Read Ntcham 1 Rois 20 Bible Online

1 Rois 20 - Ntcham bible

1 Rois 20

¹Siirii bɔtiu Been-Adaadi kóoǹ u-janjaliibi kɔkɔ ki kpáfì. Bibɔtiibi mmuŋku nì saalaa nì bili di nìn kútì u-pu u nì bi ŋá mpèé. U nìn cáań itaamu nì janjatɔrɔkub ki dɔ́miń u nì u-janjakitil māntìi tú Samaarii tiŋki kí já nì kì.

²U nìn tú binib bí tùkù Isirayeel bɔtiu Akaab yii:

³«Man ubɔti Been-Adaadi nín sòon̄ puee sèé: <Man di yì a-nimbiliŋ nì a-sindaariyau. A-nimpoobi nì a-jipɔmbi bin ŋān̄ee, man di tí yì bi mun.>»

⁴Ní Isirayeel bɔtiu kíí-u yii: «Ti-baa ubɔti, a nín lī puee míǹ dee. Man nì tin kɔkɔ m cááyee, sii di yì.»

⁵Ama ní ituunee fātìi gítìń nliliitiim ki bí-u yii: «Man Been-Adaadi di bíi sòoǹ. M tú bí tùkù-si yii: <Á dū a-nimbiliŋ nì a-sindaariyau nì a-nimpoobi nì a-jipɔmbi kí tīiń-mi.>

⁶Di sá yii fool naŋkɔnampuee, m làá fu tɔ̄ m-kàlimbi bí fūkul̀ a-naakookun nì a-kàliŋkpilib diiŋŋin. Kun bi yaa fu ká an cáá a-cee kunyampoou aa mɔ̄ ti-puee, bi làá fu yòon̄.»

⁷Niinee ní Isirayeel bɔtiu yíiń bitindaŋkpilib ki bí-bi yii: «Ní kpèèmaan, kijapaai nee baasii bíi tákà-mi tibɔti ní. U nín túnní yii ḿ dū m-nimpoobi nì m-biyaamu nì m-nimbiliŋ nì m-sindaariyau kí tīī-uee, maa yíì.»

⁸Niinee ní bitindaŋkpilibee nì samaa kɔkɔ bí-u yii: «Á taa pīlifiǹ-uaaa, kí taa kíí u nín bālifì-si tiŋyee.»

⁹Ní u bí Been-Adaadi tuuŋyee yii: «Ní tùkù ti-baa ubɔti yii: <Tin a bàà bí yii man a-tɔntɔnliu ń ŋá kí tīī-si mpeepeekaamee, m làá ŋá míǹ kí tīī-si, ama tin a bālifì kɔŋkɔnneeyee, maa làá ŋmā kí ŋá míǹ.>» Ituunee nìn búntì ki cūtìi tùkū Been-Adaadi Isirayeel bɔtiu nín kíí puee.

¹⁰Niinee ní Been-Adaadi fātìi dū u-tɔntɔnliibee kí tú ntataatiim bí tùkù-u yii: «Awaa ń dáaĺ m-tafal kí gíti kūtì m yaa kaa yāntì Samaarii tiŋki kpántì ntam min kaa làá gbí bin kɔkɔ cēentí-mi nee ŋaantiliŋinee!»

¹¹Ní Isirayeel bɔtiu kíí yii: «Ní tùkù Been-Adaadi yii: <Un cá kujaauee kaa máaǹ kí nīn pùlifī kii u nyánní kujaauee.>»

¹²Been-Adaadi nì bibɔtiibi bin kíǹee nìn bí tantibin ki nyù idafi ní bi dɔ́miń ki tùkū-u tibɔti gbanti. U nín gbìl̄ mimmee ní u bí u-janjakpilib yii: «Dikɔ̀ndi ń kíĺ!» Ní bi bɔ́ntì kí kíĺ dikɔ̀ndi.

¹³Niinee ní Unimbɔti bɔnaatiliu ubɔ dɔ́miń ki ká Isirayeel bɔtiu Akaab ní ki bí-u yii: «Ti-Dindaan bí yii: <Kéè a ká bijanjaliibi cutimaanyi nee yaa! M làá dū-bi kí ŋá a-ŋaan díǹ ní á béé yii man di sá ni-Dindaan.>»

¹⁴Ní Akaab bí yii: «Kí dūú dī ŋma pu ní a làá dū-bi kí ŋá m-ŋaan ní?» Ní ubɔnaatilee kíí-u yii: «Kpèè ti-Dindaan nín sòon̄ puee sèé: <Ntiŋgbamu kpilib janjaliibi bin sá binipɔmbee pu ní m làá dūú dī.>» Ní Akaab gíti bālifì yii: «Ŋma di làá kíĺ dikɔ̀ndi ní?» Ní u kíí yii: «An sá sii.»

¹⁵Niinee ní Akaab kóoǹ ntiŋgbamu janjapɔmbee ki kpáfì. Bi nìn bí binib alaataa ali nì mmuŋku nì binib bili. Bíǹ boonee ní u kóoǹ Isirayeel kɔkɔ janjaliibi ki kpáfì, bíǹ nìn sá binib kutukub biluli.

¹⁶Kuwiŋkuluu, ŋyunti ŋun ní Been-Adaadi nì bibɔtiibi mmuŋku nì saalaa nì bili bin u nì bi ŋá mpèéyee bí bi-tantibin ki nyù ki gbéèyee ní Akaab nì u-yab nyáń kí já nì bi.

¹⁷Ntiŋgbamu janjapɔmbee di nìn péé péé ki nyáń. Been-Adaadi nìn tú binib bí kpèè kun bíi jītée ní bíǹ dɔ́miń ki tùkū-u yii: «Binib nyánní Samaarii ki dòoń.»

¹⁸Ní Been-Adaadi bí yii: «Bi yaa dòoń nì ŋgbansɔŋfee, ní cúú-bi kí taa kpɔ̀-bi, bi yaa tí dòoń nì kujaauaa, ní tí cúú-bi kí taa kpɔ̀-bi!»

¹⁹Ama bijanjapɔmbee nìn nyáń kitiŋin dijanjakitil pá bi-boon.

²⁰Báà ŋma nìn kūū u nì un bíi jáàyee. Siirii yab nìn sáǹ ní Isirayeel yab jìn̄-bi. Siirii bɔtiu Been-Adaadi nìn ŋúń ki kāl̀ utaamu pu kí sáǹ ki ŋmátì ki kpáaǹ bitanjakaliibi biba.

²¹Isirayeel bɔtiu nìn jáń ki pɔ́ɔkiǹ Siirii yab kpataaa. U nìn kūū ki céetì itaamu ki nāaǹ janjatɔrɔkub.

²²Niinee ní Unimbɔti bɔnaatiliu dɔ́miń ki ká Isirayeel bɔtiu ní ki bí-u yii: «Ká kunyannyaau, ama á dàkafì tiŋan kí kpèè a nín máaǹ kí ŋá puee, di sá yii jiil naŋkɔnampuee, Siirii bɔtiu làá dāá fàtīí gítiń kí já nì si.»

²³Siirii bɔtiu naacimbi bí-u yii: «Isirayeel Nimbɔtiu sá ajoon pu Nimbɔtiu ní, an pu ní bi jáń ki pɔ́ɔkiǹ-ti. Ama yàntī tí já nì bi laakin kitiŋ tèen̄ee, niinee ti làá pée pɔ̄ɔkiǹ-bi ní.

²⁴An nín máaǹ tí ŋá puee sɔ̀. Kpákatí bibɔtiibi kɔkɔ kí dū kɔmandambi kí téeǹ bi-yil pu

²⁵ní kí fàtīí fōō bijanjaliibi bin wīikí ki jítiǹ bin sáǹ-see, ní kí nyàab̀ itaamu nì tɔrɔkub ń nīn wīikí kii mpeepeekaamee. A yaa ŋá míǹ ki dóòyee, timbi làá cùú já nì Isirayeel yab laakin kitiŋ tèen̄ee, báà an ŋá pu ti làá pɔ̄ɔkiǹ-bi.» Been-Adaadi nìn pílifiǹ-bi ní ki ŋá kii bi nín bí yii ú ŋá puee.

²⁶Dibindi páaǹee ní Been-Adaadi kóoǹ Siirii janjaliibi ki kpáfì, ní ki cáá-bi ki cūnnì Afeeki tiŋkin bí já nì Isirayeel yab.

²⁷Ní Akaab mun kóoǹ Isirayeel janjaliibi ki kpáfì ní ki tīī-bi bi-janjawanti, ní bi nín cá kí já nì Siirii yab. Bi nìn cúu yākatì akiti ali ní ki gāā ajanjanaapaa ki túĺ Siirii yab. Isirayeel yab nìn bí kii tiŋɔcaŋkpun tin kaa náaǹee ní, ama ní Siirii yab nìn yàl̄ ki gbí an kɔkɔ pu.

²⁸Unimbɔti bɔnaatiliuee nìn tí dɔ́miń ki sòon̄ nì Isirayeel bɔtiu. U nìn bí-u yii: «Ti-Dindaan nín sòon̄ puee sèé: <Siirii yab nín bí yii man ni-Dindaan, m sá ajoon pu Nimbɔtiu kaa sá laakin kitiŋ tèen̄ee Nimbɔtiuee puee, m làá dū bi-janjakitikpaandi nee kí ŋá a-ŋaan, ní ní béé yii man di sá ni-Dindaan.>»

²⁹Bi nìn gāā bi-janjanaapaaŋi ki túĺ tɔb áli iwiin iluli. Ŋwinluluútee ní dikɔ̀ndi kíĺ. Isirayeel yab nìn jáń ki pɔ́ɔkiǹ Siirii yab ní ki kūū ŋwimbambaanti bi-janjaliibi bin còom̄ kitiŋ ki jáàyee kutukub dilaataal.

³⁰Bin nìn kíǹee nìn sá kii binib kutukub mmuŋku nì biluli ní ki sáǹ ki nín kóò Afeeki tiŋkin, ama ní digundi tàb̄ ki kūū-bi. Been-Adaadi mun nìn sáǹ ki kɔ́ kitiŋee poon ní ki nìn kóò ki póotí adiin ki bāal̀.

³¹U-tɔntɔnliibi nìn bí-u yii: «Pīlifì doo, ti gbìl̄ yii Isirayeel bɔtiibi cáá kulaŋŋaŋfitiiu tikpil. Míǹ puee yàntī tí dū kutukub kí pèen̄, kí dū iŋmii kí kúĺ kí léeń ti-silii, ní kí nyā kí tūŋkì Isirayeel bɔtiu. An yaa yíì u làá yàntī-si kí taa kpɔ̀-si.»

³²Niinee ní bi nyàab̄ kutukub ki pēeǹ, ní ki dū iŋmii ki kúĺ ki léeǹ bi-silii ní ki nín cá Isirayeel bɔtiu cee. Bi bàn̄ee ní ki bí-u yii: «A-tɔntɔnliu Been-Adaadi gbàam̄-si yii á fīī u-maŋfal.» Ní Akaab bí yii: «U dáá gbíntìi bí dimaŋfalinaaa? U sá m-nabiki naa!»

³³Bin Been-Adaadi nìn túnnée nìn ká yii an sá kudaaŋŋu kun ŋān̄ee ní bi kpáàa fātìi lī malaa yii: «Tiŋman, Been-Adaadi lafun sá a-nabiki!» Ní Akaab bí yii: «Cùú cáaḿmaan-u.» Niinee ní Been-Adaadi nyánní laakin u bál̀ee ní ki nín dòoń Akaab cee, úǹ dū-u ki kāaǹ u-tɔrɔkuu pu.

³⁴Been-Adaadi bí-u yii: «M làá fàtīí gíiǹ ntimu mun m-baa nìn jáń ki fōō a-baa ŋaanee kí tīī-si. A ŋūǹ kí nīn kíǹ ki nyáfí a-wanti Damaasi tiŋkin kii m-baa nín nìn ŋūǹ kí nyāfì ti-wanti Samaarii tiŋkin puee.» Ní Akaab kíí-u yii: «See tí pòon̄ tɔb kí ŋá mpèé ní ḿ nín yàntī á nīn cá.» Niinee ní bi pōoǹ tɔb ki ŋá mpèé ní Akaab yāntì u búntì.

³⁵Ti-Dindaan nìn sòon̄ nì u-bɔnaatiliibi kitil poon ubɔ ní úǹ bí u-juti yii: «M gbàam̄-si, fáá-mi!» Ama ní u-jutee yíì kaa fáá-u.

³⁶Niinee ní un bàà bí yii ú fáá-uee bí-u yii: «A nín ŋá pu kaa pílifiǹ ti-Dindaan nyɔkɔee, a yaa pée nyáń dooyee, gbikinti di làá kpɔ̀-si.» Ŋyunti ŋun kijapaayee lafun nyánnée ní gbikinti kíntì-u ki kūū-u.

³⁷Unimbɔti bɔnaatiliuee ti ká unil ubɔ mun ní ki bí-u yii: «M gbàam̄-si fáá-mi!» Ní úǹ fáá-u ki ŋá-u tiweendi.

³⁸Niinee ní Unimbɔti bɔnaatiliuee cūtìi kāl̀ nsan caŋin ki cí ubɔti. U nìn dū ŋŋaabu ki fìn̄ u-nimbiin bí taa ŋmā kí béé-u.

³⁹Ŋyunti ŋun ubɔti bíi jītée ní u téeń yii: «Ti-baa ubɔti, man a-tɔntɔnliu bí dikɔ̀ndin ki bíi jáàyee ní ujanjal ubɔ cáań-mi unil ubɔ ní ki bí-mi yii: <Nín̄ kpèé-mi unil nee yaa! U yaa sáǹ ki ŋmátì, sii ní bi làá dūú téeǹ u-yil pu, àá a làá pà animbil jitɔmbi kutukub bita>.

⁴⁰Ama m nín là doo ki là dooyee, maa ti ká mpaan kí kpèè-u ní u sáǹ ki ŋmátì!» Ní Isirayeel bɔtiu kíí-u yii: «Too sii a-ba di sòon̄ ki kūū a-bɔti.»

⁴¹Niinee ní ubɔnaatilee cúú ŋŋaabu ŋun u dūu fìn̄ u-nimbiinee ki lēē malaa, ní Isirayeel bɔtiu béè yii an sá Unimbɔti bɔnaatiliibi kansikin ubɔ.

⁴²Unimbɔti bɔnaatiliuee bí-u yii: «Ti-Dindaan nín bí puee sèé: <A nín yāntì unil un m kūū u-bɔti yii bí kpɔ̀-uee ŋmátèe, sii ní bi làá kpɔ̀ kí téeǹ u-yil pu, ní kí kpɔ̀ a-nibul kí téeǹ u-nibul yil pu.>»

⁴³Ní Isirayeel bɔtiu nín gítí u-dumpu Samaarii nì kunimbaau nì diŋuul.