Read Ntcham 2 Rois 10 Bible Online

2 Rois 10 - Ntcham bible

2 Rois 10

¹Akaab nìn cáá naantiibi imuŋku ita nì saalaa kóò Samaarii tiŋkin. Jeewuu nìn ŋmàn̄ kugbɔŋu ki tú bí cáá tīī Samaarii tindaŋkpilib nì Jisirayeel janjakpilib nì bin nìn kpèé Akaab naantiibee kí tùkù-bi yii:

²«Nimbi di kpèé ubɔti biyaamu, ki cáá tɔrɔkub nì itaamu nì tijanjawan, ní ki kóò kitiŋ kin poon bi máń digundi ki māntìi túee. Ŋyunti ŋun ni yaa fōō kugbɔŋu neeyee,

³ní kpèè ubɔti jipɔmbi kansikin kí lēē un kítì ki máaǹ kí nīn sá ubɔtee kí dū-u kí kàan̄ tibɔtiil ú fōō u-baa yil. Ni yaa ŋá míǹ ki dóòyee, ní bɔ́ntí ni-ba kí já kí mɔ̄tì ni-kpiliu dicaŋku pu.»

⁴Bi gbìl̄ mimmee ní ki fāŋkì tikpil ki kíǹ ki lì tɔb cee yii: «Bibɔtiibi bili kaa ŋúń ki síl̀ u-nimbiin, kin mana ní timbi nee làá ŋmā kí já nì u?»

⁵Niinee ukpil un kpèé ubɔti cindee nì ujanjakpil un kpèé kitiŋ gbantee nì bitindaŋkpilib nì bin kpèé mbiyaamuee tú bí cùú tùkù Jeewuu yii: «Timbi sá a-tɔntɔnliibi ní. Kun a yaa pée bí yii tí ŋée, ti làá ŋá. Taa làá lēē báà ubɔ kí kàan̄ tibɔtiil. Míǹ puee ŋá min di ŋān̄ a-ceeyee.»

⁶Ní Jeewuu fātìi ŋmàn̄ kugbɔŋu kuliliitiiu ki tùkū-bi yii: «Ni yaa bí m-jandi pú ní ki yaa làá pīlifì m-nyɔkɔee, ní lēēmaan ni-kpiliu Akaab jipɔmbi nì u-naantiibi kɔkɔ yiliŋ kí fu cáań-mi fool naŋkɔnampu Jisirayeel tiŋkin.» Ubɔti jipɔmbi nì u-naantiibi imuŋku ita nì saalaa gbantee nìn kā Samaarii nikpaambi cee ní bi kpèé-bi.

⁷Bikpilibee nín fōō kugbɔŋuee ní bi cúú ubɔti jipɔmbi nì u-naantiibi imuŋku ita nì saalaayee kɔkɔ ki lāntì, ní ki dū bi-yiliŋ ki ŋá tikabitin ki tú bi cáa tīī Jeewuu Jisirayeel tiŋkin.

⁸Ubɔ nìn dɔ́miń ki tùkū Jeewuu yii: «Bi cáań ubɔti jipɔmbi nì u-naantiibi yiliŋ.» Ní Jeewuu bí yii: «Dūmaan-ŋi kí bíĺ akpuku ali kitiŋ punyɔkɔki caŋin áli fool kutaafaau!»

⁹Kutaa wúntèe ní Jeewuu nyáń ki síl̀ samaa nimbiin ki lī yii: «Nimbee, ni sá deedeedambi! Man di bɔ́ntì kí kpɔ̀ m-kpiliu ubɔti ní ki lafun kūū-u mun. Ama ŋma di kūū bin bí nee kɔkɔ?

¹⁰Ní béémaan yii tin kɔkɔ ní ti-Dindaan nìn sòon̄ ki tɔ́ Akaab dicaŋku puee, báà dinyɔɔbundi kpá kí gbíntí fám! Ti-Dindaan nín dī u-bɔnaatiliu Eelii pu ki sòon̄ tin kɔkɔee, u ŋá míǹ[21].»

¹¹Niinee Jeewuu kūū bin kɔkɔ nìn kíǹ Akaab dicaŋkun ki bí dimaŋfalin ki kóò Jisirayeelee[22] kɔkɔ. U nìn kūū ki kpáaǹ bikpilib bin kɔkɔ nìn pá u-boonee nì u-bɔɔbi nì u-tandambi. Waa nìn yāntì bi-kansikin ubɔ ŋmátì.

¹²Boonee Jeewuu kíĺ nsan ki nín cá Samaarii. U bàn̄ laakin bi yíì yii Beeti-Eekeedi-Bipikpaabee,

¹³ní ki tú Juuda bɔtiu Akasiyasi nabiyaamu. Ní u bālifì-bi yii: «Ni sá bilab ní?» Ní bi kíí yii: «Ti sá Akasiyasi nabiyaamu ní. Ti dɔ́miń kí jāam̀ ubɔti nimpuu Jeesabeel biyaamu nì bin kíǹ ki bí ubɔti dicaŋkunee ní.»

¹⁴Ní Jeewuu téeń yii: «Ní cúúmaan-bi nì bi-nimbiliŋ!» Ní u-naacimbi cúú-bi nì bi-nimbiliŋ ki lāntì ní ki dū-bi ki tɔ́ Beeti-Eekeedi lɔkɔun. Binib gbanti nìn sá binib imuŋku ili nì bili ní. Bi-kansikin báà ubɔ kaa nìn ŋmátì.

¹⁵U nyáń niin kí nīn cée ní ki dūu tú Reekaab[23] jipɔɔn Yoonadaab, u mun nìn còom̄ ki túŋkí-u. Jeewuu jáam̀-uee ní ki bí-u yii: «A sí m-boon kii ma mun nín sí a-boon pueeee?» Ní Yoonadaab kíí yii: «Iiin!» Ní Jeewuu gíti bí-u yii: «An yaa sée, tīī-mi kuboou!» Ní Yoonadaab tīī-u kuboou. Niinee ní Jeewuu cúú u-ŋal ki cáá-u ki kɔ́ǹ u-cee tɔrɔkun,

¹⁶ní ki bí-u yii: «Dāan̄ tí cù á kpèè man nín cáá ti-Dindaan pu difaŋgiil puee!» U lī mimmee ní ki yōoǹ-u u-tɔrɔkuu pu ki cáá-u ki búntì.

¹⁷Bi bàn̄ Samaarii tiŋkinee ní Jeewuu kūū Akaab dicaŋkun yab bin kɔkɔ nìn kíǹ ki bí kitiŋin niinee. U nìn nāaǹ bi-kɔkɔ ki nóó nì ti-Dindaan nín nìn dī ubɔnaatil Eelii pu ki sòon̄ puee.

¹⁸Míǹ boonee ní Jeewuu kóoǹ samaa kɔkɔ ki kpáfì ní ki bí-bi yii: «Ubɔti Akaab tōotì diwaal Baal, man làá gíti tòotī-dì kí jītíǹ-u.

¹⁹An puee ní yíiń Baal bɔnaatiliibi kɔkɔ nì bin kɔkɔ tòotī-dèe nì di-tandambi kɔkɔ bí kpāfì m-cee. Ubɔ ń taa kíń, di sá yii m làá ŋá saraakpaŋkpaan ní kí tīī diwaal Baal. Un yaa kaa dɔ́mińee, bi làá kpɔ̀-u ní.» Jeewuu nìn bíi ŋmàtíǹ-bi kí ŋmā kí kpɔ̀ kí céetí bin nìn tòotī diwaal Baalee ní.

²⁰An pu ní u nìn bí yii bí kóoǹ kí kpāfì kí jāam̀ diwaal Baal. Bi nìn ŋmàn̄ tigbɔn

²¹ki yākatì ki tīī Isirayeel beel kɔkɔn. Bin kɔkɔ nìn pée tòotī diwaal Baalee nìn dɔ́miń ní. Ubɔ kaa nìn kíǹ kaa dɔ́miń. Bi nìn kɔ́ diwaal Baal diikun ní an gbí.

²²Ní Jeewuu bí un kpèé diwaal wampeeŋkaatee yii: «Nyāntí tiwampeeŋkaal kí yàkatīí tīī bin kɔkɔ pée tòotī Baalee!» Ní úǹ nyántì tiwampeeŋkaal ki tīī-bi.

²³Jeewuu nì Reekaab jipɔɔn Yoonadaab nìn kɔ́ diwaal Baal diikun ní ki bí bin tòotī Baalee yii: «Ní kpèèmaan ni-kansikin tiŋan kí kpèè yii bin jáaḿ ti-Dindaanee yaa bí doo, di sá yii ti pée là bin tòotī Baalee ŋmaniŋma ní.»

²⁴Jeewuu nì Yoonadaab nìn nín kóò kí ŋá mpèé saraabi nì bisaraawɔkaabi. Kaa nyí kii Jeewuu ŋá mimmee ki nyàab̄ bijanjaliibi imuŋku inaa ki síiǹ mmɔŋki ki bí-bi yii: «M dū binib nee kɔkɔ ki ŋá ni-ŋaan, ama ubɔ yaa yāntì bi-kansikin ubɔ ŋmátèe, udaan làá dū úǹ u-ba maŋfal ní kí téeǹ un ŋmátèe yal pu.»

²⁵Ŋyunti ŋun Jeewuu ŋá saraabi ki dóòyee ní u bí bijanjaliibi nì bi-kpilib yii: «Ní kɔ́ kí kpɔ̀ binib nee! Ní taa yàntī ubɔbɔ ń ŋmátí.» Ní bi kɔ́ ki dū ntàataajimu ki kūū bi-kɔkɔ. Bi kūū-bi ki dóòyee ní ki nyántì-bi ki tɔ́ ki fá kitiŋ kpaanceetiŋu. Bi ŋá míǹ ki dóòyee ní ki nín gítiń diwaal Baal diikun,

²⁶ní ki nyántìń ditaŋkpal din nìn cɔ́ diwaal Baal diikun bi tòotēe ki tūū ŋŋmi.

²⁷Bi nín wùn̄ Baal taŋkpal míǹ ki dóòyee ní bi gbáń ki wīī di-diiku ki dūu ŋá kupɔɔndii. Ku bí ki dāa sāā díǹ.

²⁸Jeewuu nín ŋá pu ní ki kúntì diwaal Baal Isirayeel beelinee dee.

²⁹Nì míǹ kɔkɔee, waa nìn kākatì u-ba ki wāatì ikpiti in ní Neebaati jipɔɔn Jeerooboowaam nìn yāntì Isirayeel yab ŋá ki cūtìi bíi jáaḿ sindaariya nabiliŋ ŋin bi nìn mɔ́ɔ́ an bí Beeteel nì Daanee[24].

³⁰Niinee ti-Dindaan bí Jeewuu yii: «A ŋá an ŋān̄, a ŋá tin fáatiǹ-mee. A ŋá Akaab dicaŋkun yab kii m nín là puee. An puee a-naantiibi làá kàl̄ Isirayeel tiŋki pu tibɔtiil kí cáá sāā anaantitɔntɔkɔ anaa pu.»

³¹Ama nì míǹ kɔkɔee, Jeewuu kaa nìn ŋúb́ ti-Dindaan Isirayeel Nimbɔtiu marab nì u-pɔbil kɔkɔ, waa nìn kākatì u-ba ki wāatì ikpiti in Jeerooboowaam nìn yāntì Isirayeel yab ŋée.

³²Ŋyunti gbantee, ti-Dindaan nìn kíĺ ki bíi bàtī Isirayeel tiŋki pu. U nìn yāntì Siirii bɔtiu Asayeel jáń ki pɔ́ɔkiǹ Isirayeel yab bi-tiŋki kɔkɔ poon.

³³Siirii yab nìn jáń ki fōō kitiŋ kin bí Jɔɔdan ŋwìiń nyalaŋki púee nì Arooweer tiŋki kin bí Arinɔn buŋŋu ŋgan púee, an dàkà yii Galaadi nì Baasan timmu. Ntimu gbanti poon ní Rubeen nì Gaadi nì Manasee naakɔti yab nìn kóò.

³⁴Jeewuu tuuŋŋi ŋin kíǹee nì tin kɔkɔ u ŋée nì u-pɔ́ɔǹtam kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

³⁵Jeewuu kpíì ki cūtìi ŋàl̄ u-baabi ní bi síb́-u Samaarii tiŋkin. U-jipɔɔn Joowakaasi di fōō u-yil ki kpántì ubɔti.

³⁶Jeewuu nìn jíń dibeel Isirayeel tiŋki pu abin mmuŋku nì anii ní. Samaarii tiŋkin ní u nìn kóò.