Read Ntcham 1 Rois 2 Bible Online

1 Rois 2 - Ntcham bible

1 Rois 2

¹Daafiidi nín tóob́ ŋkúmee ní u kpáafì u-jipɔɔn Saloomɔn tibɔti nee yii:

²«M làá dòon̄ m-ŋaliŋu pu dee, á pɔ́ɔǹ a-ba kí ká kunyannyaau.

³Nín̄ ŋúb́ tin ti-Dindaan a-Nimbɔtiu yāntì bi ŋmàn̄ ki yóoǹee. Nín̄ pée ŋáań min u lèe, kí nīn ŋúb́ u-bɔkpaaŋi nì u-marab nì u-koobiliŋ nì u-dàkatam, kii an nín ŋmàn̄ ki kā Mooyiisi Marau poon puee. A yaa ŋá míǹ, án làá bútí-si a-tuuŋŋi kɔkɔ nì tin kɔkɔ a bɔ́ntì kí ŋée poon.

⁴Niinee, ti-Dindaan làá ŋá kii u nín nìn pōoǹ-mi ki lī puee yii: <A-naantiibi yaa ŋáań min m lèe, ki yaa nóó-mi ibaamɔn poon nì bi-pɔbiliŋ kɔkɔ nì bi-naŋki kɔkɔee, a-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin.>

⁵Tiba mun gíti sɔ̀. A téetí Seeruya jipɔɔn Joowaab nín nìn ŋá-mi tikpitil tiŋyee kɔkɔɔ! Úǹ di nìn kūū Neer jipɔɔn Abineer nì Yeeteer jipɔɔn Amasaa, Isirayeel janjakpilib bilee. U nìn kūū-bi ŋgbansɔŋfi yuntiŋu, a lì kii kujaau poonee, ní ki làá túń bi-kúm kpuulool[7].

⁶Míǹ puee, dàkà iciin kí taa yàntī ú púĺ kí nīn sìntī ditaŋkpiilin nì ŋgbansɔŋfi.

⁷Ama á dàkà ugiilaadija Baarsilaayi jipɔmbi kulaŋŋaŋfitiiu bí nīn bí a nì bin kpáfí ki jīǹ disambibaantiilee kansikin. Di sá yii bi nìn ŋá-mi tiŋan ŋyunti ŋun ní a-maan Abisaloom nìn jì-mi m bíi sáń-uee[8].

⁸Kí kúntée, á taa súntí Geera jipɔɔn Simeeyii un sá Beenjameen naantiu ubɔ ki kóò Bawuriim tiŋkinee pu. Ŋwiin ŋun m nìn sáń ki cá Mayanayiim tiŋkinee, u nìn tɔ́-mi mbusu an kaa cáá bí lì. Ama m nín gítińee, u nìn sīntì Jɔɔdan buŋgbandi ki túŋkìń-mi, ní m nìn pūtì ti-Dindaan ki pōoǹ-u yii maa làá kpɔ̀-u[9].

⁹Ama kɔŋkɔnnee á taa yàntī ú nīn bí kii u sá maanyiibee. Di sá yii a sá uciŋfiti, míǹ puee a nyí a nín làá ŋá-u puee. Á kpɔ̀-u ú kpáaǹ u-yikpipinti kí sìntī ditaŋkpiilin.»

¹⁰Daafiidi dáaĺ u-ba ki sīntèe ní bi síb́-u Daafiidi Tiŋkin, Jeerusaleem.

¹¹U nìn kāl̀ dibeel Isirayeel tiŋki pu abin imuŋku ili ní. U nìn kāl̀ abin aluli Eebrɔn tiŋkin, ní ki kāl̀ abin mmuŋku nì saalaa nì ata Jeerusaleem[10].

¹²Niinee ní Saloomɔn kāl̀ u-baa Daafiidi beejal pu, ní u-beel báaǹ inyaan tiŋan.

¹³Dalbee ní Agiiti jipɔɔn Adooniyasi cūtìi ká Saloomɔn na Baatiseeba. Baatiseeba ká u dòońee ní u bālifì-u yii: «An mɔ̄ deeee?» Ní úǹ kíí-u yii: «Iiin, an mɔ̄!»

¹⁴Ní ki gíti kútì yii: «M cáá tiba kí tùkù-si ní.» Ní Baatiseeba bí-u yii: «Sòoǹ tin a cááyee!»

¹⁵Ní u kíĺ ki bíi sòoǹ yii: «Kii a nín nyí puee, man di bàà baasii yì dibeel, ní Isirayeel yab kɔkɔ nìn kíǹ ki kā ki cí yii man nín kpántí ubɔti. Ama ní dibeel ŋmábitì m-ŋalin ní m-naal fōō, di sá yii ti-Dindaan di là yii úǹ ní kpántí ubɔti.

¹⁶Kɔŋkɔnnee, m cáá kuwambambaantiiu ní kí mèè-si. M gbàam̄-si, á taa yííyee.» Ní Baatiseeba bí-u yii: «Nín̄ sòoǹ!»

¹⁷Ní Adooniyasi nìkī ki bí yii: «M gbàam̄-si, tùkù ubɔti Saloomɔn ú dū kisuneembiki Abiisaagi kí tīī-mi ḿ cáá. Kéè waa làá yííyeeee!»

¹⁸Ní Baatiseeba kíí-u yii: «An ŋān̄, m làá cùú sòoǹ nì ubɔti an bɔti kí tīī-si.»

¹⁹Niinee ní Baatiseeba nín cá ubɔti Saloomɔn cee kí sòoǹ nì u tin Adooniyasi cáań ki tùkū-uee. Ubɔti nín ká-uee ní u yíkì u-beejal pu ki nín túŋkí-u ní ki gbāaǹ u-nimbiin. U ŋá míǹ ki dóòyee ní ki gítì ki kāl̀ u-beejal pu ní ki nyàab̄ diba mun ki síiǹ u-ŋaŋgiil pú ní u-na mun kāl̀ díǹ pu.

²⁰Ní Baatiseeba bí-u yii: «M cáá tiba fiii ní ki là kí mèè-si, á taa yííyeeee.» Ní ubɔti kíí-u yii: «M-na, mèè kun ní a yaa lèe, m làá ŋá kí tīī-si.»

²¹Ní Baatiseeba bí yii: «Mimmee baa ŋūǹ kí dū kisuneembiki Abiisaagi kí tīī a-maan Adooniyasi ú cááaaa?»

²²Ní ubɔti Saloomɔn kíí u-na yii: «Ba pu ní a bàlifī bí dū kisuneembiki Abiisaagi ŋmaniŋma kí tīī Adooniyasi? Bàlifì bí dū dibeel mun kí tīī-uaa, kun puee u sá m-maan ní! Bàlifì bí dū-dì kí tīī u nì u-naacimbi usaraaŋakpil Abiyataar nì ujanjakpil Joowaab, Seeruya jipɔɔn[11]!»

²³Ní ubɔti Saloomɔn pūtì ti-Dindaan ki lī yii: «Unimbɔti ń dáaĺ m-tafal kí gíti kūtì m yaa kaa yāntì Adooniyasi dū u-maŋfal ki pàn̄ tin u sòon̄ee pɔndi!

²⁴Nì ti-Dindaan un bí dimaŋfalin ki yāntì m kāl̀ m-baa Daafiidi beejal pu, ní ki pōoǹ-mi yii dibeel làá nīn sá ki tīī man nì m-naantiibee yindi puee, m pūtì yii díǹ díǹ ní Adooniyasi làá kpú.»

²⁵Niinee ní ubɔti Saloomɔn tú Yeewooyadaa jipɔɔn Beenayawuu, ní úǹ cūtìi kūū Adooniyasi.

²⁶Ní ubɔti bí usaraaŋakpil Abiyataar yii: «Nín̄ cá Anatooti tiŋkin, a-kpaatantin, di sá yii a máaǹ ŋkúm. Ama maa làá kpɔ̀-si díǹ, kun puee a túǹ ti-Dindaan Unimbɔti dakaau m-baa Daafiidi yuntiŋu, ní a nì m-baa kpáfì ki jíń falaa[12].»

²⁷Saloomɔn lēē Abiyataar ú taa ti nín̄ sá ti-Dindaan saraaŋakpiliu. Mimmee u ŋá kii ti-Dindaan nín nìn sòon̄ tin usaraaŋakpil Eelii dicaŋku pu Siilooyee dee[13].

²⁸Ŋyunti ŋun ní Joowaab gbìl̄ tin jítèe ní u sáǹ ki cūtìi kɔ́ ti-Dindaan tantiun ki cúú nsaraafan yiŋyi. Di sá yii Joowaab nìn kíí ki kútì Adooniyasi pu, ama waa nìn páaǹ Abisaloom boon.

²⁹Ní bi dɔ́miń ki tùkū ubɔti Saloomɔn yii: «Joowaab sáǹ ki cūtìi kɔ́ ti-Dindaan tantiun ki bí nsaraafan caŋin.» Niinee ní Saloomɔn tú Yeewooyadaa jipɔɔn Beenayawuu ú cùú kpɔ̀-u.

³⁰Beenayawuu kɔ́ ti-Dindaan tantiu poonee ní ki bí Joowaab yii: «Ubɔti bí yii á nyānní niin.» Ama ní Joowaab kíí yii: «Kpáb, doo ní m làá kpú.» Ní Beenayawuu nín gítí ubɔti cee ki dū Joowaab nín kíí-u puee ki tùkū-u.

³¹Ní ubɔti bí-u yii: «An yaa sée kpɔ̀-u niin, kí síb́-u. An yaa ŋá mimmee man nì m-baa dicaŋku nyáń maanyiibab bili bin Joowaab nìn kūūyee kpuuloolin dee.

³²Tiŋman, Isirayeel janjakpiliu, Neer jipɔɔn Abineer nì Juuda janjakpiliu, Yeeteer jipɔɔn Amasaa nìn sá deedeedambi ki jítiǹ Joowaab. Ama u nìn kūū-bi m-baa kaa kpáàa nyí. Ti-Dindaan ń yàntī u-nikpaakooŋu gbanti kpuulool ń gítí u-pu.

³³Bi-fatikuu ń gítí Joowaab nì u-naantiibi pu kí nīn cá jaanjaan. Ama ti-Dindaan ń yàntī Daafiidi nì u-naantiibi nì u-dicaŋku nì u-beel ń nīn bí mmɔnni kí nīn cá jaanjaan.»

³⁴Niinee ní Yeewooyadaa jipɔɔn Beenayawuu nín gítí Joowaab cee ki kūū-u. Bi nìn síb́ Joowaab u-dumpu kuteeun ní.

³⁵Ubɔti nìn dū Yeewooyadaa jipɔɔn Beenayawuu ki téeǹ u-yil u kpántì ujanjakpil, ní ki yāntì usaraaŋakpil Sadooki fōō Abiyataar yil.

³⁶Ubɔti nìn yāntì bi yíiń Simeeyii ní u bí-u yii: «Mā a-diiku Jeerusaleem tiŋkin doo kí nīn kóò. Aa cáá nsan kí nyā kí cù laaba.

³⁷Di sá yii ŋwiin ŋun ní a yaa nyáń ní a-taal lákatì Seedrɔn bùmbiki puee, á béé yii a làá pée kpú ní, ní a-fatikuu kpuulool ń gítí a-pu.»

³⁸Ní Simeeyii bí ubɔti yii: «Ti-baa ubɔti, a nín lī puee ŋān̄ tikpil. A nín bí yii man a-tɔntɔnliu ń ŋá puee, míǹ ní m làá ŋá.» Simeeyii nìn kāl̀ Jeerusaleem ki yúntì.

³⁹Ama abin ata boonee ní Simeeyii yumbui ili sáǹ ki nín cá Gaati bɔtiu, Maaka jipɔɔn Akiisi cee, ní bi dɔ́miń ki tùkū Simeeyii yii: «A-yumbui bí Gaati tiŋkin[14].»

⁴⁰Ní Simeeyii yíkì ki kpàl̄ u-maŋki ki nín cá Akiisi cee Gaati tiŋkin kí nyàabìń u-yumbui. Simeeyii nìn pée cūtì Gaati tiŋkin ki gíiǹní u-yumbui ní.

⁴¹Ní bi tùkū Saloomɔn yii Simeeyii nyáń Jeerusaleem ki cūtì Gaati tiŋkin ki fātìi gítìń.

⁴²Niinee ní ubɔti yāntì bi yíiń Simeeyii ní u bí-u yii: «M nìn yāntì a pūtì ti-Dindaan nimbiin yii aa làá nyā kitiŋee ni ní man m-ba kpáafì-si yii: <Ŋwiin ŋun a yaa nyáń kitiŋ nee ni ki cūtì laabee, a làá kpɔ́ɔ>! Kéè a nìn kíí-mi yii tin m sòon̄ee ŋān̄aa!

⁴³Kin ba pu ní aa tɔ́ dipoondi din a nìn pōoǹ ti-Dindaan nimbiinee nì mara un m nìn tīī-see?»

⁴⁴Ní ubɔti gíti bí Simeeyii yii: «Sii a-ba nyí tiŋan tikpitil tin ní a ŋá m-baa Daafiidee. Too, ti-Dindaan làá yàntī a-toonam ń gítí a-pu.

⁴⁵Ama man ubɔti Saloomɔn, ti-Dindaan làá bìin̄ m-pu, ní kí tīī Daafiidi beel mpɔn kí nīn cá jaanjaan[15].»

⁴⁶Niinee ní ubɔti pú Yeewooyadaa jipɔɔn Beenayawuu kinyɔkɔ ú nyāntí Simeeyii ní úǹ nyántì-u ki kūū-u. Min ní Saloomɔn nìn ŋá ki mɔ̄tìi ká mpɔn u-beel báaǹ inyaanee dee.