Read Ntcham 2 Rois 25 Bible Online

2 Rois 25 - Ntcham bible

2 Rois 25

¹Seedeesiyasi nín jíń dibeel abin awa ŋmasaalaatiu poon iwiin saalaa dalee[61], ní Babiloon bɔtiu Neebukadineesaar nì u-janjaliibi kɔkɔ dɔ́miń kí já nì Jeerusaleem tiŋki. Bi nìn ŋātì bi-janjanaapaal kitiŋ boon ní ki gbìn̄ ataŋkpuku ki bíl̀ ki māntìi tú-kì.

²Bi nìn māntìi tú kitiŋee ki dāa sāā Seedeesiyasi nín jíń dibeelee, abin saalaa nì diba poon.

³Ŋkùm nìn nyāŋkì kitiŋin ní binib kaa nìn gíti cáá tiba kí jī. Uŋmananaati iwiin iwa dalee,

⁴Babiloon yab lùkū dibundi digundi din nìn māntìi tú Jeerusaleem tiŋkee. Kunyeeuee, min kamaa Babiloon janjaliibi māntìi tú-kèe, Juuda janjaliibi dūu dī kipunyɔkɔ kin bi dìŋfī ki cá ubɔti kuŋfaati kpaabun, kì bí agunlɔkɔ ali kansikinee ki sáǹ. Ubɔti Seedeesiyasi nìn kíĺ nsan ŋun cá Jɔɔdan tantakalinee ki nín cá.

⁵Ama Babiloon janjaliibi nìn kùl̄ ki bīiǹ ubɔti boon ní ki jìn̄ ki tin cúú-u Jeeriikoo tantakalin. Niinee ní u-janjaliibi kɔkɔ sáǹ ki yàl̄ ki dū-u ki fá.

⁶Babiloon yab nìn cúú ubɔti ní ki cáá-u ki cūnnì Babiloon bɔtiu cee, Riibila tiŋkin. Niin ní bi sòon̄ u-bɔti.

⁷Bi nìn lāntì Seedeesiyasi jipɔmbi u-nimbilin. Míǹ boonee ní Neebukadineesaar yāntì bi sāā ki cɔ́tì Seedeesiyasi nimbiliŋ aliitil, ní ki yāntì bi dū tasa kusakai ki bóob́-u tiŋan ki cáá-u ki cūnnì Babiloon[62] tiŋkin.

⁸Babiloon bɔtiu Neebukadineesaar nín jíń dibeel dibindi diba kpá mmuŋku, uŋmaŋmooŋmooti winluluútiŋu poonee, ní Neebusaradan kɔ́ Jeerusaleem tiŋkin. U nìn sá Babiloon bɔtiu janjakpiliu ubɔ ní ki nìn sá bijanjaliibi bin cí ubɔtee kpiliu.

⁹U nìn gāā ŋŋmi ki tūū ti-Dindaan Diiku nì ubɔti diiku nì Jeerusaleem tiŋki diiŋŋi, cilinjee bikàliŋkpaambi diiŋŋi kɔkɔ[63].

¹⁰Babiloon yab janjaliibi bin nìn céeǹní ujanjakpilee nìn gbáń ki wīī digundi din bi nìn máń ki tú Jeerusaleem tiŋkee.

¹¹Neebusaradan nìn cúú bin kɔkɔ nìn kíǹ ki gbíntìi bí Jeerusaleem tiŋkinee, an dàkà yii bin nìn sáǹ ki kɔ́ Babiloon yabee nì bin kɔkɔ nìn pée kíǹ ki bí niinee.

¹²Ama u nìn yāntì biwɔfib kansikin biba bíǹ ń nīn bí ki kù fiinyib nì tikpaajin tisatin.

¹³Babiloon yab nìn gbáń ki wīī ti-Dindaan Diiku jaantalkub bin bi nìn dū tasa kúti ki mɔ́ɔ́yee. Bi nìn gbáń ki wīī tɔrɔkub nì kusɔŋkpaaŋŋu kun bi nìn dū tasa kúti ki mɔ́ɔ́ an bí ti-Dindaan Diiku cindinee[64]. Bi nìn yōoǹ kusɔŋu gbanti ki cáa cūnnì Babiloon tiŋkin.

¹⁴Bi nìn gíti yōoǹ ŋfantam kumbɔbiyaamu nì peelab nì njimu nì kɔŋkɔnnyɔkaabi nì tiwan tin kɔkɔ bi nìn pée dū tasa kúti ki mɔ́ɔ́ bi cáa tūǹ ditundi ti-Dindaan Diikunee.

¹⁵Bijanjaliibi bin cīití ubɔtee kpiliu nìn gíti yōoǹ kisambiki kin poon ní bi nìn tùutī talaalubee nì kisambiki kin poon bi ŋáań fatiku ki cáa yàantée. Tiwan gbanti kɔkɔee, sindaariya àá animbil kúti ní bi nìn dūu mɔ́ɔ́-tì.

¹⁶Tasa kúti tin ní Saloomɔn nìn yāntì bi dūu mɔ́ɔ́ jaantalkub liitil nì kusɔŋkpaaŋŋu nì tɔrɔkub ki síiǹ ti-Dindaan Diikunee nyiŋfiŋu kaa nìn cáá bí dūú ŋmàntī.

¹⁷Jaantalkub kamaa fɔkɔŋŋu yilpu nìn sá meetab biwa ní. Bi nìn dū tasa kúti ki mɔ́ɔ́ dikɔl yam, di-fɔkɔŋŋu sá meeta ubɔ nì dijandi ki tɔ́kɔǹ jaantalku kamaa yilpu. Bi nìn dū tasa ki lēē tilaandi yam nì greenaadi biliŋ ki nyɔ̄kɔntì ki māntìi tú-bi. Jaantalkub liitilee nì bi-laanti nìn sá tiwambaantiil ní.

¹⁸Ujanjakpilee nìn cúú usaraaŋakpil Seeraya nì u-taapu yɔu Seefaniya nì bisaraaŋaliibi bin nìn cīití ti-Dindaan Diiku punyɔkɔkee taatil kuyuŋu.

¹⁹U nìn gíti cúú ukàlinjakpaan un nìn kpèé bijanjaliibi bɔtee nì ubɔti saŋkiliibi biŋmoo bin nìn bí kitiŋinee. U nìn gíti cúú ujanjakpil un nìn fòol̄ bijanjaliibi ki gíti sá ugbaŋŋmalee nì Juuda yab binib imuŋku ita kitiŋin niin.

²⁰Bijanjaliibi bin cí ubɔtee kpiliu Neebusaradan nìn yōoǹ bisarkadambi gbanti kɔkɔ ki cáa cūnnì Babiloon bɔtiu cee, Riibila tiŋkin.

²¹Ní Babiloon bɔtiu kūū bi-kɔkɔ Riibila tiŋkin, Amaati tiŋkpaaŋkin. An nín dī pu ní bi cúú Juuda yab kuyuŋu ki jìn̄-bi bi-tiŋki puee dee.

²²Babiloon bɔtiu Neebukadineesaar nìn yāntì binib biba gbíntì Juuda tiŋkin. U nìn lēē Ayiikaam jipɔɔn, Cafan naantiiu Geedaliyasi ki kāaǹ gɔmina ú nīn kpòotī-bi.

²³Ŋyunti ŋun ní Juuda yab janjakpilib nì bi-janjaliibi bin kaa nìn dū bi-ba ki tīī Babiloon yab kí kpántí bi-yumbuuyee nín gbìl̄ yii Babiloon bɔtiu dū Geedaliyasi ki kāaǹ gɔminee ní bi cūtìi ká-u Miisipa. Bijanjakpilib bin nìn cūtèe di sá Neetaniya jipɔɔn Isimaayeel nì Kareeya jipɔɔn Yoowanan nì Taneewumeeti jipɔɔn Seeraya nì Neetoofa nì Yasaniyawuu nì Maaka.

²⁴Geedaliyasi nìn tùkū bi-kɔkɔ yii: «Ní taa fàŋkì Babiloon yab. Nimbi dee, ní kàl̄maan kitiŋ nee poon kí sìntī ni-ba kí tīī Babiloon bɔtiu ní an kɔkɔ ń còom̀ tiŋan kí tīī-ni.»

²⁵Ama dibindi poon ŋmaluluútiu poonee, Neetaniya jipɔɔn, Eeliisama naantiiu Isimaayeel un gíti sá Juuda bɔtiu dicaŋkun ubɔee nì binib saalaa táá ki cūtì Miisipa. Bi bàn̄ee ní ki kūū Geedaliyasi nì Juuda yab nì Babiloon yab bin nìn bí u-ceeyee.

²⁶Niinee kí yòon̄ kibiki kí cáá sāā ukpaan nì bijanjakpilibee kɔkɔ kíĺ nsan ki nín cá Eejipiti, di sá yii bi nìn fāŋkì Babiloon yab[65].

²⁷Bi nín cúú Juuda bɔtiu Yooyakiin ki cūnnì kuyuŋu abin ata kpá imuŋku ilee ní Eefiil Meerodaki kpántì Babiloon bɔtiu. Dibindi din u kpántì ubɔtee iŋmal saalaa nì ili poon iwiin mmuŋku nì iŋmoo dalee ní u nyántì Juuda bɔtiu Yooyakiin sarkan ki tīī-u dibatɔl.

²⁸U nìn sòoǹ nì u kubɔɔtiiu poon ní ki nìn kāaǹ-u mpaan ŋun jítiǹ bibɔtiibi bin kɔkɔ nìn bí u-cee Babiloon tiŋkinee yai.

²⁹U nìn yāntì Yooyakiin kaa ti pèentí disarkabɔkutil. Yooyakiin nì Babiloon bɔtiu di nìn kíǹ ki jīǹ disambibaantiilin baabadal.

³⁰Kí yòon̄ ŋwiin gbanti kí tin sāā Yooyakiin kúm dalee, Babiloon bɔtiu di nìn tìì-u tin u máaǹ kí nīn cáá ki bí dimaŋfalinee.