Read Ntcham 2 Rois 13 Bible Online

2 Rois 13 - Ntcham bible

2 Rois 13

¹Akasiyasi jipɔɔn Joowaasi nín kpántì Juuda bɔtiu abin mmuŋku nì ata poonee ní Jeewuu jipɔɔn Joowakaasi kpántì Isirayeel bɔtiu. U nìn kóò Samaarii tiŋkin ní ki jíń dibeel abin saalku nì ali.

²U nìn ŋá tin kaa kítì ti-Dindaan nimbiinee. U nìn dū u-ba ki yá ki nákáǹ ikpiti in Neebaati jipɔɔn Jeerooboowaam nìn ŋá ki yāntì Isirayeel yab kɔ́ ikpitinee. Waa nìn fātì u-boon ki tīī-i.

³Ti-Dindaan nìn gíí Isirayeel pu diŋuul ní ki nìn dū-bi ki ŋá Siirii bɔtiu Asayeel nì u-jipɔɔn Been-Adaadi ŋaan. U nìn gíí bi-pu diŋuul míǹ an yúntì.

⁴Ama Joowakaasi nìn gbāam̀ ti-Dindaan ú sɔ̀ŋkì u-ŋuul Isirayeel yab pu ní u pílifiǹ-bi, di sá yii u nìn ká Siirii yab nín nìn wɔ́b́ Isirayeel yab puee.

⁵Ti-Dindaan nìn tīī Isirayeel yab ufiil ubɔ ní úǹ dɔ́miń ki fīī-bi ki nyántì Siirii yab ŋaan. Kí yòon̄ ŋyunti gbantee ní Isirayeel yab fātìi ká ŋgbansɔŋfi.

⁶Nì míǹ kɔkɔee, baa nìn kākatì bi-ba ki wāatì Jeerooboowaam nì u-dicaŋku yab kpitii in bi nìn ŋá ki yāntì Isirayeel yab kɔ́ ikpitinee. Áli gba diwaal Aseera waadɔŋu nìn gbíntìi cɔ́ Samaarii tiŋkin.

⁷Joowakaasi janjakitil poonee, an nìn pée kíǹ bitanjakaliibi binib imuŋku ili nì saalaa nì janjatɔrɔkub saalaa nì bijanjaliibi kutukub saalaa ja ní. Di sá yii Siirii bɔtiu nìn kūū bin kɔkɔ kíǹee. U nìn ŋá-bi kii ŋkpɔŋkpɔm min unil tèe ní.

⁸Joowakaasi tuuŋŋi ŋin kíǹee nì tin kɔkɔ u ŋée nì u-pɔ́ɔǹtam kɔkɔ ŋmàn̄ ki kā Isirayeel bɔtiibi tuuŋŋi gbɔŋkun.

⁹U kpíì ki cūtìi ŋàl̄ u-baabi ní bi síb́-u Samaarii tiŋkin. U-jipɔɔn Joowaasi di nìn fōō u-yil ki kpántì ubɔti.

¹⁰Juuda bɔtiu Joowaasi nín kpántì ubɔti abin ata kpá imuŋku ili poonee ní Joowakaasi jipɔɔn Joowaasi kpántì Isirayeel bɔtiu. U nìn kóò Samaarii tiŋkin ní ki jíń dibeel abin saalku nì diba.

¹¹U nìn ŋá tin kaa kítì ti-Dindaan nimbiinee. U nìn dū u-ba ki yá ki nákáǹ ikpiti in Neebaati jipɔɔn Jeerooboowaam nìn ŋá ki yāntì Isirayeel yab kɔ́ ikpitinee. Waa nìn fātì u-boon ki tīī-i.

¹²Joowaasi tuuŋŋi ŋin kíǹee nì tin kɔkɔ u ŋée nì u-pɔ́ɔǹtam nì u nín jáń kujaau nì Juuda bɔtiu Amasiya puee ŋmàn̄ ki kā Isirayeel bɔtiibi tuuŋŋi gbɔŋkun.

¹³Joowaasi kpíì ki cūtìi ŋàl̄ u-baabi ní bi síb́-u Isirayeel bɔtiibi kaakulin Samaarii tiŋkin. Jeerooboowaam nín nìn fōō u-yil ki kpántì ubɔti.

¹⁴Eeliisee nìn búŋkì ki làá kpú ní Isirayeel bɔtiu cūtì kí màntì u-pu. U bàn̄ee ní ki tīntì u-pu ki bíi sūǹ ki lì yii: «M-baa! M-baa! A jítiǹ Isirayeel janjatɔrɔkub nì u-tanjakaliibi[28]!»

¹⁵Ní Eeliisee bí-u yii: «Yòon̄ butɔbu nì ipiin!» Ní Joowaasi yōoǹ butɔbu nì ipiin.

¹⁶Ní Eeliisee bí-u yii: «Dáaĺ butɔbu!», ní u dáaĺ. Ní Eeliisee dū u-ŋal ki ŋá ubɔti ŋalin

¹⁷ní ki bí yii: «Pìitī tɔkɔla un bí ŋwìiń nyalaŋki púee!» Ní Joowaasi pīitì. Ní Eeliisee bí-u yii: «Dáaĺ butɔbu kí tɔ̄ mpiin!», ní u tɔ́. Ní Eeliisee bí yii: «Ti-Dindaan jajil piiŋŋu dee, dijajil din a làá jī Siirii yab puee dee. A làá já kí pɔ́ɔkiǹ Siirii yab Afeeki [29] tiŋkin kí nàan̄-bi.»

¹⁸Ní Eeliisee bí Joowaasi yii: «Yòon̄ a-piiŋyi!» Ní ubɔti yōoǹ. Ní Eeliisee bí-u yii: «Dáaĺ kí yā kitiŋ!» Ní ubɔti dáaĺ ki yá kitiŋ ŋfunyɔm mita ní ki síl̀.

¹⁹Ní Unimbɔti bɔnaatiliu Eeliisee gíí u-pu diŋuul ki bí yii: «A yaa bàà dáaĺ ki yá kitiŋ ŋfunyɔm miŋmoo àá miluu puee, a bàà làá já kí pɔ̄ɔkiǹ Siirii yab kí nàan̄-bi kɔkɔ múb. Too, kɔŋkɔnnee, mita ja ní a làá já kí pɔ̄ɔkiǹ Siirii yab.»

²⁰Eeliisee kpíìyee ní bi síb́-u. Dibindi kamaayee, Moowaab yab nìn dòoń Isirayeel tiŋkin ki fúkuĺ-bi.

²¹Dalbee Isirayeel yab biba cūtì kí síb́ unil ní ki ká akiti gbanti tí dòoń. Bi nìn dū utaŋkpiilee ki bíl̀ Eeliisee kaakulin malaa ki sáǹ ki nín kùnní. Utaŋkpiilee gbēē Eeliisee kpabiŋee ní ki fīkitì ki yáatìi yúl̀.

²²Siirii bɔtiu Asayeel nìn sāaǹ Isirayeel yab iwiin in kɔkɔ Joowakaasi dūu kāl̀ tibɔtiil Isirayeel beelinee.

²³Ama ti-Dindaan nìn súń Isirayeel yab saai ki dàkā-bi u-laŋŋaŋfitiiku ki dū bi-kpitii ki pú-bi. Dipoondi din u nìn pōoǹ Abraam nì Isaaki nì Jaakɔbee pu ní u nìn ŋá míǹ ki tīī-bi. An puee waa nìn nāaǹ-bi. Waa nìn dá láá dū-bi ki fá.

²⁴Siirii bɔtiu Asayeel kpíìyee ní u-jipɔɔn Been-Adaadi fōō u-yil ki kpántì ubɔti.

²⁵Joowakaasi jipɔɔn Joowaasi nìn fātìi fōō ntimu mun Asayeel nìn jáń ki fōō u-baa Joowakaasi ceeyee u-jipɔɔn Been-Adaadi ŋaan. Joowaasi nìn jáń ki pɔ́ɔkiǹ Been-Adaadi ŋfunyɔm mita pu ní ki fātìi fōō Isirayeel timmu gbanti kɔkɔ.