Read Ntcham 1 Rois 22 Bible Online

1 Rois 22 - Ntcham bible

1 Rois 22

¹Abin ali ŋin páaǹee, ŋgbansɔŋfi nìn dōoǹ Siirii tiŋki nì Isirayeel yab kansikin.

²Ama dibintataatiil poonee ní Juuda bɔtiu Joosafaati dɔ́miń kí màntì Isirayeel bɔtiu Akaab pu.

³Akaab nìn tùkū u-kàliŋkpilib yii: «Kéè ni nyí yii timbi di yì Ramooti tiŋki kin bí Galaadi tiŋkpaaŋkinee yaa! Kin ba pu ní ti gíti gùgufī kaa làá cùú fōō-kì Siirii bɔtiu ŋaan?»

⁴Ní u bālifì Joosafaati yii: «A làá céeǹ-mi ḿ cùú já kí fōō Ramooti tiŋki kin bí Galaadi tiŋkpaaŋkineeee?» Ní Joosafaati kíí Isirayeel bɔtiu yii: «Man nì si sá unibaanti ní. A-nibul sá m-nibul ní a-taamui sá man taamui.»

⁵Ama ní Joosafaati gíti kútì ki lī yii: «Tí bàlifì ti-Dindaan kí wàatī.»

⁶Niinee ní Isirayeel bɔtiu kóoǹ u-bɔnaatiliibi ki kpáfì. Bi nìn sá binib alaataa anaa nyɔkɔm ní ubɔti bālifì-bi yii: «Ḿ cùú já kí fōō Ramooti tiŋki kin bí Galaadi tiŋkpaaŋkineeyaaa, ḿ taa cù?» Ní bíǹ kíí-u yii: «Nín̄ cá! Ti-Dindaan dū-kì ki ŋá a-ŋaan.»

⁷Ama ní Joosafaati gíti bālifì yii: «Mimmee báà ti-Dindaan bɔnaatiliu ubɔ gíti kpá doo tí ŋmā kí cù u-cee kí bàlifì kí béé ti-Dindaan nín sòon̄ pueeee?»

⁸Ní Isirayeel bɔtiu kíí Joosafaati yii: «Ubɔ gíti bí un pu ti ŋūǹ kí bàlifì kí béé ti-Dindaan nín sòon̄ puee, ama maa là u-bɔti, di sá yii tin kaa ŋān̄ee ŋma ní u nàatī-mi, waa nàatī-mi tin ŋān̄ee dalba dalba. Úǹ di sá Yiimila jipɔɔn Miika.» Ní Joosafaati bí yii: «Taa sòoǹ míǹ!»

⁹Niinee ní Isirayeel bɔtiu yíiń u-kàlinjau ubɔ ní ki bí-u yii: «Cùú cáań Yiimila jipɔɔn Miika doo malaa!»

¹⁰Isirayeel bɔtiu nì Juuda bɔtiu Joosafaati nìn kā báà ŋma u-beejal pu Samaarii tiŋki punyɔkɔki caŋin ki pēē bi-beebɔkutiŋ. Bibɔnaatiliibi kɔkɔ nìn bí ki nàatī tibɔti bi-nimbiin.

¹¹Keenaana jipɔɔn Siideekiyawuu nìn dū tikúti ki mɔ́ɔ́ ŋyin. U nìn bí yii: «Ti-Dindaan nín sòon̄ puee sèé: <Nì ŋyin nee ní a làá dūú já nì Siirii yab kí céetí-bi múb.>»

¹²Bibɔnaatiliibi bin kɔkɔ nìn kíǹee nìn pée sòoǹ tibɔbaantiil ní ki lì yii: «A ŋūǹ kí cùú já kí fōō Ramooti tiŋki kin bí Galaadi tiŋkpaaŋkinee. A làá já kí pɔ̄ɔkiǹ-kì, ti-Dindaan làá dū-kì kí ŋá a-ŋaan.»

¹³Un bi tú ú cùú yíiń Miikayee bàn̄ee ní ki bí-u yii: «Kpèè, Unimbɔti bɔnaatiliibi kɔkɔ ŋá kinyɔɔbaantii ki sòoǹ ki nàatī ubɔti tiŋanee ŋma ní. Si mun yaa bàn̄ee, á sòoǹ kí nàatī ubɔti tin ŋān̄ee ŋma kii bin béeyee.»

¹⁴Ama ní Miika kíí-u yii: «Nì ti-Dindaan un bí dimaŋfalin nee puee, tin ti-Dindaan yaa tīī-mi ḿ nàatēe, tíǹ ní m làá sòoǹ.»

¹⁵U bāań ubɔti ceeyee ní ubɔti bālifì-u yii: «Miika, tí cùú já kí fōō Ramooti tiŋki kin bí Galaadi tiŋkpaaŋkineeyaaa, tí taa cù?» Ní Miika kíí-u yii: «Nín̄ cá! A làá já kí fōō-kì! Ti-Dindaan dū-kì ki ŋá a-ŋaan.»

¹⁶Ama ní ubɔti gíti bí-u yii: «Ŋfunyɔm miŋa ní m máaǹ kí yàntī á pùtī kí tùkù-mi ibaamɔn ti-Dindaan yindi pu ní a nín tùkù-mi ní?»

¹⁷Niinee ní Miika bí yii: «M ká Isirayeel nibul yàl̄ ki gbí ajoon pu kii ipii in kaa cáá upikpaalee[69]. Ní ti-Dindaan bí yii: <Baa ti cáá ukpil. Báà ŋma ń nīn gítí u-dumpu nì ŋgbansɔŋfi.>»

¹⁸Ní Isirayeel bɔtiu bí Joosafaati yii: «M bàà tùkū-si yii bee! Waa pée nàatī tin ŋān̄ee kí tīī-mi see tikpitil!»

¹⁹Ama ní Miika gíti bí-u yii: «Too! Pīlifì tin ti-Dindaan sòon̄ee. M ká ti-Dindaan kā u-beejal pu ní yilpu janjaliibi yú ki kɔ́ĺ-u, biba yú u-ŋaŋgiil pú ní bin kíǹee yú u-ŋaŋgan pú.

²⁰Ní ti-Dindaan bí yii: <Ŋma ní m làá nín ká ú cùú ŋmàtiǹ Akaab kí yàntī ú cùú já nì Ramooti tiŋki kin bí Galaadi tiŋkpaaŋkinee bí kpɔ̀-u ní? Niinee ní ubɔ ń bí yii tina, ní un kíǹee ń bí yii tina.

²¹An ŋá mimmee ní ŋfam miba dɔ́miń ki síl̀ ti-Dindaan nimbiin ní ki bí yii: <Man di làá cù kí ŋmàtiǹ-u.> Ní ti-Dindaan bālifì-u yii: <A làá ŋá mana ní?>

²²Ní u kíí yii: <M làá cù kí kɔ́ bibɔnaatiliibi kɔkɔn ní kí yàntī bí sòoǹ tinyimɔmbɔti kí tùkù ubɔti.> Ní ti-Dindaan bí-u yii: <A làá cùú ŋmàtiǹ-u ní m nyí yii a làá ŋmā. Nín̄ cá kí ŋá míǹ.>

²³Ti-Dindaan yaa lafun dū nnyimɔn fam ki ŋá a-bɔnaatiliibi kɔkɔ nyɔmmunee, á béé yii u là dinimbinaamandi ń jēetí a-pu ní.»

²⁴Niinee ní Keenaana jipɔɔn Siideekiyawuu sútì ki pìl̄ Miika ní ki fáá-u ntampa ki lī yii: «La pú ní ti-Dindaan fam nyáń m-ni ki cūtìi bíi sòoǹ nì si ní?»

²⁵Ní Miika kíí yii: «Tiŋman, ŋwiin ŋun ní a yaa láa sáń ki póotí adiin ki bāal̀ee, a làá dāá gbìl̄ taapu.»

²⁶Niinee ní Isirayeel bɔtiu tīī mara yii: «Ní cúúmaan Miika kí cùnnì-u kí tīī Amɔn tiŋki kɔmandaŋwu nì ubɔti jipɔɔn Yoowasi,

²⁷ní kí tùkù-bi yii: <Man ubɔti di bí yii, ní dū kijapaai nee kí tɔ̄ sarka, kí tīī-u tijin ŋwaam pu nì nnyim kí nīn cí ŋyunti ŋun m làá fàtīí gítiń nì ŋgbansɔŋfee.>»

²⁸Ní Miika bí-u yii: «A yaa fātìi gítìń nì laafiyee, mimmee ti-Dindaan kaa dī m-pu ki sòon̄ dee.» Ní u gíti kútì yii: «Nimbi samaa kɔkɔ, pīlifìmaan!»

²⁹Isirayeel bɔtiu nì Juuda bɔtiu Joosafaati nín cá kí já nì Ramooti tiŋki kin bí Galaadi tiŋkpaaŋkinee.

³⁰Ní Isirayeel bɔtiu bí Joosafaati yii: «M làá kpántí m-wampeeŋkaati bí taa béé-mi ní kí cùú já kujaau, ama siiyee, dū a-beebɔkutil kí pèen̄.» Ní Isirayeel bɔtiu lafun kpántì u-wampeeŋkaati bí taa béé-u ní ki cūtìi bíi jáà.

³¹Siirii bɔtiu mun nìn tīī u-janjaliibi mmuŋku nì saalaa nì bili bin sá bin kpèé janjatɔrɔkub kpilibee mara yii: «Ní taa já nì bijanjaliibi ŋwaamuɔɔɔ, kí taa já nì bijanjakpilib, ama ní pée já nì Isirayeel bɔtiu baba.»

³²An pu ní bin kpèé janjatɔrɔkub kpilibee nín ká Joosafaatee, bi bí yii: «Báà an ŋá pu, Isirayeel bɔtiu dee», ní bi fātì bi-ba ki túĺ-u ki bíi jáà nì u, ní Joosafaati kíĺ ki bíi kūuntí.

³³Niinee ní bijanjakpilibee nín béè yii an kaa sá Isirayeel bɔtiu ní bi yāntì-u kaa tí bíi jì-u.

³⁴Ama Siirii yab janjaliu ubɔ pée tɔ́ mpiin yìkíl̄ yikil ní an cūtìi yá Isirayeel bɔtiu laakin u-gbampɔɔl janliitiliŋ tūū tɔbee. Ní ubɔti bí un ŋàal̀ u-tɔrɔkuuee yii: «Fàtīí gítí a-boon tí nyā dikɔmbool pu, di sá yii m fōō tiweendi.»

³⁵Ama ŋwiin gbantee, kujaau nín nìn pɔ́ɔkì puee, bi nìn yāntì ubɔti yú u-tɔrɔkuu poon ubɔ ŋúb́-u ki túĺ Siirii yab, ní kujoouee, u kpíì. Fatiku un nìn nyáń-uee nìn dōoǹ tɔrɔku poon ki pùub̄.

³⁶Ŋwìiń jéetèe ní bi téeń dijanjanaapaal pu yii: «Báà ŋma ń gítí u-dumpu u-tiŋkin,

³⁷di sá yii ubɔti kpíì!» Bi nìn cáań-u Samaarii ki síb́-u niin.

³⁸Bi bíi fíntí Akaab tɔrɔkuu Samaarii nyimbɔbilinee ní iboo dɔ́miń ki líntì u-fatikuu ní nnimpulaakpaamu mun fùl̄ dinyimbɔbilee poon, kii ti-Dindaan nín nìn pée sòon̄ puee.

³⁹Akaab tuuŋŋi ŋin kíǹee, tin kɔkɔ u ŋée nì u nín dū kunti nyiŋŋi ki máń kudii puee nì ntimu mun u máńee kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

⁴⁰Akaab kpíì ki cūtìi ŋàl̄ u-baabi. U-jipɔɔn Akasiyasi di fōō u-yil ki kpántì ubɔti.

⁴¹Akaab nín jíń dibeel Isirayeel tiŋki pu abin anaa poonee ní Asaa jipɔɔn Joosafaati kpántì Juuda tiŋki bɔtiu.

⁴²U nìn cáá abin aŋmoo kpá imuŋku ili ní ki kpántì ubɔti, ní ki kāl̀ Jeerusaleem abin mmuŋku nì aŋmoo ki jíń dibeel. Bi nìn yíì u-na Asuuba, Siilii bisal.

⁴³U nìn nóó u-baa Asaa tabɔbiliŋ ní deedee, ní ki nìn ŋá tin fáatiǹ ti-Dindaanee.

⁴⁴Ama waa nìn gbáń ki kpītì isaraafan in nìn bí ŋgbantamu puee. Binib nìn gbíntìi cáà niin ki ŋáań saraabi ki tùutī talaalub.

⁴⁵Joosafaati nì Isirayeel bɔtiu nìn ŋá mpèé ní ŋgbansɔŋfi nìn bí bi-kansikin.

⁴⁶Joosafaati tuuŋŋi nì u-pɔ́ɔǹtam nì u nín jáń tijáti puee kɔkɔ ŋmàn̄ ki kā Juuda yab bɔtiibi tuuŋŋi gbɔŋkun.

⁴⁷U nìn kúntì bininjab bin nìn ŋáań tilaakpaal tuuŋŋi kunimbɔtidiin ki nìn kíǹ ki bí u-baa Asaa yuntiŋuee kɔkɔ.

⁴⁸Ŋyunti gbantee, ubɔti kaa nìn dáá bí Eedoom tiŋkin, ama kɔmandan ní ubɔti nìn lēē u kpèé kitiŋ.

⁴⁹Joosafaati nìn yāntì bi kpáá meelakpaambi Eesiiyɔn-Geebeer tiŋkin bí bàà nín̄ cáà Oofiiri tiŋkin[70] ki nyàabìń sindaariya. Ama meelabee kaa cūtì ndan, di sá yii bi nìn bíil̀ Eesiiyɔn-Geebeer tiŋkin.

⁵⁰Niinee ní Akaab jipɔɔn Akasiyasi bí Joosafaati yii: «Yàntī m-tɔntɔnliibi ń nīn bí a-yab cee meelanaa!» Ama Joosafaati kaa nìn kíí míǹ.

⁵¹Joosafaati kpíì ki cūtìi ŋàl̄ u-baabi ní bi síb́-u Daafiidi Tiŋkin, ní u-jipɔɔn Jooram fōō u-yil ki kpántì ubɔti.

⁵²Juuda bɔtiu Joosafaati nín kāl̀ dibeel abin saalku nì ali poonee, ní Akaab jipɔɔn Akasiyasi kāl̀ Samaarii tiŋkin ki jíń Isirayeel tiŋki pu dibeel.

⁵³U nìn ŋá tin kaa fáatiǹ ti-Dindaanee. U nìn nóó u-baa nì u-na nì Neebaati jipɔɔn Jeerooboowaam bin nìn yāntì Isirayeel yab kɔ́ ikpitinee tabɔbiliŋ ní.

⁵⁴U nìn gbāaǹ diwaal Baal nimbiin ki jáam̀-dì. U nìn gbítì ti-Dindaan Isirayeel Nimbɔtiu ŋuul, kii u-baa nín nìn pée ŋá puee ní deedee.