Read Ntcham 2 Rois 18 Bible Online

2 Rois 18 - Ntcham bible

2 Rois 18

¹Eela jipɔɔn Oosee nín jíń dibeel Isirayeel tiŋkin dibintataatiil poonee ní Akaasi jipɔɔn Eeseekiyaasi kpántì Juuda bɔtiu.

²U nìn cáá abin mmuŋku nì aŋmoo ní ki kpántì ubɔti ní ki kāl̀ Jeerusaleem ki jíń dibeel abin mmuŋku nì awa. Bi nìn yíì u-na Abii, Seekariya bisal.

³U nìn ŋá tin fáatì ti-Dindaanee kii u-naanja Daafiidi nín nìn ŋá puee ní deedee.

⁴U nìn kúntì ŋgbantamu pu saraabi, ki gbáń ki wīī ataŋkpee ŋin bi kpítì ki dūu ŋá awaayee, ki gāatì ŋwindɔ ŋun bi nìn dūu cóoǹ ki tīī diwaal Aseerayee. U nìn tí gbáń ki wīī kukoonaŋu kun Mooyiisi nìn dū tasa kúti ki mɔ́ɔ́yee[43], di sá yii kí cáá sāā ŋyunti gbantee, Isirayeel yab nìn tùutī talaalub ki tìì kukoonaŋu gbanti ní. Bi nìn yíì-ku yii Neeyuusitan.

⁵Eeseekiyaasi nìn dū u-mákal ki páaǹ ti-Dindaan, Isirayeel Nimbɔtiu pu. Juuda bɔtiibi bin nìn līntiǹ-uee nì bin dāa páaǹní u-boonee, bi-kansikin báà ubɔ kaa bàn̄-u.

⁶U nìn dū u-ba ki yá ki nákáǹ ti-Dindaan, kaa fātì u-boon ki tīī-u. U nìn ŋúb́ marab bin kɔkɔ ní ti-Dindaan nìn tīī Mooyiisee.

⁷An puee ti-Dindaan nìn bí u-cee, ní tin kɔkɔ u nìn ŋáańee bútí-u. Waa nìn kíí u-ba pu Asuur bɔtiu cee ní kaa nìn gíti bí u-taapu.

⁸U nìn jáń ki pɔ́ɔkiǹ Fiiliistii yab ki jìn̄-bi ki cáa sāā Gaasaa tiŋki. U nìn jáń ki fōō ntimu mun bi máń agun ki túee nì ntimu mun pée cáá sintil difɔŋfɔkɔŋi ŋmaniŋmee.

⁹Eeseekiyaasi nín jíń dibeel dibinnanaatiil poonee nì Eela jipɔɔn Oosee nín jíń Isirayeel tiŋki pu dibeel abin aluli poonee, ní Asuur bɔtiu Salmanasaar dɔ́miń kí já nì Samaarii tiŋki ní ki māntìi tú-kì.

¹⁰Abin ata boon, an dàkà yii Eeseekiyaasi beel binluluutiil poon nì Oosee beel biŋwawatiil poon ní Asuur yab jáń ki fōō Samaarii tiŋki.

¹¹Asuur bɔtiu nìn cúú Isirayeel yab kí cáa cūnnì kuyuŋu Asuur tiŋkin. U nìn dū-bi ki kāaǹ Alaa tiŋkpaaŋkin nì Abɔɔr tiŋkpaaŋki kin poon ní Goosan buŋŋu pùub̀ ki jītée, nì Meedii timmun.

¹²Kun pu ní tíǹ gbanti kɔkɔ bāań-bee di sá yii baa nìn pílifì ti-Dindaan bi-Nimbɔtiu nyɔkɔ, ní kaa nìn síl̀ nì u-poondi deedee. Marab bin ní ti-Dindaan tɔntɔnliu Mooyiisi nìn dūu tīī-bee, baa nìn tɔ́-bi ní kaa nín ŋá bi nín bí yii bí ŋá puee.

¹³Eeseekiyaasi nín jíń dibeel dibindi diba kpá saalku poonee ní Asuur bɔtiu Seenakeeriibi dɔ́miń ki jáń nì Juuda yab timmu mun bi máń agun ki túee ki fōō mu-kɔkɔ.

¹⁴Niinee ní Juuda bɔtiu tú bí cùú tùkù Asuur bɔtiu Lakiisi tiŋkin yii: «M yīntì! Taa ti já nì mi. A yaa gíí-mi dipɔndi diŋyee, m kíí kí pà.» Asuur bɔtiu nìn gíí Juuda bɔtiu Eeseekiyaasi dipɔndi animbil kúti kiiloobi kutukub biwa nì sindaariya kiiloobi alaataa awa.

¹⁵Ní Eeseekiyaasi yōoǹ animbil ŋin kɔkɔ bí ti-Dindaan Diikunee nì ŋin kɔkɔ bí ubɔti nimbikpaafidiikunee ki tīī Asuur bɔtiu.

¹⁶U nìn lēē gba sindaariya un u nìn dūu nyūntì ti-Dindaan Diiku punyɔmmu dɔi ilalikaa nì icooŋkaayee kɔkɔ ki dūu tīī Asuur bɔtiu.

¹⁷Asuur bɔtiu nìn bí Lakiisi tiŋkin ní ki dū u-janjakpiliu nì un sá bijanjaliibi kɔkɔ yidaaŋwuee nì un bi yaa cūtì kujaau u ŋúb̀ ubɔti janjawantee ki tú ubɔti Eeseekiyaasi cee, bi nì dijanjakitikpaandi diba nóó. Bi bàn̄ Jeerusaleem tiŋkinee ní ki jɔ́m̀ ki síl̀ kunyiŋfuŋu kun bi cátì nnyim dì ki kóò dinyimbɔbil din bí yilpu púee. Dinyimbɔbil gbanti nìn dɔ̄ didandi din cá biwaŋfintiliibi kpaabunee watil pú ní.

¹⁸Bi síl̀ niinee ní ki téeń yii bi là kí sòoǹ nì ubɔti. Bin kpèé ubɔti cindee kpiliu Eeliyaakiim, Yiilkiyaawuu nì ubɔti gbaŋŋmaliu Seebina nì Asafi jipɔɔn Yoowa un kpáafí ubɔti gbɔntee di nìn nyáń ki túŋkì-bi nsanni.

¹⁹Ní un nìn ŋúb̀ Asuur bɔtiu janjawanti kujaaunee bí-bi yii: «Ní tùkù Eeseekiyaasi yii: Ubɔtikpaan, Asuur bɔtiu nín sòon̄ puee sèé: <Ba pu ní a máká ní?

²⁰A dàkafī yii anyɔɔbun fám ŋūǹ kí fōō kujaau bɔ́ntitam nì dibaatandi paaŋŋu kí já kujaauaaa? Ŋma pu ní a baasii máká ní ki yíkì kaa kíí a-ba pu m-cee na?

²¹Eejipiti pu ní a mákáaa? Saa nyí yii Eejipiti sá kii kukaluu kun gíìyee ní un yaa dū u-ŋal ki nyīī ku-puee, an gíí-uaaa? Too, míǹ ní Eejipiti bɔtiu Faaroo sá ki tīī un kamaa yaa dū u-mákal ki páaǹ u-puee!

²²An yaa yíì a làá lì yii: <Ti-Dindaan ti-Nimbɔtiu pu ní timbi máká!> Kin an kaa sá sii Eeseekiyaasi ubaantee di kúntì ŋgbantamu pu saraabi nì mu-saraafaŋyi ní ki bí Juuda nì Jeerusaleem yab yii nsaraafan ŋun bí Jeerusaleemee baba nimbiin ní bí nīn gbàantí ki jáaḿ ti-Dindaanaaa?

²³A yaa là sii nì m-kpiliu Asuur bɔtiu ń kpáká kí kpèè. A yaa ŋúń ki ká bitanjakaliibi, m làá tīī-si itaamu kutukub bili mun!

²⁴Á kpáàa ŋūǹ kí já kí pɔ̄ɔkiǹ m-kpiliu tɔntɔnliibi kansikin kiwaai gba! Kin ba pu ní a nín máká Eejipiti pu ú tīī-si janjatɔrɔkub nì itaamu na!

²⁵A dàkafī yii ti-Dindaan kaa là ní m dɔ́miń kí jáǹ kitiŋ nee kí nàan̄-kàaa? Ti-Dindaan u-ba di bí-mi[44] yii: <Cùú já nì kitiŋ nee kí nàan̄-kì!>»

²⁶Niinee Yiilkiyaawuu jipɔɔn Eeliyaakiim nì Seebina nì Yoowa bí Asuur janjakpiliuee yii: «Ti gbāam̀-si ní, sòoǹ nì timbi a-tɔntɔnliibi Aram yab sooŋyi poon, di sá yii ti gbìl̀-i. Taa ti sòoǹ nì ti eebru sooŋyi poon, di sá yii binib tɔ́kɔ́ digundi pu ki pílifí.»

²⁷Ama ní Asuur janjakpiliuee kíí-bi yii: «A dàkafī yii sii nì a-bɔtiu baba cee ní m-kpiliu túnní-mi ḿ cáań tibɔti nee kí sòoǹaaa? Tibɔti gbanti sá ki tīī binib bin kɔkɔ bí digundi pu nee mun ní. An kaa làá ti yúntí, bi làá ŋmɔ́ bi-binti ní kí nyɔ̀ bi-nyeem kii ni muee.»

²⁸Míǹ boonee ní Asuur yab janjakpiliuee yíkìi síl̀, ní ki téeń mpɔn eebru sooŋyi poon yii: «Ní pīlifìmaan tibɔti tin ubɔtikpaan, Asuur bɔtiu cáá kí sòoǹee!

²⁹Ubɔti nín lī puee sèé: <Ní taa yàntī Eeseekiyaasi ń kīil̀-ni, di sá yii waa làá ŋmā kí fīī-ni!

³⁰Ní taa yàntī Eeseekiyaasi ń kīil̀-ni ní dū ni-mákal kí páań ti-Dindaan pu, u bí ki lì yii báà an ŋá pu, ti-Dindaan làá fīī-ni. Kitiŋ nee kpá kí kɔ́ Asuur bɔtiu ŋaan!>

³¹Ní taa pīlifì Eeseekiyaasi, ama ní pīlifì tin Asuur bɔtiu bí ki sòoǹee, yii: <Píímaan-mi kubɔɔtiiu, ní sāǹ kí kɔ́maan-mi! Ni yaa ŋá míǹ, báà ŋma làá ŋmɔ́ u-fiinyi subu nì u-fiigi subu biliŋ ní ki nyɔ̀ u-lɔkɔu poon nyim,

³²kí nīn cí ŋyunti ŋun ní m làá dāan̄ kí yòon̄-ni kí cùnnì kitiŋ kin bí kii ni-yaka nee poonee. Kitiŋ gbanti poonee, bilee nì ndamam nì tikpaajin nì fiinyi biliŋ nì ɔliifi biliŋ nì ŋkpam nì tisiil bí ní. Mimmee ni làá nīn bí dimaŋfalin kaa làá kpú.> Míǹ puee ní taa pīlifìmaan Eeseekiyaasi, di sá yii nnyimɔn ní u bí ki mɔ́ntí-ni ki lì yii: <Ti-Dindaan làá fīī-ti!>

³³Atimbun ŋin kíǹee waaŋi ŋúń ki fīī ŋi-timmu ki nyántì Asuur bɔtiu ŋaanaaa?

³⁴Amaati nì Aripaadi yab waaŋi bí la? Seefarfayiim nì Eena nì Afa yab waaŋi bí la? Awaa gbanti ŋúń ki fīī Samaarii tiŋkaaa?

³⁵Ntimu gbanti kɔkɔ waaŋi dilal di ŋúń ki fīī di-tiŋki ki nyántì m-ŋaan? Kin án làá dī mana ní ti-Dindaan ń pìin̄-mi nsan ḿ taa fōō Jeerusaleem?»

³⁶Bin kɔkɔ nìn bí niinee, báà ubɔ kaa nìn wāaǹ kinyɔkɔ ní kaa nín gātì-u, di sá yii ubɔti nìn kpáafì-bi yii: «Ní taa pée kíí-u tiba!»

³⁷Míǹ boonee ní Yiilkiyaawuu jipɔɔn Eeliyaakiim nì ugbaŋŋmal Seebina nì Asafi jipɔɔn Yoowa un kpáafí ubɔti gbɔntee nín gítí ubɔti Eeseekiyaasi cee. Bi nìn dáaĺ ki cátì tiwan tin bi pēēyee, ní ki dū tibɔti tin ujanjakpilee sòon̄ee ki máafì-u.