Read Ntcham 1 Rois 19 Bible Online

1 Rois 19 - Ntcham bible

1 Rois 19

¹Akaab máafì u-nimpuu Jeesabeel tin kɔkɔ ní Eelii ŋée nì u nín kūū diwaal Baal bɔnaatiliibi kɔkɔ puee.

²Niinee ní Jeesabeel tú bí cùú tùkù Eelii yii: «Fool naŋkɔnampu, m yaa kaa fu ŋá-si kii a nín ŋá bibɔnaatiliibi nee puee, awaa ń dáaĺ m-tafal kí gíti kūtì!»

³Eelii gbìl̄ mimmee ní ki yíkìi kátì kí fīī u-ba. U bàn̄ Beerseeba, Juuda yab tiŋkinee ní ki dū u-tɔntɔnliu ki kāaǹ niin.

⁴Ama ní úǹ u-ba dū ŋwimmɔn ki cōom̀ kuteeun, ní ki cūtìi kāl̀ kisugbooi kiba taapu ki mèé yii ŋkúm ń dāá dū-u. U nìn bí yii: «Ti-Dindaan, kɔŋkɔnnee an gíti lákatì! Lēē m-maŋfal, di sá yii maa jítiǹ m-naanjab.»

⁵U lī mimmee ní ki tātìi dōoǹ kisugbooyee taapu ki dūu gèen̄. Kpalaayee ntuun ŋubɔ gbēē-u ní ki bí-u yii: «Yīkìm̄ kí jī tijin.»

⁶U kpēē u-yil púee, kantaalku nì dinyimbool di sée. U jíń ki nyùn̄ ki dóòyee ní ki fātìi dōoǹ.

⁷Ama ní ti-Dindaan tuuŋŋuee fātìi gítìń nliliitiim ki gbēē-u ní ki bí-u yii: «Yīkì kí jī tijin, di sá yii a-saŋŋu dá láá fɔ̀kɔ̀.»

⁸Eelii yíkèe ní ki jíń ki nyùn̄ ní ki ká mpɔn ki cōom̀ iwiin imuŋku ili ŋwiimpu nì kunyeeu ki tin nyáń Unimbɔti jool Ooreeb pu.

⁹Eelii bàn̄ Ooreebee ní ki kɔ́ ki dōoǹ ntaŋkpalɔkɔ ŋubɔn kunyeeu. Niinee ní ti-Dindaan bālifì-u yii: «Eelii, ba ní a tūǹ doo?»

¹⁰Ní Eelii kíí yii: «Ti-Dindaan, ipɔn kɔkɔ Nimbɔtiu, m cáá a-pu difaŋgiil, ní an páb́-mi Isirayeel yab nín fātì bi-boon ki tīī a-poondee. Bi gbáń ki wīī a-saraafaŋyi, ki kūū a-bɔnaatiliibi. M pée kíǹ m-baba ní, ní bi bíi nyàab̀ kí lēē ma mun maŋfal[62].»

¹¹Ní ti-Dindaan bí-u yii: «Nyānní kí sīĺ dijool pu m-nimbiin yéèyaa, m làá jītí.» Kpalaayee kubuŋkpaaŋŋu kubɔ dɔ́miń ki jítì, kubuŋuee nìn pɔ̄ɔ̄ ki yàntī ajoon fátí iween ki wìil̄ ataŋkpee. Ama ti-Dindaan kaa nìn bí kubuŋuee poon. Kubuŋu jítì ki dóòyee ní kitiŋ cīŋkì. Ama ti-Dindaan kaa nìn bí kitiŋ nín cīŋkì puee poon.

¹²Kitiŋ cīŋkì míǹ ki dóòyee ní ŋŋmi dɔ́miń, ama ti-Dindaan kaa nìn bí ŋŋmee poon. Ŋŋmi boonee ní u gbìl̄ nneen ŋubɔ pu ŋu bí dìmmm.

¹³Ŋyunti ŋun Eelii gbìl̄ nneenee puee ní u dū u-bɔkutikpaandi ki bīiǹ u-nimbiin, ní ki nyáń ki sí ntaŋkpalɔkɔee nyɔkɔpu. Niinee ní nneen ŋubɔ gíti sòon̄ nì u yii: «Eelii, ba ní a ŋáań doo ní?»

¹⁴Ní u kíí yii: «Ti-Dindaan, ipɔn kɔkɔ Nimbɔtiu, m cáá a-pu difaŋgiil, ní an páb́-mi Isirayeel yab nín fātì bi-boon ki tīī a-poondee. Bi gbáń ki wīī a-saraafaŋyi, ki kūū a-bɔnaatiliibi. Man baba di pée kíǹ, ní bi bíi nyàab̀ kí lēē ma mun maŋfal.»

¹⁵Niinee ní ti-Dindaan bí-u yii: «Nín̄ gítí, yòon̄ Damaasi teeku saŋŋu. A yaa bàn̄ee, á bàtī ŋkpam kí sìtī Asayeel yil pu kí kàan̄-u Siirii bɔtiu[63].

¹⁶A yaa dóòyee, á bàtī ŋkpam kí sìtī Nimisii jipɔɔn Jeewuu yil pu kí kàan̄-u Isirayeel bɔtiu, ní kí bàtī ŋkpam kí sìtī Safaati jipɔɔn Eeliisee un sá Afeel-Meewoola tiŋkinee yil pu ú fōō a-paaŋŋu kí kpántí m-bɔnaatiliu[64].

¹⁷Unil un yaa ŋúń ki sáǹ ki ŋmátì ní Asayeel kaa kūū-uee, Jeewuu làá kpɔ̀-u, ní un yaa ŋúń ki ŋmátì Jeewuu kaa kūū-uee, Eeliisee làá kpɔ̀-u.

¹⁸Ama m làá kíń Isirayeel tiŋkin binib kutukub biluli, an dàkà yii bin kɔkɔ tabiŋyiliŋ kaa gbāaǹ diwaal Baal nimbiin kaa móotì-dèe[65].»

¹⁹Niinee Eelii kíĺ nsan ki nín cá. U cée ní ki ká Safaati jipɔɔn Eeliisee ŋúb́ inaa in bi kpàl̄ i kù tikpaalee mmuŋku nì inaa ki bíi kù tikpaal. Eelii jítì u-ceeyee ní ki tɔ́ u-bɔkutikpaandi ki páaǹ Eeliisee pu[66].

²⁰Niinee Eeliisee yāntì u-naayee ki nín cá Eelii cee ki bí-u yii: «Yàntī ḿ cùú kpàl̄ m-baa nì m-na kí kàan̄-bi ní kí dāan̄ kí nīn nóó-si.» Ní Eelii bí-u yii: «Nín̄ gítí a-tundi pu, m lī-si tibaaa?»

²¹Eeliisee nín gítí u-saakun. U bàn̄ee ní ki cúú inaa ili ki ŋá saraa. Idɔ in bi nìn dūu kpàl̄-iee ní u nìn dūu kpāā ŋŋmi ki tɔ́kɔǹ tinan ki tīī u-yab. U ŋá míǹ ki dóòyee ní ki yíkìi páaǹ Eelii boon ní ki kpántì u-tɔntɔnliu.