Read Ntcham 1 Rois 21 Bible Online

1 Rois 21 - Ntcham bible

1 Rois 21

¹Tibɔti nee boonee tin jítèe sɔ̀. Ujiseeraayeelja Nabooti nìn cáá bufiinyikpaa bubɔ, bu nìn dɔ̄ ki pìlīǹ Samaarii bɔtiu Akaab dumpu.

²Dalbee ní Akaab cūtìi ká Nabooti ní ki bí-u yii: «Dū a-fiinyikpaabu kí tīī-mi ḿ dūú ŋá tikuŋfaal kpaabu, di sá yii bu dɔ̄ ki pìlīǹ m-dumpu, ní ḿ tīī-si bufiinyikpaa bun ŋān̄ ki jítiǹ bu neeyee. A yaa tí là ḿ pà-si bu-daaku nimbiliŋ nín sá pueeyaaa, m làá pà.»

³Ama ní Nabooti kíí-u yii: «Maa cáá nsan ti-Dindaan nimbiin kí dū bufiinyikpaa bun m fōō difakal m-naanjab ceeyee kí tīī-si.»

⁴Ní Akaab nín kùǹ nì kunimbaau nì diŋuul, kun puee ujiseeraayeelja Nabooti bí-u yii: «Maa làá dū m-naanjab fakal kí tīī-si.» U dōoǹ u-lambaŋki pu, ní ki fātì u-nimbiin ki túĺ digundi kaa là tijin kí jī.

⁵U-nimpuu Jeesabeel dɔ́miń ki ká-uee ní ki bālifì-u yii: «Ba pu ní a-nimbiin wíiḿ míǹ aa là tijin kí jī na?»

⁶Ní ubɔti kíí-u yii: «Kun bée di sá yii m cūtìi ká ujiseeraayeelja Nabooti ki bí-u yii: <Dū a-fiinyikpaabu kí nyāfiǹ-mi, a yaa tí làa, ḿ dū m-fiinyi kpaabu bubɔ kí kpántí-si.> Ní u kíí-mi yii: <Maa làá tīī-si m-fiinyikpaabu.>»

⁷Niinee ní Jeesabeel bí-u yii: «Sii di kaa sá Isirayeel bɔtiuaa? Yīkìm̄! Jī tijin kí nīn fàal̀. Man di làá dū ujiseeraayeelja Nabooti kpaabu kí tīī-si.»

⁸Niinee ní u ŋmàn̄ kugbɔŋu ubɔti Akaab yindi pu, ní ki dū ubɔti jaliiki ki nyīī, ní ki tú bí cùnnì tigbɔn gbanti kí tīī kitiŋ kin poon Nabooti kóòyee tindaŋkpilib nì ki-kpambaliŋ.

⁹Tigbɔn gbanti poonee, tin u ŋmàn̄ee sɔ̀: «Ní bóob́ kinyɔkɔ kí kóoǹ samaa kɔkɔ kí kpāfì kí yàntī Nabooti ń kpòotī dinyɔɔboobil gbanti.

¹⁰Ní nyàab̀maan bininjab bili bin kaa bí tibanee kí kàan̄ u-nimbiin, ní bíǹ ń lēē nnyimɔn seerau kí túń u-pu. Bí lì yii: <A sòon̄ ki bíil̀ Unimbɔti nì ubɔti.> Míǹ boonee, ní nyāntí-u kitiŋ kpaanceetiŋu, kí yāŋkì-u ataŋkpee ú kpú[67].»

¹¹Nabooti nín kóò kitiŋ kin poonee kpilib nì ki-kpambaliŋ ŋá kii Jeesabeel nín ŋmàn̄ kugbɔŋu poon ki bí yii bí ŋá puee.

¹²Bi bóob́ kinyɔkɔ ní ki kóoǹ samaa kɔkɔ ki kpáfì ní ki yāntì Nabooti kpōotì.

¹³Bininjab bili bin kaa bí tibanee dɔ́miń ki kāl̀ Nabooti nimbiin ní ki kíĺ ki bíi sòoǹ nnyimɔn seerau ki tūntí Nabooti pu, samaa kɔkɔ nimbiin ki lì yii: «Nabooti sòon̄ ki bíil̀ Unimbɔti nì ubɔti.» Niinee ní bi nyántì-u kitiŋ kpaanceetiŋu ki yáŋkì-u ataŋkpee ki kūū.

¹⁴Ní bi tú bí cùú tùkù Jeesabeel yii: «Bi yáŋkì Nabooti ataŋkpee ki kūū-u.»

¹⁵Jeesabeel nín gbìl̄ yii bi yáŋkì Nabooti ataŋkpee ki kūū-uee ní u bí Akaab yii: «Cùú fōō ujiseeraayeelja Nabooti fiinyikpaabu bun u nìn yíì yii waa làá dūú nyāfiǹ-see kí nīn kíǹ ki yì, di sá yii Nabooti kaa ti bí, u kpíì.»

¹⁶Akaab nín gbìl̄ yii Nabooti kpíìyee, ní u nín sìntī u-kpaabun, kí fōō-bu kí nīn kíǹ ki yì.

¹⁷Niinee ní ti-Dindaan bí ubɔnaatil Eelii utiiseebeeja yii:

¹⁸«Yīkì kí cù Isirayeel bɔtiu Akaab un kóò Samaarii tiŋkinee cee. U bí Nabooti fiinyi kpaabun. U cūtì kí fōō bukpaayee kí nīn kíǹ ki yì.

¹⁹Á tùkù-u yii: <Ti-Dindaan nín sòon̄ puee sɔ̀. A kūū unil ki dóòyee ki dɔ́miń kí fōō u-wantaa!> Á gíti kūtì-u yii: <Ti-Dindaan nín gíti sòon̄ puee sɔ̀. Laakin ní iboo líntì Nabooti fatikuee, niin ní i làá líntí si mun yɔu.>»

²⁰Ní Eelii dū tibɔtee ki tùkū Akaab ní Akaab bí-u yii: «M-nannanliu, a tí nyàab̄-mi ki ká-maa!» Ní Eelii kíí-u yii: «M tí nyàab̄ ki ká-si, kun puee an pée mɔ̄ǹ-si á nīn ŋáań tin kaa fáatiǹ ti-Dindaanee dee.

²¹Kpèè ti-Dindaan nín lī puee sèé: <M làá yàntī dinimbinaamandi ń kɔ́-si. M làá kúntí a-dicaŋkun yab. M làá kpɔ̀ kí céetí a-dicaŋkun bininjab kɔkɔ, uyumbuee, un tɔ́ u-beeee, báà ubɔ kaa làá kíń.

²²M làá ŋá a-dicaŋku kii m nín nìn ŋá Neebaati jipɔɔn Jeerooboowaam nì Ayiiya jipɔɔn Bayeesa dicaŋŋi puee ní. Di sá yii a gbítì m-ŋuul ki yāntì Isirayeel yab kɔ́ ikpitin.>

²³Ti-Dindaan nìn sòon̄ Jeesabeel bɔti ki lī yii: <Iboo di làá ŋmɔ́ Jeesabeel nanti Jisirayeel gundi taapu[68].

²⁴A-dicaŋkun un yaa kpíì kitiŋinee, iboo di làá ŋmɔ́ udaan nanti. Un di yaa kpíì tisatinee, inoon di làá jī u-nanti.>»

²⁵Ubɔ kaa ti pée bí ki dū u-ba ki líiǹ atuun ŋin kaa fáatiǹ ti-Dindaanee diŋál kii Akaabee. U-nimpuu Jeesabeel di nìn téekí-u ní u ŋáań míǹ.

²⁶U nìn túń ntimbiil tuuŋŋi ki jáam̀ awaa kii Amɔɔr yab bin ti-Dindaan nìn jìn̄ ki fōō bi-tiŋki ki tīī Isirayeel yabee nín nìn ŋá puee.

²⁷Akaab nín gbìl̄ tibɔti gbantee ní u cúú tiwan tin u pēēyee ki cátì, ní ki dū kutuku ki pēeǹ ní ki bóob́ kinyɔkɔ. U nìn pèentí kutuku míǹ ní ki dɔ̀, ní ki còom̄ soooo soooo.

²⁸Niinee ní ti-Dindaan bí Eelii utiiseebeeja yii:

²⁹«Kéè a ká Akaab nín sīntì u-ba m-nimbiin pueeyaa! U nín sīntì u-ba m-nimbiin puee, maa làá ti cáań dinimbinaamandi kí tɔ̄ u-dicaŋku pu u-maŋfal wiiŋyi poon, asee u-jipɔɔn yaa láa kāl̀ dibeelee ní m làá cáań.»