Read Ntcham 2 Rois 8 Bible Online

2 Rois 8 - Ntcham bible

2 Rois 8

¹Dalbee ní Eeliisee sòon̄ nì unimpu un biki u nìn fīkitèe[10] ki bí-u yii: «Yīkì doo, sii nì a-dicaŋku kí nīn cá laakin ni yaa ŋūǹee kí kàl̄. Di sá yii ti-Dindaan bɔ́ntì kí cáań ŋkùm Isirayeel tiŋki pu. Án kaa ti làá yúntí ŋkùmee làá kíĺ ní kí ŋá abin aluli.»

²Ní Unimpuee yíkì ki ŋá kii Unimbɔti bɔnaatiliu nín bí-u yii ú ŋá puee. U nì u-dicaŋku kɔkɔ nìn yíkì ní ki cūtìi kāl̀ Fiiliistii yab tiŋkin ki ŋá abin aluli.

³Abin aluli boonee ní unimpuee nyánní Fiiliistii yab tiŋkin ki fātìi gítìń. U bāańee ní ki cūtìi ká ubɔti ní ki mēē-u yii ú fōō u-diiku nì u-kpaatanti kí tīī-u.

⁴Ŋyunti gbantee, ubɔti nì Eeliisee tɔntɔnliu Geeyaasii di nìn bíi sòoǹ. Ubɔti nìn bí-u yii: «Māafì-mi atuŋkpaan ŋin kɔkɔ ní Eeliisee ŋáaǹee!»

⁵Geeyaasii nìn bíi máafí ubɔti Eeliisee nín fīkitì utaŋkpiil ubɔ puee, kpalaayee unimpu un biki Eeliisee nìn fīkitèe dūu kɔ́ní ubɔti cee kí gbàam̀-u ú fōō u-diiku nì u-kpaatanti kí tīī-u. Niinee Geeyaasii téeń yii: «Ti-baa ubɔti, kpèè unimpu un jipɔɔn Eeliisee nìn fīkitèe nì u-jipɔɔnee sɔ̀!»

⁶Ubɔti nìn bālifì unimpuee ní úǹ dū tibɔtee ki máafì-u. Niinee ní ubɔti dū unimpuee bɔti ki ŋá u-janjakpiliu ubɔ ŋaan ki lī yii: «M là yii bí fàtīí gíiǹ u-wanti kɔkɔ kí tīī-u, ní kí pà-u bi nín túń ditundi u-kpaatanti pu ki ká ipaati iŋyee kɔkɔ kí yòon̄ daliŋkin u yíkèe kí dāá sāā díǹ nee.»

⁷Dalbee Eeliisee yíkì ki nín cá Damaasi tiŋkin. Ŋyunti gbantee Siirii bɔtiu Been-Adaadi būǹ. Ní bi tùkū-u yii: «Unimbɔti bɔnaatiliu dɔ́miń doo.»

⁸Ní ubɔti bí Asayeel[11] yii: «Nyàab̀ tiwampɔkaal kí cáá pɔ̄ Unimbɔti bɔnaatiliu Eeliisee kí kpáàa gbàam̀-u ú bàlifì ti-Dindaan kí kpèè yii m làá ká dicáaǹdaaa, maa làá ká.»

⁹Ní Asayeel yíkì ki nín cá ki cūtìi ká Eeliisee. U nìn yōoǹ tiwammɔntiil tin bí Damaasi tiŋkinee ki túǹ igutaamu imuŋku ili kí cáá pɔ̄ Eeliisee. U bàn̄ ki síl̀ Eeliisee nimbiinee ní ki bí-u yii: «A-tɔntɔnliu Siirii bɔtiu Been-Adaadi di túnní-mi a-cee ḿ bàlifì-si yii u làá pɔ̄ɔkàaa, waa làá pɔ̄ɔkì.»

¹⁰Ní Eeliisee kíí-u yii: «Cùú tùkù-u yii u làá pɔ̄ɔkì. Ama tiŋman puee ti-Dindaan lēē ki dàkā-mi yii u bàà làá kpú ní.»

¹¹Kpalaayee Unimbɔti bɔnaatiliu Eeliisee kíĺ ki bíi kpèé Asayeel címmm áli icoo dāa kpáàa cúú-u, ní Eeliisee kíĺ ki bíi sūǹ.

¹²Ní Asayeel bālifì-u yii: «M-kpiliu, ba pu ní a bíi sūǹ ní?» Ní Eeliisee kíí yii: «M sūǹ kun puee m nyí inikpiti in a làá dāá ŋá Isirayeel yabee. A làá dāá tūū bi-timmu mun bi máń agun ki túee ŋŋmi, kí dāá làntī bi-naacimpɔmbiyaamu, ní kí dāá tāā tāā kí mátí bi-biyaamu ní kí dāá pùtī bi-nimpoobi bin sá bipɔdambee.»

¹³Ní Asayeel bí yii: «Mana ní man a-tɔntɔnliu un bí kii kibɔgbaŋfii nee làá dāá ŋmā kí ŋá míǹ?» Ní Eeliisee kíí-u yii: «Ti-Dindaan lēē ki dàkā-mi yii a làá dāá kpántí Siirii bɔtiu[12].»

¹⁴Asayeel yíkì Eeliisee ceeyee ní ki nín gítí u-kpiliu cee. U bàn̄ee ní u-kpiliu bālifì-u yii: «Eeliisee tùkūń-si yii ba?» Ní u kíí yii: «U bí-mi yii a làá ŋmátí.»

¹⁵Ama kutaa wúntèe ní Asayeel yōoǹ ŋŋaabu ki dūu ŋá nnyimin ní ki dūu bīiǹ ubɔti nimbiin waa ti ŋūǹ kí fòotī. Ubɔti kpíìyee ní Asayeel fōō u-yil ki kpántì ubɔti.

¹⁶Akaab jipɔɔn Jooram nín kāl̀ Isirayeel beelin tibɔtiil dibiŋŋmooŋmootiil poonee, ní Joosafaati jipɔɔn Jooram kpántì Juuda beelin ubɔti.

¹⁷U nìn cáá abin mmuŋku nì saalaa nì ali ní ki kpántì ubɔti, ní ki kāl̀ dibeel pu Jeerusaleem abin anii.

¹⁸U nìn pée nóó Isirayeel bɔtiibi tabɔbiliŋ ní, a lì kii Akaab dicaŋkun yab nín nìn bí puee, di sá yii u nìn cáá Akaab bisal ubɔ ní. U nìn ŋá tin kaa nìn kítì ti-Dindaan nimbiinee.

¹⁹Ama ti-Dindaan tɔntɔnliu Daafiidi puee, waa nìn là kí nàan̄ Juuda tiŋki, kun puee u nìn pōoǹ Daafiidi yii u-jipɔmbi làá nīn pée kā dibeel pu Jeerusaleem ní kí nīn cá jaanjaan[13].

²⁰Jooram beel yuntiŋu ní Eedoom yab yíkì kaa kíí bi-ba pu kí nīn gbíntìi bí Juuda yab taapu ní ki kāaǹ bi-ba nì bi-bɔtiu[14].

²¹Jooram nìn yíkì ki nín cá Sayiir tiŋkin ki kpáaǹ u-janjatɔrɔkub kɔkɔ. Kunyeeuee ní u nì u-janjatɔrɔkub kpootiliibi jáń ki pɔ́ɔkiǹ Eedoom yab bin nìn māntìi tú-bee. Ama Juuda janjaliibi nìn sáǹ ki nín kóò bi-tantibin.

²²Kí yòon̄ yaadal wiiŋŋu ní Eedoom yab fōō bi-ba kaa ti bí Juuda yab taapu. Ŋyunti gbanti mbaanti ní Liibiba yab mun kaa kíí bi-ba pu.

²³Jooram tuuŋŋi ŋin kíǹee nì tin kɔkɔ u ŋée ŋmàn̄ ki kā Juuda bɔtiibi tuuŋŋi gbɔŋkun.

²⁴Jooram kpíì ki cūtìi ŋàl̄ u-baabi ní bi síb́-u Daafiidi Tiŋkin. U-jipɔɔn Akasiyasi di fōō u-yil ki kpántì ubɔti.

²⁵Akaab jipɔɔn Jooram nín kāl̀ Isirayeel tibɔtiil abin saalaa nì ali poonee ní Juuda bɔtiu Jooram jipɔɔn Akasiyasi kpántì Juuda beelin ubɔti.

²⁶Akasiyasi nìn cáá abin mmuŋku nì ali ní ki kpántì ubɔti. U nìn kāl̀ Jeerusaleem dibindi diba ní ki jíń dibeel. U-na di nìn sá Isirayeel bɔtiu Oomirii bisal ní bi yíì-u yii Atalii.

²⁷U nìn nóó Akaab dicaŋkun yab tabɔbiliŋ ní ki nìn ŋá tin kaa kítì ti-Dindaan nimbiinee kii Akaab dicaŋkun yabee, di sá yii u nìn sá Akaab dicaŋkun yab coo ní.

²⁸U nì Akaab jipɔɔn Jooram nìn cūtì ki jáń nì Siirii bɔtiu Asayeel Ramooti tiŋki kin bí Galaadi tiŋkpaaŋkinee ni. Ama kujaaunee ní Siirii yab tīī Jooram tiweendi.

²⁹Ní Jooram nín gítí Jisirayeel kí cáaǹ tiweendi tin u fōō Siirii yab cee Raama tiŋkin ŋyunti ŋun u nìn bíi jáà nì Siirii bɔtiu Asayeelee. U bí Jisirayeel niinee ní Juuda bɔti Akasiyasi, Jooram jipɔɔn cūtì kí màntì u-pu.