Read Ntcham 2 Rois 6 Bible Online

2 Rois 6 - Ntcham bible

2 Rois 6

¹Dalbee Unimbɔti bɔnaatiliibi kitil bí bi-kpiliu Eeliisee yii: «Kudii kun poon ti nì si kpáfí nee kaa wāā ki bàn̄-ti.

²An puee á pɔ̄-ti nsan tí cù Jɔɔdan buŋgbandi kí gāań idɔ kí cáań kí mā ti-kpafidiiku.» Ní Eeliisee kíí-bi yii: «Nín̄ cámaan!»

³Ní bibɔnaatiliibee kansikin ubɔ bí yii: «Ti gbàam̄-si ní ukpil, pée kíí kí céeǹ timbi a-tɔntɔnliibaa!» Ní Eeliisee kíí yii: «Too, m làá cù.»

⁴U lī mimmee ní ki yíkì ki táá-bi. Bi bàn̄ Jɔɔdan buŋgbandee ní ki gāā isufi.

⁵Ŋyunti ŋun bi bíi gà isufee ní bi-kansikin ubɔ cɔkɔbiim cúu báatì ki tɔ́ nnyimin, ní u fáá mbiil yii: «M-bɔlii na! M-dindaan, m mēeń-kì ní!»

⁶Ní Eeliisee bālifì-u yii: «La pú ní ncɔkɔbiimee tɔ́ ní?» Ní kijapaayee dàkā-u laakin pú ní mi tɔ́ee. Niinee Eeliisee gāā didɔgindi ki dūu tɔ́ nnyimin laakin ncɔkɔbiimee tɔ́ee. Dicilpu niin ní ncɔkɔbiimee yíkì dēeǹ nnyim pu.

⁷Ní Eeliisee bí-u yii: «Dèetīń-mì!» Ní kijapaayee dēetìń-mì.

⁸Siirii bɔtiu nìn bí ki jáà nì Isirayeel yab. U nì u-janjakpilib yaa nìn kpáfì ki lī yii: «M-janjaliibi làá cùú gāā dijanjannaapaal dooyee»,

⁹ní Eeliisee ń tɔ̄ bí cùú tùkù Isirayeel bɔtiu yii: «Á nīn nyí kí taa dī mpaan nee pu, di sá yii Siirii yab janjaliibi bí niin»,

¹⁰ní Isirayeel bɔtiu ń lēē bijanjaliibi kí tɔ̄ bí cù kí nīn cɔ́ŋkí niin. An nìn ŋá míǹ ŋfunyɔm kupaau. U nìn pée tùkù ubɔti tin bée ní úǹ bɔ́ntí u-ba.

¹¹An ŋá mimmee ní Siirii bɔtiu kaa ti nyí tin poon u bée, ní u yíiń u-janjakpilib ní ki bí-bi yii: «Ni-kansikin ubɔ bí Isirayeel bɔtiu jandi pú. Ní tùkùmaan-mi un ní an sée.»

¹²Ní u-janjakpilib kansikin ubɔ bí yii: «Ti-baa ubɔti, ubɔ kaa bí ki nyēē a-boon! Ama an sá Unimbɔti bɔnaatiliu Eeliisee un bí Isirayeel tiŋkinee di ŋáań míǹ. Báà tin ní a yaa sòon̄ a-didooŋkaaku poonee, u ŋūǹ kí béé-tì kí dūú tùkù Isirayeel bɔtiu.»

¹³Niinee Siirii bɔtiu bí yii: «Ní cùú nyàab̀ kí béémaan laakin u bée ḿ ŋma kí tɔ̄ binib bí cùú cúuń-u!» Ní bi tùkū-u yii Eeliisee bí Dootan.

¹⁴Niinee ubɔti dū dijanjakitikpaandi nì itaamu nì janjatɔrɔkub ki tú kunyeeuee bi cūtìi māntìi tú kitiŋ kin poon Eeliisee kóòyee.

¹⁵Kutaa wúntì kutaafaau pɔ̀lpɔlee Eeliisee tɔntɔnliu péé ki yíkì ki nyáń kitiŋinee ki ká dijanjakitikpaandi nì itaamu nì janjatɔrɔkub māntìi tú kitiŋ. Ní u bí Eeliisee yii: «Ukpil, ti kpíì ní! Ti làá nín ŋá mana dee?»

¹⁶Ní Eeliisee kíí-u yii: «Taa pée fàŋkì! Bin bí ti-ceeyee wīikíǹ bin bí bíǹ ceeyee.»

¹⁷Eeliisee lī mimmee ní ki mēē yii: «Ti-Dindaan, ŋúbití u-nimbiliŋ ú wāl̀!» Ti-Dindaan cúú utɔntɔnlee nimbiliŋ ki ŋúbitèe ní u wál̀ itaamu nì janjatɔrɔkub bin sá ŋŋmee gbí dijool pu ki māntìi tú Eeliisee.

¹⁸Siirii janjaliibee nìn bíi còom̄ ki cá Eeliisee cee ní úǹ mēē ti-Dindaan yii: «Yàntī bijanjaliibi nee kɔkɔ ń kpántí bijɔfub!» Ní ti-Dindaan lafun yāntì bi kpántì bijɔfub kii Eeliisee nín mēē puee.

¹⁹Niinee Eeliisee bí-bi yii: «Ni yīntì nsan, kitiŋ kin poon ni cée kaa sɔ̀. Páaḿmaan m-boon ḿ cáá-ni kí cùnnì unil un ni nyàab̀ee cee.» Ama Eeliisee yōoǹ-bee ní ki cáá-bi ki cūnnì Samaarii tiŋkin.

²⁰Ŋyunti ŋun bi bàn̄ Samaariiyee ní Eeliisee mēē yii: «Ti-Dindaan ŋúbití binib nee nimbiliŋ bí wāl̀!» Ti-Dindaan ŋúbitì bi-nimbiliŋee ní bi ká yii bi bí Samaarii tiŋki poon táb.

²¹Isirayeel bɔtiu nín ká-bee ní u bālifì Eeliisee yii: «M-baa, ḿ kpɔ̀-baaa?»

²²Ní Eeliisee kíí-u yii: «Taa kpɔ̀-bi! Mimmee a yaa cūtì kujaau ní ki cúuń binib bi kpántì a-yumbuuyee, a kù-bi níii? Tīī-bi tijin bí jī kí tīī-bi nnyim bí nyɔ̀ ní kí yàntī bí nīn gítí bi-kpiliu cee.»

²³Niinee Isirayeel bɔtiu ŋá-bi tican ní bi jíń ki nyùn̄. Bi jíń ki nyùn̄ míǹ ki dóòyee ní u yāntì bi nín gítí bi-kpiliu cee. Kí yòon̄ yaadal wiiŋŋuee, Siirii yab bin dòoń ki fúkuĺ binib Isirayeel tiŋkinee kaa ti pée dɔ́miń.

²⁴Ŋyunti ŋubɔ boonee Siirii bɔtiu Been-Adaadi kóoǹ u-janjakitiŋ kɔkɔ ki kpáfì ní ki cūtìi māntìi tú Samaarii tiŋki kí já nì kì.

²⁵An ŋá mimmee ní ŋkùm dūu nyáń Samaarii tiŋkin. Bin nìn māntìi tú kitiŋee nìn cí-kì tiŋan, an puee bi nìn kíǹ ki dāā kimaŋ yil animbil kúti jitɔmbi imuŋku inaa ní ki dāā atùun disambijandi animbil kúti jitɔmbi biŋmoo.

²⁶Dalbee Isirayeel bɔtiu tɔ́kɔ́ digundi din bi máń ki māntìi tú kitiŋee pu ki jītí ní unimpu ubɔ téeń ki yíiń-u ní ki bí yii: «Ti-baa ubɔti, dāá fīī-mi!»

²⁷Ama ní ubɔti kíí-u yii: «Ti-Dindaan yaa kaa fīī-si, man làá ŋá mana ní kí fīī-si! Tijin kaa ti báaa, ndamam mun kaa ti bí.»

²⁸Ubɔti gíti nìkī ki bí-u yii: «Ba ní a là ní?» Ní unimpuee kíí-u yii: «A ká unimpu nee yaa! Yaadalee u dɔ́miń ki ká-mi ní ki bí-mi yii: <Yàntī tí ŋmɔ́ a-biki díǹ, foolee tí fu ŋmɔ́ man yaka.>

²⁹Niinee ní ti cúú m-biki ki kūū ki tɔ́kɔǹ ní ti ŋmɔ́[8]. Kutaa wúntèe ní m bí-u yii: <Cáań a-biki tí ŋmɔ́>, ama ní úǹ yōoǹ u-biki kí cáa bál̀.»

³⁰Ubɔti nín gbìl̄ unimpuee nín sòon̄ puee ní u cúú u-wanti tin u pēēyee ki dáaĺ ki cátì. Ubɔti còom̄ digundi pu ki jītée ní binib ká yii u dū kutuku ki ŋá poon bɔkutil ki pēeǹ[9].

³¹Ní ubɔti bí yii: «Díǹ nee, m yaa kaa lēē Safaati jipɔɔn Eeliisee yil, Unimbɔti ń dáaĺ m-tafal kí gíti kūtì!»

³²Eeliisee nìn kā u-dumpu ní bitindaŋkpilib kā ki kɔ́ĺ-u. Ubɔti nìn dū ubɔ ki tú u-cee. Ama udaan kaa láá bāań u-cee ní Eeliisee bí bikpilibee yii: «Ni káa! Unikpɔl nee túnní ubɔ ú dāá lēē m-yil. Udaan yaa láa bāańee, ní dū kudii kí kpàl̄ kí taa pɔ̄-u nsan. Pīlifìmaan, m gbìl̀ u-kpiliu pu u pánní u-boon ki dòoń.»

³³Eeliisee nìn dáá bíi sòoǹ u-nyɔkɔ kaa láá ŋmíl̀ ní ubɔti tuuŋŋuee dūu bāań u-cee ki bí-u yii: «Ti-Dindaan di yāntì digìńdi nee bāań-ti! Ba ní m gíti ŋūǹ kí nīn kā ki cí ú ŋá kí tīī-mi?»