Read Ntcham 2 Rois 22 Bible Online

2 Rois 22 - Ntcham bible

2 Rois 22

¹Joosiyaasi nìn cáá abin anii ní ki kpántì ubɔti. U nìn kóò Jeerusaleem[48] ní ki jíń dibeel abin mmuŋku nì saalaa nì diba. Bi nìn yíì u-na yii Yeediida. U-na nìn sá Bootikaati tiŋkin ní ki sá Adaaya bisal.

²U nìn ŋá tin fáatiǹ ti-Dindaanee. U nìn nóó u-naanja Daafiidi tabɔbiliŋ ní deedeedee, waa nìn kpēetì ki cūtì ŋgan púɔɔɔ, ŋgiil pú.

³Ubɔti Joosiyaasi nín jíń dibeel abin saalku nì ata poonee ní u tú u-gbaŋŋmaliu Safan, Asaliya jipɔɔn, Meesulam naantiiu ti-Dindaan Diikun ní ki bí-u yii:

⁴«Cùú ká usaraaŋakpil Ilikiya kí tùkù yii ú kàaǹ animbil ŋin kɔkɔ ní bi cáań ti-Dindaan Diikunee nì ŋin ní bipunyɔɔciitiliibi fōōyee[49].

⁵Bí dū animbilee kí tīī bin kpèé ti-Dindaan Diiku ŋāŋkitam tuuŋŋee kpilib, ní bíǹ ń lēē kí pà bitɔntɔnliibi bin bí ki tūǹ ti-Dindaan Diiku ŋāŋkitam tuuŋŋee.

⁶Bí lēē kí pà kapintab nì bidimaliibi nì bitɔntɔnliibi bin kíǹee, ní kí lēē kí dā idɔ nì ataŋkpee ŋin bi kpítèe kí dūú ŋāŋkì ti-Dindaan Diiku.

⁷Bí taa bàlifì-bi yii bí gbá animbil ŋin bi dūu tīī-bee kɔntaau, di sá yii bi sá bibulcinnib ní.»

⁸Ubɔti gbaŋŋmaliu Safan cáań ubɔti nyɔɔbundee ki bíl̀ usaraaŋakpil Ilikiyawuu nimbiin ní úǹ bí-u yii: «M ká Marab gbɔŋku ti-Dindaan Diikun!» Ilikiyawuu dū ti-Dindaan gbɔŋkuee ki tīī Safanee ní úǹ kàan̄.

⁹U kàan̄ mimmee ní ki cūtìi ká ubɔti ki bí-u yii: «A-tɔntɔnliibi bisaraaŋaliibi yōoǹ animbil ŋin kā dakaa poon ki sí ti-Dindaan Diikunee ki dūu tīī bin kpèé ti-Dindaan Diiku ŋāŋkitam tuuŋŋee kpilib.»

¹⁰Ní ubɔti gbaŋŋmaliu Safan gíti kútì ki lī yii: «Usaraaŋakpil Ilikiyawuu dū kugbɔŋu nee ki tīī-mi.» Ní Safan kàan̄ kugbɔŋuee ki tīī ubɔti.

¹¹Bi nín kàan̄ tin kā Marab gbɔŋkun ubɔti gbìl̄ee ní u-pɔbil bíil̀ ní u cúú tiwan tin u pēēyee ki dáaĺ ki cátì.

¹²Míǹ boonee ní u yíiń usaraaŋakpil Ilikiyawuu nì Safan jipɔɔn Ayiikaam nì Mikaya jipɔɔn Akibɔɔr nì ugbaŋŋmal Safan nì u-kàliŋkpiliu Asaya ní ki tīī-bi mara yii:

¹³«Ní cùú bàlifì ti-Dindaan man nì Juuda yab kɔkɔ yil pu. Ní bàlifì-u tin di ŋmàn̄ ki kā kugbɔŋu nee poonee pu. Di sá yii ti-Dindaan gíí ti-pu diŋuul ŋkpitim pu. U gíí ti-pu diŋuul kun puee ti-naanjab kaa tɔ́ tin ŋmàn̄ ki kā kugbɔŋu nee pooneeyaaa, kaa ŋá kii tibɔtee nín bí yii bí ŋá puee.»

¹⁴Niinee usaraaŋakpil Ilikiyawuu nì Ayiikaam nì Akibɔɔr nì Safan nì Asaya nín cá Unimbɔti bɔnaatiliu Uulida cee. U-cal di nìn sá Saluum, Tiikifa jipɔɔn, Araasi naantiiu. U nìn kóò Jeerusaleem tincaliiki kipɔŋ poon ní. Úǹ di nìn kpèé bisaraaŋaliibi wampeeŋkaati ti-Dindaan Diikun. Usaraaŋakpil nì u-naacimbi dū tin bée ki máafì-uee,

¹⁵ní u bí-bi yii: «Ti-Dindaan, Isirayeel Nimbɔtiu nín sòon̄ puee sɔ̀. Ní cùú tùkù un túnní-ni m-ceeyee yii:

¹⁶<M làá cáań nnaabu kí tɔ̄ Jeerusaleem tiŋki nì bin kɔkɔ kóò ki-nee pu, kii an nín ŋmàn̄ ki kā kugbɔŋu kun Juuda bɔtiu kàan̄ee poon puee, ti-Dindaan di lī míǹ.

¹⁷Jeerusaleem yab dū-mi ki fá ní ki tūutì talaalub ki tīī awaa ŋin sá bíǹ bi-ba ŋalii pu tuuŋŋee ki gbítì m-ŋuul. An pu ní m gíí kitiŋ nee pu diŋuul ŋkpitim pu, ní m-ŋuulee kpá kí sɔ̀ŋkì!>

¹⁸Ama ní tùkù Juuda bɔtiu un di túnní-ni ní dāan̄ kí bàlifì ti-Dindaanee yii: <Ti-Dindaan, Isirayeel Nimbɔtiu nín sòon̄ puee sɔ̀. A gbìl̄ tibɔti tin kā kugbɔŋu nee poonee, ní

¹⁹tibɔtee gbēē-si. A nín gbìl̄ tin m sòon̄ yii án làá bàń Jeerusaleem nì ki-nib puee, a sīntiǹ a-ba taapu. Tilafuŋman, kitiŋ nee làá kpántí kii kuteeuee, ní kí kpántí kii kitiŋ kin bi tɔ́ mbusuee. A nín gbìl̄ mimmee ní a dáaĺ ki cátì tiwan tin a pēēyee ní ki súń m-nimbiin. An puee ma mun gbìl̄ a-wimmeem. Man ni-Dindaan di lī míǹ.

²⁰Míǹ puee m làá yàntī á kpú kí cùú ŋàl̄ a-baabi nì ŋgbansɔŋfi ní bí síb́-si a-kaakulin. Sii kaa làá ká nnaabu ŋun m làá cáań kí tɔ̄ Jeerusaleem tiŋki puee.>» Ubɔti tuuŋyee gítì ki dū Unimbɔti nín kíí puee ki tùkū-u.