Read Ntcham 2 Rois 24 Bible Online

2 Rois 24 - Ntcham bible

2 Rois 24

¹Ŋyunti ŋun Yooyakiim sá ubɔtee, ní Babiloon bɔtiu Neebukadineesaar dɔ́miń kí já nì Juuda[55] yab. Yooyakiim nìn kíǹ ki bí Neebukadineesaar taapu ki cáa sāā abin ata, ama ní boonee, ki dāa yíkì kaa kíí u-ba pu.

²Niinee ní ti-Dindaan dū Babiloon nì Siirii nì Moowaab nì Amɔn fukuliliibi ki tɔ́ u-pu. Bi nìn nāaǹ Juuda tiŋki ki nóó nì ti-Dindaan nín nìn dī u-tɔntɔnliibi bibɔnaatiliibi pu ki sòon̄ pu ki síiǹee.

³Ti-Dindaan u-ba di nìn cáań nnaabu gbanti ki tɔ́ Juuda yab pu, kun puee u nìn là kí jà-bi kí wàatī u-ba. Tiŋman ubɔti Manasee nìn baasii ŋá ikpiti ní.

⁴U nìn kūū maanyiibab tikpil ki yāntì fatiku gbí Jeerusaleem tiŋki, an puee ti-Dindaan kaa nìn kíí kí dūú pɔ̄[56].

⁵Yooyakiim tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun.

⁶Yooyakiim nìn kpíì ki cūtìi ŋàl̄ u-baabi ní u-jipɔɔn Yooyakiin fōō u-yil ki kpántì ubɔti.

⁷Eejipiti bɔtiu kaa nìn gíti nyēē u-tiŋkin kí cù kujaau, di sá yii Babiloon bɔtiu nìn jáń ki fōō ntimu mun kɔkɔ nìn bí u-taapuee, kí yòon̄ Eejipiti bùmbiki kí cáá sāā Eefiraati mɔɔl.

⁸Yooyakiin nìn cáá abin saalku nì ata ní ki kpántì ubɔti. U nìn kóò Jeerusaleem ní ki jíń dibeel iŋmal ita. Bi nìn yíì u-na yii Neeyuseeta. U-na gbanti nìn sá Eelnatan bisal ní ki nyánní Jeerusaleem.

⁹U nìn ŋá tin kaa kítì ti-Dindaan nimbiinee kii u-baa nín nìn pée ŋá puee ní deedeedee.

¹⁰Ŋyunti gbantee, Babiloon bɔtiu Neebukadineesaar janjaliibi nìn dɔ́miń kí já nì Jeerusaleem yab ní ki māntìi tú-kì.

¹¹Babiloon bɔtiu Neebukadineesaar u-ba nìn dɔ́miń kí já nì kitiŋ kin ní u-janjaliibi nìn māntìi túee.

¹²Niinee Juuda bɔtiu Yooyakiin nì u-na nì u-kpambaliŋ nì u-janjakpilib nì u-kàliŋkpilib nyáń ki túŋkì Babiloon bɔtiu. Neebukadineesaar nín jíń dibeel abin anii poonee ní u cúú-bi ki tɔ́ sarka[57].

¹³Kii ti-Dindaan nín nìn pée sòon̄ pu ki síiǹee, Neebukadineesaar nìn kóoǹ tigaajawan tin kɔkɔ nìn bí ti-Dindaan Diikunee nì tin kɔkɔ bí dibeecindinee. U nìn gbáń ki wīī sindaariya wanti tin kɔkɔ ní Isirayeel bɔtiu Saloomɔn nìn mɔ́ɔ́ ki síiǹ ti-Dindaan Diikunee.

¹⁴U nìn cúú Jeerusaleem yab kɔkɔ ki cáa cūnnì kuyuŋu. U nìn cúú bikpootiliibi kɔkɔ nì bijanjakpilib kɔkɔ, an dàkà yii binib kutukub saalaa. U nìn cúú ki kpáaǹ iŋal pu tɔntɔnliibi nì bicaabi kɔkɔ. Bin nìn pée kíǹ kitiŋinee di nìn sá biwɔfib.

¹⁵U nìn cúú Yooyakiin nì u-na nì u-nimpoobi nì u-janjakpilib nì abɔtibil ki yōoǹ-bi Jeerusaleem ki cūnnì Babiloon kuyuŋu[58].

¹⁶Babiloon bɔtiu nìn gíti cúú bigaajab kɔkɔ binib kutukub biluli nì iŋal pu tɔntɔnliibi nì bicaabi binib kutuku ki cūnnì Babiloon tiŋkin kuyuŋu. Binib gbanti kɔkɔ nìn sá bibaatandambi ní.

¹⁷U nìn dū Yooyakiin baawaai Mataniya ki kāaǹ ubɔti u fōō u-yil, ní ki kpántì u-yindi. Bi nìn kíǹ ki yíì-u yii Seedeesiyasi[59] ní.

¹⁸Seedeesiyasi nìn cáá abin mmuŋku nì diba ní ki kpántì ubɔti ní ki kāl̀ Jeerusaleem ki jíń dibeel abin saalaa nì diba. Bi yíì u-na yii Amutaal, uliibinaja Irimeeya bisal.

¹⁹U nìn ŋá tin kaa kítì ti-Dindaan nimbiinee, kii Yooyakiin nín nìn ŋá puee ní deedeedee.

²⁰Ti-Dindaan nín nìn gíí diŋuul diŋyee puee di nìn yì-tì ní nnaabu gbanti jéetì Jeerusaleem nì Juuda yab pu, áli gba u dāa fātì u-boon ki tīī-bi. Seedeesiyasi nìn yíkì kaa kíí u-ba pu Babiloon bɔtiu cee[60].