Read Ntcham 1 Rois 9 Bible Online

1 Rois 9 - Ntcham bible

1 Rois 9

¹Saloomɔn nìn máń ti-Dindaan Diiku nì úǹ u-ba naakooku nì tin u nìn pée là kí mēe ki dóò.

²Míǹ boonee ní ti-Dindaan nyántì u-ba nliliitiim ki dàkā-u kii u nín nìn nyántì u-ba ki dàkā-u Gabawɔn puee.

³Ti-Dindaan nìn bí-u yii: «M gbìl̄ a-wimmeem nì a-gbaamii in a dūu bíl̀ m-nimbiinee. M ŋá kudii kun a máńee circir, ní m kíí bí nīn jáaḿ m-yindi ku-poon kí nīn cá jaanjaan. M-nimbikpeeŋu làá nīn pée cɔ́ ku-pu, ní m làá nīn wúń ku-pu baabadal.

⁴Ama siiyee, nín̄ nóó-mi nì dipɔbil diba nì ibaamɔn poon kii a-baa Daafiidee. Nín̄ ŋáań tin m kpáafì-see, ní kí nīn ŋúb́ m-bɔkpaaŋi nì m-koobiliŋ.

⁵A yaa ŋá míǹ, m làá tīī a-bɔtiiti Isirayeel nibul pu mpɔn kí nīn cá jaanjaan. M nín nìn pōoǹ a-baa Daafiidi puee dee. M nìn bí-u yii: <A-kpátam boonee, a-naantiibi kansikin ubɔ làá nīn pée sá ubɔti ní Isirayeel tiŋkin.>

⁶Ama sii nì a-jipɔmbi yaa kaa ŋúb́ m-marab nì m-koobiliŋ ŋin m tīī-nee, ní ki yaa fātì ni-boon ki tīī-mi ki cūtìi nóó awaa ki gbàantí ŋi-taapuee,

⁷m làá jà Isirayeel yab kitiŋ kin m tīī-bee pu. M làá fàtī m-boon kí tīī kudii kun m dūu sú m-ba nee. Anibul kɔkɔ làá nīn kíǹ ki bèel̄ Isirayeel yab ní ki lāā-bi.

⁸Kudii nee làá dāá kpántí adigbun ní. Un kamaa yaa láa jītí kudii nee caŋinee làá dāá bàkatī ní kí bàlifì yii: <Ba yì-tì ní ti-Dindaan nín ŋá kitiŋ nee nì kudii nee míǹ?>[38]

⁹Niinee ní bí dāá kíí-bi yii: <Kun yì-tèe di sá yii Isirayeel yab dū ti-Dindaan bi-Nimbɔtiu un di nyántìń-bi Eejipiti tiŋkinee ki fá. Bi dū bi-ba ki tīī awaa ki gbàantí ŋi-taapu ki jáaḿ-ŋi. An pu ní ti-Dindaan yāntì nnaabu nee bāań-bi.>»

¹⁰Abin mmuŋku ní Saloomɔn nìn dūu máń adiin liitil, an dàkà yii ti-Dindaan Diiku nì kubɔtinaakoou.

¹¹Tiir bɔtiu Yiiram di nìn tīī Saloomɔn seedir dɔi nì siipreesi dɔi nì sindaariya kii u nín nìn là puee. An puee ubɔti Saloomɔn nìn tīī-u Galiilee tiŋkpaaŋkin ntimu mmuŋku.

¹²Niinee ní Yiiram nyánní Tiir tiŋkin ki dɔ́miń kí kpèè ntimu mun Saloomɔn tīī-uee, ama ntimuee bɔti kaa nìn fáatì-u.

¹³Niinee ní u bí yii: «M-nabiki, ba timmu ní a nín tīī-mi nan dee!» An pu ní nìn díǹ, bi yíì ntimu gbanti yii Kabuul timmu[39].

¹⁴Nì míǹ kɔkɔee Yiiram nìn gíti tīī Saloomɔn sindaariya tɔnnib bita nì dijandi.

¹⁵Diwɔ́bil tundi ní Saloomɔn nìn dūu máń ti-Dindaan Diiku nì úǹ u-ba diiku nì kudii kun bi yíì Miilooyee nì digundi din bi máń ki tú Jeerusaleem tiŋkee nì Asɔɔr nì Meegiidoo nì Geeseer timmu.

¹⁶Eejipiti bɔtiu Faaroo nìn cūtìi jáń ki fōō Geeseer tiŋki. U nìn kūū Kanaan yab bin nìn kóò niinee kɔkɔ ní ki tūū adiin ŋŋmi, ní ki dū kitiŋee ki pàn̄ u-bisal un mɔ́ǹ Saloomɔŋyee cootiiku.

¹⁷An pu ní an nìn bālifì yii Saloomɔn ń fàtīí mā Geeseer tiŋki gbanti. Saloomɔn nìn gíti máń Beeti-Oorɔn-Taapu,

¹⁸nì Balaati timmu nì Tamaar tiŋki kin bí kuteeunee,

¹⁹nì ntimu mun kɔkɔ poon ní bi nìn bīil̀ u-jintee, nì ntimu mun poon ní u-janjatɔrɔkub nìn sīlifée, nì mun poon ní u-taamui nìn bée. Saloomɔn nìn gíti máń kun ní u nìn lèe Jeerusaleem tiŋkin nì Leebanɔn jool pu nì ntimu mun kɔkɔ nìn pée bí u-taapuee.

²⁰Amɔɔr yab nì Eeti yab nì Peeriisi yab nì Eefi yab nì Jeebusi yab biba nìn kíǹ ki bí Isirayeel tiŋkin, bíǹ gbanti kaa nìn sá Isirayeel yab.

²¹Bi nìn gbíntìi bí kun puee Isirayeel yab kaa nìn ŋúń ki kūū ki céetì-bi. Saloomɔn nìn dū bi-naantiibi ki ŋá diwɔ́bil tundin ki dāa sāā díǹ.

²²Ama Saloomɔn kaa nìn dū Isirayeel yab ki ŋá diwɔ́bil tundi gbantin. Bíǹ di nìn sá u-janjaliibi nì u-janjakpilib nì u-janjakpootiliibi nì bin ŋàal̀ janjatɔrɔkubee nì bitanjakaliibi.

²³Kɔmandambi nìn lēē bikàliŋkpilib alaataa aŋmoo nì imuŋku ili nì saalaa bí nīn kpèé bin bí ki tūǹ Saloomɔn tuuŋŋee.

²⁴Faaroo bisal nín jɔ́m̀ Daafiidi Tiŋkin ki kɔ́ kudii kun Saloomɔn nìn máń ki tīī-uee, boonee ní u nín máń Miiloo diiku.

²⁵Saloomɔn nìn ŋáań bisaraawɔkaabi nì mpèé saraabi nsaraafan ŋun u nìn máń ti-Dindaanee dibindi poonee mita pu[40] ní. U nìn gíti tùutī talaalub nsaraafan pu ki tìì ti-Dindaan. Míǹ ní u nìn ŋáań ki dàkà kun pu kunimbɔtidii bée.

²⁶Ubɔti Saloomɔn nìn kpáá meelab Eesiiyɔn-Geebeer tiŋkin Eelaati tiŋki caŋin. Eelaati tiŋki gbanti bí Tikati Mɔɔl gbandi, Eedoom tiŋkin ní.

²⁷Yiiram nìn dū u-tɔntɔnliibi bimeelaŋaaliliibi bin nyí tiŋku bɔti tiŋanee ki tú bí tūtuǹ Saloomɔn tɔntɔnliibi.

²⁸Bimeelaŋaaliliibi gbanti nìn cūtì Oofiiri tiŋkin ki nyàab̄ sindaariya tɔnnib saalaa nì bili ki cáa cūnnì ki tīī ubɔti Saloomɔn.