóoǹ kí kpāfì Kaarmeel jool pu.»

²⁰Niinee ní Akaab tú bi yíiń Isirayeel yab kɔkɔ nì bibɔnaatiliibee, ní bi kóoǹ ki kpáfì Kaarmeel jool pu.

²¹Eelii nìn sútì ki pìl̄ samaa kɔkɔ ní ki bí-bi yii: «Kí cáá sāā ŋyunti ŋulɔŋu ní ni làá lēē kí nóó nlandɔkɔbaanti ní? Ti-Dindaan di yaa sá Unimbɔti, nín̄ nóómaan-u. Diwaal Baal di yaa tí sá Unimbɔtee, ní nóó-dì!» Ama samaa kansikinee, báà ubɔ kaa nìn wāaǹ kinyɔkɔ ní kaa nín kíí tiba.

²²Niinee ní Eelii bí samaa yii: «Man baba di kíǹ ki sá ti-Dindaan bɔnaatiliu, ní diwaal Baal bɔnaatiliibi sá binib alaataa anaa nì imuŋku ili nì saalaa.

²³Ní tīī-ti inajaa ili: diwaal Baal bɔnaatiliibi ń lēē ubɔ, kí càkà kí dūú páań idɔ pu kí ŋá saraa, ama bí taa kpāā ŋŋmi. Ma mun làá yòon̄ unaja un kíǹee kí bɔ́ntí kí páań idɔ pu, ma mun kaa làá kpāā ŋŋmi.

²⁴Boonee bí mèè bi-waal ní ma mun ḿ mèè ti-Dindaan. Un Nimbɔtiu yaa kíí ki yāntì ŋŋmi fōō saraayee di lafun sá Unimbɔti.» Ní samaa kɔkɔ kíí yii: «Ti kíí míǹ.»

²⁵Niinee ní Eelii bí diwaal Baal bɔnaatiliibi yii: «Lēēmaan unaja ubɔ kí bɔ́ntí-u, di sá yii nimbi di wīikí. Ní mèè ni-waal, ama ní taa kpāā ŋŋmi.»

²⁶Ní bi lēē inajaa in bi cáańee ubɔ ki bɔ́ntì saraa, ní ki kúuǹ ki yíiń Baal ki yōoǹ kutaafaau ki cáa sāā kuwiŋkuluu ki lì yii: «Baal, kíí-ti!» Ama baa nìn gbìl̄ nneen ŋubɔ puɔɔɔ, ubɔ mun kaa nìn kíiń-bi. Bi nìn ŋōō ki màntī nsaraafan ŋun bi nìn máńee.

²⁷Kuwiŋkuluuee ní Eelii kíĺ ki bíi bèel̄-bi ki lì yii: «Nín̄ kūuntímaan mpɔn! U sá unimbɔti ní! An yaa yíì u bíi dàkafī tiba pu àá waa bí, àá u cūtì nsan. An yaa yíì u dɔ̄ ki gèeǹ ní an sá ní fìntī-u.»

²⁸Niinee ní bi bíi kūuntí mpɔn, kii bi-koobiliŋ poon nín sá puee. Bi nìn cáá njimu nì ŋkpamu ki gífí bi-ba áli fatiku dāa kíǹ ki pùub̀ bi-wunti pu.

²⁹Kuwiŋkuluu gbáń ki jítèe ní an fītì-bi yam ní bi kíǹ ki tátí mpɔn áli kuwiŋkuluu saraau yuntiŋu dāa sāā, ama baa nìn gbìl̄ nneen ŋubɔ puɔɔɔ, ubɔ kaa nìn kíiń-baaa, baa nìn ká báà kudaaŋŋu mun.

³⁰Niinee ní Eelii bí samaa kɔkɔ yii: «Ní sútiń kí pìl̄maan-mi!» Ní samaa kɔkɔ sútì ki pìl̄-u. Ní u ŋáŋkì ti-Dindaan saraafaŋŋu ŋun nìn lítèe.

³¹U yōoǹ ataŋkpee saalaa nì ali ki nóó nì Jaakɔb jipɔmbi naakɔti saalaa nì tilee, Jaakɔb gbanti ní ti-Dindaan nìn bí yii: «Bi làá nīn kíǹ ki yíì-si yii Isirayeel ní[60].»

³²Ataŋkpee gbanti ní Eelii nìn fātìi dūu máń nsaraafan ki dū-ŋu ki sú ti-Dindaan. U nìn gbìn̄ dibɔbil din poon nnyim liitirib mmuŋku nì saalaa ŋūǹ kí kɔ́ee ki tú nsaraafan.

³³U ŋá míǹ ki dóòyee ní ki bɔ́ntì idɔ ki páaǹ nsaraafanee pu, ní ki càkā unajee ki bɔ́ntìi páaǹ idɔee pu.

³⁴Niinee ní u bí bin nìn bí niinee yii: «Lúḿmaan nnyim kí gbéeǹ aboo anaa kí sìtī saraa nì idɔ nee pu.» Ní bi ŋá míǹ. Ní u gíti bí yii: «Gíti ŋámaan míǹ nliliitiim.» Ní bi gíti ŋá míǹ. Ní u gíti tí bí yii: «Gíti tí ŋámaan míǹ ntataatiim.» Ní bi gíti tí ŋá míǹ ntataatiim.

³⁵Nnyim nìn kíǹ ki pùub̀ nsaraafan pu ní áli dibɔbil din bi gbìn̄ee gba gbí.

³⁶Ŋyunti ŋun bi ŋáań kuwiŋkuluu saraauee bàn̄ee ní Unimbɔti bɔnaatiliu Eelii sútìi pìl̄ nsaraafan ní ki bí yii: «Ti-Dindaan Abraam nì Isaaki nì Jaakɔb Nimbɔtiu, yàntī bí béé díǹ yii sii di sá Isirayeel Nimbɔtiu ní man sá a-tɔntɔnliu, ní sii di bí yii ḿ ŋá tin kɔkɔ m ŋá nee.

³⁷Kíí-mi, ti-Dindaan, kíí-mi kí yàntī samaa nee ń béé yii sii ti-Dindaan di sá Unimbɔti, ní a là kí fàtīí gíiǹní-bi a-cee.»

³⁸Ní ti-Dindaan yāntì ŋŋmi nyánní yilpu ki wùn̄ saraayee nì idɔee nì ataŋkpeeyee nì ŋkpɔŋkpɔm, ní ki yāntì nnyim min kā dibɔbilinee fóotì.

³⁹Samaa nín ká mimmee ní bi-kɔkɔ tātìi dōoǹ kitiŋ dicincibil ki bí yii: «Ti-Dindaan di lafun sá Unimbɔti! Ti-Dindaan di lafun sá Unimbɔti!»

⁴⁰Ní Eelii bí-bi yii: «Ní cúúmaan diwaal Baal bɔnaatiliibee! Ní taa yàntī báà ubɔ ń ŋmátí!» Ní bi cúú-bi, ní Eelii cáá-bi ki sīntì Kiisɔn buŋgbandi ki lāntì bi-kɔkɔ niin.

⁴¹Boonee ní Eelii bí Akaab yii: «Jɔ̄m̀ kí jī kí nyɔ̀, di sá yii m gbìl̄ ditaadundi pu.»

⁴²Ní Akaab nín jɔ́ḿ kí jī kí nyɔ̀, ní Eelii úǹ nín jɔ́ḿ Kaarmeel jool yilpu, ki tātìi gbāaǹ ki dū u-yil ki fákáǹ u-tabiŋyiliŋ kansikin.

⁴³Niinee ní u bí u-tɔntɔnliu yii: «Jɔ̄m̀ kí kpèè tiŋku watil pú.» Ní utɔntɔnlee jɔ́m̀ ki kpēē ní ki fātìi gítìń ki bí yii: «Tiba kpá.» Ŋfunyɔm miluli pu ní Eelii bí-u yii: «Gítí kí kpèè.»

⁴⁴Ŋfunyɔm miluli puee ní utɔntɔnlee bí yii: «Kpèè, kitagbambilii kiba nyánní tiŋku watil pú ki jɔ́miń. Kaa gbìfì ki bàn̄ unil ŋaŋfaau gba.» Ní Eelii bí-u yii: «Jɔ̄m̀ kí tùkù Akaab yii: <Kpàl̄ a-taamuu kí kpákatí utaa ń taa cúú-si nsanni.>»

⁴⁵An kaa pée súŋkì ní utaa yíiń ki bɔ̄ntì kpíŋkpiŋkpim ní kubuŋu bíi jītí, ní utaakpaan ubɔ dɔ́miń ki nìn̄. Ŋyunti gbantee Akaab kā u-tɔrɔkuun ki gítí Jisirayeel tiŋkin[61].

⁴⁶Ti-Dindaan nìn tīī Eelii mpɔn ní úǹ gbìn̄ u-dambalau ki sáǹ ki līntì Akaab tɔrɔkuu nyɔkɔpu ki tin kɔ́ Jisirayeel tiŋkin.