Read Ntcham 2 Rois 3 Bible Online

2 Rois 3 - Ntcham bible

2 Rois 3

¹Juuda bɔtiu Joosafaati nín kāl̀ dibeel abin saalku nì ata poonee ní Akaab jipɔɔn Jooram kpántì Isirayeel bɔtiu. U nìn kóò Samaarii tiŋkin ní ki jíń dibeel abin saalaa nì ali.

²U nìn ŋá tin kaa kítì ti-Dindaan nimbiinee, ama waa nìn bàn̄ u-baa nì u-na, di sá yii u nìn kpéelikì diwaal Baal taŋkpeeŋi ŋin u-baa nìn cóoǹ bi tòotēe.

³Ama u nìn dū u-ba ki yá ki nákáǹ ikpiti in Neebaati jipɔɔn Jeerooboowaam nìn ŋá ki yāntì Isirayeel yab kɔ́ ikpitinee. Waa nìn fātì u-boon ki tīī-i.

⁴Moowaab bɔtiu Meesaa nìn kpàá tiwaŋkuti ní. Dibintil kamaayee, u nìn pà Isirayeel bɔtiu lampoo apibil kutukub dilaataal nì ipii in cáá tikuti tin bi cáa lù satabee kutukub dilaataal.

⁵Ama ŋyunti ŋun ubɔti Akaab kpíìyee ní Moowaab bɔtiu Meesaa yíkì kaa kíí u-ba pu un fōō Akaab yil ki kpántì Isirayeel bɔtiuee cee.

⁶Niinee ní Jooram yíkì Samaarii tiŋkin ki kàan̄ Isirayeel janjaliibi kɔkɔ.

⁷Míǹ boonee ní u tú binib bí tùkù Juuda bɔtiu Joosafaati yii: «Moowaab yab bɔtiu kaa kíí u-ba pu ki bíi jáà nì mi. Mimmee a kíí kí dāá kūtì m-pu tí já nì u-tiŋkaaa?» Ní Juuda bɔtiu kíí-u yii: «M kíí kí cù, di sá yii man nì si sá unibaanti ní, ní man nib sá a-nib ní man taamui sá a-yai.»

⁸Ama ní Joosafaati gíti kútì ki lī yii: «Nsan ŋulɔŋu pu ní ti làá dī kí cù ní?» Ní Jooram kíiń-u yii: «Ti làá dī Eedoom teeku pu ní kí cù.»

⁹Isirayeel bɔtiu nì Juuda bɔtiu nì Eedoom bɔtiu kíĺ nsan ki nín cá. Bi cōom̀ iwiin ilulee, bijanjaliibi nì tiwaŋkuti tin bí bi-ceeyee kaa ti cáá nnyim kí nyɔ̀.

¹⁰Niinee Isirayeel bɔtiu téeń yii: «Ti kpíì ní! Ti-Dindaan di cáań timbi bibɔtiibi bita nee doo kí dū-ti kí ŋá Moowaab yab ŋaan!»

¹¹Ama ní Joosafaati bālifì yii: «Ti-Dindaan bɔnaatiliu ubɔ kaa bí doo tí dī u-pu kí bàlifì ti-Dindaanaaa?» Ní Isirayeel bɔtiu janjaliu ubɔ bí yii: «Safaati jipɔɔn Eeliisee bí doo, úǹ di nìn tútúǹ Unimbɔti bɔnaatiliu Eelii.»

¹²Ní Joosafaati bí yii: «An yaa sée u làá ŋmā kí tùkù-ti tin ti-Dindaan cáá kí tùkù-tee.» Dicilpu niinee ní Isirayeel bɔtiu nì Juuda bɔtiu nì Eedoom bɔtiu nín cá Eeliisee cee.

¹³Bi bàn̄ee ní Eeliisee bí Isirayeel bɔtiu yii: «Ba di bí man nì sii kansikin ní? Nín̄ cá a-baa nì a-na bɔnaatiliibi cee kí bàlifì-bi.» Ní ubɔti kíí-u yii: «Aayee! Ti-Dindaan di cáań timbi bibɔtiibi bita nee doo kí dū-ti kí ŋá Moowaab yab ŋaan.»

¹⁴Ní Eeliisee bí yii: «Nì ti-Dindaan Mpɔŋkɔdaan un bí dimaŋfalin m nóó-u nee puee, m pūtì yii an yaa kaa bàà sá Juuda bɔtiu Joosafaati pu, maa bàà làá pée fàtīí kpèè-si gba ní kaa nín pílifiǹ-si.

¹⁵Too kɔŋkɔnnee, cáaḿmaan-mi ubeebɔɔl.» Ŋyunti ŋun ní ubeebɔɔlee bíi bɔ̀ɔ́yee ní ti-Dindaan pɔŋŋu kpákatì Eeliisee pu,

¹⁶ní u bí yii: «Ti-Dindaan nín sòon̄ puee sɔ̀ yii: <Ní gbàmaan kibùmbiki kin nyim fóotì nee poon abɔbil án nīn náaǹ.

¹⁷Di sá yii man ni-Dindaan, man di lī yii naa làá wāl̀ kubuŋu, kaa làá wāl̀ utaa mun, ama nnyim làá gbí kibùmbiki nee, ní ni nì ni-janjaliibi nì ni-waŋkuti ń ká kí nyɔ̀.>»

¹⁸Ní Eeliisee nìkī ki lī yii: «Tíǹ kaa sá tiba ti-Dindaan cee. U làá dū Moowaab yab mun kí ŋá ni-ŋaan.

¹⁹Ni làá nàan̄ bi-timmu mun bi máń agun ki túee nì mun sá ŋkpaamuee. Ní gàatì isufi in lòoǹ abilee kɔkɔ, kí gbīŋkì bi-nyimbɔbiliŋ kɔkɔ ní kí tòò ataŋkpee kí gbéeǹ bi-kpaaŋŋi ŋin bi kùn̄ee kɔkɔn kí bīil̀-ŋi.»

²⁰Kutaa wúntì ŋyunti ŋun bi ŋáań kutaafaau saraauee, bi kpēēyee nnyim di pùub̀ ki nyánní Eedoom tiŋkin ki bīiǹ kitiŋ puee.

²¹Ŋyunti ŋun Moowaab yab gbìl̄ yii bibɔtiibee dòoń kí já nì bee ní bi yíiń bin kɔkɔ ŋūǹ kí gbìn̄ gbajabee ní ki cáá-bi ki síiǹ bi-tiŋki kpaanyɔkɔ.

²²Kutaa wúntì kutaafaau Moowaab yab fīntèe, ŋwìiń nyáń nnyim pu. Bi nín ká nnyim gbanti ndanee, mi máǹ kii fatikuee

²³ní bi téeń yii: «Fatiku dee! Báà an ŋá pu, bibɔtiibee nì bi-janjaliibi di gbáń ki kūū tɔb. Kɔŋkɔnnee, Moowaab yab, yīkìmaan tí cùú fūkul̀-bi!»

²⁴Ama ŋyunti ŋun bi sútì ki pìl̄ Isirayeel yab janjanaapaalee ní bíǹ nyáń ki kpìlìń-bi. Niinee Moowaab yab dū itaaci ní Isirayeel yab kùl̄ ki bīiǹ bi-boon áli ki tin kɔ́ bi-tiŋkin ki kūū-bi.

²⁵Bi nìn kpéelikì ntimuee ní báà ŋma tɔ́ tisati tin bi kùn̄ee poon ditaŋkpal ní ataŋkpee dūu gbí tisatee. Bi nìn gbíŋkì anyimbɔbil kɔkɔ ní ki gāatì isufi in lòoǹ abilee kɔkɔ ki fá. An dāa kúntèe, digundi din bi máń ki tú Kiiri-Eereesee baba ní baa gbēē, ama bijanjaliibi bin tòó tijaataafunee nìn māntìi tú-kì kí já nì kì.

²⁶Moowaab bɔtiu nín ká yii kujaau nyīŋfì u-puee ní u yōoǹ bijanjaliibi alaataa aluli, bi-kɔkɔ ŋúb́ bi-tàataajimmu, ki dū bi-ba ki wúliń Eedoom bɔtiu watil pú kí bàà ká nsan kí jītí, ama ní kaa ŋúń.

²⁷Niinee ní u cúú u-jipɔŋkpiliu un bàà làá fōō u-yil kí kpántí ubɔtee ki kūū ki ŋá saraawɔkaa digundi pu. An ŋá mimmee ní Isirayeel yab fāŋkì tikpil ní ki yíkì niin ki nín gítí bi-tiŋkin.