Read Ntcham 1 Rois 8 Bible Online

1 Rois 8 - Ntcham bible

1 Rois 8

¹Míǹ boonee ní ubɔti Saloomɔn yíiń Isirayeel tindaŋkpilib nì tinaakɔti kpilib kɔkɔ nì Isirayeel dicaŋŋi kpilib u-cee bí yòon̄ ti-Dindaan Poondi Dakaau Daafiidi Tiŋkin, an dàkà yii Siiyɔn jool pu, kí cáá cùnnì kunimbɔtidiin[30].

²Niinee ní Isirayeel yab kɔkɔ kóoǹ ki kpáfì ubɔti Saloomɔn cee bí jī tibìń jiŋaaliu Eetaniim ŋmaliu, an dàkà yii uŋmaluluúti poon.

³Ŋyunti ŋun ní Isirayeel kpilib kɔkɔ bāańee ní bisaraaŋaliibi yōoǹ Dipoondi Dakaau ki túǹ.

⁴Bisaraaŋaliibi nì Leefii yab nìn yōoǹ ti-Dindaan Poondi Dakaau nì circir kɔŋkooŋŋu nì tiwan tin kɔkɔ nìn bí ŋu-poonee ki túǹ.

⁵Isirayeel samaau kɔkɔ nìn kóoǹ ki kpáfì ubɔti Saloomɔn cee ní bi kūū Dipoondi Dakaau nimbiin ipii nì inaa ki ŋá saraabi an kaa cáá ŋkaan.

⁶Míǹ boonee ní bisaraaŋaliibi nín dū Dipoondi Dakaau ki kɔ́ǹ Circir Páaa laŋki diikun ki síiǹ u-paaŋŋu pu, keerubimbi feeŋyi taapu.

⁷Di sá yii keerubimbi nìn kpátì bi-feeŋyi mpaan ŋun bi nìn bɔ́ntì kí síiń Dipoondi Dakaauee yilpu, ní ki nìn bīī Dipoondi Dakaau nì idɔ in bi cáa tūntí-uee pu.

⁸Dakaa dɔi gbanti nìn fɔ̀kɔ̀ tiŋan, an puee a yaa nìn bí Circir laŋkee, a nìn wāĺ i-nyɔkɔ ní, ama a yaa nìn bí mmɔŋkee, an kaa nìn wāĺ. Idɔee dáá gbíntìi bí ki dāa sāā díǹ.

⁹Tiba kaa nìn bí Dipoondi Dakaau poon an yaa kaa sá ataŋkpee pilinti tili tin Mooyiisi nìn dūu ŋée. Ti-Dindaan nín nìn nyántì Isirayeel yab Eejipiti tiŋkin u nì bi ŋá mpèé Ooreeb jool puee ní Mooyiisi dū ataŋkpee pilinti gbanti ki ŋá dakaayee poon[31].

¹⁰Ŋyunti ŋun ní bisaraaŋaliibi nyánní Circir laŋkee ní ditagbandi diba dɔ́miń ki bīiǹ ti-Dindaan Diiku pu.

¹¹Ditagbandee puee, bisaraaŋaliibi kaa nìn gíti ŋūǹ kí sīĺ poon kí tɔ̄ bi-tundi, di sá yii ti-Dindaan nyooti nìn gbí u-diiku poon[32].

¹²Niinee ní Saloomɔn bí yii: «Ti-Dindaan, a nìn lēē yii a làá nīn kóò ditagbambɔndin ní.

¹³Ama m máń-si kudinyaaŋŋu nee, kudii kun poon ní a làá nīn kóò talkuee!»

¹⁴Isirayeel yab kɔkɔ nìn sí ní ubɔti fātì u-nimbiin ki túĺ-bi ní ki mēē ki bīiǹ bi-pu.

¹⁵U nìn bí yii: «Tí jāam̀maan ti-Dindaan, Isirayeel Nimbɔtiu! Úǹ u-ba ŋá kii u nín nìn pōoǹ m-baa Daafiidi puee. U nìn bí-u yii:

¹⁶<Man di nyántì m-nibul Isirayeel Eejipiti tiŋkin. Kí yòon̄ ŋwiin gbantee, maa lēē Isirayeel timmu kɔkɔ kansikin kiba kin poon ní bi làá mā-mi kudii ḿ nīn lèekī m-ba ki dàkèe. Ama m lēē sii Daafiidi á nīn sá m-nibul Isirayeel bɔtiu.>

¹⁷M-baa Daafiidi nìn cáá nlandɔkɔ kí mā kudii kí dū-ku kí sú ti-Dindaan, Isirayeel Nimbɔtiu.

¹⁸Ama ti-Dindaan nìn bí-u yii: <A nín ká nlandɔkɔ yii a làá mā kudii kí tīī-mee, an ŋān̄ tikpil[33].

¹⁹Tin bée di sá yii an kaa sá sii di làá mā kudii gbanti, ama sii a-ba jipɔɔn un a màl̄ee di làá mā kudii gbanti kí tīī-mi[34].>

²⁰Kɔŋkɔnnee, ti-Dindaan nín nìn pōoǹ puee u ŋá míǹ. Di sá yii m fōō m-baa Daafiidi yil ki jíń Isirayeel tiŋki pu dibeel, kii ti-Dindaan nín nìn lī puee, ní m máń kudii nee ki dū-ku ki sú ti-Dindaan Isirayeel Nimbɔtiu.

²¹M kpáàa bɔ́ntì mpaan ki tīī Dipoondi Dakaau un poon ti-Dindaan Poondi nyɔɔbuŋŋi kēe. Dipoondi gbantee, u nín nìn nyántìń ti-naanjab Eejipiti tiŋkinee ní u nìn pōoǹ.»

²²Míǹ boonee ní Saloomɔn yíkìi síl̀ ti-Dindaan saraafaŋŋu nì Isirayeel yab bin kɔkɔ nìn kóoǹ ki kpáfèe nimbiin, ní ki yōoǹ u-ŋalii ki túĺ kutaa

²³ní ki bí yii: «Ti-Dindaan Isirayeel Nimbɔtiu, Unimbɔti ubɔ kaa bí yilpu àá kitiŋ pu ki bí kii siiyee. A ŋúb̀ a-poondi ki dàkà a-tɔntɔnliibi bin sí nì si nì dipɔbil dibee kulaŋŋaŋfitiiu.

²⁴A nín nìn pōoǹ a-tɔntɔnliu m-baa Daafiidi yii a làá ŋá pu kí tīī-uee, a ŋá míǹ. Mbaamɔn tin a nìn pōoǹ-uee, sii a-ba ŋá míǹ ki tīī-u díǹ.

²⁵Kɔŋkɔnnee, ti-Dindaan Isirayeel Nimbɔtiu, ŋá a nín nìn pōoǹ a-tɔntɔnliu m-baa Daafiidi yii a làá ŋá pu kí tīī-uee. A nìn bí-u yii: <A-naantiibi yaa nóó-mi ibaamɔn poon kii sii a-ba nín nóó-mi puee, ibaamɔn ní m tùkù-si, a-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin.>

²⁶Míǹ puee Isirayeel Nimbɔtiu, m gbàam̄-si ní, ŋá kɔŋkɔnnee a nín nìn pōoǹ a-tɔntɔnliu m-baa Daafiidi yii a làá ŋá puee kí tīī-u!

²⁷«Mimmee Unimbɔti ŋūǹ kí kɔ́ kitiŋ puɔɔɔ? Áli gba kutagbɔŋu nín wāā pu nee kaa bàn̄-si á kɔ́, ki dāa nín kàaǹ kudii kun m máń nee[35]!

²⁸Nì míǹ kɔkɔee, m-Dindaan m-Nimbɔtiu, pīlifì man a-tɔntɔnliu wimmeem nì m-gbaamii! Pīlifì m-kuŋkuuntii nì m-wimmeem min man a-tɔntɔnliu bíi mèé-si díǹ neeyee!

²⁹A-nimbikpeeŋu ń nīn pée cɔ́ kudii nee pu ŋwiimpu nì kunyeeu, ŋú nīn pée cɔ́ mpaan ŋun pu a nìn sòon̄ yii: <M-yindi làá nīn bí niin> nee pu. Pīlifì ŋwimmeem min m bí doo ki mèé-si nee[36].»

³⁰Pīlifì man a-tɔntɔnliu nì Isirayeel, a-nibul wimmeem min ti bí doo ki mèé-si nee. Pīlifiǹ-ti doooo yilpu laakin a kóòyee. Pīlifiǹ-ti kí dū ti-kpitii kí pɔ̄-ti.

³¹Ubɔ yaa yīntiǹ u-juti, bi ŋūǹ kí lì yii ú pùtī yii u yaa ká mbusu ń lítí u-pu. Udaan yaa lafun dɔ́miń kudii nee poon a-saraafaŋŋu nyɔkɔpu ki pūtèe,

³²á pīlifì doooo yilpu kí kpèè tibɔti gbanti kí sòoǹ a-tɔntɔnliibi bɔti. Á kpɔ̀ dibɔkpil daan bɔti kí dáaĺ u-tafal, ní kí pɔ̀ un bɔti ŋān̄ee báà ŋma ń béé yii u sá maanyiiba.

³³«Isirayeel yab a-nibul yaa yīntiǹ-si ní bi-nannanliibi jáń ki pɔ́ɔkiǹ-bi, ní bi fātìi gítìń a-cee, ki nyɔ́ŋkì-si, ki mēē-si ní ki gbāam̀-si kudii nee poonee,

³⁴sii ti-Dindaan, á pīlifì a-nibul Isirayeel yab doooo yilpu, kí dū bi-kpitii kí pɔ̄-bi, ní kí fàtīí gíiǹní-bi kitiŋ kin a nìn dūu tīī bi-naanjabee pu.

³⁵«A-nibul yaa yīntiǹ-si ní a dū kutaa ki pīiǹ utaa kaa ti bíi nì, ní bi fātì bi-ba ki túĺ mpaan nee pú ki mēē ki nyɔ́ŋkì a-yindi, ní ki fātì bi-boon ki tīī bi-kpitii a nín dáaĺ bi-tafal pueeyee,

³⁶sii ti-Dindaan, á pīlifiǹ a-tɔntɔnliibi Isirayeel yab doooo yilpu. Á dū bi-kpitii kí pɔ̄-bi, kí dàkà-bi nsammɔnti ŋun bi máaǹ kí nóóyee, ní kí yàntī utaa ń nì a-tiŋki nee pu, kitiŋ kin ní a dūu tīī a-nibul án nīn sá bi-fakalee.

³⁷«Ŋkùm àá bìlbil kúm yaa jéetì kitiŋ nee pu, àá tikpaajin kaa láá bīń ní ki kūń àá ki sūū, àá inaakitoon nì inaaki di ŋmɔ́ ki bíil̀ tikpaajin, àá bi-nannanliibi di māntìi tú bi-timmu kí já nì bi, àá an yaa pée sá tibumbun àá igbaŋween iŋyee,

³⁸Isirayeel yab kansikin ubɔ àá a-nibul Isirayeel yab kɔkɔ di yaa béè tin bāań-bee, ki yōoǹ bi-ŋalii ki túĺ Kudii nee watil pú ki mēē-si àá ki gbāam̀-see,

³⁹sii ti-Dindaan, á pīlifiǹ-bi doooo yilpu laakin a kóoǹnée. Á dū bi-kpitii kí pɔ̄-bi, ní kí ŋá kí tīī báà ŋma kii an nín máaǹ puee. Di sá yii a nyí báà ŋma pɔbil poon bɔti.

⁴⁰Ŋá míǹ án nín làá ŋá pu ní Isirayeel yab ń fàŋkì-si iwiin in kɔkɔ bi cáá kí kàl̄ kitiŋ kin a tīī bi-naanjabee puee.

⁴¹«Unicaan un kaa sá a-nibul Isirayeel yab kansikin ubɔee yaa nyánní kitindandatii ki dɔ́miń a-yindi pu,

⁴²di sá yii u gbìl̄ bi sòon̄ a-yiŋkpaandi nì a-pɔŋkpaaŋŋu pu. U yaa dɔ́miń míǹ ki yōoǹ u-ŋalii ki túĺ kudii nee ki mēēyee,

⁴³sii ti-Dindaan, á pīlifiǹ-u doooo yilpu laakin a kóoǹnée, kí ŋá u nín bālifì-si puee kí tīī-u. A yaa ŋá míǹ, kitiŋ pu nib kɔkɔ làá béé a-yindi, kí fàŋkì-si kii Isirayeel yab nín fàŋkí-si puee. Bi làá béé yii a lafun bí kudii kun m máń nee ni.

⁴⁴«A yaa tīī a-nibul Isirayeel yab mara yii bí cù kí já nì bi-nannanliibi, ní bi fātì bi-ba ki túĺ kitiŋ kin a lēē nee nì kudii kun m máń-si nee watil pú ki mēēyee,

⁴⁵á pīlifì bi-wimmeem nì bi-gbaamii doooo yilpu, ní kí tīī-bi dijajil.

⁴⁶«An ŋūǹ kí ŋá yii Isirayeel yab yīntiǹ-si, di sá yii unil ubɔ kpá kaa yìntī. Bi yaa ŋá míǹ ní a gíí bi-pu diŋuul ki yāntì binannanliibi jáń ki pɔ́ɔkiǹ-bi ki cúú-bi ki cūnnì bi-tiŋki kin dátèe àá kin kaa dátèe ni kuyuŋu,

⁴⁷ní bi yaa kíĺ ki bíi dàkafī, ki kpántì bi-bimbim, ki gbāam̀-si kitiŋ gbanti poon ki lī yii: <Ti ŋá ikpiti, ti yīntì, ti jíń dibɔkpil>.

⁴⁸Bi-nannanliibi tiŋki gbanti poonee, bi yaa fātìi gítìń a-cee nì bi-pɔbil kɔkɔ nì bi-naŋki kɔkɔ, ní ki fātì bi-ba ki túĺ kitiŋ kin a tīī bi-naanjab nì kitiŋ kin ní a lēē nee nì kudii kun ní m máń-si nee ki mēē-see,

⁴⁹sii ti-Dindaan, á pīlifiǹ-bi doooo yilpu laakin a kóoǹnée. Pīlifì bi-wimmeem nì bi-gbaamii kí jòoń-bi.

⁵⁰Dū a-nibul kpitii kí pɔ̄-bi. Dū bi nín jáà nì si puee kí pɔ̄-bi, ní kí yàntī bin ŋúb́-bi kuyuŋuee ń sɔ̄ bi-saai kí dàkà-bi kulaŋŋaŋfitiiu.

⁵¹Di sá yii bi sá a-nibul ní. Sii di yì-bi ní ki nyántìń-bi Eejipiti yab paaki ŋmiŋun.

⁵²«Ŋúbití a-nimbiliŋ, ti-Dindaan Unimbɔti. Pīlifì man a-tɔntɔnliu gbaamii nì a-nibul Isirayeel gbaamii. Pīlifiǹ-ti ŋyunti ŋun kamaa ní ti yaa pée kúuǹ ki yíiń-see.

⁵³Di sá yii sii di lútì-ti kitiŋ pu nibuliŋ kɔkɔ kansikin tí nīn sá difakal ki tīī-si, kii a nín nìn dī a-tɔntɔnliu Mooyiisi pu ki sòon̄ pu ŋyunti ŋun a nìn nyántì ti-naanjab Eejipiti tiŋkinee.»

⁵⁴Saloomɔn nìn gbāaǹ u-tabiŋyiliŋ pu ti-Dindaan saraafaŋŋu nyɔkɔpu, ki yōoǹ u-ŋalii yilpu, ní ki mēē ki gbāam̀ ti-Dindaan. U nìn mēē míǹ ki dóòyee ní ki yíkì

⁵⁵ki síl̀ ki mēē mpɔn ki bīiǹ Isirayeel samaau pu ki lī yii:

⁵⁶«Tí nyɔ̄ŋkìmaan ti-Dindaan un di tīī u-nibul Isirayeel ŋgbansɔŋfi kii u nín nìn pōoǹ puee. Di sá yii u nín nìn dī u-tɔntɔnliu Mooyiisi pu ki pōoǹ-ti ipoon iŋyee, báà iba kaa gbíntì waa ŋá[37].

⁵⁷Tin m mèé ti-Dindaan Unimbɔtee di sá ú nīn bí ti-cee kii u nín nìn bí ti-naanjab cee puee. Ú taa dū-ti kí fá, kí taa fàtī u-boon kí tīī-ti.

⁵⁸Ú gíiǹní ti-pɔbiliŋ u-cee! Niinee ti làá ŋmā kí nīn bí kii u nín là tí nīn bí puee, ní tí nīn ŋúb́ u-marab nì u-bɔkpaaŋi nì u-koobiliŋ ŋin u nìn dūu tīī ti-naanjabee.

⁵⁹Ti-Dindaan ti-Nimbɔtiu ń nīn téetí m-gbaamii in m dūu bíl̀ u-nimbiin nee pu ŋwiimpu nì kunyeeu. Ú pɔ̀ man u-tɔntɔnliu nì u-nibul Isirayeel yab.

⁶⁰An yaa ŋá mimmee, kitiŋ pu nib kɔkɔ làá béé yii ti-Dindaan baba di sá Unimbɔti, ubɔ kaa ti bí.

⁶¹Nín̄ símaan nì ti-Dindaan ni-Nimbɔtiu deedee, kí nīn ŋúb́ u-bɔkpaaŋi kí nīn tɔ́ u-marab, kii ni nín bíi ŋáań pu díǹ nee.»

⁶²Ubɔti saloomɔn nì Isirayeel yab kɔkɔ kpáfì ki ŋá saraabi ki tīī ti-Dindaan.

⁶³Saloomɔn nìn kūū inaa kutukub mmuŋku nì bili, ní ki kūū ipii nì iŋoobu kutukub dilaataal nì mmuŋku ki ŋá mpèé saraau. Bi nín ŋá pu ki dū kunimbɔtidii ki sú ti-Dindaanee dee.

⁶⁴Ŋwiin gbanti mbaanti ní ubɔti dū dicindi din bí kunimbɔtidii nyɔkɔpuee ki sú ti-Dindaan. Di sá yii tasa kúti saraafaŋŋu ŋun nìn bí kunimbɔtidii punyɔkɔki caŋinee kaa nìn náaǹ bí ŋmā kí wà saraabi kɔkɔ. An puee kunimbɔtidii cindin ní u nìn dū saraawɔkaa nì tijin saraabi nì mpèé saraabi kpam ki wùn̄ ki ŋá saraa.

⁶⁵Ŋyunti gbanti mbaanti ní Saloomɔn nì Isirayeel yab kɔkɔ kpáfì ki jíń tibìń jiŋaaliu. An nìn sá dinikitikpaandi ní, binib nìn nyánní doooo Leeboo-Amaati kitiŋ yilpu pú ki cáá sāā Eejipiti buŋŋu kitiŋ taapu pú. Bi nìn jíń jiŋaal gbanti iwiin iluli ní ti-Dindaan nimbiin, ní ki gíti kútì iwiin iluli, an kpáfìi ŋá ŋwiin ŋubɔ kpá saalku.

⁶⁶Kinyɔnliliitii iwiin inii dalee ní Saloomɔn yāntì Isirayeel yab nín gítí bi-dumpui. Samaa nìn jáam̀ ubɔti ní ki nín kóò bi-tantibin nì mmɔn nì dipɔɔpindi, kun puee ti-Dindaan nìn dàkā u-tɔntɔnliu Daafiidi nì u-nibul Isirayeel kulaŋŋaŋfitiiu.