Read Ntcham 2 Rois 4 Bible Online

2 Rois 4 - Ntcham bible

2 Rois 4

¹Unimbɔti bɔnaatiliibi kitil kansikin ubɔ nimpuu dɔ́miń ki ká Eeliisee ki bí-u yii: «Ukpil, sii a-ba nyí yii a-tɔntɔnliu m-cal nìn fàŋkí ti-Dindaan. Kɔŋkɔnnee u kpíì ní ti-pɔnliu dɔ́miń yii u làá yòon̄ m-jipɔmbi liitil kí ŋá u-yumbui kí téeǹ dipɔndi din ti cáá-uee.»

²Ní Eeliisee bí-u yii: «Ba ní a là ḿ ŋá kí tīī-si ní? Tùkù-mi kun ní a cáá an bí a-dumpuee?» Ní u kíí yii: «Man a-tɔntɔnliu kaa pée cáá tiba m-dumpu, an yaa kaa sá ŋkpam min m cáa ŋmìtēe fiiiyee.»

³Ní Eeliisee bí-u yii: «Nín̄ cá a-kɔŋkɔnnaatɔb cee kí càà tilɔn tin poon tiba kpée, á càà an nīn náaǹ.

⁴A yaa ŋá míǹ ki dóòyee sii nì a-jipɔmbi ní kɔ́ kudiin kí dūú pìin̄, ní kí bàtī ŋkpam kí ŋá tilɔnee poon. Kulɔŋŋu kun yaa gbée, á dū-ku kí síiń ku-ba.»

⁵Niinee unimpuee yíkì ki nín kùǹ. U bàn̄ mmɔŋkee ní ki dū dikampiil ki pīiǹ u nì u-jipɔmbi pu. U-jipɔmbee nìn cáá tilɔnee ki nàatī-u ní úǹ bàtī ŋkpam ki sìtī ki gbēentí.

⁶U bíi ŋáań míǹ an bàn̄ ŋyunti ŋubɔee ní u bí u-jipɔmbi kansikin ubɔ yii: «Dū kulɔŋŋu kubɔ mun kí nàatīń-mi!» Ní úǹ kíí-u yii: «Tilɔn kaa ti bí.» Niinee ŋkpamee gúń kaa tí bíi còol̀.

⁷Ní unimpuee cūtìi máafì Unimbɔti bɔnaatiliu tin jítèe ní úǹ bí-u yii: «Nín̄ cá kí dū ŋkpamee kí nyāfì kí lēē kí pà a-pɔndi. A-nimbil ŋin yaa kíǹee, á dūú kpíiǹ sii nì a-jipɔmbi.»

⁸Dalba muee, Eeliisee yíkì ki cūtì Suneem[5]. Upíja ubɔ nìn bí niin ki páb́-u yii ú dāan̄ u-dumpu kí jī tijin. Kí yòon̄ ŋwiin gbantee, Eeliisee yaa ti pée jītí kitimbilii gbantinee, u nìn pàatī u-cee ní ki jīǹ tijin.

⁹An bée ní unimpuee dāa tùkū u-cal yii: «M dáań ki béè yii kijapaai kin pée dòoń ti-cee doo nee sá Unimbɔti circir niliu ní.

¹⁰Míǹ puee yàntī tí mā kidibiki kí tɔ́kɔń bi nín bɔ̀b̄ kudii puee yilpu[6], ní kí nyàab̀ kilambaŋ nì teebil nì dijal nì fitila kí síiń ki-poon. U yaa ti dɔ́miń ti-ceeyee, ú dòon̄ niin.»

¹¹Dalbee Eeliisee tí dɔ́miń binibee cee ní ki nín kóò kidibikee ni kí dòon̄.

¹²Niinee ní u bí u-tɔntɔnliu Geeyaasii yii: «Yíiń-mi usuneennimpu nee yaa!» U yíiń-uee ní úǹ dɔ́miń ki síl̀ u-nimbiin.

¹³Ní Eeliisee bí u-tɔntɔnliu yii: «Tùkù-u yii: <A tīī a-ba digìńdi ki ŋá tin bí nee kɔkɔ ki tīī-ti. Ba ní ti ŋūǹ kí ŋá kí tīī-si ní? A là tí sòoǹ a-pu ubɔti nì ujanjakpil ceeee?» Ní unimpuee kíí yii: «Aayee! Man nì m-yab pée bí nì ŋgbansɔŋfi ní.»

¹⁴Ní Eeliisee bí Geeyaasii yii: «Ba ní ti ŋūǹ kí ŋá kí tīī-u ní?» Ní Geeyaasii kíí yii: «Toooo! Waa cáá kibiki ní u-cal mun púĺ.»

¹⁵Ní Eeliisee bí yii: «Fàtīí yíiń-u.» U yíiń unimpuee ní u dɔ́miń ki síl̀ kipunyɔkɔpu.

¹⁶Ní Eeliisee bí-u yii: «Jiil naŋkɔnampuee, a làá dāá nīn ŋúb́ kibiki.» Ní unimpuee téeń yii: «Aayee, m-dindaan, Unimbɔti niliu, taa mɔ̄ntì man a-tɔntɔnliu.»

¹⁷Ama unimpuee dūu cáá dipool ní dibindi tú deedeeyee, u dūu màl̄ kibininjabiki, kii Eeliisee nín nìn tùkū-u puee.

¹⁸Kibikee nìn cíkitì. Dalbee, u-baa bí bijincaliibi cee ki tūǹ ditundi ní kibikee nín cá u-cee.

¹⁹Dicilpuee ní u kíĺ ki bíi kūuntí ki lì yii: «M-baa! M-yil! M-yil!» Ní ubaati bí u-tɔntɔnliu ubɔ yii: «Yòon̄-kì kí lìb̄ kí cáá tīī ki-na!»

²⁰Ní utɔntɔnlee yōoǹ kibikee ki lìb̄ ki cáa tīī ki-na. Unimpuee yōoǹ u-biki ki làl̄, ama kuwiŋkuluu nyɔkɔmee ní kì sīntì.

²¹Niinee ní unimpuee yōoǹ kibikee ki jɔ́m̀ Unimbɔti tɔntɔnliu Eeliisee diikun ní ki dū-kì ki bíl̀ u-lambaŋki pu. U ŋá mimmee ní ki nyáń ki dū kudii ki pīiǹ.

²²Míǹ boonee ní u yíiń u-cal ní ki bí-u yii: «Cáań-mi utɔntɔnli ubɔ nì kimansalii kiba. M làá sāǹ kí cù Unimbɔti bɔnaatiliu cee kí gítiń.»

²³Ní u-cal bālifì-u yii: «Ba ŋá ní a là kí cùú ká-u díǹ? Díǹ kaa sá uŋmapɔɔn kaa tí sá ŋwiŋŋuŋfikaa mun.» Ní u kíí u-cal yii: «Taa fàŋkì, tiba kpá!»

²⁴U lī mimmee ní ki kpàl̄ kimansaliiyee ní ki bí u-tɔntɔnliuee yii: «Tí nīn cá, nín̄ dàtī kimansalii kí taa sīĺ nsanni, see m yaa bí-si yii á sīĺ baba.»

²⁵U yíkèe ní ki nín cá Eeliisee cee Kaarmeel jool pu. Ŋyunti ŋun Eeliisee ká-u ndanee ní u bí u-tɔntɔnliu Geeyaasii yii: «Kpèè usuneennimpuee!

²⁶Sāǹ kí tūŋkì-u kí bàlifì-u yii: <A pɔ̄ɔ̄ mana? A-cal ní? A-biki pɔ̄ɔ̄ tiŋanaaa?» Geeyaasii bālifì-u mimmee ní u kíí-u yii: «Tikɔkɔ pée còom̄ tiŋan ní!»

²⁷Ama ŋyunti ŋun u bàn̄ Eeliisee cee dijool puee ní u tātìi gbāaǹ u-nimbiin ki cúú u-taal. Geeyaasii bàà sútì ki pìl̄-u kí téé-u, ama ní Eeliisee bí-u yii: «Yàntī-u, di sá yii u bí kunimbaaun ní maa nyí kun yì-tèe. Unimbɔti kaa lēē-tì ki dàkā-mi.»

²⁸Ní unimpuee bí yii: «Man nìn bālifì sii m-dindaan yii á tīī-mi kibikaaa? Maa nìn tùkū-si yii: <Á taa tīī-mi dimákakulindaaa?>»

²⁹Ní Eeliisee bí Geeyaasii yii: «Bɔ́ntí a-ba kí yòon̄ m-kpandɔŋu kí tàb̄ kí nīn cá! A yaa tú ubɔ nsanni, á taa jāam̀-u. A yaa bàn̄ee, á dū m-kpandɔŋu kí páań kibikee nimbiin.»

³⁰Ama ní kibikee na bí Eeliisee yii: «Nì ti-Dindaan un bí dimaŋfalin nee nì sii a-ba maŋfal puee, m pūtì yii m kpá kí yàntī-si!» Niinee ní Eeliisee yíkì ki páaǹ u-boon.

³¹Geeyaasii nìn péeǹ-bi ki bàn̄. U dū ŋkpandɔee ki páaǹ kibikee nimbiin, ama waa nìn gbìl̄ kibikee neen puɔɔɔ, kaa ká yii kì cīŋkì ki-ba mun. Niinee ní Geeyaasii fātìi nín gítí Eeliisee cee ki bí-u yii: «Kibikee kaa fīntì.»

³²Eeliisee dūu bàn̄ dicindee, kibikee di kpíì ki dɔ̄ u-lambaŋki puee.

³³Eeliisee kɔ́ kudiinee ní ki dūu pīiǹ ní ki kíĺ ki bíi mèé ti-Dindaan.

³⁴U mēē ki dóòyee ní ki dōoǹ kibikee pu ní ki dū u-nyɔkɔ ki tūū ki-nyɔkɔ, ní ki dū u-nimbiliŋ ki tūū ki-nimbiliŋ ní ki dū u-ŋalii ki páaǹ ki-ŋalii pu. U dɔ̄ kibikee pu mimmee ní ki-wunti píĺ.

³⁵Eeliisee yíkì kibikee pu ní ki bíi còom̄ ki pùntī kudiin, ní ki fātìi gítìń ki dōoǹ ki-pu. Niinee kibikee cíiǹ ŋfunyɔm miluli pu ní ki cúú ki-nimbiliŋ ki ŋúbitì.

³⁶Eeliisee yíiń Geeyaasii ní ki bí-u yii: «Yíiń-mi usuneennimpuee yaa!» Geeyaasii cūtìi yíiń-u u bāańee ní Eeliisee bí-u yii: «Yòon̄ a-jipɔɔn!»

³⁷Ní unimpuee gbāaǹ Eeliisee taaŋi taapu u-yigbeel tūū kitiŋ. U ŋá míǹ ki dóòyee ní ki yíkìi yōoǹ u-biki ki nín nyēē.

³⁸Tíǹ jítì boonee ní Eeliisee nín gítiń Giilgaal. Ŋkùm nìn bí kitiŋee pu. Unimbɔti bɔnaatiliibi kitil nìn kóoǹ ki kpáfì u-cee ní u bí u-tɔntɔnliu yii: «Dū daanseekpaan kí tɔ́kɔń kí ŋàan̄-ti tikun.»

³⁹Niinee ní bibɔnaatiliibee kansikin ubɔ nín cá kusaaun kí nyàabìń tikuŋfaal. U bàn̄ee ki ká kumooun fiinyi subu lòon̄ abil ní u kītì ki gbéeǹ u-wampeeŋkaatin. U fātìi bāańee ní ki càkā ki ŋá daanseeyee poon, di sá yii baa nìn nyí kun ní an sée.

⁴⁰Bi tɔ́kɔǹ an bīńee ní bi lēē ki ŋá binib bin bí niinee. Ama ŋyunti ŋun ní bi dákée ní bi kíĺ ki bíi gbáà ibiil ki lì yii: «Unimbɔti bɔnaatiliu, ŋkúm bí daansee poon!» Baa nìn ŋúń ki jíń tijinee.

⁴¹Niinee ní Eeliisee bí yii: «Cáaḿmaan ŋyim!» Bi cáańee ní u dūu ŋá daanseeyee poon ní ki bí yii: «Lēē kí ŋá binib bí jī!» Tijin tin nìn kā daanseeyee poonee nìn ŋáŋkì bi kíǹ ki ŋūǹ kí jī-tì.

⁴²Uninja ubɔ nìn nyánní Baal-Saliisa ki cáań u-jincɔ̀fikaati kpɔnɔb ki tīī Unimbɔti bɔnaatiliu. U nìn dū ɔɔji nì bileepɔɔn yim ní ki ŋá kpɔnɔb mmuŋku nì tijimpin tin u dáá cáńee kutuku ubɔ. Ní Eeliisee bí u-tɔntɔnliu yii: «Dū tijinee kí yàkatī kí tīī binib bí jī!»

⁴³Ama ní u-tɔntɔnliu kíí-u yii: «Mana ní m ŋūǹ kí dū tijinee kí yàkatī kí tīī binib dilaataal?» Ní Eeliisee bí-u yii: «Sii dee, dūú yàkatī kí tīī-bi bí jī, di sá yii ti-Dindaan nín sòon̄ puee sɔ̀: <Báà ŋma làá jī kí díkí an kíń gba.>»

⁴⁴Niinee ní utɔntɔnlee dū kpɔnɔbee ki yākatì ki tīī binibee. Bi nìn ŋmɔ́ an kíǹ kii ti-Dindaan nín nìn sòon̄ puee.