Read Ntcham 1 Rois 3 Bible Online

1 Rois 3 - Ntcham bible

1 Rois 3

¹Saloomɔn nìn kpántì Eejipiti bɔtiu Faaroo coo. U nìn cáá Faaroo bisal ní ki cáań-u ki kāaǹ Daafiidi Tiŋkin ki cáá sāā ŋyunti ŋun u dāa máń úǹ u-ba diiku nì ti-Dindaan diiku nì digundi ki māntìi tú Jeerusaleem tiŋki ki dóòyee.

²Ama kí cáá sāā ŋyunti gbantee, binib nìn dáá gbíntìi ŋáań saraabi ŋgbantamu pu awaa saraafaŋyi pu ní, di sá yii baa nìn dá láá máń ti-Dindaan kudii.

³Saloomɔn nìn néeń ti-Dindaan ní ki nìn ŋáań min u-baa Daafiidi nìn kpáafì-uee. Ama ŋgbantamu pu awaa saraafaŋyi pu ní u mun nìn kù tiwaŋkuti ki ŋáań saraabi ní ki tùutī talaalub.

⁴Dalbee ubɔti nìn cūtì Gabawɔn kí ŋá saraabi niin, di sá yii niin ní nsaraafan ŋkpaan nìn bí. Saloomɔn nìn kūū tiwaŋkuti kutuku ní ki ŋá saraawɔkaa nsaraafan gbanti pu.

⁵U bí Gabawɔn niin kunyeeuee ní ti-Dindaan lēē u-ba ki dàkā-u ní ki bí-u yii: «Bàlifì kun ní a là ḿ tīī-see.»

⁶Ní Saloomɔn kíí yii: «A dàkā a-tɔntɔnliu m-baa Daafiidi kulaŋŋaŋfitiiu tikpil, kun puee u nìn nóó-si nì ibaamɔn nì deedee ní u-pɔbil nìn bí diba nì si. A gíti dàkā-u a-laŋŋaŋfitiiku ki tīī-u jipɔɔn u kpántì díǹ pu nee ubɔti.

⁷Too kɔŋkɔnnee, ti-Dindaan m-Nimbɔtiu, sii di yāntì man a-tɔntɔnliu fōō m-baa Daafiidi yil ki kpántì ubɔti. Ma mun di dá láá sá campɔnti kaa nyí dibeel bɔti tibee.

⁸Man a-tɔntɔnliu bí a-nibul din a lēēyee nib kansikin kí nīn kpòotī-bi. Dinibul gbanti nib wīikí tikpil áli baa kpáàa ŋūǹ kí kàaǹ-bi.

⁹Míǹ puee tīī man a-tɔntɔnliu dinyil ḿ dūú kpòotī a-nibul, kí ŋmā kí béé kí gàntī tin ŋān̄ee nì tin kaa ŋān̄ee. Di sá yii ŋma di ŋūǹ kí gāā u-bindi kí lì yii u ŋūǹ kí kpòotī a-nibul dikpaandi nee?»

¹⁰Tin Saloomɔn nìn mēē gbantee nìn fáatiǹ ti-Dindaan.

¹¹Niinee ní Unimbɔti bí-u yii: «Aa mēē yii ḿ tīī-si mmaŋfafɔkɔn, àá tigaajati, àá ḿ nàan̄ a-nannanliibi. Ama ní ki mēē yii ḿ tīī-si dinyil á ŋmā kí dūú kpòotī m-nibul nì ibaamɔn. A nín mēē mimmee puee,

¹²kpèè m làá ŋá míǹ kí tīī-si. Dinyil nì iciin in m làá tīī-see, ubɔ kitiŋ nee pu kaa láá pée ká míǹ ki ká, ní ubɔ mun kitiŋ nee pu gíti kpá kí ká míǹ.

¹³M làá tīī-si gba tin ní aa mēēyee, m làá tīī-si tigaajati nì tinyool a-maŋfal wiiŋyi kɔkɔ poon. Báà ubɔti ubɔ juti kaa làá nīn sá-si.

¹⁴A yaa ŋáań min m lèe, ki yaa tɔ́ m-bɔkpaaŋi nì m-marab kii a-baa Daafiidee, m làá gbéeǹ a-maŋfal wiiŋyi pu.»

¹⁵Saloomɔn fīntèe ní ká yii an sá kudamintiiu. Míǹ boonee ní u nín kùǹ u-dumpu Jeerusaleem ní ki cūtìi yúl̀ ti-Dindaan Dakaau nimbiin. U nìn ŋá bisaraawɔkaabi nì mpèé saraabi, ní ki ŋá jiŋaal ki yíiń u-tɔntɔnliibi kɔkɔ bi jíń.

¹⁶Dalbee nnimpulaakpaamu muli mubɔ dɔ́miń ubɔti Saloomɔn cee.

¹⁷Bi-kansikin ubɔ bí yii: «Ti-baa, m gbàam̄-si ní. Man nì unimpu nee di kóò kudibaantiiun. M màl̄ kibiki kudii gbantinee, u mun nìn bí niin.

¹⁸M màl̄ míǹ iwiin ita boonee ní unimpu nee mun dūu màl̄. Ti nìn bí dicilpu ní kudii gbantin. Báà ubɔ kaa nìn dɔ́miń ki kútì ti-pu, ti-liitil ŋmaniŋma di pée bí kudiiyee poon.

¹⁹Kunyeeuee ní unimpu nee biki kpíì, kun puee u nyīkiǹ ki-pu.

²⁰Ní u yíkì kunyataasiiu ki yōoǹ m-biki m-cee ŋyunti ŋun man a-tɔntɔnliu dɔ̄ ki gèeǹee. U yōoǹ m-bikee ní ki dū-kì kí bíl̀ ki kɔ́ĺ u-ba, ní ki dū u-yaka kin kpíìyee ki bíl̀ ki kɔ́ĺ-mi.

²¹M fīntì kutaafaau kí tīī m-biki dibiilee, m ká yii kì kpíì. Kutaa wúntì ki dóò m kpēē-kì tiŋanee ní ki ká yii an kaa sá m-biki.»

²²Unimpuliliitee nìn bí yii: «An kaa sá mbaamɔn! Man biki di bí dimaŋfalin, kin kpíìyee, a-yaka dee.» Ama ní unimpupeepeekaayee bí yii: «Aayee! Sii biki di kpíì, man yaka di bí dimaŋfalin.» Bi nín nìn sí ubɔti nimbiin ki sòoǹ puee dee.

²³Niinee ní ubɔti bí yii: «Unee ń bí yii: <Kibiki kin bí dimaŋfalinee, man biki dee, sii yaka di kpíì>, ní un kíǹee ń bí yii: <Aayee! Sii biki di kpíì, man yaka di bí dimaŋfalin!>

²⁴An yaa sée, ní cáaḿmaan-mi kitàataajiki.» Ní bi cūtìi cáań-u kitàataajiki.

²⁵Ní ubɔti bí yii: «Pùtīmaan kibiki kin bí dimaŋfalinee mili, kí dū dijandi kí tīī ubɔ kí dū dijandi din kíǹee kí tīī un kíǹee.»

²⁶Ama unimpu un biki bí dimaŋfalinee bí ubɔti yii: «Ti-baa, m gbàam̄-si, dū kibiki kin bí dimaŋfalinee kí tīī unimpu nee, ní taa kpɔ̀-kì!» Di sá yii dineendi din unimpuee nìn cáá u-biki puee nìn fòol̄ u-ni lìblib kii ŋŋmee ní. Ama ní unimpu un kíǹee bí yii: «Ní taa dū-kì kí tīī ti-kansikin báà ubɔ. Ní pùtī-kì mili!»

²⁷Niinee ní ubɔti bí yii: «Ní taa kpɔ̀ kibikee. Dūmaan-kì kí tīī unimpupeekaayee, di sá yii úǹ di sá kibikee na!»

²⁸Isirayeel yab kɔkɔ nìn gbìl̄ ubɔti nín sòon̄ tibɔti gbanti puee, ní bi kíǹ ki tɔ́-u tikpil. Bi nìn ká yii Unimbɔti ciiŋyi bí u-ni ú nīn cáa sòoǹ tibɔti.