Read Ntcham 2 Rois 5 Bible Online

2 Rois 5 - Ntcham bible

2 Rois 5

¹Siirii tiŋki bɔtiu janjakpiliu ní bi yíì Naama. U-kpiliu nìn pàkà-u ki dàkà-u kulaŋŋaŋfitiiu. Di sá yii u-pu ní ti-Dindaan nìn dī ki tīī Aram yab dijajil. Ama ubaatandaan nì ujanjakpaan gbantee nìn sá unyaŋgbanti.

²Siirii yab janjaliibi biba nìn nyáń ki kɔ́ Isirayeel tiŋkin ki fúkúl̀ bi-wanti ní ki kpáàa cúuń kisapɔmbiki kiba uyumbu. Kì nìn bí Naama nimpuu cee ní ki tūǹ-u ditundi.

³Dalbee ní kì bí ki-kpiliu yii: «Áà, m-kpiliu cal yaa bàà ŋūǹ kí cù kí ká Unimbɔti bɔnaatiliu un bí Samaarii tiŋkinee! Úǹ bàà làá cáaǹ-u u-nyaŋgbandi nee.»

⁴Niinee ní Naama cūtì u-kpiliu ubɔti cee ki dū tin kisirayeelsapɔmbikee tùkū-uee ki máafì-u.

⁵Ní ubɔti bí yii: «Bɔ́ntí a-ba kí nīn cá, m làá tīī-si kugbɔŋu á cáá tīī Isirayeel bɔtiu.» Niinee Naama yōoǹ animbil kiiloobi alaataa ata nì sindaariya kiiloobi imuŋku ita nì jiŋaal bɔkutiŋ saalaa ki kíĺ nsan ki nín cá.

⁶U bàn̄ee ní ki dū kugbɔŋuee ki tīī Isirayeel bɔtiu. Kugbɔŋuee poonee, bi nìn ŋmàn̄ yii: «Man di túnní m-janjakpiliu Naama un ŋúb́ kugbɔŋu nee yii á cáaǹ-u u-nyaŋgbandi.»

⁷Ubɔti nín pée kàan̄ kugbɔŋu ki dóòyee ní ki cúú tiwan tin u pēēyee ki cátì ní ki bí yii: «M sá Unimbɔtaaa? M cáá mpɔn kí kpɔ̀ unil àá kí yàntī unil ń nīn bí dimaŋfalinaaa? Kin ba pu ní Siirii bɔtiu dū ubɔ ki túnní m-cee ḿ cáaǹ-u dinyaŋgbandi? Ni káa, u bíi tákà-mi tibɔti ní!»

⁸Unimbɔti bɔnaatiliu Eeliisee nín gbìl̄ yii Isirayeel bɔtiu dáaĺ tiwan tin u pēēyee ki cátèe, ní u tú bí tùkù-u yii: «Ba pu ní a dáaĺ ki cátì tiwan tin a pēēyee? Yàntī Naama ń dāan̄ m-cee, u làá béé yii Unimbɔti bɔnaatiliu ubɔ bí Isirayeel tiŋkin.»

⁹Niinee Naama jɔ́m̀ ki kāl̀ u-tɔrɔkuu un u-taamui dátée poon, ki nín cá ki cūtìi síl̀ Eeliisee diiku nyɔkɔpu.

¹⁰Eeliisee nìn tú ubɔ ú tùkù-u yii: «Cù Jɔɔdan buŋŋun kí múĺ ŋfunyɔm miluli pu. A yaa ŋá míǹ, a làá pɔ̄ɔkì ní a-wunti ń ŋāŋkì.»

¹¹Naama gbìl̄ mimmee ní ki gíí diŋuul ki nín cá ki lī yii: «Man bàà dàkafī yii u làá nyānní kí sīĺ m-nimbiin kí mèè ti-Dindaan u-Nimbɔtiu, ní kí dū u-ŋal kí càab̀ m-wunti laakin dinyaŋgbandi tɔ́ee ní kí cáaǹ-mi.

¹²Damaasi buŋyi Albana nì Paarpaar kaa jítiǹ ibun in kɔkɔ bí Isirayeel tiŋkineeee? Maa bàà ŋūǹ kí múĺ íǹ poon m-wunti ń ŋāŋkàaa?» U lī mimmee ní ki fātì kí nīn kùǹ nì diŋuul.

¹³Ama ní u-tɔntɔnliibi sútì ki pìl̄-u ní ki bí-u yii: «Ukpil! Unimbɔti bɔnaatiliu nee yaa bàà bí-si yii á ŋá tiba tin pɔ̄ɔ̄yee, aa bàà làá ŋáaa? Kin ŋma nín kàlaasì u nín bí-si yii: <Cùú dū a-ba kí múĺ nnyimin a-wunti ń ŋāŋkì na!>»

¹⁴Niinee Naama nín sìntī Jɔɔdan buŋŋun ki múĺ nnyimin ŋfunyɔm miluli pu kii Eeliisee nín bí yii ú ŋá puee, ní u-wunti ŋáŋkì kii kibiki wunti nín bí puee[7].

¹⁵Dicilpu niinee ní u nì u-naacimbi nín gítí Unimbɔti bɔnaatiliu cee. U bàn̄ee ní ki kɔ́ ki síl̀ u-nimbiin ní ki bí-u yii: «Kɔŋkɔnnee ní m nín béè yii Unimbɔti ubɔ kaa ti bí kitiŋ pu laaba an yaa kaa sá Isirayeel tiŋkin. M gbàam̄-si, fōō tiwampɔkaal tin man a-tɔntɔnliu cáań-si nee.»

¹⁶Ama ní Eeliisee kíí yii: «Nì ti-Dindaan un bí dimaŋfalin m sá u-tɔntɔnliu nee yindi puee, m pūtì yii m kpá kí fōō tiba.» Naama pée páb́-u yii ú fōō, ama ní Eeliisee yíì.

¹⁷Naama bí yii: «Kii a nín yíì kaa fōō m-wampɔkaatee, pɔ̄-mi nsan ḿ yáfí a-tiŋki pu tam kí túń imamboon ili. Di sá yii man a-tɔntɔnliu kaa ti làá ŋá saraawɔkaa àá saraa ubɔ fám kí tīī awaa, see ti-Dindaan baba.

¹⁸Ama m mèé yii ti-Dindaan ń dū tin bí nee kí pɔ̄-mi. Di sá yii m-kpiliu Siirii bɔtiu yaa kɔ́ u-waal Riimɔn diikun ki gbāaǹ kí jāam̀-dì ní ma mun gbāaǹee, an sá yii m-ŋaliŋu pu ní u nyìitī. M yaa gbāā diwaal Riimɔn diikun mimmee, ti-Dindaan ń dūú pɔ̄ man a-tɔntɔnliu an pu.»

¹⁹Ní Eeliisee kíí-u yii: «Nín̄ cá nì ŋgbansɔŋfi.» Ní Naama nín cá. Naama búntì kaa láá kɔ́ ndan

²⁰ní Eeliisee tɔntɔnliu Geeyaasii lī u-neen yii: «M-kpiliu ŋá u-ba kaa fōō tin usiiriija Naama cáań kí pɔ̄-uee tiba. Nì ti-Dindaan un bí dimaŋfalin nee yindi puee, m làá sāǹ kí páań u-boon kí fōoń tiba u-cee!»

²¹Ní Geeyaasii kùl̄ ki bīiǹ Naama boon. Naama nín ká-u u sáń ki dòoń u-ceeyee ní u kpákatì u-tɔrɔkuu pu malaa ki túŋkì-u ní ki bālifì-u yii: «Ba ŋá?»

²²Ní Geeyaasii kíí-u yii: «Tiba kaa ŋá. M-kpiliu di túnní-mi ḿ tùkù-si yii: <A nín pée búntì kpalaayee ní Unimbɔti bɔnaatiliibi kitil poon binib bili nyánní Eefiraayiim jooŋŋi pu ki bāań m-cee. An puee m gbàam̄-si, tīī-mi animbil kúti kiiloobi mmuŋku nì saalaa nì jiŋaal bɔkutiŋ ali.>»

²³Ní Naama bí-u yii: «Yòon̄ animbil kúti kiiloobi imuŋku ita.» U pée páb́-u míǹ ní ki dū animbil kúti kiiloobi imuŋku ita nì tiwampeeŋkaal tili ki ŋá kutukub bili poon ki kúĺ ki dūu túǹ u-tɔntɔnliibi bili bí túń kí cáá céeǹ Geeyaasii.

²⁴Bi bàn̄ Oofeelee ní Geeyaasii fōō kutukubee ki dūu bíl̀ u-cee ní ki bí Naama tɔntɔnliibee yii bí nīn gítí, ní bíǹ nín cá.

²⁵Míǹ boonee ní Geeyaasii nín kóò u-kpiliu Eeliisee cee ní úǹ bālifì-u yii: «Geeyaasii, a nyánní la ní?» Ní u kíí yii: «Man a-tɔntɔnliu kaa pée cūtì laabaa!»

²⁶Ama ní Eeliisee bí-u yii: «A nyí yii maa bí a-cee ŋfamin ŋyunti ŋun uninja ubɔ kpákatì malaa u-tɔrɔkuu pu ki túŋkìń-see niin? Mimmee ŋyunti ŋun an sá á fōō animbil kúti nì tiwampeeŋkaal nì ɔliifi nì fiinyi nì ipii nì iŋoobu nì inaa nì bitɔntɔnliibi bininjab nì binimpoobee deeee?

²⁷Too Naama nyaŋgbandi làá gítí sii nì a-naantiibi pu ní kí nīn cá jaanjaan!» Geeyaasii nyáń Eeliisee ceeyee, dinyaŋgbandi píń u-wunti pu ki pīiǹ kii ntaayimee.