Read Ntcham 2 Rois 11 Bible Online

2 Rois 11 - Ntcham bible

2 Rois 11

¹Akasiyasi na Atalii nín ká yii u-jipɔɔn kpíìyee ní u lēē yii u làá kpɔ̀ kí céetí ubɔti naantiibi kɔkɔ.

²Ama ubɔti Jooram bisal Yooseeba, Akasiyasi niisal nìn ŋúń ki yōoǹ Akasiyasi jipɔɔn Joowaasi u-mambi kansikin baa ŋúń ki kūū-u ní ki cáá kibikee nì ki-bilooliu ki bál̀ kunimbɔtidii didooŋkaaku kubɔn. Atalii kaa nìn béè, an puee baa nìn kūū kibiki gbanti.

³Kibikee nì ki-bilooliu nìn bál̀ ti-Dindaan diikun niin áli abin aluu. Ŋyunti gbanti kɔkɔee, Atalii di nìn kā dibeel pu.

⁴Dibinluluútiil poonee, ní Yooyadaa tú bi cūtìi yíiń Karii yab janjakpilib nì bijanjaliibi bin cīití dibeecindi nì ti-Dindaan diikuee. Bi bāańee ní u cáá-bi ki cūnnì ti-Dindaan Diikun ní u nì bi ŋá kinyɔkɔbaantii. U nìn yāntì bi pūtì ní u dū ubɔti jipɔɔnee ki dàkā-bi.

⁵Boonee ní u tīī-bi mara nee yii: «Ni nín làá ŋá puee sɔ̀. Ŋwiŋŋuŋfikaa nee, ni-kitil diba làá tɔ̄ ditundi. Dikitipeekaal làá cīití dibeecindi kii di nín kpàà ŋáań puee,

⁶ní dikitililiitiil ń nīn cí Suur punyɔkɔki ní ditataatiil ń nīn cí kipunyɔkɔ kin bí biciitiliibi boonee. Akiti ata gbanti làá nīn cīití dibeecindi ní ki fòol̄ tɔb.

⁷Akiti ali ŋin kaa làá nīn bí ditundin ŋwiŋŋuŋfikaa dalee ń dāá dāan̄ ti-Dindaan Diikun kí nīn cí ubɔti.

⁸Ní dāá màntīí tū ubɔti báà ŋma ń nīn ŋúb́ u-janjawanti u-ŋaan. Un yaa là kí ŋá mpɔn kí kɔ́née, ní kpɔ̀-u. Laakin kamaa ubɔti yaa cée, ní nīn bí u-cee.»

⁹Bijanjakpilibee nìn ŋá kii usaraaŋakpil Yooyadaa nín bí yii bí ŋá puee. Báà ŋma nìn yōoǹ u-janjaliibi, bin tundi nìn kífí ŋwiŋŋuŋfikaa dalee nì bin tundi nìn kúntí ŋwiin gbanti dalee, ní bi nín cá usaraaŋakpil Yooyadaa cee.

¹⁰Usaraaŋakpil nìn dū ubɔti Daafiidi kpaŋki nì u-gbampɔɔŋi ŋin nìn bí ti-Dindaan Diikunee ki tīī bijanjakpilib.

¹¹Bijanjaliibee nìn māntìi tú ubɔti ti-Dindaan Diiku nì nsaraafan nimbiin kí yòon̄ ŋgiil pú ki cáa sāā ŋgan pú. Bi nìn ŋúb́ tijanjawan ní ki lūtìi gíb́ ubɔti.

¹²Niinee Yooyadaa nyántì Joowaasi, ki dū kibeefuulii ki cíkiǹ-u ní ki dū dipoondi taŋkpapilinti ki ŋúbiǹ-u. Boonee ní u bātì ŋkpam ki sītì u-yil pu ki kāaǹ-u tibɔtiil ní samaa kɔkɔ kpáafì abaal ki kíǹ ki tátí yii: «Ubɔti ń nīn cáá mmaŋfafɔkɔn!»

¹³Atalii nín gbìl̄ samaa nì bijanjaliibi wooku puee ní u nín cá ti-Dindaan Diiku watil pú diniwulee cee.

¹⁴U kpēēyee, ubɔtipɔɔn di tɔ́kɔ́ ti-Dindaan Diiku kɔl pu kii bi nín kpààa ŋáań puee, bijanjakpilib nì bikantámbunliibi sí ki kɔ́ĺ-u. Samaa kɔkɔ nìn bí mmɔnni ní bikantámbunliibi búǹ akantán. Niinee Atalii cúú tiwan tin u pēēyee ki dáaĺ ki cátì ní ki téeń yii: «Bi nyáń m-boon ní! Bi nyáń m-boon ní!»

¹⁵Ní usaraaŋakpil Yooyadaa tīī bijanjakpilib bin nìn kpèé bijanjaliibi bin bí ti-Dindaan diikunee mara yii: «Nyāntímaan-u doo! Un di yaa páaǹ u-boonee, bí kpɔ̀-u!» Di sá yii usaraaŋakpil nìn lī yii: «Bí taa kpɔ̀-u ti-Dindaan Diikun doo.»

¹⁶Bi nìn dáaĺ-u ki cūnnì kubɔtinaakoou watil pú, ní ŋyunti ŋun bi bàn̄ Itaamu punyɔkɔkee ní bi kūū-u niin.

¹⁷Yooyadaa nìn ŋá mpèé ti-Dindaan nì ubɔti nì samaa kansikin bí nīn kíǹ ki sá ti-Dindaan nibul. U nìn yāntì ubɔti nì samaa mun ŋá mpèé.

¹⁸Niinee ní samaa kɔkɔ nín cá diwaal Baal diikun ki gbáń ki wīī-ku. Bi nìn gbáń ki wīī Baal saraafaŋyi nì ataŋkpee ŋin nìn bí niin bi tòotēe. Bi nìn kūū Baal tandaaŋwu Matan ki bíl̀ isaraafan caŋin. Boonee ní usaraaŋakpil Yooyadaa lēē binib bí nīn cí ti-Dindaan Diiku.

¹⁹Yooyadaa nìn kóoǹ bijanjakpilib nì Karii yab nì bijanjaliibi bin nìn sá biciitiliibee nì samaa kɔkɔ ní bi yōoǹ ubɔti ti-Dindaan Diikun, ki dūu dī biciitiliibi saŋŋu ki céeǹ-u ki cáa cūnnì ubɔti dumpu. Joowaasi nìn kāl̀ dibeejal pu,

²⁰ní samaa kɔkɔ kíĺ ki bíi fàal̀. Bi nín kūū Atalii dibeecindin boonee ní kitiŋ kɔ́ ŋgbansɔŋfin. Atalii úŋ̀wuee, bi nìn dū kitàataajiki ní ki kūū-u dibeecindin.